عشق في بلاد حروبها لا تنتهي ( الفتنه و الثأر)

البارت 15

_
_
#عشق_في_بلاد_حروبها_لا_تنتهي
   الحلقة 15
(الياقوت)
في الحلقة السابقة
وتنهدت وهيا تتلفت تشبح لروشن المظبخ وعينها في الكنشيلو الجنان المردود:سبحان الله يايسكر الباب يانكنشيلو بس يسكرهم الزوز مع بعضهم ده شي مستحيل علي احمد خوي
ونفخت وهيا قعده تشبح واول ماشافت الباب انفتح وجت عينها في عين محمد طاح بيها الكرسي التالي بعيطه منها ....
.
قراءة ممتعة 💛
#البارت_الخامس_عشر
.
سمعها احمد اللي وقف وكان جايها بس سمع تخبيط علي الكنشيلو ، صيح وهوا يطلع:هيا هي
وطلع وأول ماشبح محمد واقف قدام الكنشيلو ويتكلم مع زوز شباب لابسين نفس لباسه غير هما لونه اسود ، ضاق صدره وهوا يسمع في صوت غالية اللي جت تجري:احمد ماتطلعش بااللهي عليك
سكر احمد عليها الباب لرجعت فتحاته وهيا تكبه عليهم.
مشي احمد جيهت محمد لسمعه يقول:نا نجيبه في سيارتي قضيته شوري وكان علي الافندي علي تو نكلمه
الشاب:كان علينا عادي بس الاوامر اوامر والامر مشي علي الكل وقضيته قويه ومش بساهل نتساهلو
تلفت محمد لأحمد لجي وقف جنبهم:نعم تفضلو
شبحله الشاب:انت احمد عبدالسلام ###
هز احمد راسه وعرف انه الليله مش ح يرقد في الحوش
الشاب:انت عليك قضيتين تجارة المخدراة والهروب من السجن
قص محمد عليهم:هوا ماهربش نا لطلعته
شبح احمد لمحمد بصدمه وقال مع الشاب:كيف
محمد حط يديه في جيوبه وبكل برود عاود:نا لطلعته يعني عنده قضيه وحده وحتي هيا مشكوك فيها
الشاب:والسيد علي عنده علم يعني كان يعرف هربت سجين اعتبر روحك في الحبس معاه
ميل محمد راسه وشبح لشاب وهوا يضيق في عيونه؛انت جديد
الشاب:وشن خصك
محمد رفع يده مسح علي لحيته وهوا يبعد تلاته خطوات التالي وفجأة وبخفة طلع سلاحة من حزامه وضرب تحت رجلين الشرطي اللي قريب صب مسارينه وقعد ينقز زي المهبول واحمد وخر طول والخوف ركبه من ساسه لراسه وهوا يسمع في صوت محمد لعيط:هيا انت وياه كل واحد يركب سيارته والمسجون نا نجيبه
كيف الشاب بيتكلم بس محمد قص عليه وقال بعصبيه:كلمه اخري لا نعرف سيد علي لا عليوه رصاصه بين عيونك
سكت الشاب وتلفت ركب سيارته بفم ساكت وخلا محمد يرجع في سلاحه في حزام سرواله وهوا يشبح لأحمد:اركب
لاد محمد وركب وقعد يشبح لأحمد لقرب كلمه من الروشن:عادي نظمن اختي علي الاقل
هز محمد براسه بمعني تمام وقعد يستني في احمد لخش لغالية لتستني فيه قدام الباب مقعمزه من الرعشه ودموعها بين عيونها وهيا تخبط تحساب الرصاص لسمعاته جي فيه ، جاها يجري:خيرك
اول ماشبحاته غاليه وقفت تغمراته:واااه نحسابه قتلوك
بعد احمد وباس راسها بسرعه:قريب شكله ياغاليه قريب
شهقت غالية:شن قصدك
احمد:اني توا لازم نمشي اتصلي بخديجه ولا صفاء يجو يباتو معاك
شدت غالية في يده وهيا تبكي:لا بالله اهرب بس ماتمشيش مع المجرم هدا اني مانبيكش جنبي اهرب عادي المهم ماتموتش باللهي عليك احمد لا ماتمشيش معاه
رجع احمد حضنها وهوا يحاول يهديها:ادعيلي
وفك روحه منها ومشي لحقاته وطلعت تشبح فيه يركب مع محمد لشبحها كيف تبكي من كل قلبها وبكل حرقه.
