عشق في بلاد حروبها لا تنتهي ( الفتنه و الثأر)

البارت 10

_
_
#عشق_في_بلاد_حروبها_لا_تنتهي
   الحلقة 10
(الياقوت)
في الحلقة السابقة
مسح محمد علي وجهه ونزل خطف خدي السلاحه من علي الارض وهوا يسحب فيه:اها يصير
وضرب تحت رجلين زياد طلقتين بضحكه لين زياد نقز بخوف:كنت فاطن بحفرة الصقر ليا هااا يابيوع
وتلفت وهوا يلاحظ صوت الرصاص خف هلباااا سيب زياد ومشي بخطوات سريعه جيهت الشباب يشوف في الوضع لكان تام والشباب محاصرين جمعة الصقر وكان فيه زوز مقتولين.
.
قراءة ممتعة 💛
#البارت_العاشر
.
كانت غالية مقعمزة قدام احمد وهيا شاده يديه وتبكي:الحمدالله الحمدالله روحت كنت خايفه بروحي قريب متت انت مشيت وماما ماتت وخلتني بروحي
نزلو دموع احمد وزاد شد في يدين غالية:اهو وليت بأذن الله ماعاد نخليك بروحك
قربت غالية وحضناته بالقوه ووخرت وهيا تمسح في دموعها:كيف خلوك تمشي
احمد مسح علي جبهته وكان حاس روحه معفن بكل وريحته اخي:والله مانعرف فجأة جاني واحد ساعدني نطلع ، وحني طلعنا من هني والدنيا نقلبت من هني
غالية:اي صوت الرصاص هلبااا صح
احمد:اي هجمو علي الصقر اشبح شن صاير بس ربي يستر اكيد لبلاد بتنقلب
تنهدت غاليه:لقلب ليقلب المهم انت روحت
حرك احمد يده وهوا يتوجع:حاس روحي مدقدق ادقديق
رفعت غاليه يدها لوجهه وهيا تمس في جوروحه:قطع يديهم ان شاءالله ، خش دوش واني نوض نديرلك حاجه تاكلها
هز احمد راسه وناض بشويه عليه وهوا يتألم .
__
نادين:واااه تو قلبي بيقعد غادي
فاطمه لبست وشاحها:لا غادي لا هني ، هني روحك مش ح تصيرله شي قولي ان شاءالله حني مايصرنا شي منه
فرح:اي والله طالع احرف ولدك مشطنه
ضيقت نادين عيونه:انتي الحرفه ولدي مشاءالله عليه غير مستغرب قعد في الجو بس
فاطمه:الله علي من تكدبي انتي
ضحكت نادين:خزيه هههه الله غالب عليا طالع لبوه
فرح:وانتي الصادقه طالع لي امه
نادين:بري روحي تره روحي
فتحت فرح الباب:حتي اني مروحه اقعدي فيها ياحرفه
فاطمه:هههه تصبحي علي خير
طلعو فاطمه وفرح ووصلتهم نادين لا باب الجنان وخشت للحوش ، واول ماخشت للمظبخ خلعها فارس لسكر التلاجه وقال:حرفه جعان
نادين:واااه من وين جيت مش كنت مهناش
فارس جبد الكرسي وقعمز وهو يأشر بصبعه علي باب الكوجينه:خشيت من هني جعان حطيلي عشي
قلبت نادين عيونها وقعمزت علي الكرسي مقابلته وحطت رجل علي رجل:ماعاش فيه كمل دير خبزه وجبنه ولا قول لخالتك اديرلك
وسكتت شوي وقالت بسرعه:ولا بنتها
ضحك فارس وهوا يقرن في حواجبه:تي نوضي خيرلك جعان
هزت نادين كتافها:مانبيش مش تبي تهدرز علي خالتك
وسكتت شوي ودارت نفس اللقطه وكملت بسرعه:وبنتها خلاص نوض دير بروحك
ضحك فارس وهوا يمسح علي وجهه:يانهارك لحرف كان ماتنوضيش
نادين:حوش امالية جنبي نقدر نمشي حرجانه حتي توا ره
هز فارس راسه:ماتربي مراة كان مراة زيها شن رايك نجيبها بنت خالتي هدي عليك
شبحتله نادين وقلبها ولا نااااار وقالت بعصبيه مكبوته:وعلاش لا اصلا انت من البدايه تبيها ، صح ولا
رد فارس بكل برود:صح
ضيقت نادين عيونها وحست انها ولا شيء:اممم كويس برا خودها عادي مش امانعه حتي اني
بتسم فارس وشبحلها:تم هدا يوم المني والله
وقفت نادين وفتحت التلاجه وطلعت صونية مسلفره نحت السلفر وحطتها في المايكرويف تحت نظارات فارس لقال:شن هدا
تلفتتله نادين وباين انه وجها تغير وعيونها مدمعات:عشاك
فارس:مش تم
رجعت نادين تلفتت:لا اكيد مش ح نخليك من غير عشي
ودموعها نزلو وهيا تحطله فيه وتطلع وتخلي فيه ياكل ، خشت لدار وهيا تحس انه مستحيل يحس بيها او يحبها زي ماتحبه حتي لو تعرف انه كلامه لقاله مجرد كلام وقاله لانه بس يحب يستفزها بس حتي هيا انسانه وبتحس حتي لو عارفه لكلام مش ح يصير بس ح تحسه
