الفصل الرابع و العشرون
- انتى ازاى عملتى كده !
- مين ... ادهم طيب قول مساء الخير الاول
- ايه خلاص نسيتى صوتى يا دكتوره
- ابداً بس لِسَّه صاحيه و مصدعه شويه و بعدين مَش متعوده على الصوت العالى ده فمن فضلك يا تتكلم بصوت اهدى من كدهً شويه و الا ممكن نأجل الكلام مع بعض شويه لحد ما تهدى
- اهدى اهدى ازاى يا سما و الولد بيكلمنى النهارده وهو فرحان و بيشكرنى انى وافقت على السفر هو احنا مَش اتكلمنا فى الموضوع ده و اتفقنا اننا نأجل الموضوع ده شويه و ان ظروفى دلوقت متسمحش و انك انتى اللىً هتبلغيه الكلام ده بالراحه
- حصل فعلا يا دكتور و انا مَش بانكر ده
- طيب و ايه اللى حصل ممكن افهم لتتنهد فى ضيق و تجيب
- مقدرتش اعمل كده و أخيب امله و بمنتهى البساطه انتى مكنتش معايا وهو بيبص ليا ومستنى و يقولى انه راضى مشفتش الأمل و الحزن فى عنيه و هو بيتكلم اذا كان يهون عليك ابنك يا دكتور انا ميهونش عليا
- سما انا مَش وحش و لا انسان ظالم و انتى عارفه انا بحب حمزه اد ايه بس ظروفى
- اى ظروف ممكن تتغير عشان اللى بنحبهم يا دكتور احنا اللى بايدنا نتحكم فى الظروف دى و نغيرها بايدنا مَش هى
- لِسَّه زى ما انتى يا سما وعمرك ما هاتتغيرى ابدا بتتعاملى بمنطق القلب و العواطف
- يمكن بس على الاقل لِسَّه عندى قلب يحب و يحس
- غلط يا سما القلب من غير عقل يحكمه بيغلط
- متخفش عليا يا دكتور انا باتحكم فى قلبى و عقلى كويس اوى
- طيب و دا هيفيد حمزه بايه انتىً مَش بس عقدتى الموضوع اكثر لا و اديتى له امل عمره ما هايتحقق لانه عمره ما هايسافر حنيتك و قلبك الطيب صعبت الامور يعنى وقتها هاتعملى ايه يا سما لما يسألك
- طيب و ليه ؟
- ليه ايه مَش فاهم ؟
- ليه مَش هايتحقق ايه اللى يمنع ؟
- سما احنا مَش اتكلمنا قبل كده و شرحت لك ظروفى و
دى ظروفك انت يا دكتور و انت ادرى بيها انًما انا لا ليصمت و لا يجيب لتكمل هى
انا مَش باقول حاجه او باخد قرار الا لما افكر فيه كويس و كويس اوى كمان و اكون قادره انى أنفذه
- يعنى ايه ؟
- يعنى دا ابنى و انا امه و اللى ربيته و تعبت معاه و مَش هاتخلى عنه و لا هاسيبه يضيع او يواجه المصير ده و اقول الظروف
- سما انتى فاهمه انتى بتتكلمى فى ايه مَش بس مصاريف لا اجراءات ووقت و مجهود طيبه القلب و المبادىء بتاعتك مَش هاتنفع فى الوضع ده انتى مثاليه زياده عن اللزوم
- لا يا دكتور انا ام و بحب و عشان ابنى هاضحى باى حاجه فاهمانى يا دكتور
- طيب و المطلوب
- انا مطلبتش منك اى حاجه و لا الزمتك باى حاجه بالعكس كل اللى مطلوب منك انك توافق على السفر بصفتك والده و انا هاتصرف فى الباقى كله
- ازاى يعنى يعنى انتى هاتتحملى كل حاجه و انا ماليش اى لزوم لتجيبه فى عصبيه
- انت عايز ايه يا ادهم بالضبط عايز تسافر انت مع ابنك اتفضل انا معنديش اى مانع و لا حمزه بالعكس هانفرح اوى و لو مَش هاتقدر خلاص سيب الموضوع كله ليا و انا هاتصرف انا اولى بأبنى و هاسافر انا معاه هو المهم دلوقت مين عمل ايه و لا مصلحه حمزه
- ايوه بس
- مفيش بس و اذا انت رفضت براحتك بس اتصل انت بابنك و بلغه ليه انت بتحرمه من حقه فى الحياه عشان بس كرامتك و مين يعمل ايه
- خلاص يا سما انا اسف يمكن انتى عندك حق بس ممكن تسيبى ليا فرصه بسيطه افكر فى الموضوع و اشوف هاعمل ايه
- طبعا ده حقك بس يا ريت يكون بسرعه
- سما
- نعم يا دكتور
- من فضلك يا ريت اعرف منك انتى اى قرار يختص بالأولاد بعد كده و نتناقش فيه الاول مَش تاخدى القرار لوحدك و بعدين تبلغينى بيه
لتصمت ثم تقول
- يمكن فى دى عندك حق بس انا مفكرتش وقتها او خططت حاجه بالعكس يمكن حسابات القلب بتختلف عن العقل يا ادهم
- طيب يا سما هانتكلم بعدين
- ان شاء الله
