⭕️⭕️⭕️سلسلة بداية الخلق⭕️⭕️⭕️
🌹🌹🌹الحلقة 40🌹🌹🌹
📌موسى الجزء 12"موسى والخضر"
كان ياما كان ولا يحلى الكلام الا بذكر الله ثم الصلاة على رسول الله
🎀🎀🎀🎀🎀🎀🎀🎀🎀🎀🎀🎀🎀🎀🎀🎀🎀🎀
خلصنا ياولاد قصة موسى عليه السلام وقلنا هنحكى شوية مواقف حصلت لموسى عليه السلام بس مش عارفين وقتها امته بالظبط
فى مرة كان موسى عليه السلام واقف وسط بنى اسرائيل وعمال يكلمهم عن ربنا وعن الدنيا وازاى يقدروا يدخلوا الجنة واعد يقول ويقول لحد ما كل الناس اتاثرت اوى بالكلام
💐💐💐💐💐💐💐💐💐💐💐💐💐💐💐💐💐💐
فواحد من بنى اسرائيل اللى واقفين لما عجبه كلام موسى جدا سال موسى عليه السلام هو فى حد فى الارض عنده علم اكتر منك ؟؟!! هو ساله السؤال دا من كتر ما موسى اتكلم عن ربنا واتكلم عن حاجات محدش يعرفها غيره هو لان ربنا هو اللى علم موسى
لكن موسى عليه السلام رد على الراجل وقاله ان مفيش حد اعلم منه ومحدش يعرف اكتر منه
🌹🥀🌹🥀🌹🥀🌹🥀🌹🥀🌹🥀🌹🥀🌹🥀🌹🥀
وطبعا الاجابة دى مش صح لان محدش يعرف العلم اللى عند الناس كلها اد ايه
ومفيش حد هو اعلم واحد فى الدنيا دى كلها
لان كل واحد بيعرف حاجة كويس اوى وحاجات تانية ميعرفهاش فكانت الاجابة المظبوطة انه يقول الله اعلم
لان ربنا هو العليم بكل شى وهو الذى علم موسى وعلم الناس جميعا
المهم ياولاد ربنا اوحى لموسى ان مش هو اعلم واحد فى الارض وان فى واحد تانى اسمه الخضر اعلم من موسى
وامره ربنا انه يروح يدور عليه ويتعلم منه وكمان ياولاد ربنا اداله علامة علشان يعرف مكان الخضر دا فين
🌲🍒🌲🍒🌲🍒🌲🍒🌲🍒🌲🍒🌲🍒🌲🍒🌲🍒
قاله ياخد معاه سمكة ميتة ويركب مركب فى البحر واول لما يوصل للمكان اللى فيه الخضر السمكة دى ربنا هيحيها تانى وهتنط فى الماية
سبحان الله ياولاد معجزات ربنا لا تنتهى
وفعلا موسى اخد معاه سمكة واخد معاه واحد من تلاميذه يساعده وقاله اول لما السمكة ربنا يحيها قولى علشان هو دا المكان اللى عايزنه
🌹🥀🌹🥀🌹🥀🌹🥀🌹🥀🌹🥀🌹🥀🌹🥀🌹🥀
وفضلوا ماشين فى البحر لحد لما موسى عليه السلام تعب ونام ووهو نايم السمكة ربنا احياها ونطت فى الماية ولما صحى موسى عليه السلام نسى تلميذه يقوله
وفضلوا ماشين ماشين وحس موسى بالتعب وان الرحلة طولت اوى وقال لتلميذه يجيب الغدا لانهم تعبوا جدا
ففتكر على طول تلميذه السمكة وقال لموسى ان ربنا احياها ونطت فى الناية بس هو نسى يقوله
🌟🌟🌟🌟🌟🌟🌟🌟🌟🌟🌟🌟🌟🌟🌟🌟🌟🌟
فقاله موسى يرجعوا تانى يدوروا على مكان السمكة وفعلا ياولاد نزلوا فى البلد اللى نزلت في بحرها السمكة ومشيوا شوية بيدوروا على الخضر
وبعدين لاقوا الخضر نايم كدة ومتغطى كله فموسى عليه السلام قاله انه عايز يعد معاه شوية يتعلم منه
🌹🌹🌹🌹🌹🌹🌹🌹🌹🌹🌹🌹🌹🌹🌹🌹🌹🌹
فالخضر رد عليه وقاله انه مش هيستحمل ابدا يكون معاه لانه هيعمل حاجات كتير موسى مش هيفهمها
لكن موسى قاله انه ان شاء الله هيصبر وهيستحمل فالخضر وافق بشرط واحد بس
الشرط دا ياولاد ان موسى ميسالش على اى حاجة ابدا مهما كانت
🌲🍒🌲🍒🌲🍒🌲🍒🌲🍒🌲🍒🌲🍒🌲🍒🌲🍒
وافق موسى على الشرط ومشيوا مع بعض ونقف هنا المرة دى ونشوف المرة الجاية موسى عليه السلام هيتعلم ايه من الخضر
بس قبل ما امشى عايزة اقولكم حاجة مهمة جدا ... شوفتوا ازاى ياولاد موسى عليه السلام وتلميذه سافروا سفر طويل علشان يتعلموا
🌷🍃🌷🍃🌷🍃🌷🍃🌷🍃🌷🍃🌷🍃🌷🍃🌷🍃
شوفتوا ازاى العلم مهم جدا جدا ... يبقى احنا كمان لازم نتعلم كويس اوى. نروح المدرسة بنشاط وحيوية ... نذاكر دروسنا ونعمل واجبتنا علشان ربنا يباركلنا ويعلمنا الل احنا منعرفوش
ويالا استنونا الحلقة الجاية
يتبع ...
