عشق في بلاد حروبها لا تنتهي ( الفتنه و الثأر)

البارت 27

_
_
#عشق_في_بلاد_حروبها_لا_تنتهي
   الحلقة 27
(الياقوت)
في الحلقة السابقة
قلب علي الجواز وقعد يقرا فيه:هدا لأحمد
الصقر:اي لكن ماتعطيهولاش الا لما تتأكد انه ادمن مزبوط ، نبي رقبته بين يديا
علي حط الجواز في جيبه:تم....
.
قراءة ممتعة 💛
#البارت_السابع_والعشرون
.
فاتو يومين علي وصول محمد لطرابلس وفي اليومين هدو برغم انه مادار فيهم شي وماحد يعرف بوصوله بس عرف فيهم هلبا حاجات ، منهم والاهم فيهم واللي خلا محمد يتحرك ويدور علي احمد بسرعة ، لما بعت سفيان يشوف وضع الشارع لكانت تسكن فيه غالية وعرف سفيان من الجيران حاجات ماكنتش في الحسبان محمد انه ح يتهموه انه خاطفها واللي يحساب انه هربت معاه واللي قعد يتكلم علي عيلتها بطريقة ماتنفعش وبستحقار ، وفكر انه كان الناس هكي قالت علي غالية امالا خوها شن اللي فكر فيه اكيد فكر انه خطفها باش ينتقم علي موت خوه .
سفيان وقف قدام محمد اللي يلبس في البوت العسكري وقال:السيد كريم اتصل بيا برقم تاني وقالي مانخليكش تطلع حياتك في خطر
محمد:نا من لما خشيت السريب هضا حياتي في خطر وكان نخاف من الموت راهو ماتلقانيش نقاتل في حرب خاسره ياصاحبي
سفيان:اني خايف من الموت الحق
محمد وقف وشبح لسفيان لكمل:لا مرضي والدين ولا نعرف القبلة وين باش تشفعلي عند ربي
طبطب محمد علي كتف سفيان وماردش عليه وتلفت طلع ركب في السيارة ووراه سفيان اللي قعد يفكر لو ربي كتبله عمر جديد وطلعه من اللبز هدا كله وعد منه لربي ح يكون انسان جديد ويبدا حياة جديده ، مع خوه اللي من تحت راسه ولت حياته في خطر وعلي حافة الموت هوا ومرته وولده .
__
نادين:يعني خلاص بنمشو
فارس:اي مش هدا لتبيه
نادين رفعت كتافها:وسفيان
فارس مسح علي وجهه:هوا لطلب مني نسافر واصلا بعد لصار خايف سراج لا سمح الله يديرلكم حاجه انتي وزيد
قربت نادين منه:اكيد اني مانبيش نبعد علي عيلتي وبلادي حتي هيا الغربة صاعبة بس صعوبة الغربة يافارس ولا صعوبة الفراق اني وزيد بلاك ولا شي انت عزوتنا في الدنيا
بتسم فارس ورفع يده شد بيها خدها:وانتم عيلتي وتهمني راحتكم ياعيوني
نادين:باهي هي تعالا تغدي مرات تجي خالتك تخليه في الرقبه
ضحك فارس ومشي وراها:وين زيد
نادين:جي خداه بابا رافع عمر للبحر قالي بنرفعة معانا
فارس:قعد صقع علي لبحر
نادين:مش عايمين حتي حوايج ماعطيته قال بلعبهم شوي وبروح بيهم
__
فتحت هيام الباب علي صفاء وخشت:صفاء
صفاء:نعم
هيام:شن قلتي لصاحبتك ولا لا
صفاء:اليوم ماجتش للجامعة اكيد غدوه تجي تو نقلها ويصير خير
هيام بتسمت:ربي يقدم لي فيه الخير والله ناس باهيه ، وقيلي ولوحي عليك الشقفه نبي نغسل بساط الكوجينه باش تغسليه معاي
صفاء:باهي غير سكري الباب وقولي لهدوكم ينقصو التلفزيون فالتينه علي قوته
طلعت هيام وردت الباب ورفداته بالمخده وخلت صفاء تتنهد:نقول ردي الباب تسكره نقول سكريه ترده بالمخده اااه ياماما اااه
