عشق في بلاد حروبها لا تنتهي ( الفتنه و الثأر)

البارت 32

_
_
#عشق_في_بلاد_حروبها_لا_تنتهي
#تكملت_الجزاء_الأول  الحلقة (32)
.
.
في الحلقة السابقه
ضيقت غالية عيونها بكل وقالت:بو وجهين
ضحك محمد وقال وهوا يتلفت ويفتح في طقت الباب:نجيك ره
وطت غالية صوتها وهمست:قليل ادب وصايع
رجع محمد طقت الباب بطقتين وتلفتلها:شني شني....

قراءة ممتعة 💛
#البارت_التاني_والتلاتون

رفعت غالية حواجبها وقالت ببرائة مصطنعة:قولتش شي اني
قرب محمد خطوه منها وهيا وخرت خطوة علي طول وتشبحله كيف بتسم وقال وهوا يأشر لروحة بصبعة:نا صايع وقليل ادب
خافت غالية بس ألسانها مهناهاش وقالت:اي صايع
ضحك محمد:تحشمي
رفعت غالية كتافها وقالت بنفعال:اني نقول في الحق علاش منتحشهم انت صايع وضايع فوقها
مسح محمد وجهه بيديه الزوز وزاد قرب منها:نا مش صاحبتك
غالية:نعرف انت محمد
طلع محمد السانه ونتشه وكان بقرب منها بس منيلية الباب قعدت تتحرك ودير في صوت ، تلفتو هما ازوز للباب لبدي يطق وصوت ميسم تصيح:غااالية افتحيلي
فتحت غالية فمها علي وسعة وشبحت لمحمد وقالت:تبخر تبخر
محمد: كيف بنتبخر
ركبت فوق السرير ونزلت من الجيها التانية وفتحت الدولاب وتلفتت شبحتله ورجعت ركبت فوق السرير ونزلت لجيهته وجت لروشن وشدت حديد الحماية وهيا تجبد فيه اكتر من مرة ومش عارفه علاش تجبد فيه ، ورجعت تلفتتله وشبحتله كيف يشبح بستغراب.
ميسم:تي ياااغالية كنك ماتفتحي راقده ولا شني
خبطت غالية خدودها وقربت من محمد اللي شدها من يداها وقرب وجهه من وجها وقال بتوشويش:اششش اهدي
هزت غالية راسها بمعني باهي وقعدت تاخد في نفس وطلع فيه اكتر من مرة تقول بتجيب لين محمد ضحك وزاد قرب منها وباسها من خدها وقال:خليكي ساكته تو تعدي
هزت غالية راسها ووشوشتله بصوت يادوب مسموع من الخوف:مهبول انت وكان مامشتش نقعدو لصبح هني
محمد:نعن فيتك ادوي زين
قلبت غالية شفايفها بتنقنيق ومحمد كمل:اسكتي ومن غير وجيج
حطت غالية يداها الزوز علي فمها ومحمد بعد والابتسامه علي وجهه وقعد واقف قدام الباب وهوا يشبح لتليفونه لبدي يهز معلن وصول رسالة فتحها وهوا يضيق في عيونه ويشبح في مضمون الرسالة اللي كان .
(من حقي نكلم اختي ، نبي نسمع صوتها ونظمن عليها ونبي نجي نشوفها ، اني احمد)
تحمحم محمد وفتح الباب بشوية وهوا يتأكد انه مافيش حد وطلع وخلا غالية اطيح علي السرير وتنفخ:الحمدالله ياربي
__
في #طرابلس
ايلاف:ياحليلي وجهك كيف ولا واااه
قعمزت صفاء علي السريرها وحولت التليفون علي ودنها التانية وردت علي ايلاف:وحقربي ماتتحشمي هي حطيتيني في موقف بايخ معاه
ايلاف:ونبي ركبتولي الصفير ازح
صفاء نخلعت وهيا تحول في التليفون من ودنها وتشوف في من خش عليها انتظار.
