عشق في بلاد حروبها لا تنتهي ( الفتنه و الثأر)

البارت 12

_
_
#عشق_في_بلاد_حروبها_لا_تنتهي
   الحلقة  12
(الياقوت)
في الحلقة السابقة
تحشم وهوا يقيم في روحه بشويه ويشبح لنادين لسخفاته انه بيخلعها قعد ينحي في ايده بشويه ويبي ينوض بس نادين زادت كبشت فيه لين ضحكو الممرضات اللي يمسحو في الارضيه قالت وحده منهم:خليكم خليكم حني طالعين اصلا
ولا وجه فارس يجيب في الوان الوان هههه وهوا ينفخ ويمسح في جبهته رد شبح لنادين لراقده بكل سلام ولا علي بالها حاجه بتسم ورجع اتكه جنبها وقرب بوجهه من وجها..
.
قراءة ممتعة 💛
#البارت_التاني_عشر
.
وباس خشمها بخفه:دودة
قربت نادين اكتر لين خلت جبهتها لاصقه علي جبته وهيا تهمهم باسها فارس علي جبهتها وهمس في ودنها:ياللي ماتتحشمي نوضي
نفخت نادين وهيا قعده بين راقده ونايضه ومغمضه عيونها:هم اني مريضه ره
ضحك فارس ونتش شحمت ودنها بشويه:شن دخني بيك اني به مكلبشتيني معاك
دوب مافتحت عيونها وقالت:خايفه عليك من الفلبينيات يعاكسوك
ضحك فارس بالقوه:والله مافي فلبينيات فيه ليبيات كانو هني اوووف محلاهم
زادت نادين فتحت عيونها:شن رايك نخطبلك وحده منهم بالمره مافيها مامشينا لحياشهم
رفع فارس حاجبه:لالا مش نوعي المفضل
نادين:اه صح اني لنعرف نوعك المفضل ، سحيقه تراهو تستنا في الحوش تقول حوش بوها نار طليقه ترفعها
ضيق فارس عيونه بمكر وهوا فاهم علي من تدوي:خيرك تدعي علي روحك
شبحتله نادين:بعيد السو عليا
وغيرت صوتها داراته ارق وقالت بستهزاء:ندعي علي نوعك المفضل ياسي
رفع فارس يده وهوا يقرصلها في شفايفها:واااااك من السانك لحرف واااك
عيطت نادين وهيا تنحي في يديه:نحي اني مريضه ره
ناض فارس من جنبها:خيرك انتي تبي تمرضي روحك بسيف
كمكمت نادين روحها بالشرشاف:برا روح تفوه برا وخليني في حالي نتمرقد
وغمضت عيونها بغيظ منه ، بتسم فارس وهوا يلبس في سبيدروه وقال:ماروحش ونخلي نوعي المفضل مريضه بروحها
فتحت نادين عيونها علي طول وشبحتله كيف ضحك عليها كيف تفجأة وقرب باسها علي جبهتها وطلع وخلاها تبتسم بروحها زي الهبلا .