لوحت اليرغان ووقفت سكرت الباب ورجعت لسريرها وغمضت وجها وغمضت عيونها وهيا تفكر في احمد اللي قعده نظرته ،  ودموعة الغالية ل علي خدوده بين عيونها لحد اليوم ، نفخت وزادت سكرت عيونها وهيا تستغفر ربها وتحاول تنسي وترقد ، بس خلعها صوت تليفونها لشرين وخشت اختها الصغيره حلا في نفس الوقت تصيح وتعيط بصوت عالي ، نطرت صفاء اليرغان بخلعة وتلفتت لحلا وهيا تشد في التليفون ليشرين في يدها :تي خيرك
حلا:سرو بابتني
صيحت صفاء:وقسم بالله ياسارة كان ماتبطلي ضرب في اختك لما نجيك بسبتت سرولي توا
جاها صوت ساره لتصيح:هيا لتسكر في التلفزيون علينا مادرتلها شي دفيتها بس
صفاء ردت عليها وهيا تشبح لرقم ليتصل:ماعاش تمسيها
وقعدت تشبح لشاشة تليفونها لتتصل برقم مش طالعلها وطالع بداله "رقم مجهول " و فصل بس رجع عاود مره تانيه وهيا تقول في خاطرها ارد لا ارد لا ، لين قررت قبل مايفصل الخط ترد وخلاص
صفاء:الو من معاي
غالية:صفاء
صفاء ضيقت عيونها وزي لعرفت صوتها:مني
غالية:اني غالية
صفاء ساوت تقعمزتها وفتحت عيونها:غاليه وينك كيف هربتي من الحقير قصدي كيف طلعتي من المستشفي بروحك تي وينك
غالية:ستاحشتكم وحقربي
نزلو دموع صفاء:تي قريب هبلنا عليك حني ماخلينا ماكان في المستشفي مادورنا عليك فيه كيف وصلتي لرقمي
غالية:حافظاته اصلا ماحافظه رقم حد غيرك انتي واحمد بس احمد يعطي فيا مقفل ماعاش سمعتو عليه شي
صفاء مسحت دموعها:طلع من الحبس
رفعت غالية حواجبها:طلع باه وينه وشن قلتوله عليا اكيد قريب هبل لما قلتوله مختفيه ولما شاف حوشنا محروق واااه علياا وينه توا
صفاء:والله مانعرفو وينه اني شفته هداكا اليوم واقف يشبح لحوشكم محروق ودموعة علي خدوده ياناري وجعني في وسط خاطري وبعدها لما جاه عمي ايمن خشيت قلت لبابا مابين طلع لقاه مشي
غالية:وين مشي
صفاء:مانعرفش قال عمي ايمن قد ماشديته ماباش يخش وقعد يقول والله لما نقتل الحيوان شكله يدوي علي الراجل اللي خداك
حطت غالية يدها علي فمها:هوا ماخطفنيش ره هوا حماني واني قعده عند عيلته
صفاء:كيف ياخدك من غير مايقوللنا وحني اولا بحمايتك ياغالية غلط لداره وفوقها كدب علي بابا وعمي ايمن انه ولد خالتك
غالية تنهدت:انتم مش فاهمين شي القصة خاشة بعضها وحقربي
صفاء:فهميني باهي
غالية:تو نفهمك لكن مش توا تو نتصل بيك بعدين باهي
صفاء:لااا وين ماشيه ماصدقت سمعت صوتك وابعتيلي رقمك لانه تليفوني شكله يخرط طلعلي رقمك مجهول و قوليلنا انتي وين باش نقول لبابا يجيبك حني اولا بحمايتك وانتي بنتنا
غالية:اني في بنغازي مش في طرابلس ياصفاء تو نتصل بيك بعدين ورقمي تو نبعتهولك في رساله هي باي
.
.
.
- سأبقه صغيرة حتي لو بلغت من الهموم الجبال .
(الياقوت)
.
وقبل ماترد عليها صفاء سكرة في وجها الخط ، وخلتها وكأنها في حلم ، وقفت وطلعت من الدار تجري تنادي:ماماااااااا.
.
مسحت غالية دموعها وحطت علي رقم محمد لمسجلاته #الدماغول وخدت نفس كبير وتصلت بيه .