ايلاف:الوو تي وينك
صفاء:رقم خش عليا انتظار اخلعني بالك غالية
ايلاف:سكري سكري وردي بالك ربي فتحها في وجهكم ويطلع رؤوف
نفخت صفاء وقبل ماترد عليها سكرت ايلاف في وجها وخلتها فاتحة فمها :حقيرة
رجعت انتبهت لتليفون لقعد يتصل وقعدت تشبحله ، مش ح نرد ، ونفخت وهيا تحط في التليفون قدامها ، واصلا شن بنهدرز عليه واني مش ضايقاته الراجل مانبيش انافق روحي ولا انافقه مانيش راده .
تسكر الخط وهيا قعدت تشبحله فترة وتفكر وقلبها يوجع وتفكر في احمد وبس ، تنهدت وخدت التليفون حطاته علي الكمادينو ورقدت بين افكارها ودموعها .
__
اتكه سفيان علي الكرسي بضهره وشبح لزياد لحط السبسي في فمه وولعة وقال:بروح غدوة
رفع سفيان كثافة:مش عارف ماقاليش
زياد:لكن غلط المفروض بعد لدارة هجمنا طول لانه توا في اقصي ضعفهم ماعندهمش لا دخاير ولا اسلحة كافية باش يصدونا
سفيان بتسم وقعد يهز في راسه يمين يسار:انت اللي غلط تي دماغة هدا مفكر في كل شي ههههه ضربته لقوية مازال مادارهاش
زياد:هههههه مش ح نسأل شن مزال لانه مش قادر نستوعب الاولي ، ازفت كيف خش هدا بينهم
سفيان:خبرة ، اسمع
زياد:نعم
سفيان:هوا مش في اي جريمة قتل ياخدو في بصمات الرصاصة و السلاح ويشوفوها مطابقة ولا لا
زياد:اي المفروض
سفيان:باه حني الاجراء هدا يديرو فيه عندنا
ضحك زياد ونفخ الدخان من فمه:ماخاطريش نضحك ياصاحبي تي حني طب زن لا يدورو في بصامات لا في تحقيق لقو القاتل يشدوه القو واحد خاطم يشدوه ويلصقو عليه التهمه المهم مايخلوش القضيه مفتوحة
تنهد سفيان ووقف وهوا يطلع في تليفونه ومشي بعيد شوي وتصل ب محمد ، اللي رد في اخر لحظه واللقطه هدي حفظها سفيان عليه
محمد:هاا سفيان
سيان:غدوة مروح
محمد:مش بكرا بأذن الله بعد بكرا قبل مانوصل بساعة نرن عليك بيش ادير لقتلك عنه تمام
سفيان:تم
__
في_بنغازي
تاني يوم الصبح
كانو غالية وميسم يوتو في الفطور ويهدرزو علي خشت عائشة عليهم واول ماشافتهم يهدرزو ويضحكو وكانه عائلاتهم مابينهم شي حزت في نفسها وقالت:ميسم محمد روح ولا شني في سيارة البرا
ميسم:اي روح امس
رفعت عائشة حاجبها:وعليش هضا وين قلتولي
سكتت ميسم ورفعت كتافها ، طلعت عائشة طايرتلها وميسم تلفتت لغالية اللي عاطية بكفاها وتشبح للقهوي وسرحت لبعيد وهيا حاسه انها مدايرة حاجة كبيرة لدرجة مش قادرة تشبح لوجه عائشة .
واول ماطلعت عائشة من المظبخ وخشت للصالون خش محمد وراها.
محمد:صباح الخير
رقية:صباح النور
تلفتتله عائشة:كنك ماتصلتش بيا لما روحت
محمد رفع حاجبة:هيوالله نا المفروض لندورك مش انتي
طبست عائشة راسها وهيا تمسح علي جبهتها:مش قص..
محمد قص عليها و قرب باسها علي جبهتها وتخطاها ومشي قعمز جنب امه لباسها من راسها.
تنهدت عائشة ومشت خشت وخلتهم .