__
#في_بنغازي
قعمزت ميسم قدام رقيه وهداية وهيا تحط في صفرة الشاهي:اهو عدا وماكلمتيشي
رقيه:ياعليك موال جديد
هداية:مانحكيلكمش كيف كشخ ورقاله مني بكل لما قتله ماكلمتاش واااه قريب كلالي وجي
ميسم:واااه الحمدالله جيت الصغيره لا حد يعبي عليا نكلم لا هضا لا هضا
رقيه شبحت لهداية:شن خطر عليه من سيره
هداية رفعت كتافها وهيا تشرب من الشاهي:علمي علمك مسكني وقالي كلمي محمد وقوليليه جدك يبي يخطبلك بنت خالك حمد
ميسم:اما بنت ماقلكش ان شاءالله مش حنين الشومه ماخاطري فيها تولي مرت خويه ايوه من توا نخبركن
هداية:غر اسكتي انتي ماحد خدي شيرتك
رقيه:لالا حنين صغيره موليد الألفين كان هناك ميسون ولا هنادي
هداية:تي كنكم توا نا وين ونتن وين نقلكن عطوني راي كيف نفتح السيره مع محمد وانتن تفكرولي من هيا لبياخدها غير يرضي هوا
رقيه:كله كوم ولما بتسمع عيشه كوم
ميسم:ياناري منين بتلقاها لا بتلقاها
تنهدت هداية:صح نظلمت وشافت الويل بس ره حتي محمد انظلم لما زوجتوهاله منين يشكي خويه طول وعرض وزين ورزانه ياخد بنت لبنوت بس الله غالب علي جدي وقراراته
ميسم:نا نحس جدي يبي يجوزه اخرى بيش يريح ضميره
رقيه:اه وخلاص
__
ميلت صفاء راسها وهيا تتكه علي حاشية الرخامه بداها:شن سبب رفضك مرات يطلع كويس وراجل
شبحتلها غالية وهيا تخبط في الصفرة علي الطاوله بغل:سبب رفضي انه قعده قاصر قعده ماوصلتش لسن القنوني حتي17ماوصلتلهمش قعده ره قعده في التانوي قعده نقرا قعده عيل كيف بنتحمل مسؤوليه
صفاء:ضحكتيني تي موليد2003بصغارهم جت عليك وبدات في وضعك ،غالية احمد عنده حق في نقطه خايف عليك لانه الوضع لأنتم فيه توا مش امان ابدا
تنهدت غالية:تعبت اني واللهي تعبت اسوء سنين عمري ماعش بو يتمو كل عام نقول خلاص بنرتاحو بس تجي فوق روسنا مصيبه اكبر من قبلها
صفاء سخفتها حالت غالية كيف صغيرة في السن وشافت الويل حاولت تغير الموضوع بضحكه:اي شن صار في الكيكه
وقفت غاليه بخلعه وهيا تشوف في الكوشه:واااه قريب نحرقت يدهب شيرتهم هل خطاب لمناجيه
صفاء:ههههه واااه معندك غر اسمعي انتي ساوي روحك وشوفيهم وقابليه ماعجبكش قوليلهم باي مع السلامه ويتسكر الموضوع
غاليه:مش بسهوله هدي احمد مسكر راسه ويبي يعطيني برضاي او من غيره بس والله ماهي صايره لما نطفشهم نخليهم هم ليرفضوني
طلعت صفاء لسانها بضحكه:ماعندهم علاش يرفضو علي الشعر وماشاءالله يخرب بيتك بيقولولك حتي لو مش حلوه من شعرك ناخدوك المهم ولو علي لبيوضيه بيضه تللشي ولو علي لعيون كبار وسود وجدابات الرحمني ولبس نظارات ههههه
ضحكت غاليه ورفعت يداها الزوز وهيا تخمس علي وجه صفاء:خميسه عليا وحويته تو تعطيهالي مجمره ههههه
صفاء ضربتها بالفوطه علي وجها:خزي حقيره هههه حقا غدوه بنمشي لصاحبتي شن رايك تمشي معاي تغيري جو
هزة غالية راسها:لالا ماخاطريش بري شن بندير عند صاحبتك تو تقول شن هالبنت
صفاء:بالعكس من كتر مانحكيلها عليك لين هيا لقتلي بروحها لما تجي قوليلها تجي معاك
غالية:ياي ياحليلي خلاص والله لما نمشي
صفاء رفعت حاجبها:وااه الجو لديري فيه زعميتك رزينه تاريتك ميته علي مشوار
غاليه رفعت كتافها وهيا اطلع في المربه من التلاجه:والله علاش الكدب ليا سنين خاطري في طلعه غير للمدرسه او للمستشفي او ليكم
__
شبح فارس للدكتورة وقال:شن طلعو التحاليل كويسات
بتسمت الدكتوره:اها كويسات غير كل لصير معاها
اتصل تليفون فارس ودكتوره مع بعضهم عتذرة الدكتوره ووقفت وطلعت ترد وفارس اول ماشاف المكالمه من مني شبح لنادين وقال:ارد ونجيك تمام
هزت نادين راسها وهيا تشبح في فارس لطلع من هني والدكتوره خشت من هني.
