عشق في بلاد حروبها لا تنتهي ( الفتنه و الثأر)

البارت 29

_
_
#عشق_في_بلاد_حروبها_لا_تنتهي
الحلقة 29
(الياقوت)
في الحلقة السابقه
صفاء:اني نحب خوك احمد هلبااااا
ساوت غالية تقعميزتها ورفعت حواجبها وماعاش عرفت شن ترد وهيا تسمع في صوت صفاء لكملت:نحبه هلبا ياغالية مش قاادرة ناخد غيره مش قادرة نوافق نتزوج غيره ، تعرفي اليوم بجي خو إيلاف للمقابلة الشرعية ، تخيلي بس قعد ماصار شي وحاسه قلبي بيوقف من لوجع ومن فكرة انه بناخد غيره مابالك لو صارت الدوة حق والله نموت ره لفراق يقتل لفراق يموت ياغالية واااعر واااعر فراقة .
نزلو دموع غالية لماعاش عرفت شن ترد وهيا تسمع في صوت بكا صفاء لصارتلها هستيريا وماعاش قدرت توقف بكي لين سكرت الخط علي غالية لقعدت تبكي وهيا حاضنه روحها .
طقطق باب الدار عليها وخشت ميسم:قلت لكي ماما تعالي افطري
واول ماركزت ميسم علي غالية اللي متكية علي السرير وتبكي بالعبرة ، تلقائيا قربت منها وقعمزت قدامها:كنك تبكي
.
قراءة ممتعة 💛
#البارت_التاسع_والعشرون
.
اسف ياأخي تركت يدك رغما عني ، تركتك تائها ، غريب ، و وحيدا ، لا تحزن أرجوك ، لا تحزن ف أنا تركتك كي تتعلم مواجهة قسوة الحياة لوحدك ، كي تتعلم العيش حتي بعد موتي 💔
.
رفعت غالية راسها في ميسم وزادو دموعها نزلو وقالت من بين بكاها وبعبرتها:نبي خوي نبي خوي
سخفت ميسم عليها هلبااااا وقربت حضنتها وماضنتش انه غالية ح تحضنها بالقوة هدي وكأنه كانت تستني في حنان حد عليها او في صديقة في غربتها ووحدتها بين الناس لدمرو حياتها وحياة عيلتها.
__
في#طرابلس
خش احمد للمقر بعد ماروح من المقبرة ومشي طول لدار لكان مقيم فيها هوا واربع نفار ومن بينهم حسام لروح بعدم ماكملت مناوبته .
خش لدار وقال:السلام عليكم
ردو عليه الشباب السلام ووقف واحد من الشباب وبعد علي ليهدرزو في تركينه وقرب من احمد لقعمز وهوا شاد شريط لحبوب الجديد لعطاهوله الصقر امبارح ويشبحلة وسارح فيه ، واول ماحس بشاب لقعمز جنبه رفع احمد راسه.