رقية:سجلتها لبنية في المدرسة
هز محمد راسه بمعني اي وهوا شاد تليفونه ويعبي في كوروت الراصيد
__
خشت غالية بين الدولاب والتلاجة وميسم تشبحلها وهيا رافعة حواجبها وحاطه يداها علي فمها ومش عارفه تضحك ولا تصيح هههه ، بس قبل مادير ردت فعل جاها صوت سالم لخش عليهم من باب المظبخ:وين لفطور
تلفتت ميسم لجيها التانية طول وقالت:هي شوي اخري ونحطه لكم في المربوعة
قرب سالم من الثلاجه وفتحها ، وهديكة غالية قريب تموت من الرعب ومسكرة عيونها وفمها بيدها ، وميسم وراه تندب في خدودها علي عباطت البنت الغرباوية هدي .
قربت وهيا تحاول تلاهي سالم وقالت:تعالي شيل معايا لفطور
واول ماسكر سالم الثلاجة جت عينه عليها وهيا مدكوكة في التركينة ومغمظه عيونها .
ضيق عيونه وتلفت لميسم ورجع تلفتلها وقال:شن اديري هنا انتي
فتحت غالية عيونها طول وهيا تشبح فيه يشبحلها ، قلبت شفايفها وطلعت وهيا اتشح في روحها ووقفت قدامه وتحاول تتكلم من الرعب :هدي ميسم هيا قتلي ماتخليشي يشوفك
شهقت ميسم وفتحت عيونها وأول ماسالم تلفتلها قالت بسرعة:واللهي لكدابة نا ماقلتلها شي هيا خافت منك
وقبل ماسالم يتكلم خش عبد السلام عليهم:ميسم
ميسم تنهدت براحة لما شافت جدها:ها جدي نعم
هربت غالية من قدام سالم اللي رقاله وكيف جاي بيتفجر عليها بس نقدها عبد السلام لجت وقفت جنبه وقالت بتودد:صباح النور جدو
بتسم عبدالسلام:صباح الانوار يابنتي هيا وين لفطور ياميسم نا بنعدي لسيدك رجب
ميسم رفعت الصفرة ومدتها لسالم لعيونه ماحولهمش من غالية وطلع ورا جده وميسم طلعت وراهم رفعت الخبزه وهيا توشوش لغالية:احمدي ربي مابين جيتك
مشت ميسم وغالية تنهدت ب راحة وهيا تتكه علي الرخامة وتهش علي روحها بيداها:واااه عليا نسخه من خوه تبارك الرحمن عيلة ولادها وحوش
__
في #طرابلس
صفاء:تعرفي كان ماتغسليهم لما نكسرهم فوق راسك حلوة هدي كولي وهربي من غسل لماعين
نفخت سارة اللي خبطت رجليها علي الارض وتلفتت تغسل من غير اي كلمه خوف توصل لامها تقددها.
وصفاء اول ماطلعت من المظبخ ببتسامة انتصار جتها حلا تجري وهيا تمدلها في التليفون:بيك بيك حد في فون
ضيقت صفاء عيونها ونزلت علي ركابها قدام حلا وردت علي التليفون من غير ماتشوف من:الو
وأول ماجاها صوته فتحت عيونها وشبحت لحلا المبتسمه تقول مدايرة انتصار عظيم.
رؤوف:السلام عليكم
زمطت صفاء ريقها ووقفت وردت بتوتر:وعلي..كم .ال.سلام
رؤوف:نتمني مازعجتكش
صفاء:لالالا ابدا
بتسم رؤوف:كويس ، شن اخبارك
جت صفية تجري تصيح:صفااااااء زودي لاختك القرده طلعتلي روحي الدراه هدي
ضربت صفاء جبهتها ب كف يدها ومشت تجري خشت لدار وسكرة علي روحها وهيا تسمع في ضحكت رؤوف لقال:شكله فيه عركة عندكم
صفاء:هههه خواتي مايهنوش روحهم ديما زي ناقر ونقير
رؤوف:ههه ربي يحفظهم ويحفظلكم لكيوت لردت عليا
نتشت صفاء شفها اللوطي وردت:سامحني بالله كانت تلعب بيه ولما اتصلت ردت
رؤوف:علي شني منسامحك هههه عادي قعده صغيرة ماتعرفش ، ههه شكلك توترتي هدئ روحك عادي ياما بيصير من مواقف بينا
بتسمت صفاء وقعدو يهدرزو مع بعض....