__
تاني يوم الصبح روح محمد من المقر وهوا يدرس قدام عمارة في وسط لمدينه والزحمه ونزل وهوا يرد علي التليفون:ها
زياد:الو يافندي
طلع محمد مفاتيحه من جيبه وفتح باب الشقه:كنك يازياد ندوش بس ونجيكم اعتقوني
زياد حك راسه:لا بس نبي نقولك حاجه انه هوا ره الصقر هرب ماشدوشي
سكر محمد الباب وقعد متكي يده عليه:كيف مامسكوشي مش خليناه في المقر كيف هرب
زياد:الجمعه كلهم قعدين وأسروهم بس الصقر هرب وقبل حتي ما يوصلو مأسسة الدوله شكله في حد حذره في اخر لحظه
ضرب محمد يده في الحيط وهوا يسكر في وجه زياد ويمسح علي وجهه بعصبيه ، وخش من الممر الطويل ونهايته صاله كبيرة فيها بلكونه كبيرة ، لوح محمد مفاتيح  السيارة والحوش علي الطاوله وطلع للبلكونه اللي اطل علي الشارع والمحلات ودوشة الناس وزحمتهم ، طلع باكو الدخان وخدي سبسي وحطه في فمه وولعه وهوا يشد في تليفونه ويدير في مكالمه وحطه في ودنه يراجي في الرد
...:الو محمد
نفخ محمد الدخان وتحمحم:ها يافندي تمت المداهمه
...:عارف لكن مش علي اتم وجه
محمد نفض السبسي وقال:اي الصقر هرب لكن مش مطولة طيحته جمعته كلهم اسرة عندنا موضوعه منتهي ومش ح يصبي معاه حد وهيا مقلوبه عليه
...:لكن هدا غلط وغلطك انت يامحمد ماكان حد يعرف بالعملية الا جمعتك يعني اللي مقايله واحد من رجالك
محمد:صح بأذن الله نجيب راسه
...:غلطة الشاطر بألف يامحمد وغلطك انت بمليون الصقر مش هين وما هرب الا عرف انك معانا ومن رجالنا وح يدورك وين ما انت ومرات يهددك بعيلتك الاحسن الفتره هدي تختفي علي الانظار اكيد عنده جوسيس بينا وح يسربو اخبارك ليه
محمد:تمام يافندي
__
فتحت ايلاف عيونها علي صوت تليفونها ليهز جنبها ، مسحت عيونها المنفوخات من لبكي وتلفتت لتليفون واول ماشبحت رقمه قعمزت علي طول وهيا تتلفت لروان الراقده . خدت تليفونها وطلعت بسرعه لصالة وردت:الو
سفيان:ايوه نقدرو نتكلمو توا بهدوء
خدت ايلاف نفس كبير وقالت: بس علي خاطر العشرة اللي نادمه عليها
سفيان:عندك حق تكرهيني ومالومكش ياايلاف لكن علي الاقل اسمعيني تمام
سكتت ايلاف من غير ماترد ف كمل سفيان:اني ماقتلت حد صح الماضي متعي اسود شرب وصياعه وملشيات لكن ، لكن قلبي حي مانقدرش نقتل اني ضعيف بكل ياايلاف وبدات شخص مادارلي شي باللهي عمرك لقيتيني واقف علي حمزة ولا حتي بينا صحبه تي اني مانعرفاش الا منك كنت
ايلاف نزلو دموعها:به انت قلتها مادارلك شي علاش قتلته
سفيان صيح بالقوة لين ايلاف انخلعت:اني ماقتلتاش واللهي ماقتلته ياعالم ياناس ماقتلت حد اني افهموني باللهي عليكم كل اللي صار كنت اني مروح من الخدمه لقيت واحد يتنابش مع خوك من الاول والله مابيت نقرب قلت في خاطري مفرخ بس قبل مانخش للحوش سمعت صوت ضربت سلاح وعياط حمزة تلفتلهم ومشيت نجري والولد اول ماشافني طلعت سلاحي هرب علي طول واني من تفرفيشي مالهيتش فيه زي لحمار ماشديتاش وشديت حمزة لمتكي علي بابكم وشاد مكان الطلقه كنت نبي نساعده جيت ننقض فيه والله العظيم
ايلاف:كدب كدب كدب كله لقلته كدب علاش هدا كله ماقلتاش من البدايه
سفيان:وقسم بالله حكيته كله لبوك وخوتك في قسم الشرطه كله قلتهولهم لكن ماحد صدقني عشت اسواء ايام عمري ياإيلاف زي ماانتي فقدتي خوك اني انظلمت منكم كلكم كنت متأمل بالمحكمه تاخد اقوالي تشوف بصماتي وبصمات الرصاصه ستنيت وكنت متأمل بس ماصار شي حبسوني هكي من غير مايحكموني او ياخدو ادلتي انظلمت وربي بس العالم
رشفت ايلاف دموعها وهيا مش قادره تستوعب ومش قادره تصدق ومش عارفه حتي شن تقول...