طلع بالسيارة وهوا يفكر شن لمصيبه لحط فيها احمد.
صح يبي ينتقم وكان ح يقتله بس بعد مشاف اخته ماعندهاش غيره في الدنيا مرضهاش يحرمها من سندها الوحيد ويظلمها.
قص علي تفكير محمد صوت احمد لقال:علاش طلعتني كان بتردني
ماردش عليه محمد ف كمل:خود ثارك مني وريحني تعبت اني ماعاش فيا حيل نتحمل اكتر من هكي
محمد:قولي مكان خوك ونا بعدها ننساك ونسكرلك كل مواضيعك
نفخ احمد وهوا يتكه براسه علي تكاية الراس متع الكرسي:اوووف مليون مره نقولك مانعرفش مكانه واللهي مانعرف
وتلفت لمحمد:وللاسف حتي كان نعرف مش ح نقولك
تلفتله محمد وقال:انت مش خايف علي اختك
رفع احمد روحه وشبح لمحمد زين:اختي طلعها برا الموضوع قعده صغيره ياسر لشفاته سيبها في حالها خود ثارك مني اني مادخلهاش في السريب هدا
ضحك محمد بهزوه:نا مش شوري اختك
وشبح لأحمد لقعد يشبحله:نا مش جبان نستقوي علي عويله نا ثاري مع خوك لا انت ولا اختك بنمسكن
وشبح قدامه:وبنسبه للقضيه يومين ونحلها ونطلعك بس خوك مستحيل يسلم من يدي
__
ضيقت روان عيونها:خيرك فرحانه
شبحت ايلاف لروان:عادي
روان:حتي كان طلع من الاول مقايل لقالك عليه ماتنسيش عملته تخلي الواحد يحلف بمينات الله باش يبرئ روحه
ايلاف تنهدت وحطت تليفونها لوطه:بس سمعتيه لما يحلف صح هدا الحلف مش متع واحد كداب وسمعتي رؤوف شن قال رؤوف اللي توجع اكتر مني علي حمزة حس بيه قال حسيته وكأنه صادق للحظه لما يشبح لعيوني وبكل تبات يحلف انه ماقتلاش ياروان رؤوف لمايعرفش سفيان وكل عمره عاطي عليه فكره غلط حس انه صادق ، مابالك اني لعشرته سناتين طوال عراض كيف تبيني مانشكش انه كلامه حق وانه صادق
كيف روان جايه بترد بس خشت امهم عليهم:شن كلمتي البنت
تحمحمت ايلاف وهزت راسها وهيا تشبح لأمها:اي قتلي قلت لأمي وبوي وقالولكم تفضلو
نجيه:امالا عطيني رقم امها غر نكلمها نحددو يوم نمشولهم فيه
ايلاف:ممكن عندي تو نعطيهولك
نجيه:كان هدا عطيني غدوه نكلمها حتي من تليفونك
ايلاف:كان لقيته الرقم كان هدا كلميها حتي برقم صفاء
__
درس محمد سيارته وهوا ينزل ، لف لأحمد لنزل وهوا محبط تماما ، وقف محمد جنب احمد ليشبح لساحة المقر اللي مش نفس المقر اللي كان فيه الصقر ، تلفت لمحمد لقاله وهوا يطلع في تليفونه لشرين من جيبه:عدي قدامي
شبح من وقعد شاده في يده من غير مايرد واول ماخشو للمبني قريب جت لمحمد جلطه وهوا يشبح لسالم واقف مع الشباب.