__
في #بنغازي
ميسم:شكله حشيشتك الجو هضا
غالية حطت الطوبو في الغرسة وتلفتت لميسم:عادي مش هلبا بس حتي حني كان عندنا زرع وجو هدا في جنانا ماما كانت تحب تغرس
ميسم:نحنا جدي يحب يغرس واجد كان تحقي حوازتنا تفتحي فمك من جمالها كيف مخليها تجنن مرا اخري تو نشيلوك معانا
غالية:هههه لالا نبيش كان معاكم سالم لا
ضحكت ميسم:اما انتي هبلة توا مالقيتيش وين تتخبي الا غادي
غالية:مالقيتش وين ندس روحي باهي ههههه
قعدو يضحكو وهما يتمشو في الجنان لين سمعو صوت سالم ينادي ، نخلعت غالية وتلفتت لميسم لقالت بضحكة:واااه خوي عمرة طويل
غاليية:لا ياكبدي هدا ادكر الحقير يجيك يطير
ضيقت ميسم:ره نقوله يجي هنا ههههه ستني نعديله نحق شني يبي ونجي ارجيني هنا
هزت غالية راسها وميسم مشت لادت من الجيها التانية
وغالية قعدت تكمل في طريقها وماوقفهاش غير صوت عائشة:نا مش فاهمه عليش انت واكل همها عليش فارقه معاك عدي بيها لدار ايتام ولا لمكان اخر نحنا مش ملزومين بيها
زادت غالية قربت لين بانلها محمد واقف مع عائشة
محمد:نا ملزوم بيها البنت يتيمه ماليهاش غيري
عائشة تنرفزة وقالت بعياط:شني ماليهاش غيرك شني انت باتها ولا خوها ولا مجوزها ونا ماعنديش علم
وقف محمد زين وقال بعصبيه:وطي صوتك
تحمحمت عائشة وخافت وكانت تبي ترقع كلامها بس محمد سبقها وقال:الاحسن ياعيشة تتعودي علي وجودها عشان كان بتقعدي معاديتيها بتتعبي واجد
عائشة:شني قصدك ندير سفتوير للماضي وننسي شن دار باتها فيا وشني دارو خوتها في راجلي كان انت نسيت نا مانسيت شي
محمد صيح:ازف مليون مرة نقول فيها ماعاش ادخلوها في عمايل باتها وخوتها البنت عويلة وماتعرفش حتي شني دار بااتها فيك افهمي افهمي مايصيرش تعاقبي حد علي عمايل غيره
عائشة:نا بنعاقبها نا قلبي عليها دم عشان هيا منهم ، تبيها تقعد هنا تمام يامحمد تتحمل مايجيها
قالت عائشة كلامها ومشت تجري الداخل وخلت محمد يتلفت لجيها التانية وهوا متعصب ، اللي اول ماتلفت شبحها واقفه بعيد عليه شوي ودموعها علي خدودها .
تنهد محمد بهم وهوا يشبح فيها تلفتت ومشت جري خشت من باب المظبخ اللي كان فيه سالم ورقية وميسم ، بس ماعدلتش عليهم وخشت بسرعة لدار ميسم وهيا تبكي بعبرتها.
قامت راسها وهيا تشبح في تليفونها يشرين ، واول ماشافت رقمه سكرت في وجهه طول ، وبعد ماسكرت شهقت بخوف انه يديرلها زي المرة لفاتت شدت تليفونها وهيا تشبح في رسالة من ليبيانا خشت وشافتها لقت ( تم تحويل 10.000 دينار من الرقم #######21892 إلى رصيدك بنجاح)
مسحت دموعها وهيا تتنهد ، مش فاهمه هوا علاش يدير هكي معاها فعلا كلام عائشة صح .