شرين تليفون محمد اللي درس السيارة بعيد من المقر بمسافة كويسه وطلع تلفونه ، ولما شاف رقم غالية ستغرب وتلفت لسفيان لفتح الباب وقال:علاش درست هني
محمد:اكيد مراقبين من يخش ومن يطلع نخلو السيارة هنا ونخشو من الباب لاخر ك حراس أمن
هز سفيان راسه:لكن لبسنا مدني
محمد لفت راسه للكرسي الوراني وجبد الكيسه السوده وحطها في حضن سفيان:نعجبك نا
سفيان ضحك:علي من تخطر
محمد:البس وسبقني
لبس سفيان الجكيت العسكري والسروال فوق سرواله الجينز وهوا يضحك ويقول:دا انا سأتفحم النهرده
محمد:هههه تو نحولوهن جوا ياراجل هيا تسقد
سكر سفيان الجكيت ولبس القناع الوجه ونزل وخلا محمد اللي عاود لغالية لردة عليه طول:الو
محمد:هاا كنك فيكي حاجة
غالية:احمد طلع من الحبس
محمد:تسألي فيا ولا تخبري فيا
غالية:نخبر فيك توا اتصلت ببنت جيرانا وقتلي انه طلع
محمد:ومن قال لكي ترني عليها
غاليه فتحت فمها:توا اني فاش وانت فاش نقولك خوي طلع من الحبس اكيد يدور عليا وقتلي صفاء انه قال لعمي ايمن انه بيقتلك
محمد:غالية ماعاش ترني بحد قبل ماتقوليلي كان حد وصل فيكي اضيعي روحك وضيعيني معاكي
غالية نفخت:باهي توا احمد كيف بتوصله كان يلقاك ويقتلك حق
محمد قعد يمسح علي جبهته بقفا يده وهوا يفكر مستحيل احمد يقدر يدير شي بروحه لكن لو كان لي يفكر فيه صح ، ف احمد يقدر يدير كل شي وبكل سهوله ، وقال:خلاص غلاي سكري توا مشغول
غالية:محمد
بتسم محمد:ها يانبضه
زمطت غالية ريقها والكلام هرب منها وهيا تقول:شني
محمد ضحك علي ردت فعلها وتلفت خدي جاكيته العسكري ورد وهوا يلبس فيه:ههه هاا كنك
غالية:اني خايفه روح بسرعة
محمد:حاضر نلقا احمد ونجي نا وياه
غالية:وكان قتلك
سكر محمد سريتت الجكيت ورفع عيونه القدام وقبل مايرد شبح احمد واقف قدام السيارة ومصوب سلاحه في وجهه وقبل مايضغظ علي السلاح نزل محمد براسه لوطه وطلق احمد الرصاصة لخترقت مرش السيارة لتفترش علي محمد وجت في راس كرسي السيارة.
جبد محمد سلاحة من خصرة وفتح باب السيارة وهوا قعد مطبس راسه ونزل بسرعة وهوا يوقف علي حيلة ويرفع في راسه ويوجه في سلاحة علي احمد لقرب وهوا مزال مصوب بالسلاح علي محمد لقعد يضرب تحت رجليه وهوا يبي يفقدله توازنه ويخليه ينزل السلاح من عليه بس كان احمد ولا كأنه حد يضرب في الرصاص الحي تحت رجليه وهوا يقرب بكل تقه ومزال رافع السلاح في وجه محمد لوقف ضرب وهوا يعقد في حواجبه ومستغرب من قوة قلب احمد ، لقال وهوا يقرب من محمد بخطوات بطيئة:وين اختي ياكلب يا...... والله لما نقتلك
محمد:نزل سلاحك اختك في الحفظ و الصون معايا نا مادرتلها شي
نزل احمد سلاحة تحت رجلين محمد وضرب طلقة بس ماهزتش شعرة من محمد لمتحركش من مكانه بكل وهوا ينزل في سلاحة لوطة ويشبح لأحمد لصيح وهوا يزيد يقرب وحط سلاحة علي راس محمد:اليوم بناخد حقي وحق بوي وحتي وحتي اختي بناخد حقها منك انت انت ياكلب شردتنا انت وله انت وعيلتك خديتو اختي خديتو بوي وقسم بالله لما نقتلك
محمد قعد مركز في دوت احمد اللي مش مرتبة وعلي شكله لمبهدل وتحت عيونه اسود وعيونه حمر ونازلات.
