عشق في بلاد حروبها لا تنتهي ( الفتنه و الثأر)

البارت 8

_
_
#عشق_في_بلاد_حروبها_لا_تنتهي
الحلقة 8
(الياقوت)
في الحلقة السابقة
مشت خديجه وسيبت غالية تكمل في المظبخ وطلعت لي وسط الحوش لتنهدت وهيا تحط في يداها في خصرها:الله يرحمك ياماما كنتي ماتخليش فيا نمس في شي
نزلو دموعها لمسحتهم وربطت التسمال علي راسها وتحزمت وهيا تبدا تنفض في وسط الحوش وتكنس فيه وتحاول تشغل روحها من الحزن لي هيا فيه.
.
قراءة ممتعة 💛
#البارت_الثامن
.
طق باب الحوش علي غالية اللي حطت من يدها المكنسه ونقصت التلفزيون لمفتوح علي سورة البقرة علي قوته ، ومشت فتحت الباب لبتسمت من قلبها وهيا تقول:عميمة رقيه
بتسمتلها رقيه:سامحيني جيتك في لقوايل
زادت فتحت غالية الباب ووسعت وهيا تلف ودخل في رقيه لي وسط الحوش وهيا تقول:ترحبي في اي وقت تأنسينا
رقيه:جايبه معايا شوية حويجات تلقيهن قدام الباب
غالية:علاش متعبه روحك جيتك ساده
رقيه:هالحاجه لكبير
فكت غالية التسمال من علي راسها وهيا تلبس في ملاية الصلاة وطلعت وهيا تشوف في شكاير لين شهقت وهيا اطبس تشوف فيهم وتفتح في الشكاير لكان فيهم سبيزه عصائر ومشروب وحاجات فطور وطماطم وزيت ومكرونه يعني تمويل
دخلتهم للمظبخ بسرعه وحطت الشاهي علي النار وطلعت لرقيه وهيا تحط في لمنادير في مكانهم:سامحيني الدنيا مقلوبه كنت نظم
رقيه:انتي لسامحيني جيتك توا قلت غر نعدي بدري وروح قبل المغرب الدنيا ياكبدي تخوف ولبلاد ماعاش فيها أمان
غالية قعمزت جنبها:اي ربي يهدي لبلاد ، خيرها عائشه ماجتش
رقيه:حصلة برده ياناري ماقدرة توعي خليتها راقده
وسكتت رقيه وهيا تقول في خاطرها ياربي سامحني علي الكدبه.
غالية:ان شاءالله بشفي عليها غر نشوف البراد
رقيه:مانبي شي ره غير تعالي قمعزي حداي وهدرزي عليا
ضحكت غالية:حاضر نجيب علي الاقل باش نكسدو علي التهدريز
__
درس معاذ السيارة قدام الحوش وهوا يتلفت لفارس:بالله نموت ونعرف دماغك شن فيه تي انت تبي تجيب لي روحك الشبها شن تحسابه كان شبحوك معاه او عرفو عنده خو بيسيبوك في حالك كان دار مصيبه تانيه
فارس:بأذن الله مايصير شي وبعدين اني منسافر غير نشوفه نبي نفهم منه لصار
معاذ:اي وتو هوا بيقولك مه
فارس نفخ:خيرك ياخالي تسكر فيها في ام خليقتي اكتر ماهيا متقربعه
معاذ:علي خاطر خوك هدا ماينفعش فيه لدير فيه علي خاطره تي انساه وعيش حياتك وخاف علي مرتك وولدك وفوته هدا مش ح يجيبلك كان المشاكل
فتح فارس باب السياره وقال:ان شاءالله خير ، بتخش؟؟
معاذ:لالا خالتك تبيني نجيبها
فارس:بتجي عندي
معاذ:اي قالت بتتعشي هني ولا شن
فارس:تمام
نزل فارس وهوا يطلع في تليفونه ويرد:الو
نادين:ايوه فارس وينك
فارس بعد التليفون وشبح الرقم ورد حطه علي ودنه:رقم من
نفخت نادين:رقمي ، رقم من يعني امي وبعدين عازتي ولا قهرتي عندي شفرة
بتسم فارس:تو نطلعلك شفرة غدوة ، المهم شن تبي متصله بيا
نادين:مصح حتي وجهك ووجه اللي يسأل عليك
فارس:قسم بالله كان ماتدوي باهي لما نخشلك بسبته
نادين:وااااك دراه ، نبي تجيب مشروب و نسكافي خالتك ناجيه بتجي تتعشي عندنا
فارس:باه تو نجيب...