الشاب:بالله تعطيني حبة غير تمو من عندي
احمد ضيق عيونه:حتي انت تاخد فيهم
الشاب بتسم:اسمي منتصر اي وناخد فيهم من زماااااان بس توا ماعاش يفلقو فيا هلبااا
احمد ساوي تقعميزته:حاس جسمي بيتكسر وقد ماخديت منهم ماعاش يفلقو فيا حتي اني
منتصر:تبي اقوا منهم عندي
احمد سكت شوي بس ألم جسمه ورعشته ونبضات قلبه لقوية خلوه يتكلم:اي نبي
منتصر رفع حاجبة بمكر:تمام غدوة نجيبلك
احمد:ماعندكش توا مش قادر نتحمل لا غدوة
منتصر سكت شوي وشبح لشنطه:مش عارف ممكن عندي وحده
ووقف منتصر ومشي قعد يفتش في شنطه لين طلع يبرة ومعاها علبة زجاجية معبية بمادة مخدره "ترامادول"
ورجع لأحمد لحس بالخوف وقال:يباري
منتصر:اي
احمد:مخدرات
منتصر:هههه امالا شني ، كان ماتبيش خلاص لكن رد بالك تتكلم خليها بالتريس
احمد هز براسه وفك منه اليبرة:لالا خلاص هاتهم مش قادر نتحمل
شد احمد راسه ووقف وسيب منتصر يبتسم ويشبحله كيف طلع من الدار ومشي للحمام
سكر احمد علي روحة وقعمز علي ارضية الحمام المسخة من غير مايهتم وفتح اليبرة وعباها ومد يده وشبح للوريد وضربه فيه من غير مايشد يده بيستيك او حاجة ضربها وهوا حاس بالسائل ينتشر في جسمه وحسسه براحة بس وماعاش همه انه ولا مدمن ولا انه كلام محمد صح كل اللي همه انه مرتاااح توا مرتااااح ويبي غيرها باش لما ينوض عليه الألام وصداع الراس يضربها ويرتاح.
قعد مقعمز علي الأرضية فترة لين حس بدموعة السخونه علي خدوده....
__
سفيان:خديت التداكر
فارس:اي الأتنين الطيارة ان شاءالله
بتسم سفيان:ان شاءالله توصلو بالسلامه
طبطب فارس علي كتف سفيان وبتسم ورجع شبح قدامه للبحر وقال:اخي لكن كنت نحسابك بتمشي معانا
سفيان سكت شوي وقال:واخي ياخوي تعرف روحك مظلوم بس مش قادر تبرئ روحك صعب نمشي ونخلي الناس حاطه في رقبتي دنب موتت انسان
فارس:باهي اهو قعدت وجريت علي حقكك وتبي تبين برائتك وطلعتها تحسابهم بيقولو ياناري تي هما هدا وين بزيدو اللوم بيقولو من عمايله السوده وماضيه لمعفن لين الشبهات جت عليه طول ياخوي كان بدور علي رضي الناس عمرك ما ح توقف علي رجليك
سفيان:لكن فيه ناس ظروري تعرف برائتي عيلته متلا علي الاقل حتي في المستقبل لما تبي تولي هني يخلوك في حالك واني لا امتي بنقعد هارب منهم تي هدو خوته كان لقوني يرتكبو فيا جريمه وهما يحسابو روحهم خدو بتار خوهم علي الاقل نسكر موضوع التار هدا
تنهد فارس:مش عارف اني دير ليريحك المهم في اي وقت تبيني فيه ح تلقاني علي راسك
قرب سفيان ولف يده علي رقبت فارس وتكي راسه علي راس فارس ، وقال :هههه اول مره نقولها بس والله مامخليها في قلبي راني نحبك ياكلب
ضحك فارس ولف حتي هوا يده علي رقبت سفيان:ههههه حتي اني نحبك ياجحش
__
كان محمد واقف في البلكونه في شقته اللي في وسط لمدينه ويشبح في زحمة الناس للوطه .
حس بهزان تليفونه ليشرين طلعة من جيبه وأول ماشاف رقمها ، نسي عادته الشينه متع انه يرد في اخر لحظه ورد طول وقال ببتسمه:غلاي
بس اول ماسمع صوت بكاها وصوتها الممزوج برشفات متواصله:محمد
ضيق محمد عيونه وشد بيده بالقوه في حديدة الحماية متع البلكونه:كنك شن فيه عليش لبكي
غالية قالت من بين دموعها:و..و..وين ا.احمد عل.اش قعد...ما..لقيتاش اه ..ه.هوا فيه حاجه وتبيش تقولي
مسح محمد علي عيونه وهوا يدكر في حالة احمد وقال بصوت واطي يحاول بيه انه يطمنها ويهديها:وعليش مانقولكش اصلا نا نقدر نخبي عنك حاجه
عيطت غالية بعبرتها:كداب انت تكدب عليا خوي ابصر خيره وله
محمد:غلاي
غاليه رجعت عيطت:اني مش غلاك انت سيبتني بروحي خليتني هني بروحي وجبتليش خوي توا تعالا تواا نبيك اني نبيك محمد اني خايفه اني نبي نولي غادي نبي خوي ونبيك اني محمد نبيك
وقعدت تبكي بهستيريا وماعاش قدرت تتكلم معاه وهيا اتمتم ، نبيك اني خايفه نبي خوي نبيك محمد.