طلع فارس وهوا يرد:ايوه سفيان
سفيان:شن الجو
فارس:تمام شن حالك انت هداكا اليوم خليتك مش تمام
سفيان:الحمدالله من عند ربي لقيتك متصل
فارس:اكيد بنتصل نبي نفهم هلبا حاجات هداكا اليوم مابيتش نتكلم معاك في شي لانه حالتك كانت ماتسمحش بس توا نبي نعرف كل شي
سفيان خش عليه رقم انتظار شافه وهوا يرد علي فارس:غدوه نتلاقو في نفس المكان هكي تمام
فارس:ميه ميه سلام توا
سكر سفيان من فارس وعاود لرقم لتصل بيه لي قعد ينادي ينادي وماردتش الا في اخر لحظه:ايوه
سفيان ضيق عيونه:من معاي
جاه الصوت اللي حس روحه عرفه:خود من زياد مفاتيح وحده من السيارات وعاود اتصل بيا اخرى نبيك
سفيان:حاضر يافندي بس ان شاءالله خير شن تبي
محمد قال بتسهويك:هيوالله ريفت عليك واجد مش قادر علي فراقك اكتر من هكي
وغير نبرت صوته لجديات:لنقنك خديت علي الجوو دير لقتلك عنه نرجا فيك ستعجل
وسكر في وجهه لين سفيان بعد التليفون وقعد يشبحله وقال:من الشراقه يأتي الجديد
وحط تلفونه في جيبه وهوا يكمل:ياعليك ايامات غبره بنشوفهم مع هطقه
جي زياد من وراه مستغرب:خيرك تدوي مع روحك
تلفتله سفيان:شي لفندي كلمني وقالي خود وحده من السيارات وتعالالي
ضيق زياد عيونه:وين بتمشي
رفع سفيان كتافه:الله وعلم قالي خود سيارة بعدها اتصل بيا بالك بينعتني لمكانه ولا وين
زياد ستغرب:بالك
__
حطت حنان ورا نادين لمخده وهيا تشبحلها:شن هكي باهيه
نادين:خلاص ياماما والله كويسه ومانحس في شي بس جيبولي زيد ستاحشاته هلبا نبي نشوفه
نهي:فاطمه مشت تجيبه
قلبت نادين عيونها ومش عاجبها جيتها والتلصيق لدير فيه علي فارس:اوووف ماما خلاص هههههه رتاحي اني مرتاحه
تنهدت حنان وهيا تمس في راس نادين لملفوف بشاش:رعشتينا عليك
نادين:سامحيني بس دخت ومانندريش علي روحي كيف طحت
تلفتت نادين وهيا تشوف في زيد لخش يجري جهتها حضنها بفرح ، ضحكت نادين من وسط قلبها وهيا تحضن فيه وتبوس فيه تحت نظرات نهي لتنهدت وناضت من جنبها ، ومشت للكوجينه ووقفت علي فرح:تبي نساعدك
فرح:لالا كملت نستني في القهوي تفيج بس
نهي شبحت باب المظبخ:امالا اني بنطلع لجنان
فرح:اطلعي
طلعت نهي وهيا حاسه روحها بتطربق من الغيره من نادين ، تنهدت بالقوي وهيا تدكر لما شافاته شادها وطالع بيها باين من عيونه الخوف عليها كيف يرعش مع بعضه وقريب يبكي من خوفه يخسرها...
.
.
