#بداية_الخلق_قصص_الأنبياء
⭕️⭕️⭕️سلسلة بداية الخلق⭕️⭕️⭕️
🌹🌹🌹الحلقة 19🌹🌹🌹
📌يوسف عليه السلام الجزء 3
كان ياما كان ولا يحلى الكلام الا بذكر النبى عليه الصلاة والسلام
اخباركم ايه ياا اولاد يااا حلويين
طبعا كلكم فاكرين الحلم بتاع يوسف عليه السلام .... وفاكرين ازااى اخواته كللللهم ال 11 سمعوا كلام الشيطان ونفذوا الخطة الشريرة بتاعتهم ورموا اخوهم الصغير فى البير
وطبعا كلنا شوفنا رحمة ربنا ولطفه بيوسف عليه السلام رغم انه اترمى وهو صغير خالص كدة جوا البير
كل حاجة بتحصلنا يااولاد هى خير لينا حتى لو احنا شايفنها شر
لان احنا بنشوف شكلها من برة بسسس لكن مش بنعرف حقيقتها فعلا خير ولا شر الا بعد وقت كتير
فلازم نكون دايما دايما متاكدين ان كل حاجة ربنا بيقدرها علينا هى خير
زى كدة الولاد التين الشوكى.
مين بيحب التين الشوكى
انااا انااا
انا كمان بحب اوى التين الشوكى...
مين عارف شكل التين الشوكى
ااااه شوفتوا التين الشوكى شكله وحش اوى ازاى من برة
كله شووك
اى حد يمسكه بيعوره على طول
ويدخل ف ايده الشوك ويخر دم كمان
لكن لما نشيل القشرة اللى ناشفة واللى كلها شوك دى نلاقى التين الجمييل الل بنفضل ناكل وناكل وناكل فيه لحد لما بطننا توجعنا
هى بردوا الاقدار اللى بتحصلنا عاملة زى التين بالظبط... شكلها ممكن يكون وحش وصعب وكله شووك من برة لكن من جواها وحقيقتها هى الخير لينا
زى بردوا يوسف لما اترمى فى البير... دا خير ياولاد لان كان ممكن فعلا اخواته يسمعوا كلام الشيطان زى ماقالوهم يقتلوه ... لكن ربنا لطف بيه ورحمه
كان ممكن فعلا يسيبوه فى الصحرا ويمشوا وفعلا بجد يجى الذئب وياكله
لكن ربنا رحمه وحماه بانه اترمى فى البير بعيد عن اى حيوانات مفترسة
وكمان حاجة غريبة جدا حصلت ياولاد
ناس كانوا ماشيين ف الصحرا وشافوا البير اللى مرمى فيه يوسف... واحد منه راح علشان يجيب ماية من البير... لكن لاقى اييه
لقى ولد صغير جميل جوا البير... طبعا اخده معاه واستغرب جدا ازاى الولد دا وقع جوا البير
المهم ياولاد الراجل دا اخد يوسف وراح باعه
اه ياولاد باعه كدة زى ما بنبيع العربيات والهدوم والحاجات بتاعتنا