وقبل مايكمل باقي دوته سكرت في وجهه الخط ، قعد واقف في نص الشارع يفكر يمشي يجيب ولا يخش يهزب قبل ههههه.
ستهداء بالله ومشي للمحل خدي مشروب ونسكافي وشوية حاجات تانيه.
حط فارس الحاجات علي الكاسه ، خش سراج للمحل وقال قبل ماينتبه علي فارس:عطيني دخان
ولما شاف فارس لتلفت وهوا يطلع في تليفونه لشرين قال:سقدني هيا ماخاطريش نشبح العاهات
سكر فارس الخط علي سفيان وتلفت للكاسه وهوا يشبح لراجل لقال:هي شوي بس غر نسقد الزبون
سراج حذف لفلوس علي الكاسه:حتي معبره عطيني الدخان عطيني
سبقه فارس وخدي بضعته ومد لراجل فلوسه وطلع وخلا سراج يشبحله بنظرات كلها حقد وغل.
__
#ايلاف
ياربي كارها روحي كارها قلبي حاسه روحي حقيره هلبا لاني نفكر فيه لاني ندعي لا توا انه يطلع لصار حلم ، وصلت بيا حقارتي انه نقول ياريت انه مش هوا لقتل حمزة يعني مش عارفه شن نوصف روحي غير اني حقيره.
خشت عليا روان وهيا تتكلم:اسمعي امي بتبات في حوش جدي نوضي نديرو عشي
تنهدت واني نحول البطنيه من علي وجهي:مش قادره والله ماله من روحي
رفعت روان حاجبها:عارفاتك اني تتهربي من النوضه معاي فانص فااانص
وطلعت وهيا تقربع في الباب عليا.
نضت قعمزت واني نكتم في ضحكتي هوا الحق ماخاطريش ندير لا عشي لا عشيان ، اووووف قلبي يوجع فيا.
حسيت بالتليفون يهز تحت مخدتي حشيت يدي وطلعته واول ماشفت من شديت نفسي وقلبي بدي يذق بسرعه ، هوا ، هوا يتصل ياربي شن يبي فيا علاش يتصل شن دكره فيا ، تمت المكالمه تنهدت براحه وكانه هم ونزاح بس ماهما تواني وعاود يتصل خديت نفس كبير وقررت انه رد نشوفه شن يبي ومرات نعرف علاش قتل خوي حبيبي وعلاش قتل روحه من حياتي ، وفتحت الخط
جاني صوته اللي كارهاته اللي حسسني بالإشمأزاز اول ماسمعته:ايلاف باللهي عليك ماتسكريش اسمعيني وافهميني باللهي عليك .
__
اتصل محمد برقيه لرفعت تليفونها وردت:هي هي طالعه
وسكرت وهيا تشبح لغالية لضايقت:مزال بكري اقعدي والله تتعشي معاي شوي تانيه وجايات الجارات
رقيه:حي كان هضا هههه لالا يابنتي وين بنقعد بروح بنوتي دبشي بكرا معديه لبنغازي كان سخر ربي
غالية:واااه ماعاش بتجيني
ضحكت رقيه ووجعها قلبها علي غالية:من غير سوء
غالية:والله خشيتي خاطري
رقيه طبطبت علي يد غالية:وحتي انتي خشيتي خاطري نا وليدي يسكن هنا هوا ومرته كل مانجي هنا ان شاءالله نقوله يشيلني لكي ونجي نطل عليك ان شاءالله
بتسمت غالية:ان شاءالله
وصلت غالية رقيه لقدام الباب اللي اول مافتحاته لقت صفاء وخواتها جاينها ، سلمو لبنات علي رقيه.
