⭕⭕⭕سلسلة بداية الخلق⭕⭕⭕
🌹🌹🌹الحلقة 46🌹🌹🌹
📌سليمان عليه السلام الجزء 2
ونبدأ ونقول كان ياما كان ولا يحلى الكلام الا بذكر الله ثم الصلاة على رسول الله
🌹🥀🌹🥀🌹🥀🌹🥀🌹🥀🌹🥀🌹🥀🌹🥀🌹🥀
شوفنا المرات اللى فاتت مملكة داوود وسليمان عليهما السلام ازاى كانت قوية وازاى كانوا مهتمين جدا بالجهاد فى سبيل الله ومحاربة الكفر فى كل مكان
وعرفنا ان سليمان عليه السلام ربنا رزقه بملك محدش ابدا اخده من قبله او بعده والملك دا هو انه بقى ملك على الانس والجن والطيور والحيوانات
فكان بيفهم كلامهم وكانوا بيفهموا كلامه
سبحان الله !!!
يعنى اصوات الطيور والحيوانات اللى احنا بنسمعها دلوقتى ونقول القطة بتنونو والكلب بيهوهو واحنا مش فاهيم بيقولوا ايه
سليمان عليه السلام كان لما بيسمع اصواتهم كان بيفهم لغتهم وكمان لما كان بيتكلم كانوا بيفهموا
🎀🎀🎀🎀🎀🎀🎀🎀🎀🎀🎀🎀🎀🎀🎀🎀🎀🎀
وفى يوم خرج سليمان بالجيش بتاعه والجيش دا كان كبير جدا وقوى جدا.. عارفين جنود الجيش دا كانوا مين؟!!
الجيش كان عبارة عن 3 مجموعات
مجموعة من الانس ومجموعة من الجن ومجموعة من الطيور.. وكان الجيش منظم جدا فكان لكل مجموعة قائد ينظمها ويرتبها ويعرف كل واحد مكانه.
وكان الانس بيمشوا ووراهم الجن وطاير فوقهم الطيور وماشى معاهم سليمان عليه السلام
🌷🍃🌷🍃🌷🍃🌷🍃🌷🍃🌷🍃🌷🍃🌷🍃🌷🍃
وفى يوم كان فى نملة فى وادى النمل .. ووادى النمل دا ياجماعة مكان مليان بيوت للنمل وزى مانتوا عارفين ان النمل بيبنى بيوت كبيرة جدا ..جزء منها تحت الارض وجزء منها فوق الارض وبيعيش النمل فى مجموعات كبيرة اوى اوى لان مفيش نملة تقدر تعيش لوحدها
النملة دى وهى ماشية شافت جيش سليمان العظيم راحت بسرعة اعدت تنادى على باقى النمل وتحذرهم وتقولهم ياااا نمللل .. بسرعة ادخلوا بيوتكم وانزلوا تحت الارض لحسن سليمان هيعدى من فوق الوادى هو وجنوده وهيموتونا برجلهم من غير ما يعرفوا لانهم مش هيشفونا ولا هيحسوا بينا لان النمل حجمه صغير اوى ..فالنملة متاكدة ان سليمان عليه السلام مش جاى يدمر وادى النمل انما هو معدى بس ومن غير قصد منه ممكن يدوس هو وجيشه على النمل
🌷🍃🌷🍃🌷🍃🌷🍃🌷🍃🌷🍃🌷🍃🌷🍃🌷🍃
ميين سمع النملة دى ياولاد ؟!!
سليمان عليه السلام هو الوحيد اللى سمع النملة لان زى مانتوا عارفين ربنا فهمه لغة كل الحيوانات والطيور وابتسم وهو مبسوط من كلام النملة دى
فرح سليمان بذكاء النملة وحرصها على باقى النمل واد ايه كانت مهتمة انها تنقذهم كلهم ومفكرتش ف نفسها بس
وكمان فرح بفضل ربنا عليه انه رزقه نعمه عظيمة .. نعمة محدش ابدا اخدها وهى سماع وفهم الحيوانات الطيور والحشرات
وعلى طول سليمان عليه السلام دعا ربنا وطلب من ربنا انه يعلمه ازاى يشكره وانه يسهله شكره وانه بيحمد ربنا على كل النعم العظيمة اللى انعم الله بها عليه وعلى ابوه وعلى امه بانه جعلهم مؤمنين ورزقهم بنعم كتيرة تانية زى الفهم والعلم والحكم وفهم الحيوانات وتسخير الرياح وعين النحاس وحكمه فى الجن والانس والطير والحيونات
ودعا ربنا كمان انه يوفقه للعمل الصالح اللى يحبه ربنا ويرضاه وان ربنا يجعله مع الصالحين
🌹🌹🌹🌹🌹🌹🌹🌹🌹🌹🌹🌹🌹🌹🌹🌹🌹🌹
واحنا كمان ياولاد عايزين نتعلم من سليمان عليه السلام اننا لازم نحمد الله فى كل وقت واول لما يحصلنا حاجة تفرحنا على طول نفتكر فضل ربنا علينا وان الحاجة دى من رزق ربنا لينا فنحمده نشكره ونحبه
ونقف هنا المرة دى ونشوف المرة الجاية سليمان عليه السلام هيعمل ايه مع الهدهد وهيقولوا ايه