ما أصعب الخدلان ، من شخص ظننته يوما حبيب 💔🍭
(الياقوت)
طلعت فرح راسها من باب الكوجينه:نهي تعالي اشربي قهوي
تلفتتلها نهي:هي جايه
مشت فرح ونهي قعدت شوي وخشت للكوجينه خدت طاسة اميه وشربت وكيف بتمشي سمعت صوت حد قدام باب الكوجينه طلعت كبهت وهيا تشبح في فارس لجبد الكرسي وهوا يولع في سبسي لشاده بين شفايفه وقعمز
نهي:من امتي ادخن
رفع فارس راسه طول وشبحلها وهوا يساوي في تقعميزته ونزل الدخان لوطه طول وقال:تبي حاجه
قربت نهي وجبدت الكرسي التاني وقعمزت قباله علي الطاوله:شن حالك
لوح فارس السبسي وعفس عليه وهوا يتكه بمرافق يديه علي رجليه:الحمدالله
نهي قعدت تشبحله لين فارس تقيد وكيف بنوض قالت:خيرك ماتبيش تشبحلي
رفع فارس عيونه فيها:وعلاش بنشبحلك
اضايقت نهي من طريقة كلامه:تغيرت هلبا
فارس نزل راسه ومسح علي جبهته:لا ماتغيرتش قعد زي مااني فارس الاول
نهي:فارس الاول كان ماينحيش في عيونه مني
فارس بتسم:قعد نفسه غير عيوني رادو غيرك
نهي:بس اني عيوني ماردوش غيرك
فارس وقف:شيء يخصك
نهي حست روحها بتموت من القهر وقالت بسرعه:اني اسفه بس جت فاجعه في يوم وليله انقلبت الدنيا يعني سفيان قتل ونحبس وكلهم خوفوني واني خفت نتزوجو ويتعرضونا او تصير فيك حاجه واني نقعد هكي خفت يصيرلك زي توا تتغرب باش تهرب ، حياة التعب ماحد يقدر يتحملها حياة رعب وخوف
وسكتت شوي وهيا تتنهد:اسفه برغم تفكيري صح بس نادمه انه خسرتك
كان فارس واقف وحاط يديه في جيوبه ومطبس راسه وهوا يسمع فيها بكل صمت
نهي وقفت وجت قبالته:فارس
فارس اول مارفع راسه شبح نادين تفتح في باب المظبخ تخطا نهي وقرب منها:خيرك طالعه
شبحتله نادين وهيا تميل في راسها واول ماشافت نهي ضيقت عيونها وهيا تاخد في نفس كبير لين حست نخصه في قلبها من غيرتها وقالت:شي بس ماتحملتش ريحت القهوي طلعت نشم في هواء
تلفتتلهم نهي وهيا حاسه روحها بتتفجر من لقطت فارس كيف فاتها وهيا تدوي ومشي لنادين وقالت بغيظ:خيرك ماطلعتيش من الباب هداكا
ضيقت نادين عيونها وهيا حاسه انه الضغظ وسكر و الملح كله رقالها:وانتي
قص فارس عليها وهوا يقرب منها بسرعه ولف يده علي خصرها:تعالي قعمزي جنبي
رفعت نادين عيونها فيه بصدمه علي حركته انه يبي يسكتها باش ماتجرحش ست الحسن
شدت يده لي لافها علي خصرها ودفاته بشويه:تو نقعمز بروحي انتم كملو تهدريزكم
نفخ فارس ببتسامه ورجع شدها ومشاها قعمزها علي الكرسي وجبد الكرسي التاني قعمز قدامها:قعده دايخه
نهي:تبي نجيبلك اميه كانك دايخه
نادين ردت بتعصيب وبنبرة تكشيخ:لا
تحشمت نهي وحست روحها مش مرغوب فيها:نستأذن
وخشت وخلتهم وهيا عيونها فيهم
فارس:شن حالك توا كيف تحسي في روحك
خدت نادين نفس وطلعاته وهيا تحاول تشم هواء صنته غير صنة القهوي لزهقتلها كبدها:كويسه غير كان تتحول صنة القهوي بس
بتسم فارس وتكه بظهرا علي الكرسي:مش تحباها
نادين بتسمت بخفه:بس هوا ميحبهاش
ضيق فارس عيونه بستغراب:هوا
شبحتله نادين علي الجنب:شن كنت ادير انت وياها
رجع فارس بتسم:شي فتحت معاها موضوع الخطوبه وفرحت الحق
تلفتتله نادين وشبحتله زين وهيا ترفع في حاجبها:فارس مانبصرش اني
فارس ضحك:ههههه حتي اني مانبصرش شن رايك نكلم خالتي توا ، وانضم اموري ونديرو العرس طول ونجيبها تسكن معانا
نادين:اها تمام بس قبل ماتوصل ح تلقاني في حوش اماليه وتحلم بعدها تشوفني عندك
فارس رفع كتافها:عادي وانتي مافيش طلاق تقعدي هكي معلقه وولدي ناخده عندي
وقفت نادين بعصبيه وستفزها كلامه لين دموعها عبو عيونها:الله ماك راي واحد فيهم صغاري اني هدو انت برا جيب منها وتو تنفعك وكان شفتهم صغارك مره في الشهر تكون ملك بعدين
ضيق فارس عيونه:حسستيني عندنا خمس صغار
ضربت نادين الكرسي برجلها وتعصبت حست روحها بتتفجر من طريقة كلامه ونزلو دموعها وقالت:عندك زوز والتاني في بطني اني حامل وانت برا تزوج باهي تتهني ان شاءالله
وقف فارس وهوا قعد مصدوم وقبل ماتمشي نادين شدها من يدها:ح.حامل
فكت نادين يدها من يده وهيا تبكي وخشت تجري وخلاته يضرب في الكرسي برجله وهوا يشفشف في شعره بيده
__
درس سفيان السيارة بعد اللودان وهوا ماشي جاي بالسيارة في نفس الطريق يستني في سيارة تطلع باش ياخد مكانها من كتر مازحمه المنطقه.