قعد محمد ساكت وهوا حاس قلبه مضايق بيه وماباش يدوي لين حس انها هدت من الهستيريا ، تحمحم وقال:غلاي
ردت غاليه بعبرتها لترفع فيها:ها
محمد:اششش دموعك غاليات علي
وسكت شوي وهوا يسمع في نفسها العالي وشهقاتها لخفيفه وكمل:فيه حد مضايقك غادي
ردت غاليه بكل صدق:اي
محمد:ايه باهي وين السانك
غاليه:نعرفش
محمد:ولا ماتعرفيش اطولي السانك الا معايا نا ياطشه
سكتت غاليه وهيا تمسح في دموعها وتاخد في النفس وطلع فيه وهيا تحاول تنطم تنفسها.
محمد:غلاي
غاليه:ها
محمد:نا مانكدبش عليكي ، خوك بأذن الله نجيبه لكي نا مانضيعش في وقتي هنا قعد ندور عليه ونحاول نجيبه معايا
وسكت شوي وبعدها قال ببتسامه:ونا مش مسيبك نا حاطك عند هلي يعني في الحفظ والصون نا لو مش مطمن عليكي ره مانخليكي غادي بروحك ، فهمتي
غاليه:ن.ن.نعرف
ضحك محمد وعجبها:ن ن ن ن نعلي من البكيات
بتسمت غاليه من بين دموعها ليقعدات يسيلو في الدموع وتمسح فيهم.
كمل محمد كلامه:تو امسحي دميعاتي الغاليات هي ، واللي يضايقك ماتسكتي له اعطيه علي راسه و وريهن السان
وقبل ماترد غاليه تسكر الخط ، ضيقت غاليه عيونها وشبحت لتليفون ، نفخت وهيا تضرب في جبهتها بكف يدها:الرصيد تم
بس ماهيا الا تواني ورجع محمد اتصل ، بتسمت غاليه وردت عليه.
محمد:كنك سكرتي
غاليه:مش مني الرصيد تم
محمد:باهي قوليلي شني اسم مدرتسك
ضيقت غاليه عيونها وقالتله علي الاسم وهيا تسأل:وعلاش
محمد:ماتبيش تكملي قرايتك وتولي أبله
غاليه ضحكت:لكن كيف بنمشيلها
محمد رفع حواجبه:انتي تقمعيزه في الحوش وواجد عليكي ، تي شن كيف بتعديلها نا نجيب لكي وراقيك ونسجلك في وحده من المدارس لعندنا
غاليه:اه
محمد ضحك:العربي لما يفهم .....
وسكت ماباش يكمل
ضيقت غاليه عيونها وقالت بتنقنيق:سايرني لو سمحت اني راهو ره مضايقه
رد محمد عليها بنفس الطريقه وبتنقنيق:احيه ياغلاي و نا مضايق
وضحك وعدل صوته وكمل:عدي اعطيهن علي راسهن لمضايقينك
غاليه:علاش وين بتمشي انت
محمد:بعدين نكلمك ياقلبي عدي رتاحي توا مغير عندي شغل تمام ياغزال الريم
غاليه تنهدت ببتسامه علي كلامه العسل وقالت:تمام باي
بتسم محمد وسكر منها وهوا يخش ويسكر في البلكونه وخدي مفاتيح السيارة وطلع.