صفاء:هاتي نساعدك ياخالتي
غالية:لالا اني تو نوصلها
رقيه:لا خشن خشن جوا نقدر نعدي بروحي
صفاء:لا والله ماصايره
بتسمت غالية وسلمت علي رقيه بالحضن والسلام الحاااار وكأنها خالتها اخت امها حق وهيا توصي فيها تجيها لما تجي لطرابلس عند ولدها اللي قعده ماتعرفش من هوا ؟
خشو لبنات وخلو الباب مفتوح لصفاء لوصلت رقيه لسيارة محمد لنزل اول ماشافها طلعت من الجنان وشبح لصفاء:شكراً خيتي
بتسمت صفاء:ولو واجبي ، مع السلامه
وقعدت تشبح في محمد كيف رفع امه في حضنه وساعدها تركب لسيارة وهيا تقول في خاطرها"مزال فيه الخير تاريته متحمل امه برغم إعاقتها وحاطها فوق راسه والله راجل""
وردت الباب وخشت للبنات الداخل لكانو يساعدو في غالية يردو في لمنادير ويفرشو في قطع لبساطات لسيبتهم غاليه ملمومات بعد مانشفت ولهت في جيت رقيه.
__
شبح محمد لرقيه وقال:من هدي اختهم ؟
رقيه:لالا جارتهن هيا راس بنيه عندهم مسيكينه والله عيت وهيا تبوس وتعاود وتمسك فيا للعشا طيبه والله تخش الخاطر بسيف عليك
محمد هز راسه:كويس كان الجيران يضلو عليها
رقيه:مشاءالله مش مسيبنها بكل علي المرتين نلقا فيهم مصبين معاها يعاونو الحق مره لفاتت لقيت مراة واليوم البنت السمحه هدي ومعاها خياتها شكلهن مشاءالله عليها مسمحها البنت
محمد بتسم ورفع حواجبه:شني رايك تخطبيهالي
شهقت رقيه:شن وفو لبنته بيش ناخد لكي طرابلسيه
ضحك محمد:وكنهم نعنجد سمحين بكل
رقيه رفعت يداها:وربي الشاهد لحقيتهن كلهن سمحين لكن الحق الحق مايجن في ظفر غالية شي ، هك سماحه ورزانه تبرك الله عليها زين زين ربي ساكبه فيها هداكا الشعر لا نهاية الظهر معبي رايح يبي عام بيش ينسلت ومن لبيوضيه تمسها يطلع الدم
هز محمد راسه بضحكه قويه وهوا يحرك في يده بمعني زيدي:ماشاءالله ماشاءالله كان مدحتيها انتي خلاص اخطبنهالي امانا وخلاص ههههه
سكتت رقيه وشبحتله:والله خشت في وسط قلبي لكن اي والله مانقبلها كنتي وخوها قاتل ظناي لو كان تقعد اخر بنت
تحمحم محمد وبطل ضحك علي طول وستوعب انه لتحكي عليها اخت مجدي واحمد ، اخت قاتل خوه .
مسح علي شعره وادكر اليوم لهجمت عليه وهيا تبكي حسها صغيره ، صغيرة بكل جاه فضول قوي منعه انه يسكت وقال:هيا كم موليدها يعني تبان صغيره
رقيه:قعده عويله ياكبدي عليها عمرها 17 ولا اصغر بسنه
جي في باله يوم لهد عليهم وخدي احمد شن قالتله ، تمتم بصوت وااااااطي:عويله لكن وحده جلاطه
تلفتتله رقيه:كنك ماسمعتك
محمد وقف السياره:لا لا شي
ونزل ساعدها تنزل من السياره وخششها للحوش وبوس راسها وطلع وهوا يعطي فيهم في علم انه مش راجع اليوم.
