عشق في بلاد حروبها لا تنتهي ( الفتنه و الثأر)

البارت 5

_
_
#عشق_في_بلاد_حروبها_لا_تنتهي
الحلقه 5
(الياقوت)
في الحلقه السابقه
وقفت روان وزادت ضيقت عيونها لإيلاف لترقصلها في حواجبها بستفزاز مع بتسامه بارده هههه.
طلعت من الدار وهيا اتمتم ومتغايضه وأول ماوصلت في الباب المردود وقبل ماتفتحه سمعت كلام جمدها في مكانها:الكلب هدا نخطفوله ولده ولا مرته...
.
قراءة ممتعه 💛
#البارت_الخامس
.
سراج:الكلب هدا نخطفوله ولده ولا مرته انم كيف يلود قدام عيونا ومانقدروش نديروله شي كيف خوه دار العمله وقعد يلود علي حل شعره لا حكومه لانمي ح ياخدنا حق خونا
مسح خالد علي وجهه وهوا متكي علي السور وكيف بيتكلم طلعت روان وهيا حاطه يداها علي خدودها:نهارك لحرف انت وياه الله كان يسمع بيكم بوي ولا رؤوف لما يعدموكم
قرب منها سراج وقال:سكري فمك انتي وهما مش ح يسمعو
فنصت روان فيه وقالت بعصبيه وهيا تحاول ماتعليش صوتها:كيف مانقولش تبي اضيع روحك وضيع خوك معاك
رفع سراج صبعه في وجها:هدي دوة اتريس انتي ماخصكش فيها ويجيب ربي ياروان تقولي لبوي ولا لرؤوف
وطلع وهوا يقربع في باب اجنان عليها تلفتت روان لخالد:مطاوعه انت علي لدير فيه ، خالد ره سفيان هوا لقتل شن دخله فارس ياناري حتي ربي ماقالش بيه هدا شن دخل ولده ومرته حرام عليكم
تنهد خالد:اني لا مطاوعه لا سوء غر مابيتش اناقشه وهوا متكنظي يهداء ونتكلم معاه
__
حضنت غالية رقيه وباست علي راسها:تعالو مره تانيه
بتسمت رقيه:ان شاءالله يابنتي
قربت غاليه بتسلم علي عائشه بس عائشه بعدت ومدت يدها من بعيد من غير حتي نيه ، سلمت عليها غاليه وحست بيها تغيرت استغربت فيها اول ماجت تضحك وتهدرز بس في نص الهدرزه تغير وجها وماعاش شاركت ماعهم في التهدريز وهيا تشبح لغاليه بنظرات مش مريحه
سكرت خديجه الباب وهيا تلحق في غاليه لخشت لصاله ورفعت الصفره للمظبخ .
اتكت خديجه علي رخامت المظبخ:بارك الله فيهم حتي كان جيتهم بعد اسبوع بس باين عليهم جاين بقلب ورب
حطت غاليه الطواسي في الوندينو وفتحت الشيشمه:اي بارك الله فيهم من قبل نحب الشراقه زادو حبابوني فيهم
ضحكت خديجه:تي اسكتي نحسابهم مصاريت اني
غاليه:ههه واللهي حتي اني مانفرقش بين لهجاتهم نحسها متقاربه
خديجه:اي مالا غر نمشي ندير دوره علي الحوش ونجي نزلت طول عندك
غالية:صحيتي تعبتك معاي
خديجه:لا تعب لا سوء نمشي نجيب خبزة الطاجين مبكري درتها قالت صفاء بنجي بعدين
غاليه:بتباتو وله
خديجه:اني اكيد لكن صفاء قالت ماتقدرش تجيب خواتها
غاليه:تي تجيبهم نفرشو لمنادير في وسط الحوش ونرقدو مع بعضنها
خديجه:هههه راي حتي هوا تو نقولها هي مالا اني ماشيه
__
وينك ياظليمه علي الظالم ، القلب جفا علي ظناه ، وانتي ماخديتي حقه من لخداه 💔💦
.