تنهد وهوا يطفي في السيارة ويفتح في الباب وينزل:مالقي وين يسكن غير هني غريب الراجل هدا ماتعرفه جوه حلو ولا اخي ولا معقد ولا عادي لا تعرفه هدي ولا عصبي يحيرك النم
وطلع تليفونه اتصل بيه وك العاده ماردتش الا في اخر لحظه:اني تحت العماره
محمد:الدور السابع تلقا باب الشقه مفتوح واركب من الدروج
سفيان وهوا قدام العماره شبح الاسانسير راكبين فيه زوز صغار:علاش مانركبش بالاسانسير
محمد سكر في وجهه.
نفخ سفيان وركب من الدرجات ووقف قدام الاسانسير وتلفت لدروج:توا من جده يبيني نرقي لدور السابع علي رجليا باش يجيني القلب
ورص بضمت الاسانسير وقال:شن دراه ركبت من الاسانسير ولا من دروج
وركب الاسانسير ، ووصل لدور السابع وهوا يشبح في  شقتين وحده يمين وحده يسار قرب من لإيمن وهوا يشبح في الباب مردود دفه وخش وهوا يسكر في الباب.
خش من الممر الطويل وهوا يشبح حوليه واول ماوصل لصالة لكبيره طلعله محمد فجأة وضربه بوكس علي وجهه لين سفيان رجع التالي وهوا يشد في خشمه لصب دم من قوة الضربه
طبس سفيان راسه لوطه طول وهوا مش قادر حتي يفتح عيونه ، وستين فكره وفكره جاته وحس انه بصفوه او ابصر شن صاير بس سمع صوت محمد لمدله لكلينكس:امسك امسح خشمك
رفع سفيان راسه وشبح لمحمد لمادله لكلينكس ، ضيق عيونه بعدم فهم وحس روحه سطل مشروك من لوطه ههههه لانه مش قادر يفهم شي
خدي منه لكلينكس وحطه علي خشمه وهوا يتبع في محمد لجبد كرسي الطاوله وقاله:تعالا قمعز
خش سفيان وهوا يتلفت لجيها التانيه من الصالة كان فيه ألات تدريب ، قعمز علي الكرسي وهوا يتبع في محمد بعيونه لي لابس شرط بس ومن فوق مش لابس شي وجسمه عارق من التمارين خش للمظبخ فتح التلاجه وخدي شيشة اميه وطلع وهوا يشرب منها من فوق والميه لتنزل منه تنزل علي جسمه لمعضل ووقف قدام سفيان ومدله الشيشه:اشرب
خدي سفيان الشيشه وشرب وهوا يشد في خشمه بألم
جبد محمد تيشرته من الكنبه ولبسها وجي قعمز علي الكرسي وحط رجله علي رجله التانيه وبتسم:وجعاتك
رفع سفيان راسه وقال:طيرتلي خشمي مش قادر حتي نشم ياراجل
محمد:بيش مرة اخري ماتستغبانيش
سفيان استغرب:فاش استغبيتك اني
محمد غمزله:علي ركبت الدروج
ضحك سفيان:ياعن شكلك مايفوت عليك شي كيف شبحتني انم
محمد قرب بكرسيه من سفيان بسرعه وهوا يضيق في عيونه:يا عن شني
وقف سفيان طول وهوا يرفع في ايده قدام محمد:ياعن شكلي اني اني فكينا وراس الغالي
محمد رجع التكي علي الكرسي وحط رجله علي رجله التانيه و أشرله بيده بضحكه بمعني تعالا:تعالا ماتخافش
ولا سفيان قعمز وقال:مش قصدي قلتها بعفويه
محمد دخل يده في شعره اللي طاول اكتر وهوا يرجع فيه التالي:ركز علي عفويتك مرة اخري تمام
هز سفيان راسه وهوا مش متريح بكل:تمام
وسكت شوي وقال بخوف وهوا يشبح لمحمد لمقعمز بهدوء:عادي نقول حاجه
ضحك محمد:هههه قول
سفيان:يعني هوا اني عادي غير بالك ناسي بس هوا علاش جايبني هني تبي حاجه
محمد:كنك خايف
