#بداية_الخلق_قصص_الأنبياء
⭕️⭕️⭕️سلسلة بداية الخلق⭕️⭕️⭕️
🌹🌹🌹 الحلقة 20🌹🌹🌹
📌يوسف عليه السلام الجزء 4
كان ياما كان ولا يحلى الكلام الا بذكر النبى عليه الصلاة والسلام
شوفنا ياولاد المرات اللى فاتت ازاى ربنا فى كل مرة بينجى يوسف من كلللل المواقف الصعبة
وشوفنا ازاى ربنا نجاه من مرات العزيز لما قطعت قميصه من ورا وجوزها عرف انها هى الكذابة وان يوسف صادق
ودلوقتى مرات العزيز متضايقة جدا من الستات اللى بيتكلموا عليها وزعلانين جدا منها انها طلبت الطلب دا من يوسف
فهى قررت هتعمل خطة علشان تعرفهم انه كان عندها حق
وفعلا عزمت كل الستات اللى اتكلموا عليها من صحباتها وقرايبها واهلها .... عزمتهم عندها كلهم كلهم
وطبعا لما جم قدمتلهم حاجات حلوة زى ما بنعمل للضيوف وعصير وكدة
وراحت ادت لكل ست فيهم سكينة علشان تقطع الاكل بتاعها الل هتاكله
ووهم ماسكين السكاكين كدة نادت على يوسف فاول لما شوافوا يوسف استغربوا جدا جدا من جماله وبدأوا يعوروا ايدهم بالسكينة اللى ف ايدهم وهم فاكرين نفسهم بيقطعوا الاكل
وقالوا مش ممكن يكون يوسف انسان عادى زينا دا اكيد ملك كريم
ودا ياولاد زى مانتوا عارفين لان ربنا خلقه جميييل جدا جدا مفيش حد ابدا فى جماله
فمرات العزيز قالت واعترفت انها هى اللى طلبت منه انه يتجوزها وانه رفض
لكن لو مسمعش كلامها هى هتعاقبه و تدخله السجن
يوسف عليه السلام فضل يدعى ربنا انه يبعد عنه شرها وانه يحفظه منهم وانه يحب يدخل السجن احسن من انه يغضب ربنا
وفعلا ياولاد ربنا استجاب لدعائه وحفظه منهم لكن مرات العزيز دخلته السجن
بس احنا متفقين ان قضاء ربنا كله خير... فاكرين التين الشوكى وهنعرف كمان شوية ازاى الخير هيكون فى دخول يوسف السجن
المهم دخل يوسف فعلا السجن وكمان دخل معاه شابين كدة
كل واحد منهم شاف حلم... فاكرين الحلم بتاع ابراهيم عليه السلام انه يذبح يوسف
هم بردوا كل واحد شاف حلم بس مفهموش ... كان نفسهم اوى حد يقولهم معنى الحلم دا ايه
فلما شافوا يوسف وشافوا اد ايه هو اخلاقه جميلة ودايما بيدعى ربنا راحوا على طول سالوه على الحلم بتاعهم
فقال الاولانى وكان بيشتغل انه يجيب العصاير والمشروبات للملك
قال انه حلم انه بيعصر عنب
والتانى كان بيشتغل خباز يعنى بيعمل العيش حلم انه شايل فوق راسه عيش والطيور عمالة تاكل من العيش دا
والشابين كان نفسهم اوى يعرفوا معنى الحلم ايه
رد عليهم يوسف وقالهم انه هيقولهم معنى الحلم ايه لان دا من تعليم ربنا ليه وان ربنا كرمه وعلمه تفسير الاحلام
لكن قبل لما يقولهم اعد يعلمهم ازاى يعبدوا ربنا وانه لازم كل الناس تعبد ربنا وحده وانهم مينفعش ابدا ابدا يبعدوا عن طريق ربنا
وان مين احسن علشان نعبده ربنا اللى خلقنا وخلق كل شئ ولا شوية تماثيل ولا شمس وقمر ولا بشر زينا
وبعدين ابتدى يوسف يفسر الحلم
فقال للاولانى انه هيخرج من السجن وهيرجع تانى يسقى الملك
وقال للخباز انه هيموت لكن مش هيتدفن بعد لما يموت وهيربطوه وهو ميت فى شجرة فالطيور هاتيجى تاكل من راسه لانه ميت
وبعدين يوسف طلب من الشاب الاولانى اللى هيخرج من السجن ويروح للملك انه يقول للملك على يوسف ويفكره انه دخل السجن وهو بريئ ومعملش حاجة
لكن الشاب دا فعلا خرج زى ما يوسف قال لكن نسى يوسف خالص ونسى يقول للملك عليه
لكن هتحصل حاجة غريبة جدا ياولاد
حاجة هتحصل للملك هتخليه يطلب يوسف ويخرجه من السجن
خلونا نقف هنا المرة دى ونكمل مع بعض المرة الجاية ان شاء الله