كان الهدوء والصمت هوا سيد الموقف في السياره برغم الدوشه اللي في داخل عائشه ورقيه من اول ماركبو السياره بس ماحد تكلم فيهم ، وبعد صمت طويل قالت رقيه:حسبي الله ونعم الوكيل فيه قتل وليدي ودمر عيلته ، ياناري لبنيه تقطع القلب
نطت عائشه بسرعه:يستاهلو ربي ماينسى حد
وشبحت لمحمد لسوق بهدوء:كان نندري لعزا ليهم ماقصيتها عتبه
رقيه: لا ياعيشه الشتيمه مش باهيه لبنيه مادنبها شي قعدت بريحتها لا سند يسندها ولا ام تحن عليها تكسر الخاطر
سكتت عائشه وهيا تمسح في دموعها وتشبح جيهت الروشن بغيظ وكره للعيله هادي
__
#عائشه
اسمي عيشه او عائشه من موليد87بس كلهن يقلولي عيشه الا حبيبي اللي عدا يخدلي في حقي خداه ومعاش ردلي حسبي الله ونعم الوكيل فيهم كلهم لقتلوه واللي قتلوني معاه ، قبل تمانيه سنين فاتن تزوجت ولد عمي سليم كنا من الصغر نبو بعض وحبنا كبر معانا ، والحمدالله تزوجنا وعدينا لتركيا قعدنا شهر ولما روحنا نزلنا في طرابلس لانه سليم عنده صحاب واجد فيها وقال بينزل يشوفهم برغم كانت الدنيا خايطه في وقتها بس اصر وسكر راسه ينزل وكأنه قلبي كان حاسسني كنت نقوله امتي بروحو لبنغازي كان كل يوم يقولي بكرا ويعدي فيها لين سكرو المطارات ومعاش فيه رحلات رقتلي منه يومها واجد وتعاركنا تحت القصف والضرب وطلع من الحوش راقيتله مني كنت في وقتها نبي نروح لبنغازي وبس تعاركت معاه من غير مانفظن للوضع لصاير ، عدا وخلاني بروحي نبكي وياريت ماعدا قعدت نرجا فيه وصوت الرصاص والقصف فوقي ونا نرعش مع بعضي خايفه رنيت عليه رد علي طول وحسيته ندم انه طلع واخيف عليا قالي انه مع صحابه في حوش واحد منهم يخف الضرب يروح ، وقعد يوصي فيا مانفتح الباب لحد ونسكر الحوش عليا زين
قعدت في الحوش بروحي نرعش وندعي لربي يسلمنا ويحمينا ويحميلي سليم وين ماكان بس زاد الضرب ونا ماتحركتش من قدام التلفزيون نحق في لخبار كيف الدمار والضرب والقنوات كلهن يجيبن في العاجل ويحذرو في الناس لانه لهناك عنده تار بيخده توا واللي بيسرق هضا الوقت المناسب ، ونا في عز وجيج افكاري نسمع في باب الحوش يخبط بالقوه قلبي انتهض ورعشت مع بعضي ، طفيت التلفزيون وقعدت في مكاني نرعش وباب الحوش من الخبط نحس فيه بيتكسر ، ومن الرعشه الدعي والأيات القرأنيه كلهن ضاعن من داكرتي مش شاده غير حسبي الله ونعم الوكيل تكمشت في بعضي وحسيت انها خلاص النهايه ونا نسمع في صوت الباب اللي طاح متكسر وواجد اشخاص ملتمين خشو عليا وقفت ولساني انربط ونا نحق فيهم يكسرو ويدورو في الديار ، قرب علي واحد منهم وشد يدي بالقوه ونا نحاول نلحق بتع الصلاة نستر بيها روحي ونسمع فيه يقول من مدرقه عندك ياخاينه ، قعدت ندف فيه ونا نعيط ونستنجد في حد ينقضني من بين يديه
في اليوم هضا خسرت شرفي وراجلي وحياتي خسرت طعم الدنيا لقعده مافرحتش بلدتها مع راجلي ، الظلام غتصبوني استغلو ضعفي ووحدتي من غير راجل انتهكو شرفي وخسروني حياتي دلوني وعذبوني وسبوني وخلوني مرميه علي الارض بدمي في وسط الحوش المقلوب عليا ، وأول ماجا سليم جن جنونه حقيت دموعه الغاليات عليا علي خدوده ونا في صدمتي نبكي بصمت مخنوقه نبحت فيه من غير ولا كلمه ، لبسني بمتع الصلاة وعيونه شرار خشو علينا مره اخري رجاله لابسين نفس لختصبوني عيطت وقعدت نأشر عليهم ونا نصرخ ، فهم عليا سليم وقبل مايتهور واطاء الراجل راسه وقال بسرعه:هدو مجرمين معمر واتباعه لابسين لباسنا باش يشوهو صورتنا ياخوي استر الاخت وتعالا نتكلمو برا
دخلني سليم جوا في الدار وبوسني علي راسي وعدالهم قعدت نرعش بروحي نرجا فيه بس ماجاش حسيت بحد خش يطق علي باب الدار حسبته سليم وفتحت بس لقيت بنت...
هضاكا اليوم عديت لحوش صاحب سليم جا هوا ومرته ورفعوني معاهم بارك الله فيه وفي مرته وكانو عندهم خبر بموت سليم بس ماقلوليش لا الصبح لين جا محمد وباتي وجدي ، روحي كانت بتطلع لو ادموع ينزلن بدالهن دم راهن نزلن عديت مع باتي وجدي لبنغازي ومحمد قعد في طرابلس لكرهتها كره العمي المدينه لناسها خدو مني قلبي وروحي.
