#بداية_الخلق_قصص_الأنبياء
⭕️⭕سلسلة بداية الخلق⭕️⭕️
🌹🌹🌹الحلقة 7🌹🌹🌹
🌪🌪🌪 قوم عاد🌪🌪🌪
كان ياما كان ولا يحلى الكلام الا بذكر النبى عليه الصلاة والسلام
شوفنا ياولاد ايه اللى حصل المرات اللى فاتت
🌹🍁🌹🍁🌹
ها مين فاكر معايا .. ان ربنا خلق الارض والسموات فى 6 ايام ... وخلق الملايكة من نور... وخلق الشياطين من نار ... وان الملايكة كلهم حلويين... وان الشياطين كلهم وحشين... وان الشيطان مش عايز اى حاجة غير انه يخلى كل الناس وحشين زيه
وفاكرين طبعا ياولاد الشيطان عمل ايه مع سيدنا ادم وانه مرضيش يسمع كلام ربنا ويسجد ليه ... وكمان ازاى فضل يزن على ادم ويحلف ليه بالكذب انه عايزله الخير ... وانه ادم صدقه وسمع كلامه واكل من الشجرة ونزلوا عاشوا من ساعتها ف الارض
🌹🍁🌹🍁🌹
الناس والشيطان فى حرب مش هتنتهى ابدا ابدا... واننا لازم نبقى اقوياء ومنسمعش كلامه الوحش ابدا لحد اما نقابل ربنا وربنا سبحانه وتعالى يكافئنا برحمته ويدخلنا الجنة الجميييلة اللى فيها كل حاجة نفسنا فيها
وبردوا فاكرين اولاد ادم وشوفنا ازاى قابيل قتل هابيل وربنا بعتله غراب يعلمه ازاى يدفنه
🌹🍁🌹🍁🌹
وفاكرين كمان النبى ادريس والرجالة الصالحين اللى كانوا بيسمعوا كلامه واما مات هو وهم الناس من بعدهم عملتلهم تماثيل وابتدوا سنة بعد سنة يعبدوهم
🌹🍁🌹🍁🌹
لكن ربنا رحيم بالناس وبعتلهم نبى تانى يعلمهم الخير وطريق الجنة ويعلمهم الاسلام
وشوفنا نبى الله نوح ودعوته وصبره على قومه وشوفنا السفينة والحيوانات اللى اخدها معاه وفاكرين ازاى كل الناس غرقت معادا بس الطيبين المسلمين اللى كانوا مع سيدنا نوح ف السفينة
🌹🍁🌹🍁🌹
ودلوقتى يااولاد مفيش على الارض غير سيدنا نوح والمسلمين الحلوين اللى معاه... وسنة ورا سنة سيدنا نوح مات... والمسلمين الطيبين اللى كانوا معاه ماتوا هم كمان ... وبعد كدة بسنين كتير الشيطان فضل يقول للناس انتوا كدة هتنسوا الناس الطيبين الل كانوا مع سيدنا نوح ف السفينة فاحسن حاجة تعملولهم تماثيل علشان تفتكروهم دايما
🌹🍁🌹🍁🌹
وسنة ورا سنة الناس ابتدت تاااانى تعبد التماثيل دى وبعدوا عن طريق ربنا
ودايما ربنا رحيييم بينا وبعت للناس من تانى رسول يعلمهم الاسلام ويعلمهم الحق علشان يرجعوا مسلمين تانى ويدخلوا كلهم الجنة
🌹🍁🌹🍁🌹
المهم كان فى ناس اسمهم عاد... عاد دول كانوا عايشين فى مكان اسمه الاحقاف... المكان دا ياولاد
كان فى الصحرا وعاد دول كانوا ناس قوية جدا وكانت بلدهم جميلة وقوية ربنا مخلقش بلد زيها ابدا ابدا
بس المشكلة انهم كانوا كفرة وكانوا بيعبدوا الاصنام وبيسمعوا كلام الشيطان
🌹🍁🌹🍁🌹
فربنا ارسلهم النبى هود... وهود فضل يدعوهم ويقولهم انهم لازم يسمعوا كلام رينا ولازم يبقى مسلمين طيبين علشان يدخلوا الجنة والا ربنا هيعذبهم
🌹🍁🌹🍁🌹
شوية صغيرين اوى هم اللى يسمعوا الكلام وبداوا يعبدوا ربنا ورجعوا تانى مسلمين طيبين
لكن اكترهم كانوا اشرار جدا ومكنوش بيرضوا يسمعوا كلام ربنا ولا كلام سيدنا هود
🌹🍁🌹🍁🌹
وكانوا دايما يقولوا احنا اقوياء جدا... بس مش عارفين ان ربنا هو اللى جعلهم اقوياء وانه قادر انه يدمرهم
وكانوا كمان ياولا بيقولوا ان اكيد سيدنا هود بقة مجنون وان الاصنام بتاعتهم هى اللى خلته مجنون علشان هو مش بيحبهم
🌹🍁🌹🍁🌹
وقالوا لسيدنا هود احنا مش هنسمع كلامك وهنفضل نعبد الاصنام ويالا هاتلنا عذاب ربنا اللى بتقول عليه
وبعد كدة ياولاد البلد اللى كانوا عايشين فيها جالها جفاف شديد جدا... جفاف ياولاد يعنى كل حاجة نشفت من قلة الماية... ومفيش مطر... فالناس والحيوانان عطشانيين جدا والزرع مات من قلة الماية
🌹🍁🌹🍁🌹
وفى يوم قوم عاد دول شافوا سحاااابة كبييييرة جدا جاية عليهم ففرحوا بيها جدا وافتكروا ان السحاب هيمطر والماية ترجع تانى ويشربوا ويشربوا حيواناتهم ويزرعوا من جديد
لكن ياولاد السحابة دى كانت عذاب ربنا ليهم... سحاب مليان رياح دمرت كل حاجة
🌹🍁🌹🍁🌹
هوا جاامد جدا وسااقع جدا طير الناس والحيوانات والزرع وموتهم كلهم
الرياح دى ياولاد فضلت عندهم 8 ايام بحالهم
ربنا قادر انه يدمرهم كلهم ف ثانية لكن ارادة ربنا انهم هيكونوا وقت طويل ف العذاب علشان يتعذبوا اكتر واكتر
🌹🍁🌹🍁🌹
وفى وسط كل دا الا ان سيدنا هود والمسلمين اللى معاه ربنا حفظهم ونجاهم من العذاب دا
فبكدة لازم ياولاد نتاكد اننا لو بنسمع كلام ربنا فيبقى لازم ربنا هيحمينا دايما ويحفظنا ...
🌹🍁🌹🍁🌹
ونقف لحد هنا ونشوف المرة الجاية ايه اللى هيحصل مع ناس تانين جم بعد عاد
وهيعملوا ايه مع الجمل او الناقة
ويتبع ان شاء الله ......
🌹🍁🌹🍁🌹
🔹🔹🔹🔹🔹🔹🔹🔹
يالا نعلم ولادنا دينهم...
ونعرفهم رسلهم...
ونربطهم بيهم علشان يكونوا قدوتهم
تقبل الله منا ومنكم صالح الأعمال.