__
فتح محمد علي روحه امية الدوش وهوا يغمض في عيونه ويخلي في المية تنزل عليه وهوا يدكر في جثت الموته حس بقبضه في قلبه صح انه جندي ومهمته يحارب ولازم مايقوي قلبه بس لما يدكر حرقة قلبه علي خوه وشن صار لأمه من بعد موته يقول في خاطره تراهو لمات عنده عيله عنده اخ وام واخت بيتوجعو علي موته ، بس مرات يقول وهوا يقوي في قلبه هوا لختار طريق الغلط ، مسح علي وجهه من لميه وهوا يفتح في عيونه وكمل تفكير وكمل علي جملته ، و لكن هوا مقتنع انه هدي الطريق الصح زي ما اني مقتنع بالطريق لنمشي فيها صح ، زعما غلط لندير فيه ؟ سيبت حياتي وجريت ورا الدوشه هدي ؟ زعما اني جندي معترفه بيا الدوله ولا مليشياوي محيتني الدوله ومصنفتني ارهابي ؟ اني شني ؟ زمط ريقه وهوا ياخد في نفس كبير وغمط عيونه تاني واول ماغمظهم سمع صرختها اللي مرافقاته من لما سمعها صرختها المتوجعه ، عيونها ، دموعها وهيا وووو..:ان شاءالله ادوق لدقته ان شاءالله ينحرق قلبك انت وعيلتك كلها زي ماحرقت قلبي اني وعيلتي
واهم شي دعوتها لترن في ودنه كل يوم
حتي لو انه قوي وياما سمع دعاوي بس يأثر فيه مهما يكون هوا انسان يخاف ربي مش كان يحارب وشاد سلاح يطلع في الرصاص الحي يعني ماعنداش ضمير ، فكر محمد هكي وهوا في داخله دوشه ماعاش بت تكمل اصلا الصراع اللي بينه وبين روحه من لما خش في لوجيج اللي قلبله حياته ، حياته اللي كانت هاديه خدمه في صحراء يقعد سبوعين او شهر يروح مع عيلته صحابه ووو خوه بس فجاءة انقلبت علي راسه انقلبت وخسر حياته وخوه وراحته .
__
فاتو ايامات ومحمد مشي مع امه وعائشه لبنغازي وهوا باله هني وفي احمد ومجدي لمش عارف وين مكانه ، اما غالية ف كانت تعاني في احمد لتعب هلبا والضرب لكلاه كله ولا عليه ببرده قويه ، وايلاف ف من مكالمتها مع سفيان هداكا اليوم سكرت تليفونها بكل وهيا متلخبطه وخايفه تصدقه وتخون ضميرها ووعدها انه تحوله من قلبها زي ماقتل خوها وحوله من حياتها او مش هوا لقتله وهيا لكانت تفكر هكي ، او هوا لقتله وتفكيرها هوا الصح ؟
هدا صراعها كل يوم وكل ساعه ودقيقه وتانيه لدرجه الكل لاحظ عليها شرودها وصفوتها .
اما ياحنه نادين ف كانت نار من الداخل و تلج من برا تغلي علي فارس اللي الامبلاة و علي زيارات خالته وبنتها اللي ماعاش بت اتم بكل كل ليل ياغدي ياعشي ومش قادره تفتح فمها ولا تتكلم معاه وهيا تفكر انه هوا فرحان بزياراتها اكيد بيفرح لانه ح يشوفها ويسترجع دكراياته مع حبيبته ، وكان تفكيرها مره يفكر هكي ومره هكي.