سكتت غالية شوي وضيقت عيونها وقالت بصوت:لكن بابا شن دارلها علاش جابت سيرته
رجع تليفونها يشرين ، شبحتله وردت وهيا تمسح في دموعها وتسمع في صوته:نحنا شني قلنا علي تسكير التليفون
غالية:بابا شن دار لعائشة علاش تدوي عليه هكي
سكت محمد شوي وقال:لداروه هلك فينا واجد ياغالية
ضيقت غالية عيونها ودموعها بدو ينزلو اكتر:شن بينا وبينكم ، بابا وخوتي طول عمرهم علي حالهم انتم لبديتو خوك هوا لهجم علينا وقتل بابا انتم يامحمد شردتونا مش حني انتم يتمتوني اني وخوتي
محمد تنهد ومايبيش يفتح نقاش ولا يصغر عقله وقال:باهي خلاص ياغلاي بطلي بكي
غالية:اني ماعاش نبي نقعد هني ماحد يبيني هني نبي نولي حوشنا اني
محمد:غلاي ماتبديش فيها عاد
غالية:لالا روح بيا نبي نولي طرابلس مانبيش نقعد في مكان ماحد يبيني فيه
محمد:من مايبيكش
غالية:عائشة وخوك حتي من جدي متحمل وجودي بسيف
محمد:باهي وامي وميسم وكان حتي هن مايبوكش نا نبيك هنا
غالية مسحت دموعها:انت متزوج
ضحك محمد:وشني دخل زواجي في النص
غالية توترة شوي وقالت:نعرفش
محمد:امسحي دميعاتك الغاليات علي وحطي في راسك ماحد يقدر يقرب منك طول ما نا معاكي
غالية:عادي نقولك حاجة وبعدين تنساها
ضحك محمد وهوا يمسح علي شعره:ههههه يانعليا من بنتي قولي هي
غالية:بلاش خلاص
محمد:ههههه تي قولي ياطشه كنك
نخلعت غالية بصوت ميسم وقالت بسرعة:باي باي ميسم جاية
وسكرت في وجهه وخلاته يضحك علي الجو المراهقين لبدي يدير فيه معاها ههههه.
__
.
.
ضناها جواد رجال فزاعين في المحن  ، مدينة متوجه فرسانها بتجان الفخر ، مدينة عندها رجال يهدو هدود العادي عن مبغاهن ، هي مدينة بنغازي لا يفزعها رصاص ولا تهاب النار بين رجالها الشجعان 💛🌼
(الياقوت)
.
.
تاني يوم الصبح فاق محمد علي صوت تليفونه ساوة روحة وقعمز وهوا يمسح في وجهه وخدي تليفونه واول ماشاف الرقم رد بخلعة:ايوة مراد ان شاءالله خير
مراد:هداية جابت ونحنا في المستشفي
محمد حك عيونه والنوم قعد فيهم:كيف حالها توا
مراد:الحمدالله سامحني اتصلت بيك في هالوقت لكن اتصلت واجد ب ميسم وماتردش وسالم مقفل
محمد:لالا ولا يهمك نا شوي وجايك
مراد:نرجا فيك ادودهت بروحي
محمد بتسم:هضا لي يبي المفرخ تحمل يابو رفيق ياما جايك
مراد:هههه نتحمل علي قلبي كيف لعسل
محمد:يتربه في عزك ان شاءالله ويرفع راسك
مراد:ان شاءالله العقبه لكي عاد توا
تحمحم محمد:ان شاءالله عدي مانعطلكش
سكر محمد من مراد راجل اخته وتصل ب سفيان طول اللي حتي هوا انخلع من نومه ورد وعيونه مغمظات:نعم فندي
محمد:كمل نومك نا اليوم مش جاي لطرابلس
سفيان:تمام يافندي
__
غالية بتسمت:جدي يصلي قلي هكي بيده معناها جاي ههههه
ضحكت رقية:باهي عدي نوضي المنخمده ياكبدي مغلا عليها النوم تو تجي عيشة تحط لفطور
مشت غالية تنوض في ميسم وعائشة قعدت تحوس في المظبخ ورقية وعبد السلام جنبها يهدرزو .