طلع محمد بالسيارة وأول مكان مشالة هيا المقبرة اللي مدفونه فيها ام غالية "أمنه" خش للقبر طول وماتعبش انه يلقاه ، لانه كان تراب وعليه لوحة الاسم فقط و مش زي غيره اللي مبني بني ، طبس خدي رشاده ملوحه قريبه من القبر ، وطلع من جيبه ورقة ، حطها فوق القبر وحط فوقها الرشاده ، وقعد واقف شوي وجت في داكرته غير اراديا لما أخر مرة هجم علي حوش غاليه حاولت أمنه تحمي ولدها منهم بس دفها محمد بكل قسوه لين طاحت لوطه .
تحمحم محمد وحزت في نفسه كيف ماسخفش عليها في وقتها حس انه هوا سبب في موتها من قهرتها علي ولدها اللي قهرها بيه ، مسح علي وجهه بديه الزوز ورفعهم قدامه وقرالها الفاتحه وطلع من المقبرة .
__
وقفت ايلاف قدام باب الكوجينه وقعدت ادربك:ويلي شعلو ضيهم ان شاءالله نديرو زيهم
طلعت روان من الدار وقعدت ترقص وكملت:ويلي شعلو فلاشهم ان شاءالله يتمو عراسهم
زغرطة ايلاف بصياح هههه لين سراج طلع من داره وهوا يعيط:نهاار احرف ، يالنهار احرف زغرطي زين ازح
ضحكت روان:هههههههه ازح حتي من سراج لاحظ انها مش زغروطه بكل
ضيقت ايلاف عيونها وخبطت علي الباب بالقوة:خزي حتي المجامله ماتعرفوها وجوه فقر
صيحت نجيه من الدار:يابنت ايلاف زودي تليفونك يشرين
شبحتلهم ايلاف علي الجنب:اقعدو فاها غر نمشي نهدرز علي مرت خوي المستقبليه خيرلي
عوج سراج فمه:تو نشوفوها لمحبه هدي بعدين كان ماتبدو فيها تيروات وبونيات مانتسمه
ضحكت روان وايلاف مشت لدار تجري وهيا تشبح في تليفونها ولرقم ليتصل بس ردت طول تحسابه صفاء:الو
سفيان:ايوا
وفي نفس اللحطه خش رؤوف عليها وقال:اوفي زودي حداديلي سوريتي
وضيق رؤوف عيونه وقال ببتسامه:تكلمي فيها
قعدت ايلاف تشبحله وهيا مخلوعة بس تحمحمت وهزت راسها طول بمعني لا وقالت:لا
رؤوف:باه بسرعة تعالي
رجعت ايلاف هزت راسها بمعني باهي وهيا تشبح لرؤوف لطلع وسكر وراه باب الدار وخلاها مصدومه من الموقف ..لين سمعت صوت سفيان لرجع قال:ايلاف وينك
ايلاف:خيرك متصل شني تبي مني انت تغيب تغيب وتطلعلي تعكرلي في حياتي
سفيان:اني نعكرلك في حياتك طلعت
ايلاف:تي انت دمرت حياتي مش عكرتها بس ولا ناسي شن مداير
سفيان علا صوته:الف مره قتلك خوك ماقتلتاش وتو تشوفي بعيونك كيف حق ربي بيطلع ونتبتلكم كلكم انكم ظلمتوني
ايلاف:ان شاءالله يطلع الحق معاك والله اول مره في حياتي متمنيه نكون اني الغالطه