كانت واقفه في المظبخ تشوف في لغدي حست بدوخه وقريب طاحت بس ستر ربي فات فارس من قدام المظبخ وشبحها شاده في الرخامه وخلاص بطيح جي بسرعه شدها من خصرها:بسم الله
ولفتها ليه وهوا يمس في وجها:خيرك
شدت نادين راسها بداها:مش عارفه حاسه روحي دايخه بكل
خشت فاطمه و نهي لعيونها قريب يطلعو علي فارس لقريب هلبا من نادين وهوا لاف يده علي خصرها ويده التانيه يمسح علي وجها بيها
فاطمه قربت عبت طاسه اميه:خليها تشرب
جبد فارس الكرسي وساعدها تقعمز عليه:ديريلها اميه وسكر
مدتله فاطمه طاسة لميه وخلاته يشرب فيها وهيا قعدت ادير في ميه وسكر.
نهي قربت منهم:نوضي الداخل بالك نو هني
نادين طبست راسها وكانت بتتكه بمرافقها علي رجلاها بس فارس قرب منها طول وخلاها تتكه علي كتفه وهوا يمسح علي شعرها:نوضي نرفعك يديرولك تغديه ولا حاجه تصحصك
مدت فاطمه لميه والسكر:تعرف من امس وهيا جايتها الدوخه بالك عندها فقر دم
نادين:لالا شوي بس غير شكلا من النو
فارس بعدها من عليه شوي وخلاها تشرب لميه والسكر وهوا يمسلها في وجها وباين خايف عليها هلبا لدرجه حست بيه نهى لقلبها وجعها ، وجعها انه ممكن نساها بسرعه هدي وحب مرته لهدرجه هان عليه عشرت وحب سنين بينهم .
__
شبح محمد لجده برفعت حاجب وهوا كيف يمرس في البزين بيده ويقول:هي هي سمو بالله
وخر محمد وتكه علي الحيط لين تلفتله جده:تي زود كنك وخرت
محمد شبح لسالم و عمه وولاد عمه ايمن و صلاح لبدو ياكلو ، هز راسه وقال:لالا صحتين ماعنديش نيه
قرن جده"عبد السلام"حواجبه:كل النقان علي امك وفي الاخير ماعندكش نيه
مسح محمد علي شعره ووقف:حموضه ناضت عليا صحتين
وطلع وخلاهم ياكلو ، ووقف في جنان وهوا ينفخ:جعان الزف
جاه صوت من وراه:خاااالو
تلفت محمد علي طول وهوا يشبح في بنت اخته هداية لجاته تجري ، بتسم محمد وقامها في حضنه وهوا يبوس فيها من خدها:ياروح الخالو
قلبت إلين شفايفها وهيا تلف في يداها علي رقبت محمد:نا جعانه وااااجد وحبش هضا لمديرنه
ضحك محمد:يانعليا نا لمتحبش ، باهي شني تبي نجيبلك
زمطت إلين ريقها وقالت بتلذذ:بيزا كبيييييره
محمد نتشها من خدها وهوا يخش:تي بيزا بيزا ههههه
خش خدي مفاتيحه وهوا كيف طالع تلقاته هداية لمخششه صفرة لغدي للمظبخ:وانتي هنا
محمد:بنعدو نا وياها لمكان وجايين
هدايا:وين
محمد شبح لإلين لي في حضنه وغمزلها وهوا يبوس فيها:لمكان
ضحكت هداية:باه تغدية
محمد:ملا غدا جدي زهقلي كبدي وهوا يمزرط فيه بيده
هداية:ههههه مرس البزين عادي ياما كلينا من تمزريطه ونحنا عيال
إلين:هيا خالو نعدو
هداية:مغير وين بتعدو قولولي
محمد:برمه بسيارة وجايين
هداية:ماتتعطلنش نبيك في موضوع قبل مانروح
محمد:تمام
__
فتحت ايلاف عيونها علي وسعهم:صفاء صفاء صاحبتي
نجيه:اي صاحبتك امالا صاحبت مني
روان ضحكت:مايطلع منه ولدك هدا شن خطرها علي باله
ايلاف:تي واني نقول علاش يجي يروح بيا هوا في ايجازته ، قال بريح بوي قال تاريته علي خاطر صفصوف ههههه
روان:هههه يعطيهالك
نجيه:بطلو تسهويك وانتي كلميها خودي منها الزبده من غير ماتخليها تلاحظ عليك كان اماليها يبو يعطوها ولا لا
ايلاف قالت طول:لالا يبو بسيف عليهم
روان:انتي بتسيفي عليهم امالا