__
سفيان:ايلاف باللهي عليك ماتسكريش اسمعيني وافهميني باللهي عليك
كمدت ايلاف بكاها وهيا تحاول تكون قويه:شن تبي مني متصل شن تبي بعد ماقتلت خوي كبدي شن تبي فيا
حط سفيان يده علي جبهته:ايلاف اسمعيني
ايلاف عيطت بكتمان باش ماتسمعهاش روان:شن بنسمع منك تي حرقتلي كبدي شن بنسمع تاني
سفيان:بس ظلم هكي ظلم حكمتو عليا كلكم من غير ماتسمعوني
ايلاف:تي شن بنسمعو بعد ماشفنا انت عارف روحك شن تقول انت قتلت روح ، قتلت خوي وشفتك بعيني شاد السلاح وخوي بين يديك ميت
وحطت يدها علي فمها وهيا تبكي بصوت عالي ومعاش قدرت تتحكم في روحها:انت مجرم تستاهل الموت قتلت خوي وقعد عايش ولا كانك درت حاجه
زمط سفيان ريقه وعيونه تعبو دموع:اني مقتلت حد ورب العزه ماقتلته ورب الكعبه ماقتلته ياايلاف واللهي ماقتلته
وقفت ايلاف بكي فجأة وهيا تشبح في الباب انفتح وخشت روان لسمعتها قالت:انت انت كيف قادر تكدب كيف وين ضميرك
سفيان:يانااااس ياعالم افهموني اني مقتلتاش وربي ياإيلاف ماقتلته ولا مسيته كنت نبي نساعده بس لقيت روحي المتهم الوحيد لقيت روحي غاطس ومافيش من يساعدني واللهي ماقتلته
عيطت ايلاف:كيف ماقتلتاش شفتك بعيوني اني شفتك شاد السلاح
سفيان:اي صح سلاحي بس.....
ونقطع الخط ، ضيقت ايلاف عيونها وشبحت لتليفون وقعدت تعيط:الوووو الوووووو لا لا لا
وقعدت ترعش وهيا تشبح لتليفون وتشبح لروان لمسكره الباب ومتكيه عليه وتشبحلها.
ايلاف حطت يداها علي فمها:انكر انكر واني لشفته بعيوني نكر ويبيني نصدقه ، ياريت نكرانه يردلي خوي واااه ياحمزة واااااه ياقلبي
وتكت بداها علي السرير وهيا تنزل في راسها وتبكي ، وروان قعدت تشبحلها وتبكي وهيا ساكته.
__
الخونه للخوانه زي النار الوالعه ، تهب و تولع في اللي يجي قدامها ، يعني كل ماينخان يزيد طغيان 💔
.
خش محمد للمقر وهوا لابس البدله العسكريه ، وقف قدام الباب وطلع تليفونه وكتب رساله(ساعه ونطلع وليكم المكان)
وخش وهوا يقول بصوت عالي:شباب
وقفو الشباب وهما يرفعو في يديهم تحيه
محمد شبح لزياد:الصقر جوا
زياد:نعم يافندي
بتسم محمد وخش لصقر لمقعمز وحاط رجل علي رجل وشاد تليفونه.
محمد:اووووبه تريتك جوك سمح بكل
شبحله الصقر وضحك:والله سمح بكل ياراس اليوم بنرتاح من غمه كانت علي قلبي الله لا تروعك
.
.
.
#يتبع_للبارت_لبعده
____________________________________
بداء كتابة الرواية في 2019 / أبـــ4ٰـــريل / 7
تم وضع قَفلة لـ الرواية في 2019 / سبتــ9ٰـــمبر / 25