حب و إجرام (باللهجة التونسية )

الحلقة 34

الحلقة 34 :
نحيت يدو ... غزرتلوا كي باقي يڨحرلي ...ڨحرة متاع موت ... قمت من بلاصتي ... نحب نخرج ... غزرتوا تخنقني ... و فكرة اني باز نكون نحب أمير...تخوفني أكثر .. خاطر انا توا .... وحدة باش تعرس ... و في قوانين دارك ... مفماش مجال للحب ...  يعني باش نخلي ... علاقتنا مبدأها الكره ... تي حتى الكره اللي بيناتنا... يخلي علاقتنا عندها شكل مختلف ... أمير اكا العبد ... اللي يخليني ... نكرهوا و نحبوا في نفس الوقت ...نحب سيطرتوا ... و حبو للتملك ... و انوا يفرض رايو ... يمكن خاطرني عشت 24 سنة من حياتي نعمل شنحب ... حد ما نجم يفرض سيطرتوا عليا ...و نكرهوا من فازاتو ... من تحديه ليا ...من اكا الكذب اللي عملوا باش ينتقم ..، من تخليه عليا فاكا الليلة ... هاذ الشعور المتناقض باش يهبلني ...
حليت الباب ... و خرجت تكيت عالحيط ... غمضت عينيا بالقوي ..  نفسي موش منتظم ...  حسيت بيديه كي جبدوني للبيت .. دزني للتالي خبط ظهري فالحيط .. قفل الباب بكل قوتوا ... و تلفتت ڨحرلي ّ.. غزرت للجرح متاعو أحسن شي متفكش ... قدم ليا جا وجهي مع وجهوا ... لف يديه في زوز على وسطي ... و نزل راسو ... حط على جبهتي ... نفسوا هايج ...
أيلول؛ أمير
أمير؛ اششششش
أيلول؛ أمير يزي وسطي وجعني
أمير؛ شكونو
أيلول؛ شيهمك أمير المهم توا اللي صار صار ... و أصلا هذا باش يصير توا ولا مبعد و
حكمني من دقنونتي ... طلعلي راسي ... غزرتلوا ...
أمير؛ منيش باش نسلم فيك أيلول ... و مزال متخلقش اللي يديك مني ... نمحيه أيلول تعرف شمعنى نمحيه ... و برا جربني و نوريك شنعمل  ... ميهمش شكون والله يا أيلول ... و تعملها تشوف ..
باقية نغزرلوا اكهو ... جامي تلزيت كيف توا ..هزيت يديا لفيتهم عليه ... منعرش علاش نعمل هكا ،.. ولا شنية غايتي ... اما توا نعرف اللي هاذي آخر لحظاتي مع أمير المالكي ..طلعت بيهم من رقبتوا لشعروا ... نزل يدو من وجهي ّ.. باقية نعدي في يديا عليه ... لين وصلت للحيتوا ... باقية نعدي في يديا عليها ... قداش تعجبني ...طلع يديه رجعلي شعري للتالي ... نزلت يدي الثانية ... حطيتها عالفاصما ... و اليد الثانية نعدي فاها على وجهوا ...
أيلول؛  يوجع فيك الجرح
أمير؛ لا
أيلول؛ أمير
رد عليا بصوت مبحاح ... دوب خرجوا ... مفماش مسافة كبيرة بيناتنا ... ننجم نقول شبر ...
أمير؛ امممم
أيلول؛ شي
نزل عليا كثر ... شفافوا تحطوا على شفافي ... باسني بوسة خفيفة ... و جبد روحو شوي ... يحكي بصوت كلوا رغبة ...
أمير؛ أملاكي  جامي تكون لغيري .. و انتي بالنسبة ليا وقف تنفيذ ...
جيت شنحكي ... قص عليا صوت الميساج كي وصل .. جمدت فبلاصتي ... غزرلي فعينيا ... غزرتلوا ... منعرش علاش خايفة نحل الميساج هذا بالذات ...
جيت نجبد روحي ... كبس عليا أكثر ...
أمير؛ وين ؟
أيلول؛ باش نشوف بشكون نعرس
أمير؛ من غير ما تشوف
أيلول؛ شنوة؟
أمير؛ من غير ما تشوف ... باش تعرسي بيا و غدوة زادة
أيلول؛ أمير ابعد ...يزي من التخلويض...
دزيتو شوي و جبدت التيليفون ...دخلت للميساج متاع الكيلر... دوب ما ريت الاسم نغزر و نعاود ... موش مصدقة جملة ... طلعت راسي بتردد نغزرلوا .... تبسم و غمزني
أيلول؛ ا ... ان ..... انتا !!!!!!!!!!
🔜🔜🔜🔜🔜🔜🔜🔜🔜🔜🔜🔜🔜🔜🔜🔜🔜🔜🔜🔜🔜
#يسرى_أمجوج👑
#حب_و_إجرام🔫