سفيان تنهد:واللهي غالطه واللهي ظالمتيني ياايلاف
ايلاف:اتبتلي برئ روحك في عيوني وفي عيون عيلتي مانبيش دوه مانبيش كلام نبي الحق يبان ياسفيان
سفيان سكت شوي وهوا يشبح في محمد لخش عليه انتظار ورد قال:بأذن الله ماعاد سامعه صوتي ياايلاف وح تشوفي برائتي وربي معاي
ايلاف:ان شاءالله
سكر سفيان من ايلاف وفتح الخط مع محمد من غير مايفكر:الو يافندي
محمد:البس عسكري وتعالا لي في #####
سفيان:تمام يافندي
سكر سفيان من محمد وخدي تاكسي ولا لشقه لبس العسكري ونزل بسرعة خدي نفس التاكسي لوين ماقاله محمد
اللي كان يستني فيه قدام مدرسة غالية ، لكان يبي يخش بالبس العسكري وبسلاحة باش يرهبهم ولما يطلب ملفها مايردوشي او يقولو لازم ولي امر
وصل سفيان واول ماشافه محمد نزل من السيارة وقرب منه وهوا ملاحظ استغراب سفيان لقال وهوا يشبح للمكان:شني بنديرو هني
محمد اشر بحواجبه علي المدرسه:نبي ناخد ملف طالبة تقرا هنا
مسح سفيان علي شعره وضحك:والحل المناسب باش تاخده من غير تعركيل لبسنا هههه
محمد طبطب علي كتف سفيان:ليبيا حره يارا خش خش
خشو هما الزوز للمدرسه وكانت لعيون عليهم سألو علي الإدارة واللي سألوه طلع المدير نفسه ستقبلهم ومشي هوا وياهم للإداره
المدير:تفضلو ان شاءالله خير شنو المشكله
بتسم محمد:ربي مايجيب المشاكل نا جاي نبي ملف طالبة هنا
المدير:اختك
سكت محمد شوي وحس بنظارات سفيان لخلاته يشبحله بخطفه ورجع حط عيونه في عيون المدير وقال:لا اخت صاحبي
المدير ارتبك وقال:هوا لازم مايجي ولي امرها بوها خوها ظروري
محمد:باتها متوفي و..وخوها مش موجود هنا توا وطلب مني نا نجي بداله
طق باب المدير وخش استاذ:السلام عليكم
ردو عليه السلام كلهم ورجع محمد قال:ياريت ماتردني انت عارف الامتحانات قربن وخوها مازال مطول مش راد توا
المدير:وشنو اسمها لبنية
محمد:غالية عبدالسلام ###
رفع المدير حواجبه والإستاذ قال من غير تفكير:هدي لهربت مع صاحبها
رفع محمد راسه فيه وشبحله شبحه لين لستاذ عتدل في وقفته وعدل كلامه:قصدي الناس قالو هربت مع صاحبها والله وعلم
ضغط محمد علي قبضة يده وشبح للمدير وغير صيغة كلامه للأمر:اعطيني ملفها
وقف المدير:تمام شوي ونجيبه
طلع المدير وطلع قدامه لستاذ وخلو محمد يغلي من الداخر والعصبيه امبينه علي وجهه لين سفيان لاحظ عليه وماقدرش يكلمه حتي.