محمد:انت مش في وعيك يااحمد نزل سلاحك
عيط احمد وزاد لصق سلاحة في جبهت محمد:وقسم بالله كنت كله مسامحك فيه الا اختي ياكلب اختي خديتها غتصبتها غتصبت طفلة عيل قعده غتصبتها يا..... وربي لما نقتلك زي ماجبتلي العار في الحنينة وربي لما نقتلك يامحمد
شد محمد يد احمد لشاد بيها السلاح وقامها فوق لسماء في نفس اللحظة لطلق فيها احمد الرصاصة ولف محمد يد احمد ورا ظهره و ضغظ علي فك يده لين احمد وجعاته يده وطلق السلاح لطاح علي الارض علي صوت عياط احمد ليعافر في محمد لخلاه عاجز عن الحركه.
احمد:وقسم بدين الله لما نقتلك وربي لما نقتلك زي ماخديت عرضي وشرفي وقسم بالله لما نقتلك
عيط عليه محمد وهوا يحاول يزيد يتبته من الحركه:يامريض نا ماغتصبت حد ولا قربتها اختك لعبولك في راسك هم لبجردوك من عرضك كيف ماخلوك مدمن يامريض يكدبوعليك
ضرب احمد بمرفق يده علي بطن محمد لين خلاه يصيح ويفكله يديه وهوا يوخر ويشد في بطنه.
بعد احمد وتلفت لمحمد وضربه بوكس علي وجهه لين محمد طاح لوطه وعيط احمد وقال:انت الكداب هما ساعدوني فتحولي عيوني عليك يامسخ
قعد محمد يكح وماعاش قدر يوقف للحظات بسبب وجع بطنه لستغله احمد وقعد يركل فيه برجليه وعيط عليه:وقسم بدين الله لما نقتلك بديا
وتلفت احمد وهوا يشبح في السلاحه ملوح مشالة وكيف بطبس ياخده حس بمحمد لشده من تيشرته ورجعه التالي وردله الضربة ب زوز علي وجهه لين فقد احمد توازنه وكان بيطيح بس محمد قعد شاده من كتفه بيده وبيده التانيه شدله دقنه بيها وقال:بحت في روحك كيف مولي بحت لروحك كيف خلو منك واحد مدمن بيش يخلوك كلب تحت كرعيهن ويستغلو ادمانك وحتياجك ، بيش اديرلهم ليبوه فيق لروحك فيق قبل ماتزيد تغرق
وكان محمد بيزيد يضرب احمد بس حس بحركة سيارات قدامه دف احمد بعيد عليه لين طاح لوطه وقال:اختك عندي أمانة لين تفيق لروحك ونا مش كلب يااحمد ننتقم من عويلة ماتعرف شي
قال اخر كلمتين وهوا يشبح في السيارات لجو حاوطو المقر وتلفت ركب السيارة بسرعة وهوا يشبح فيهم يصيحو عليه باش يوقف ويهددو فيه بأطلاق النار بس طلع محمد يجري بالسيارة وهوا يشبح في السيارات لطلعو وراه وقام تليفونه لطايح بين رجليه وتصل بسفيان لرد طول وهوا يطبس لوطه ويخلي في الشباب ليصدو في الهجوم لصار من جمعة الصقر فجأة.
سفيان:الو يافندي وينك
محمد:اطلع من غادي بسرعة
سفيان:كيف بنسيب الشباب صاير هجوم هني من جمعة الصقر
عيط محمد ورجع قال:اطلع عدي من غادي خير مايولو عليك ورد بالك تعطي رقمك لأي حد حتي لزياد
سفيان وقف وهوا مطبس وسيب الشباب وهوا يجري لداخل المقر باش يلود ويطلع من باب القدامي بخفيه.
__
فاطمة حطت صفرة القهوة علي الرخامة بغيط وتلفتت لفرح لمقعمزة علي الكرسي ولاهية في تليفونها:واصلتلي لا هني ازح مصح خليقتها بعد لداراته كله وجايه مادة وجها
سكرة فرح تليفونها وشبحت لفاطمة:نقصي صوتك ياكلبة ، فكينا من المشاكل وبعدين اهو نادين وفارس بسافرو وهيا بتقعد بحسرتها هني
فاطمة:اي بتقعد بس بعد ماطلع مرارت نادين ومرارتي معاها كان تشوفيها كيف تتصرف وكأنه ماصار شي وكأنها مش من تحت راسها خسرت نادين البيبي
فرح وقفت:تي نقصي حسك ياعطيك لبلي تو تسمعك امي ، ومنها لربي هيا فكينا يافطوم من المشاكل وسكري فمك توا
نفخت فاطمة وهيا تلحق في فرح لمشت بتقعمز جنبهم.
