حب و إجرام (باللهجة التونسية )

الحلقة 32

الحلقة 32 :
غمضت عينيا ... ضربت فراسي فكرة .... نطرت حليت الباب بكل قوتي ... منجمش ناثق فيهم ... جاو زوز فرمليات يجريو ...
الفرملية؛ مدموزال برا ممنوع تدخل ...
دوب ماحطت يدها عليا ... دزيتها ... تلفتت الطبيب ... دوب ما شافني ... فهم روحو ... أصلا رجالي من غزرة يفهموني ...
الطبيب؛ خلوها تبقى ... هيا نكملوا
باقية نتبع فيهم ... دوب ما خرجوا الرصاصة تنهدت ...نزلت راسي ناخو نفس ... اما طلعت فيسع كي سمعت جهاز نبضات القلب حبس .... نطرت نجري ليهم ...غزرلي الطبيب متاع مفماش أمل .... جبدتو من الطابلية
أيلول؛ فيييييسسسسسسسع نحبوا عاااااايش توا توا
الطبيب؛ اماااا هو ما
أيلول؛ تحب نبعثك قبلوا ...
هز جهاز الصدمات يرجف... باقي يضرب فيه على سدرو ... مع كل مرة يتهز و يتحط قلبي يحبس ...مستحيل يموت ...لاااا
الطبيب؛ ل لازمم نمدولوا البرا هاذي ف ف في جهة القلب
خطفت البرا من يدو ... هزيت يدي و رشقتها ... رجع الخط فالجهاز ... دموعي نزلوا معاه .... جبدت روحي بالشوي ... كملوا خيطولوا الجرح ... دوب ما كملوا ... تنفست قد قد ....قدم ليا الطبيب خايف ...
الطبيب؛ تعطا مرحلة الخطر .. تو يتنحا مفعول الانستيزي ... نشوفو اذا يفيق ولا هزيت راسي ڨحرتلوا
أيلول؛ ماش تشوفوا لازم يفيق ... ميفيقش باش نسفر بارواحكم الكل ،..
هزلي براسوا
أيلول؛ تنجم تروح باش نبقا هوني منحب حتى واحد يدخل ... و بلا ما نوصي مالازمش تدخل الپوليس فالحكاية
الطبيب؛ أمرك ... تو تبقى فرملية كان صرات تطورات ... و نجي نفاقدوا انا
أيلول؛ تو نبقى انا برا توا ....
مشاو خارجين تلفتت للفرملية اللي مخرجة الشاريو متاع الأدوات ... وقفتها
أيلول؛ حبببس
تلفتت غزرتلي مبهمة .... قدمت لين جيت قدام الشاريو ... عديت عينيا عليه ... شفت الصفيحة اللي فاها الرصاصة ...هزيت فاصما ... هزيت لقاط باش نهز بيه الرصاصة ...حطيتها في نص الفاصما .. و كبست يدي علاها ... طلعت راسي لقيتها تغزرلي .... ڨحرتلها ....
أيلول؛ تنجم تروح توا
دوب ما خرجوا قدمت قعدت عالحرف متاع سرير ... عديت عينيا عليه ...لحظات كان باش يموت ... و بسبة رصاصة كانت ليا ... حليت يدي غزرت للرصاصة .... رصاصة          الدمدم            .... كون صوب عن قرب اكثر كان يجيبها فنص قلبوا .... الفكرة كهو خلاتني نرڨل من العصب ....كبست عليها .... غمضت عينيا ....
أيلول؛ و رحمة بابا و ماما ... باش نخليك تبكي الدم الا منتسماش دارك ...
هزيت يدو ... نحاول نعطيه قوة باش يفيق ... باش ننجم نرتاح ... هزيت يدي الثانية خبيت الرصاصة فالجيب ... و حكمت يدو بيديا الزوز ... تفكيري الكل كيف باش نوصل للعراب ... توا باش نتلز نوافق على شرطو متاع ال killer   ( القااتل) .... غمضت عينيا ... كل مرة نتعامل معاه بشرط يعجزني ..، و لتوا مفهمتش علاش يعمل هاذ المقايضات ... ماو ينجم يطلب الفلوس و يكون كيف أي مخبر .... اما هو لا ... واصل لكل شي و حد ما يعرف عليه شي ... اما أهم شي انو يوصلني للعراب ... مهما كان الثمن اللي باش ندفعوا ... جامي واحد غلط فيا و قعد عايش كيفو ... ا تو نوريه اللعب بالقدا ... جبدت يدي من يدو ... باقية حاكمتوا كان بيد .... جبدت تيليفوني من الفاست ... طلعت نومروه .،، بعثتلوا ميساج " موافقة على الشرط غدوة نجي و نحكيو "
طفيت التيليفون ... عينيا باش يتغمضوا ... اما ملازمش نرقد ... باز تصرالوا مضاعفات ... خممت انو ننزل نجيب قهوة ... اما منجم ناثق في حتى حد ... حطيت يدو... و قمت للبلار بلاكشي ... يضربني شوي هوا نصحصح .. الوقت تعدا رزين ... الخوف بدا يزيد ... كون ميفيقش ... هاذ الفكرة تخوفني برشا ... حد ما عندو الحق ياخو حياتو .... مستحيل .... غزرت للساعة ...الخمسة متاع الصباح.... المطر تصب ... جو بارد برشا .... هاذ الشتا باش يكون مطبوع بالدم ... متوقعتش جملة انو رجعتي لنيويورك ... باش تكون رجعتي لهاذ العالم ... رغم قوتي ... رغن انو شي ما يهدني ملي دخلت ... اما اليوم تهديت ... اليوم خفت ... اليوم بكيت ... فهاذ العالم ّ.. الكل يلعب عالاوراق الكل ... و أكيد اللعب المسخ ... وين الكل يستغل الفرص باش يوصلل للي يحب عليه ....  النهار بدا يطلع ... جو يعبر على حالتي من الداخل .... قص على تفكيري صوتو من التالي ...
أمير؛ أ.... يلووو.... ل
تلفتت غزرتلوا .... كأني موش مصدقة اللي فاق ... ثواني كهو و فطنت على روحي ....رحت نجري ليه ... حكمتوا من يدو ... نغزرلوا
أيلول؛ صافااا !!! كيف تحس فروحك توا ؟ يوجع فيك شي ؟؟
أمير؛ شوي وجيعة كهو ...
أيلول؛ اتو نعيط للطبيب باهي ...
جيت باش نقوم حكمني من يدي ... غزرتلوا ...
أمير؛ اقعد
طاوعتوا و قعدت ... جا باش يقوووم ..دزيتوا. لبلاصتوا ....
أيلول؛ فااااش تعمل هبلت ملازمش تتحرك قبل ما يفوتوا 12 ساعة عالاقل... صاوبوك برصاصة الدمدم تعرف شمعنى هذا
أمير؛ الرصاص المحرم دوليا
أيلول؛ يعني اللي صوب كان حاب يقتلني انا كهو فها الليلة ..، خاطر هاذ الرصاص ميخرجش من الكور وقت التصويبة .... اما جات فيك
أمير؛ عادي لمهم انو مقاسوكش
أيلول؛ علاش أمير ؟
🔜🔜🔜🔜🔜🔜🔜🔜🔜🔜🔜🔜🔜🔜🔜🔜🔜🔜🔜🔜
#يسرى_أمجوج👑
#حب_و_إجرام🔫