حب و إجرام (باللهجة التونسية )

الحلقة 19

الحلقة 19 :
أيلول تحكي :
تعدا وقت ... منجمتش نرقد ...حتى التيليفيزيون سامط ... رميت يدي ... هزيت التيليفون نشوف قداش فالساعة ...كانت 00:23 ...جيت شنحطوا ... اما عاودت غزرتلوا وقت ريت لادات ... قلبي خض عليا ... عينيا تحلوا ... بقيت دقيقة نتنفس بالقاوي ... نحاول ناخو نفس ... كبست بيدي على طرف السرير... نحس بالخنقة ... قد ما رمشت باش يحبسوا دموعي شي .... نزلوا يحرقوا فيا ... هاذي الحالة بالذات نكرهها فيا ... هزيت التيليفون رميتوا ... قمت من فراشي ... مسحت الدموع ... هزيت الفرد ... رميت الفاست على كتافي و خرجت ...باقية نمشي على روس صوابعي ... النسمة الباردة اللي ضربت وجهي ...خلات دموعي ينزلوا أكثر ... بلعت الغصة ... غزرت للعساسين ... مزية راقدين ... كلش يتعدا بين عينيا ... كلش يتعاود ... كل عام نتوجع ...كثر كأنوا كلشي يتجسد من جديد ...نزلت راسي ....رصيت على سنيا ...رمشت بزربة ... جيت نحل الباب سمعت صوتوا من التالي
أمير؛ گأنوا مبكرة ..
رمشت بالقاوب ... هزيت يدي مسحت دموعي ... و تلفتتلوا .. باين كان باش يرقد ... خاطروا بالشورت كهو ...
أمير يحكي _:
كنت باش نرقد ... أصلا تاعب من هم الخدمة اللي ميخلاصش جملة ... دوب ما غمضت عينيا ... سمعت حس خبطة جاية من بيتها .... قمت نشوف دوب ما دخلت ما فماش ...غزرت للارض تيليفونها مكسر كامل ...حتى من الفرد ما فماش ... يعني خرجت ... و توا !!!! ... نزلت نجري ... حليت الباب ريتها كي ماشية ... جات باش تحل ... حكيت تلفتت غزرتلي ... تفجعت عينيها منفخين... حمر جمر من الداخل ... حتى خدودها منفخين ... الظاهر كانت تبكي ...
أيلول؛ أمير باش نمشي ... مرسي على كلش و
قدمت ليها جا وجهي مع وجهها ... حطيت يديا على مرفقها و بعدتها عالباب ... تكيت عليه .. غمضت عينيها و نزلت راسها
أيلول؛ أمير عيشك بعد .. منجمش نتحكم في روحي كثر... باش نتصرف تصرفات موش مليحة ... ابعد
أمير؛ من غير ما تشقى .. ماكش باش تخرج توا ايلول ...
طلعت راسها غزرتلي بغش
أيلول؛ أميييير ... متختبرنيش توا ابعد
أمير؛ شصارلك
هزت السلاح ركحتوا في وجهي ... غزرتلها كي ترجف ... دموعها محبوسين في عينيها... قدمت ليها جا السلاج جيهة قلبي ... باقية كابسة عليه ... هزيت يدي نزلتوا .. و جبدتها.. عنقتها .. طرشقت بالبكا ... رخفت يدها ..لين طاح الفرد ... تعدا شوي وقت ... باقي نعدي في يدي على شعرها ...

#يسرى_أمجوج👑
#حب_و_إجرام🔫