وقفت نادين وهيا بركان من النار من تصروفات نهي اللي ولا كأنها مدايره شي وكيف تتدوي مع فارس ليهدرز علي خالته بس مره مره تقص عليه وتبي تفتح معاه موضوع بس كان فارس كل ماتحاول تفتح معاه موضوع يرد عليها بكلمتين ويسكرهولها.
طلعت نادين وحاسه روحها نااار داخلها ، مشت للمظبخ وهيا كيف بتطلع من بابه لحقتها امها لقالت:زودي اطفي للعشي عيب قدام خالتك ناجية
نفخت نادين:باهي يمه باهي
حنان تلفتت:بسرعة قبل ماينوضو
مشت حنان وخلت نادين اطلع في الطنجرة وتقربع وهيا ماعندهاش نية بكل وكان تلقا ولو مش علي خاطر فارس ره طلعتلها وسمعتها وسخ ودانها .
نقصت نادين علي لعشي ومشت ولت قعمزت جنبهم ،  وجت تقعميزتها قدام ناجيه لشبحت نادين تنفخ.
رفعت ناجية حاجبها وقالت:شكلنا رزنا عليك يانادين من امبكري تتأففي في وجوهنا
شبحتلها نادين وشبحت لفارس لضيق عيونه وكيف بيتكلم بس حنان سبقاته وقالت:وعلاش رزنتو انتم من أهل الحوش عيب عليك ياوخيتي
ناجية:لا شكلها نادين مش واخده راحتها معانا ياكبدي ماترد تلزنا مرة تانيا
تلفتت حنان لنادين لحست نفسها ضاق عليها وماعاش عرفت شن ترد وقعدت تشبح لوطه وفمها ساكت
فارس:لفات مات ياخالتي مش قلتيلي هكي
نتخصت نهي وقالت:حني نسينا ويشهد الله مافي في قلبي حاجة لكن مرتك برغم انها هيا الغالطة قعده تلوح في الدوة
فارس شبح لنهي ورفع حواجبه:مرتي مش غالطه يابنت خالتي لكن غير ماتبيش المشاكل
نهي:كل لداراته ومش غالطه يافارس
فارس تعصب:اني لا حد توا قعد محترمك ومانبيش نخسر القدر لبينا
وشبح فارس لخالته لقالت:كيف مش غالطه وهيا لمدت يدها علي بنتي الحق فيا اني لجاياتك ونقول عليك ولد اختي وماعنده حد غيري المفروض بعد كلام مرتك ماعاد نخطي لحوشك عتبة لكن الله غالب القلب لحرف لخلاني نتهزب عندك
فارس:حشاك وقدرك عالي وكبير عندي ويشهد الله ياخالتي كنت مانبي نتكلم و رخصت من قيمة مرتي علي خاطرك وخليت بنتك تخش حوشي بعد لداراته فيها
وقفت ناجية وصيحت:وخيرها بنتي شن دارتلكم
فارس وقف وهوا يشبح لنهي لبدت تنزل في دموعها :بنتك تقولك ، وتعرفي قيمتك عندي كيف وحوشي حوشك وتعالي في اي وقت بس بنتك حوشي ماعاد يرحب بيها
ناجية:الحوش لميرحبش ببنتي ماعاد نبيه ولا نبي ناسه هيا يانهي
سكت فارس ومالحقهاش وهيا تشد في يد نهي وتطلع وهيا تلعلع علي طول حسها وتلحق فيها حنان اللي مش فاهمه راسها من رجليها.
__
... كانت اكبر مخاوفي ان اضيع بأحلامي بعيدا عن الواقع ، حتي اخدني الواقع لكوابيسه 💔
.
.
اشر الصقر بيده لعلي لوقف وطلع من المكتب وسكر الباب وراه وخلا احمد و الصقر بروحهم.
رفع احمد عيونه الحمر وهوا حاس ببداية وجع يسري في جسمه بالكامل وقال:خليتوني ندمن باالقصد
ضيق الصقر عيونه:تدمن ؟ ههه من لقالك انه لحبوب هدو مخدرات ياغبي هدا مهدئ واقري عليهم
احمد:كان مهدئ علاش حاس روحي فاشل ومانقدرش نتحرك كان ماخديتهمش
الصقر:جرب ماتاخدهمش وارقد زين وكول زين ح تلقا روحك مستغني عليهم لكن اني عارفك انك لا تاكل لا ترقد هدا علاش عطيتهملك باش تقدر تصحصح ودور علي اختك وتاخد بتارك من محمد الكلب
سكت الصقر شوي وهوا يشبح لأحمد لقعد يمسح علي وجهه ورقبته.