صيح محمد ووجهه انقلب:ساااالم
تلفت سالم لأول ماشاف محمد جاه يجري وقبل مايتكلم شده من يده وتلفت لشباب لجو حاوطو احمد:نادو زياد
رد واحد من الشباب:مهناش زياد يافندي
رد عليه محمد وهوا مسكر علي سنونه بعصبيه:اخلقوه ليا من تحت الارض خمس دقايق نبي نحقه قدامي
وتلفت طلع وهوا يجبد في سالم اللي شد يده ويقول:تي كنك يارااا
طلع محمد برا وهوا يوقف ويفنص فيه:شني جابك هنا انت تي كيف تجي وماتتصلش بيا
سالم:شن فيها قلت نجي نرجاك هنا
محمد كان يتكلم ومتعصب:ماتقدرش ترجاني في الحوش ولا لازم كلهنم يفظنو عندي اخ
وضربه بخفه علي راسه:انت ماعندكش دماغ نا ستين الف واحد يدور في طيحتي كان شافوك هنا يمسكوك ورقه خاسرة عليا
سالم:ماحد يمسك عليك ورقه ونا معاك اصلا جاي نا عشان نقولك نبي نخدم معاك
ضرب محمد يده في الحط وقال:تخدم امك مش تخدم معايا تي الخدمه لمقومه لمنخدمك فيها معايا انت فاظن لروحك ولا واخد حاجه من نجدك تتكلم ، تبي تجلط امك تي من بدري تتصل بيا تريتها تتصل عليك
وقبل مايتكلم سالم شبح محمد زياد جاي رد شبح لسالم وقال:سكر فمك توا
زياد جاي يجري وداهش:يافندي
محمد وقف زين وحاول يهدي من عصبيته:جبت السجين خود دوريه وشيلوه لجديده وخلو محكمته الايتنين مع المجموعه الاولي
زياد:لكن يافندي هدي فرصه خليه هني مرات يعترف وين مكان مجدي
تلفت سالم لزياد طول وقبل مايتكلم صيح محمد بعصبيه:زي ماقتلك دير
انخلع زياد لضرب التحيه ومشي يهرول وخلا سالم يشبح لمحمد:خو الكلب جوا قصدك مسكته وتبي تفلته من بين يديك
محمد:ثاري مع خوه مش معاه هوا
عيط سالم بعصبيه:كيف مع خوه وهوا متستر عليه
وضرب رجله في الارض بالقوه وقال:نا نعرف كيف نطلع منه لكلام
وكيف بيتلفت شده محمد من يده:سالم اخر مره نقولك انت مادخلكش في لوجيج هضا ، ركز علي قرايتك وحياتك بس
سالم فك يده:ونا مانبيش نقرا ونبي نخش فيه لوجيج هضا وقسم بالله لما نقتله هله كلهن ونطفي ناري علي خويه
عيط محمد عليه:سالم ماترقيهاليش
ودفه وقال:سايرتك واجد نا قدامي لسيارة
__
تاني يوم....
كانت نادين مقعمزه في جنان هيا وفاطمه وفرح ونهي لتشبح لتليفونها وتهدرز مع صاحبتها فايبر..
نهي:نار في قلبي نار يا سلوي
سلوي:خلاص يانهي انسيه توا هوا متزوج وعنده ولد وفوقها مرته حامل
نهي:مش قادره نبيه قعده نحبه ومش متحمله نشوفه معاها
سلوي:نهي انتي لتخليتي عليه من الاول تحملي قرارك
نهي:ونادمه وحقربي نادمه وراضيه بتانيه عادي
سلوي:يانهارك لحرف شن راضيه بتانيه واصلا هوا مش شايفك باش ياخدك
نهي:لا شايفني وعارفه كويس قعد يحبني واكتر من الاول ماشفتيشي كيف لما يشوفني مايقدرش يشبح لعيوني بكل خايف يضعف قدامي ولا كيف يقرب منها لما نكون موجوده باش يغيظني
سلوي:اني والله ماعارفه شن نقولك بس نصيحه ماتخربيش حوش لانه لخرب حوش هد راحت باله
نفخت نهي بالقوه لين فاطمه شبحتلها:خيرك
ستاقضت نهي علي روحها:لا شي بس تعطلو
فرح:ياحنه امي وخالتي ناجيه حشيشتهم لعزيوات خوديها توا لا المغرب
نادين:عينك من امبكري ماشيين شوي تانيه ويخشو
خش فارس وهوا شاد زيد من يده ويذبذب فيه ، بتسمت نادين ووقفت مشتله:وين كنتو
شبح فارس للبنات وقال:السلام عليكم
ردو لبنات عليه السلام وردو لهو في تليفوناتهم الا نهي لقعدت اتبع فيهم بعيونها بصمت
فارس:قالي يبي شكلاطه رفعته للمحل ماعجبه شي طلع
ضحكت نادين:قصدك ماخداش
رفع فارس الشكاره ومدهالها:ولا حاجه بس شوي تانيه وبولي علي لخديتولك
نادين فتحت الشكاره وهيا تشبح لشكاليط:وااه لا ولدي لا نعرفه هدو ليا بس