ايلاف رفعت اكتافها:اي نسيف وعلاش لا علاش صاحبتي امالا كان يبيها خوي خلاص تقول تم من فم ساكت الا رويفه عاد
روان:ههههه نوضي تره نوضي
دفتها ايلاف بضحكه:نوضي انتي
نجيه شبحت لإيلاف:طيب فينا ولا المزاج باهي
تحمحمت ايلاف:وخيره مايكونش باهي
نجيه:وين نندري عليك مره تتبكي ومره تقلبي وجهك وتسرحي ومره زاهيتلك
روان:حق مافهمناك كيف
ايلاف رفعت كتافها وهيا تجبد في الريمود وتقلب في المحطات:شي عادي من يوم يومي هكي
رفعت روان حاجبها:لا والله هدا جديد
سكتت ايلاف ومابتش ترد عليها
__
#بعد_اسبوع
كانت غالية مروحه من المدرسه علي رجلاها هيا و سارة لتزند علي روحه بيداها:واااه نو نو شن هدا ياربي علاش والله مادرنا شي حني هدو لكلاب هما لقالبينها علي راسهم
تلفتتلها غالية وهيا تضحك:هههه هشي هشي بالك ربي يحن عليك من عمايلك السوده ولسانك المتبري منك
وصلو قدام حوش سارة لتلفتت لغالية وهيا مضيقه عيونها:اخزز غر انك اكبر مني بس بنحترمك
غالية شاورتلها بيدها وقالت:مشاءالله عليك ديما محترمتيني مه نشي نشي تبطليش
صيحت ساره وهيا اطق في الباب برشاده:وتقوليلي لسانك طويل والله لا انتي لطويل
ضحكت غالية وهيا تركز في السيارة اللي قدام حوشهم ، وقفت قدام الباب شوي وهيا تشبح لسيارة:من عندنا زعما
ونفخت وهيا تفتح في باب اجنان بشويه:واااه ياربي اني عيانه عيانه ماخطري في ضيووو....
وسكتت وهيا تسمع في صوت احمد:جيب عويلتك يشوفو اختي تعجبهم ولا لا بعدين ندوو في الموضوع
وخرت غالية طول وقعدت واقفه قدام الباب وهيا تسمع في صوت راجل:تمام يوم الأتنين شن رايك نجيبهم واني خوي نضمنهولك يخدم في  الشرطه القضائيه وبحوشه وبسيارته وزيد شوفه انت
احمد:اكيد نعتز بنسبتكم واني ندور لأختي الدار الباهيه نبيها ترتاح
حطت غالية يدها علي فمها ودموعها نزلو طول ، تلفتت ورجعت مشت بسرعه لحوش صفاء ، وقفت قدام بابهم وطقت وهيا تشبح لأحمد لطلع مع الراجل يسقد فيه واول مامشي الراجل فتحت صفيه الباب:غالية
قعدت غالية تشبح لأحمد لتلفت يبي يخش بس جت سيارة ووقفت قدام حوشهم.
دفت غالية صفيه الداخل وخشت وقعدت تكبه تشوف في السيارة
صفيه طبست راسها وقعدت تشوف مع غاليه:من هدا
غالية:مانعرفش شوفي وراه سيارة تانيه
صفيه:اي
ضيقت غالية عيونها وهيا تشبح لأحمد لتلفت لسيارة وقعد يشبحلها وأول ماشافت من نزل من السيارة شهقت وهيا تطلع من الحوش بس شدتها صفيه من يدها:تي وين ماشيه
فكت غالية يدها:هدا بياخد احمد مره تانيه
ومشت تجري جيهت احمد وعيونها معبيات دموع وترعش من فوق لا لوطه.
احمد اول ماشبح محمد نزل من السيارة ويشبح في السيارة التانيه لوقفت بعيد عليهم بس واضح انها جاية مع محمد.
احمد:شن تبي تاني قتلك مجدي مانعرفش وينه
وقبل ما محمد يتكلم جت غالية تجري ووقفت بينه وبين احمد.
محمد اول ماشافها خشت بينهم بعد خطوتين طول التالي.
غالية:انت شن تبي منا سيبنا في حالنا ياسر دمرت حياتنا انت وخوك الله لا ترحمه
شد احمد غالية ودفها باش تخش الداخل وهوا يركز علي محمد لتعصب وهوا يقبض في يده بالقوه وعيونه لمحولهمش من غالية...
.
.
.
#يتبع_للبارت_لبعده
____________________________________
بداء كتابة الرواية في 2019 / أبـــ4ٰـــريل / 7
تم وضع قَفلة لـ الرواية في 2019 / سبتــ9ٰـــمبر / 25