الصقر:شن قالك محمد
قعد احمد ساكت في البداية وهوا يدكر في كلام محمد الاخير وقال:قالي خليتوني مدمن باش تستغلو ضعفي وتتحكمو فيا
ضحك الصقر ووقف وهوا يلود لأحمد:وصدقته
رفع احمد عيونه في الصقر لجي قعمز قدامه:كلامه مقنع
الصقر:ههههه صح محمد يلعبك بكلامه باش يطلع روحة بكل سهولة من اي عملة يديرها ، هوا قعد يقولك هكي باش يستغل الوقت ويلهيك ويهرب من بين يديك زي مادار ياحمااار ، كانك ماسمعتلاش ره توا جثه بين يدينا .
احمد ضرب بيده علي طاولة المكتب:الكلب وقسم بالله لما نجيبه نجيبه
بتسم الصقر وطلع من جيبه شريط حبوب وحطه قدام احمد وقال:واني معاك وح نساعدك ، خود هدو باش يساعدوك تصحصح معانا
__
طلع محمد من الدوش وهوا ينشف في شعره ووقف قدام لمرايا وهوا يحول في الفوطة ويشبح لأثار جرح كتفه اللي بدي يلتحم ، تلفت لشنطة المفتوحة علي السرير وخدي تيشرته ولبسه وطلع لسفيان لمقعمز في وسط الحوش وفاتح علي الأخبار .
رفع سفيان راسه لمحمد لقعمز جنبه وقال:تعرف لو كان طرابلس تنوض وتبدا فيها الحرب خودلك شن بطفيها
مسح محمد علي شعره:واصلا نحنا في حرب ليبيا كلها في حرب مش طرابلس بس
سفيان:لكن طرابلس اكتر لا فيها امان لا حكومه لا شي بنغازي قعده اهون بهلبا من طرابلس
محمد:حتي بنغازي فيها هكي واكتر مغير انت مش عايش فيها ماحقيتش الحرب لصارت والدواعش لخشن والتفجيرات لصارن بنغازي ياما شافت
هز سفيان راسه:وطرابلس ياما بتشوف
محمد تنهد وهوا يتكه بظهره علي الصالون وقال:زياد كان في المقر
سفيان:لا واصلا ماشفت حد اني اول ماخشيت صار فيها الضرب ومانشوف غير في الشباب لبدو يتجارو ويأمنو في مداخل المقر
وسكت سفيان شوي وتلفت لمحمد لشد تليفونه وفتحه.
سفيان:ولأمتي بنقعدو هني
محمد:لين نلقا حل لصقر وجمعته
سفيان:كيف وحني بروحنا مامعانا حد ، قصدي كانك علي شباب المقر هدو تنفخهم يطيحو علي بعضهم
محمد ضحك:ههههه بديت خبرة
سفيان:امالا شن يافندي حتي اني من معاشر
محمد:لا نا مش شاد ظهري فيهم واصلا اول مايوصلو جمعتي بندز القش هدين يدربو صح
سفيان ضيق عيونه:قصدك هدا علاش مابيتش تتحرك من قبل لين يوصلو جمعتك
محمد:لا كنت نبي نحق شني صاير هنا قبل مانتحرك مش نتحرك علي العمياني
وشبح لسفيان لقعد يحرك في راسه وكمل:فهمتني
سفيان بتسم:مدكاك ازح
وقف محمد وقال:هضا يسمو فيه اتكتيك
سفيان:ههههه منك نتعلم
رفع محمد يديه فوق وهوا يدير بصوابعة علامت النصر او الإستشهاد وقال:ونا لمعلم
ضحك سفيان ومحمد خش لدار وهوا شاد تليفونه ويشبح لمكالمات غالية ، بتسم وتكه علي السرير وهوا يتصل بيها ويتكي في راسه علي السرير ، ومن اول تشرينه ردت عليه:الو
بتسم محمد طول:قعده واعيه
غالية رشفت دموعها وهيا دمسح فيهم وتسلالة.....
.
.
.
#يتبع_للبارت_لبعده
____________________________________
بداء كتاب الرواية في 2019 / أبـــ4ٰـــريل / 7
تم وضع قَفلة لـ الرواية في 2019 / سبتــ9ٰـــمبر / 25