رفع فارس يده وقرصلها خدها:عارفك فجعانه يادوده
نحتله نادين يده وهيا اضيق في عيونها وتقرب تقيم في زيد في حضنها:وعادي اهو راضي بيا
قرب فارس وخدي منها زيد:تي خيرك انتي غبيه
ستغربت نادين:خيرني
فارس حط زيد لوطه:انتي حامل ماعاش تقيميه مش باهي ليك
رفعت نادين حاجبها وهيا تبتسم وكيف بتقرب من فارس كشخ عليها:خليك غادي خواتك هني
نادين رفعت حاجبها وتلفتت لخواتها لقتهم لاهين في تليفوناتهم الا نهي اللي اول ماشافتها تلفتتلها دارت روحها تشبح لجيها التانيه ، وقالت وهيا ترجع تشبحله:ولا حبيبت القلب مرات تغار
تنهد فارس وقرب باسها علي خدها تحت نظرات نهي وبعد:ها وتغار ان شاءالله تطربق تمام
هزت نادين راسها مع بتسامه:تمام هكي رتحت هههه
فارس:هههه مهبولا
__
شبح سالم للحوش وهوا يتلفت لشاب لجنبه:متأكد هضا حوشه
الشاب:اي متأكد اني نعرف كل معلوماته لانه قعدت نتبع فيه امر من الافندي محمد اكتر من شهر
سالم شبح لشاب:تمام نا بننزل هنا عدي انت
الشاب توثر:لالا خلينا نولو للمقر الافندي كان عرف قتلك علي اي شي ح يجيب اخرتي
فتح سالم الباب ونزل وهوا يقول:لالا مش ح يفظن لشي عدي خلاص
ونزل والشاب مشي...
__
خبط محمد علي الطاوله:الملف يجيني بكرا هنا غيرها عندي تصرف اخر معاكم
الشاب:تمام يافندي نحاولو
قعمز محمد علي كرسيه:ماتحاولش جيبه والا نا نجيب روحك
هز الشاب راسه و طلع من هني خش زياد من هني داهش:يافندي سفيان نصاب
وقف محمد طول:كيف
زياد:عركه امس بين الشباب وجاته طايشه
لف محمد وطلع وهوا ينادي:سااااالم
وتلفت لزياد:وين جاته
زياد:قالو سطحيه في كتفه
مسح محمد وجهه بيديه الزوز وتلفت وصيح علي الامن:تي دورو علي امه الرااا
رد عليه راجل الامن:طلع يافندي هوا و حسام
رفع محمد يده وهوا مش عارف شن بقول ، بس سكت وهوا يقبض في يده ويتلفت لزياد:طلعلي لسمه حسام هضااا
زياد طلع تليفونه:تو نتصل بيه نعرفه الولد
فك محمد منه التليفون وحطه علي ودنه واول ماجاه صوت حسام:الو
محمد:توا تردو للمقر انت والحيوان لمعك
حسام حول التليفون من ودنه وشبح الرقم زين ورده وقال بخوف:ه..هوا يافندي
محمد عيط:تكلم
حسام:سالم هوا لقالي ارفعني لحوش مجدي وهددني كان مانرفعاش يلزني من الخدمه
محمد ستك وقعد يزربز في مكانه:يانعنفيتك ياكلب الله نشبح ام وجك هنا ماك طالع غير بتبوت
وحدف التليفون لجي بين عشر وطلع يجري.
لحقه زياد بس وقفه محمد لركب في السياره:خليك هنا
وطار بالسيارة اللي لو عندها جناح ره طارت
__
هيام حطت سلت لحوايج وقعدت تعيط:لا حولي ولا قوة الا بالله اني جايبه دكوره ولا جايبه بنات تي زودو انشرو شلاتيتكم اني مش قادره نتحرك ولا نمس حاجه تعالو عاونوني
جت صفاء وهيا قايمه حاجبها قامت السله:لا حولي ولا قوة الا بالله
هيام ضيقت عيونها:انتي امتي بتبطلي تستكردي فيا شن حاجه بيدي هيا ولا تبيني نمشي نطيحه
صفاء:اي بيدك امالا بيدي اني
فنصت فيها هيام:تحشمي يابنت
صفاء ستاقضت علي روحها:اسفه بس قصدي مش قادره نستوعب جايين يخطبو فيا وامي حامل ماتخشش لراس والله
هيام:تخش تخش وبعدين هدي حاجه من ربي وان شاءالله المره هدي يطلع وليد ونفرح وبيك بيه
صفاء:بابا فرحان بينا قريب يطير والله غير انتي متحسسه وتبي الولد باش تريحي روحك من السان حناي
هيام دفتها:ياسر من اللقاف الزايد وبري انشري وارفعي لغدي لغالية وبرو هدرزو عليها تراهو متنكده امس والله مارقدت وهيا تبكي قطعتلي كبيدتي ياناري
تنهدت صفاء ودمعتها نزلت وهيا تمسح فيها وتدكر في احمد اللي مايندرو عليه وين.