سفيان:لا ابدا
سكت محمد شوي لين سفيان سرح في خشمه لقعد يوجع فيه وبعدين قال فجأة:سفيان نور الدين ### موليد 90 تسكن في ### في 2016 قاتل ولد جيرانكم ونحبست سناتين وهلك تشردن من بعدك خوك الصغير سافر لتركيا وامك متوفيه ليها شهر
توثر سفيان لساوا روحه وهوا يشبح لمحمد لنهض روحه وتكه بمرافق يديه علي رجليه وقال:عظم الله اجرك
سفيان تحمحم:شكر الله سعيك
وسكتو شوي ورجع سفيان شبح لمحمد:شن تبي مني انت
محمد ميل راسه:شي مانبي شي بس الصقر شال حبل المشنقه من رقبتك لكن للأسف نا برده وبنشنقك
سفيان:عادي اصلا مش خاسر شي
محمد:اممم معترف بجريمتك
سفيان:اني مش مجرم ومقتلتاش الولد
ضحك محمد بهزوه:وحتي نا مش ملشياوي غير نخدم معاهم
وسكت شوي ورجع تكلم بحده:علي من تضحك انت
سفيان وقف وعيط بعصبيه:تبي تصدق صدق تبي تكدب كدب اني مش مجرم اصلا اني مش راجل باش نقتل ونشد سلاح نوجهه علي عيل
وكيف بيتلفت يمشي وقف محمد وبحركه سريعه وبسلاسه شد يده ورجعه التالي وهوا يرجع في يده ورا ظهره وطيحه علي الطاوله وتبته زين وقرب منه وهوا قعد شاد يده ورا ظهرا:تي حرام فيك كلمة راجل ياكلب ، الراجل عمره ماينكر افعاله حتي لو كانو ماينفعنش
حاول سفيان يفك روحه من محمد بس كانت بنيت محمد اقوا منه بهلبا وماقدرش يدفه حتي
حط عيونه في عيون محمد اللي النار يطلعو منهم:اني مش راجل لانه سيبت امي تموت بقهرتها عليا سيبت عيلتي تتعدب في جرتي وتتشرد مش راجل علي خاطر خليت روحي كلب نكدب لدرجه لما نقول الحق ماحد يصدقني زي ما توا صايرلي انظلمت واني الظالم
ضيق محمد عيونه وفكه بعنف وهوا يبعد عليه:شني قصدك
وقف سفيان علي حيله وهوا يشد في ظهره لوجعه من حاشية الطاوله لخشت فيه وقال بهزوه:علي اساس حتي كان حكيتلك بتصدقني
رجع محمد قعمز علي الكرسي وقال وهوا يأشر بيده بمعني ادوي:هات شني عندك و نا نقرر نصدق ولا لا
__
خشت غالية من الجنان وهيا متعصبه وقريب النار تطلع من ودانها وهيا تخش لدار المعيشه وين ما ربيعه وخديجه ولبنات مقعمزات
شبحت صفاء لخديجه لضيقت عيونها وهيا تشبح لغاليه لقعمزت جنب ربيعه:غلوش خيرك
تنهدت غالية وقالت بعصبيه:الخطاب بجو بعد غدوه احمد خوي قالي توا
ربيعه:خطاب من
خديجه:هدا صاحب احمد بيخطب غالية لخوه
وشبحت لغالية وكملت:بدل ماتفرحي وتتفألي خير انه يطلع راجل و ولد ناس ويطلعك من الرعب لعايشين فيه وتريحي خوك لرافع همك وخايف عليك تقعدي بروحك لو لقدر الله طرت فيه حاجه
غالية نزلو دموعها:قعده صغير اني مانبيش نتزوج نبي نقعد جنب خوي نمشي مدرستي اروح نقرا نمشي لصاحباتي تي نبي نلعب مزال ازح نبي نعيش مراهقتي زي العالم والناس اني مليت نبي نعيش حياة طبيعيه وبس هدا لنتمناه
سكتو كلهم وقلبهم وجعهم علي غاليه كيف كانت امنياتها بسيطه جدا جدا جدا بس للاسف كانت عند غاليه مش بسيطه و صعبه هلبا
__
تاني يوم روحت غالية من المدرسه وبدلت حوايجها وخشت للكوجينه تقلي في الدحي.