مل سفيان ووقف وهوا يلود يمين يسار ، تلفت لمحمد لمقعمز وهوا يهز برجله ويطقطق بصوابعة علي طاولة المكتب وقال:اني طالع برا
محمد:عدي
تلفت سفيان وقرب فتح الباب المردود بشويه بس قبل مايزيد يفتحه سمع صوت الأستاذ نفسه:اكيد هدا هوا لهربت معه وجاي يسترجل باالبس متعه اللي ابصر وين لاقيه
المدير:فكينا وسكت نعطوه الملف اصلا هكي ولا هكي كان بيقعد زينه هني
الاستاذ:تي شني تعطيهوله بنت لحرام خساره فيها لحياة بعد ماوطت راس خوها المسكين مزال عندها نيه في القرايا قلهم راح
وفجأة حس سفيان بروحه انجبد التالي وقبل ما يتلفت او يستوعب شبح محمد لهجم علي الإستاذ وضربه علي وجهه بالقوه وقعد يركل فيه برجليه لين المدرسه كلها تلمدد عليهم الاساتسه جو يحزو فيه وماقدر حد الا سفيان اللي شده بقطع الرقبه وبرغم هكي محمد قعد يعافر ويشبح للاستاذ لدم لطخ وجهه وحوايجه ويتكلم وهوا مسكر علي سنونه:وربي مافي حد ولد حرام ياولد لحرام غيرك ياكلب البنت اشرف منك ومن هلك كلهن
وقف لستاذ بمساعدة المدير والاساتسه وقعد يقاوم وقال بصياح:برا اسمع شن يقولو عليها مش اني لقلته لكلام هدا ماسدهاش تجيب في الدكوره لحوش بوها هربت بكل من الحوش باش تاخد راحتها معاك وتبيع روحها
انجن محمد لقعد يعافر في سفيان بالقوه بس جي ستاذ تاني وشده مع سفيان وهما يحاولو يبعدوه من لستاذ الوقح لخاف ومشي مع الاساتسه لشحوه بعيد وكان يمشي ويتلفت لمحمد لصيح عليه ويتكلم بالقوه:وربي هي وربي ياولد ال..... مانك محسوب معانا وماك راجل تدوي علي عراض الناس وربي كان ماهي حرمة ومدرسه وفيه عويلة هنا لكان الدم وصل لركاب
المدير:سامحنا ياولدي باللهي امسحها في وجهنا
دف محمد سفيان والاستاذ بالقوه من عليه ورفع راسه شبح للاساتسه والابلات والصغار الواقفين يتفرجو عليه ، ورفع يده وقال:كلامي اسمعوه كويس وعاد ماتوصي الليبي علي عواد الدوه غالية مرتي علي سنة الله ورسولة مرتي وعندي الحق ناخدها معايا لا هربت لا باعت روحها
وشبح للمدير وقال بعيطه بصوته لغليط:جيب ام الملف
المدير تلفت وجبد الملف من الأرض لطاح منه لما يحز بين محمد والاستاذ ومده لمحمد لفكه منه وطلع وطلع وراه سفيان يجري ، وخلو المدرسه فوقي لوطي ، والطلبه واقفين مصدومين وبينهم صفيه لواقفه مصدومه وهيا تتلفت لصاحباتها:غالية تزوجت معقوله
__
في الليل كان احمد مقعمز برا ومتكي علي الكرسي بظهره ومرجع راسه التالي وحاس براحة وكأنه ملك
حس بحد قعمز جنبه من صوت الكرسي لنجبد ، فتح عيونه وقام راسه وشبح لحسام
حسام:السلام عليكم
بتسم احمد براحة:وعليكم السلام ورحمة الله شن جوك ياصاحبي
مسح حسام علي راسه:الحمدالله
وسكت شوي وهوا يرفع في راسه ويشبح لأحمد لمبتسم وباين عليه الراحة ضيق عيونه وقال:شكلك فرحان
احمد:اكتر ماتتخيل تعرف فرحان هلباااا
حسام:دوم عليك
احمد:ان شاءالله وخيرك انت قالب خليقتك ياصاحبي تي فكها
حسام تنهد وبتسم بهزوه:كيف بنفكها من لهموم لعلي ظهري امالا
احمد:شن هيا همومك احكي الادان صاغية احكي ورتاح
حسام اتكه علي الكرسي بظهره وقال:بوي مريض ومحتاج عملية علي القلب ، واني حتي ربع حق العمليه مانكسابه قعد ننحرق كل يوم علي حالته ، صح يمشي ويتحرك بس لما ينكس ويمرض نقعد شاد قلبي ونجري بيه بين المستشفيات لمعفنه خايف يوم يلعبو فيه ويرزوني في السند لعايش علي خاطره ......
.
.
.
#يتبع_للبارت_لبعده
____________________________________
بداء كتاب الرواية في 2019 / أبـــ4ٰـــريل / 7
تم وضع قَفلة لـ الرواية في 2019 / سبتــ9ٰـــمبر / 25