__
مسحت غالية دموعها وهيا حاسه نفسها مقطوع وتاخد فيه بسيف، طلعت لجنان وهيا تحاول تتنفس وخدت معاها تليفونها ليتصل:الو
خديجه:شن حالك توا باهي راسك
غالية:اي خديت حبه وتوا باهي
خديجه:وشن ماعاش دختي
غاليه تنهدت وهيا تتمشي في الجنان وتمشي ورا الحوش:الحمدالله ماتبيش تجي
خديجه:صفاء اونا قتلي بتجيك اني نمشي العياده واول ماروح نجي عندك
غالية اتكت علي حاشية السور وهيا تشم في صنة بنزينه بس ماعدلش ولادت:باهي باي
سكرت غاليه وهيا تشبح للأرض لمزرزقه طبست وهيا تشم في البنزينه شبحت حولينها وخافت وقالت:ياربي احميني
ولادت وهيا كيف بتخش شافت خيال واحد رعشت غاليه وخشت سكرت علي روحه الباب طول برعب وقعدت متكيه عليه تتعود من الشيطان خشت لدارها وهيا ترد علي صفاء:الو
صفاء:شن مدايره
صفاء:شي امتي بتجو
صفاء:شوي تانيه غير بنطلع مع بوي واخدين لحلا سروال جي عليها واسع بنغيروه ويحطني عندك طول
غاليه:باه
وسكرت وهيا تتنهد وتلوحت علي سريرها وغمظت عيونها وهيا تفكر لين خداها النوم...
__
درس محمد السيارة بعيد وهوا يشبح في الجيران الملتمين علي حوش احمد اللي راكبه فيه النار ويجيبو في الميه ويشرتعو علي النار بالك تنطفي
نزل محمد من السياره اللي خلاها مفتوحه وخش بين الجيران ، وجت قدامه صفاء لتبكي وتعيط:غاالية الداخل حد يخش يطلعها ، غاااالية
دف محمد الشباب ليشرتعو في الميه وخش وهوا يسمع فيهم يقولوله:تي مهبول انت اطلع
معدلش علي حد وخش وهوا يدف في باب الحوش برجله لطاح علي طول خش وهوا غام خشمه بدراعه ويصيح:غاااالية...
وكل مايقدم يجيه الصهد اكتر من النار لواكله كل شي لبسطات والمناذير والطاولات غم علي محمد نفسه طلع وهوا ياخد نفس والناس تصيح عليه باش يطلع بس رجع غم خشمه بدراعه وخش للحوش وهوا يخش لديار لقعد يدف فيهم برجله وتالت دار كانت مردوده اول مادفها برجله شبحها راقده علي السرير ودور الداير علاها النار والعه.
قرب منها طول وهوا يقلب فيها علي ظهرها ويضرب فيها علي خدودها:غالية هي
قامها في حضنه وطلع بيها برا يجري قعمز في الجنان وحطها في غمره وهوا يصيح:اميه
طلعو الشباب والرجاله لبطلو تبزيع لميه علي الحوش اللي خلاص كلاته النار وخشو صفاء وخديجه وهيام ولبنات يجرو ومدت سارة لميه لمحمد لخداها وهوا يبزع علي يده ويغسل لغاليه في وجها وهوا يبعد في شعرها من علي وجها لطلع من ملاية الصلاة
خبطت خديجه علي خدودها وهيا تبكي:ارفعوها للمستشفي البنت مافيهاش نفس
حطها محمد علي الارض وهوا يضغظ علي صدرها ونزل يسمع في دقات قلبها الضعيفه رفع وجهه لوجها وهوا يزمط في ريقه وشد خشمها بيد وبيده التانيه شد دقنها وقرب بشفايفه من شفايفها وهوا ينفخ في فمها...
.
.
.
#يتبع_للبارت_لبعده
____________________________________
بداء كتاب الرواية في 2019 / أبـــ4ٰـــريل / 7
تم وضع قَفلة لـ الرواية في 2019 / سبتــ9ٰـــمبر / 25