خش احمد عليها:احسبيني معاك
شبحتله غالية:دير بروحك
احمد:غالية
تلفتتله غالية:خيرك
تنهد احمد:فكينا من الجو هدا عارفتيني ندير في هدا كله علي خاطر مصلحتك
غالية:انك تعطيني لي اول واحد يدق بابنا هدي مصلحتي
احمد:مش في اول واحد او عاشر واحد ، هيا في نبي اريحك من لحياة لحني فيها ياغالية اني مش مأمن علي حياتي في اي لحظه يجو ويطبوني وتقعدي بروحك اني نبي نأملك مستقبل نبي ماعاش نفكر فيك انتي بنتي مش اختي ياغاليه نبي نتهنه علي بنتي وقلبي يرتاح من يالاك
نزلو دموع غالية لقربت من احمد:حتي اني نعتبر فيك بوي مش خوي انت لربيتني من بعد بابا ولا مره حسيتك خوي الواعر الا توا
احمد وقف وحضنها:لوعره تجي حتي من البو ياغاليه عنادك لتوا كله ح ينقلب دعي في المستقبل
مسحت غالية دموعها وبعدت وهيا تتلفت:قعمز نفطرو اني وياك
بتسم احمد:يعني رضيتي عليا
غالية:هههه اها لانه نبي منك طلب
احمد:وشن هوا تره
غالية تلفتتله:صفاء عازمتها صاحبتها اليوم وعزمتني معاها وبيرفعنا عمي مفتاح
احمد:اممم ووين تسكن البنت
غالية:وين نندري بس اكيد عمي مفتاح مايرفعهاش الا عارف العيلة كويسه غر هيا وراس حميدا
ضحك احمد:يالعوبه تعرفي تلعبي علي التقيل عارفتيني مش ح نقولك لا باش تستريني مع الناس غدوه
رفعت غالية حاجبها بمكر:اكيد وحده بوحده
احمد:ههههه مدام مع عمي مفتاح وصفاء بتمشي معاك بري عادي
نقزة غالية وهيا تصفق:يسس ههههه ح نوتيلك احلي فطور توا ههه
هز احمد راسه بضحكه:عيل واللهي لعيل ههههه
__
فرح كانت في المظبخ تغسل في الماعين لفطور خش فارس عليها:فرح وين نادين
شبحتله فرح:قعدين في فراشاتهم هيا وفاطمه يبوش ينوضو
بتسم فارس:امتي بتروحو ضايقتونا
ضيقت فرح عيونها وهيا تمسح في يداها في حوايجها:خزي غير كان صبرت شوي ره حجيت وتهنيت منا من غير ماتحشم روحك
ضحك فارس:نبصر يالجارة
غمزتله فرح وهيا تطلع:مادور شي عارفاتك مستاحش الدوده
وطلعت وخلاته يشرب في ميه وهوا يسمع في فرح تصيح عليهم باش ينوضو هههه
فرح:تي هيا نوضي يادراه ره ساعه 12 عرفتيه بوك كان ماتحطيش لغدي 2 ماعاش ياكل
نفخت فاطميه ووقفت:باهي ازح حتي البيتان مانرتاحو بيه
وشبحت لنادين لمتغمره زيد لقعد راقد وهيا راقده جنبه وقالت:علاش ساكنين جنبنا علاش ماسكنتو في عين زاره متلا او السياحيه او في لمدينه
ضحكت نادين:حاضر علي خاطرك تو نمشي نسكن في الحارة شن رايك
فاطمه رفعت البطنيه اطبق فيها و فرح تساوي في لمنادير:تسهوكي هههه
نادين:خلاص خلوهم تو النوض انديرهم
فرح شحت فاطمه:باه املا بعدين تو نجوك