فاتن شهور تغيرن فيهن واجد امور رديت نا لحوش هلي وسيبت حوشي لمتهنيت بيه وجدي حول مع مرت سيدي رقيه عشان تعبت واااجد وجتها جلطه متحملتش موت ولدها ، سليم كان البكر ويحب امه واااجد ، ومعزت البكر تقعد بروحها ، سليم عنده زوز خوات وزوز خوت هدايا و ميسم ، ومحمد وسالم ، هدايا بعد سليم متزوجه اما ميسم وسالم الصغيرين ومحمد بعد هدايا لما صار لصار سيب شغله فجأة لي هيا مهندس نفظ في الصحراء و ولا يشتغل في الشرطه والمقرات والجو هضا كلنا ستغربنا فيه وجدي طبعه وااعر لما سيب محمد شغله وتجه لشغل هضا قامت لقيامه ولعاراك وصل بين جدي ومحمد لعنان السماء عدا محمد هضاكا اليوم وغاب سبوع بس كان يتصل بمرت عمي رقيه وبخواته هدايا وميسم وبخوه سالم كل يوم وفجأة بعد السبوع كشف جدي انه محمد في طرابلس وحول غادي عشان خدمه ماخدمه ، رقاله جدي منه واااجد وقامها معاه بيش يرد لبنغازي ويفك عنه سريب ووجيج الشرطه بس دماغ محمد اكسح من سليم الله يرحمه نين خلا جدي يستسلم ويخليه ، بعد مامرو سناتين وبطولهن وبعرضهن مرت عمي رقيه تزر فيا نوافق علي محمد ياخدني ، بدايتها كنت رافضه قلبي وروحي عند سليم وبس ف كنت نسمع منها ونسكت بس كلهن بدو يزرن عليا كنت رافضه ، طول عمري نحسب فيه بحسبت اخ لا غير وصديق الدراسه نا وياه نفس العمر مانتخيلش روحي معاه ابدا بس بأصرارهن وفقت وبديت نتخيل في روحي معاه الصراحه ومن غير نفاق محمد تتمناه الف بنت مش ميه جميل في شكله وجدااب وااجد بنات العيله كلهن يموتن فيه وشخصيته اجمل بواجد من شكله وراجل بجديات ، وليت نتقبل في الفكره ووفقت ، بس خفت انه يعارض يقول مرت خوي كيف ناخدها بس ستغربت لما كلماته مرت عمي قلها كلمتين بس هضا يرضيك قتله اي قلها نا موافق عرفت في وقتها انه بس يبي رضي امه وتزوجنا فعلا بس شرطه كان نعدو نعيشو في طرابلس ، لطالما كرهتها بسبت سليم حبيبي لحبني وعطاني من حبه واااجد قبل ما يموت بس حبيتها من محمد لطول السنين لمتجوزين فيهن ماكنلي غير لحترام والود وبس اما حب ف لا ومالوماش برغم ملتله واجد ونتمنا نعيشو كيف اي متزوجين لكن حب سليم مستحيل نلقاه اخري.
__
نفخ بملل وهوا يفتح في ترمص لميه بكل قوته بس ماقدرش قلب شواربه وجبد المصاص ودبدب وقف فوق راسها وقلب الترمص علي وجها في الاول مانزلتش لميه بس بعدين قعدت تقطر بالقوه لين نخلعت نادين ونقزت علي فارس لراقد جنبها وهيا تشهق من لميه لمصقعه لنزلت عليها دفها فارس وهوا يمسح علي وجهه:ياعن شكلك خير امك وانتي ديما مخلوعه
مسحت نادين لميه من علي وجها وهيا ترجع في شعرها الهايج التالي وأول مافتحت عيونها شبحت زيد الواقف وشاد في يده الترمص ويضحك ، قعدت نادين تشبحله للحظه بهدوء وبعدين غمظت عيونها وقعدت تنقنق:يااربي علاش ياربي منلقها من الراجل ولا من ظناي واااه كل يوم نتصبح علي عمله احرف من لقبلها واااك عليا
قام فارس راسه وشبح لزيد لقعد يضحك علي امه كيف تنقنق ، ضحك فارس ونهض روحه قعمز وتكه علي الحيط ، جاه زيد يجري وقعمز في حجره زاد فارس ضحك وشدله خشمه:ياعفريت انت
ضحك زيد:بيس تنود هيا(ماتبيش تنوض هيا)
تلفتتلهم نادين وهيا تتنهد ووجها اصفر من الخلعه لين فارس سخفاته ياناري كل يوم تفيق بسخطه من زيد ، قرب باس زيد وقامه وقفه وقرب من نادين اللي قعده مخلوعه وتحاول تتنفس زين ، مس قلبها لقاه قريب يطلع منها قامت نادين عيونها فيه:ولدك هدا مايوصل خمس سنين لين يوقفلي قلبي
بتسم فارس وباسها من خدها:بعيد السوء عليك نوضي اشربي اميه
هزة نادين راسها وفارس وقف وتلفتلها:تبي نجيبلك
رفعت نادين راسها:لالا تو نمشي بروحي غير نظم لمنادير ولبطاتين
وشافت لدار لمنكتها سي زيد وهما راقدين مشي فارس خش للحمام ، ونادين وقفت اظم في الدار وفي لمنادير لرقدو عليهم ، ومشت توتي في لفطور..
.
.
.
#يتبع_للبارت_لبعده
____________________________________
بداء كتابة الرواية في 2019 / أبـــ4ٰـــريل / 7
تم وضع قَفلة لـ الرواية في 2019 / سبتــ9ٰـــمبر / 25