نادين شاورتلهم بيدها بمعنا باي ورجعت غمظت عيونها وهيا تبوس في زيد لراقد ، وتدكر في كلام فارس امبارح ، نفخت وهيا تفتح في عيونها وتحاول تبطل تفكير فيه باش ماتتعصبش وتتوثر وهدا كله مش باهي ليها
حست بيه خش لدار غمظت عيونها طول وهيا ادير في روحها راقده بتسم فارس وقرب وهوا يقعمز ويتكه جنبها وقرب منها هلباااااا وهيا كانت عاطياته بظهرها وتحس في نفسه علي رقبتها وبلمسات يديه لنح بيهم شعرها وهوا يبوس فيها من رقبتها:دودة
شدت نادين نفسها وهيا تحاول ماتتلبكش من لمساته وهمساته وماردتش بس دخل فارس يده تحتها وهوا يرجع يهمس في ودنها:كيف كنتي تتكلمي مع خواتك مسرع رقدتي ياكدابه
نادين وهيا قعده مغمظه عيونها وزادت كبشت في زيد الراقد:اني مش كدابه
ضحك فارس وباسها من خدها ودخل يده تحتها وهوا يلف فيها علي خصرها وجبدها بشويه ليه:ارخي زيد
نادين:لا انت نحي تو تنوضه وبرا
زاد فارس باسها علي خدها :قتلك ارخيه خير مانجبدك ونوضه مخلوع
نادين فتحت عيونها وتلفتتله براسها وقبل ماتتكلم ستغل فارس الفرصه انه رخت زيد وقلبها عليه ويخلي في زيد ينقلب لجيها التانيه...
بعد عليها شوي وبتسم وهوا متبتها بديه عليه زين باش ماتهربش:قعده الدودة زعلانه
نزلت نادين راسها لرقبته وهيا تحاول تاخد نفسها لخلا فارس يزيد يحضنها بس رجعت رفعت راسها وقعت تعافر فيه:نحي حول من عليا
فارس:انتي لعليا مش اني
ضيقت نادين عيونها وهيا ترجع في يدها ورا ظهرها وتحاول تفك يديه لي لافهم علي خصرها:هوا انت كان تحول يديك بس
نفخ فارس علي وجها:محلاك وانت زعلانه
رخت نادين روحها وهيا فشلت:فاارس ماعنديش جهد اني نحي
فك فارس يديه من عليها وخلاها ساوت روحها وحولت من فوقه وقعمزت لوطه وهيا تتنهد واول مارفعت راسها بتشبحله لقاته يشبحلها ويبتسم ضيقت عيونها وقالت:خيرك
ناض فارس اتكه علي يده وباسها علي خدها:اني اسف
تلفتتله نادين براسها وخلت وجهه ووجها قراب لبعض هلبااا وقالت برفعت حواجب:شني
باسها فارس بخفه علي خشمها:اسف
ومسح علي وجهه بيده ورجع شبحلها:ممكن زودت في بصارتي شوي
نادين:بصاااره
فارس:من كل عقلك صدقتي
نادين رفعت كتافها وهيا تشبح فيه كيف قعمز وتكه علي الحيط وهوا يتلفت يشبح لي زيد:وعلاش مانصدقش يعني في النهايه كلنا نعرفو انك تبيها
شبحلها فارسها ورفع حواجبه زي مامدايره هيا....
.
.
.
#يتبع_للبارت_لبعده
____________________________________
بداء كتاب الرواية في 2019 / أبـــ4ٰـــريل / 7
تم وضع قَفلة لـ الرواية في 2019 / سبتــ9ٰـــمبر / 25