نزل محمد وخش عليهم:صباح الخير
ردو عليه الكل وهوا خش جبد الكرسي وقعمز جنب جده:هداية في المستشفي
رقية:يانعليا جابت عليش مراد ماخبرنا من امس
محمد:تي شني بخبرك الراجل مدوده ماعارف كراعة من يديه وين
عبدالسلام:حطن لفطور وتو نعدي بيكن نا
محمد:تمام امانا نا معديلة توا
رقية:يانعليا شيلني معاك
عبدالسلام:لالا عدي مربوحة ياولدي عدي حق الراجل شني يبي ونا تو نشيلك يارقية ماتعطليشي هوا
رقية:اي اي عدي انت بسرعة
__
طلعت ايلاف من الكفيتيريا وهيا تتصل ب صفاء لردت:الو
ايلاف:الو يلويك تي وينك علاش ماجيتيش ياقرده
صفاء:هدا عقاب علي اللي درتيه اول امس
ايلاف:ههه حقيرة وحقربي هههه ياتافهه
صفاء:ههه مش اتفه ولا احقر منك ههه علي العموم نبصر امي تعبت شوي ياحنه متعبها الحمل
ايلاف:يحليلي هههه تو خوك ولا اختك بيتربه مع صغارك
صفاء:اس اس فكيني تره ماشفتيش فرحت حناي بيها واااك قريب تقيمها فوق راسها متأمله يطلع ولد
ضحكت ايلاف:حناك عقليتها جاهله سامحيني فيها
صفاء:لا نسامحك لا شي اصلا هيا جاهله كلها مع بعضها هههه سكري سكري غالية تتصل
ايلاف:ونبي سلميلي عليها هلبااااا وقوليلها تسلملي علي الطرف لمغبر باهي
ضحكت صفاء:سكري ياكلبه هههه
سكرت صفاء من ايلاف وردت علي غالية:الو غاليتي ستاحشتك
غالية:واااه حتي اني ستاحشتكم كلكم كلكم
صفاء:ياروحي تعالي عندنا قوليلهم يجيبوك عندنا
غالية تنهدت:ياريت بس هالمحمد شكله مش ح يعتقني
صفاء تحمحمت:احم احم شكله طاح فيك ههههه
غالية بتسمت:ياريت
فتحت صفاء عيونها:شن ياريت
هزت غالية راسها وردت بعياط:لالالالالالا مش قصدي
صفاء:هههههه لالا قصدك شني مني بدينا نحبو حي علي الجو حي
وغيرت صفاء صوتها وقالت:لالا ياصفاء متزوج هوا ههههه
غالية قالت بضحكه وبتنقنيق:بطلي هههههه
صفاء:اوكي اوكي هههه بس بجديات شني صاير
تنهدت غالية:نعرفش بس بيني وبينك ومش عارفه كيف بنقولها لكن والله لما يبدا جنبي نحس بشعور حلو مانقدرش حتي نوصفه
بتسمت صفاء:شعور زي النار لتحرق ونفس الوقت زي التلج يلدع تحسي روحك متحشمه لكن تبيه
غالية:صح وربي صح هي تعرفي ياصفاء وربي في قربه نحس بطعم حنان الاب كيف يدوي معاي ويساير فيا حتي لما يكشخ عليا نحس انه يبي مصلحتي بجد يهتم بيا ويخاف عليا اااه غريب الانسان هدا
صفاء:هههه حب حب حب هههه
غالية:اوووف ياا مش لهدرجة
صفاء:شكلك واخده راحتك تدوي بصوت عالي وين الشراقة امالا هههه
غالية:كلهم مشو لأخت محمد لكبيرة جابت اليوم واني قعده في الحوش بروحي قريب نتبلغم من الكساد قلت هي نتصل بصفصف
صفاء:تو صفصف بتسكر حناي حسها جت تو تقعد تنكرز
غالية:واااه عليكم خيرها جايتكم
صغاء:مش عارفه درهتلي كبدي شادتها اليومين هدو عندنا
ضحكت غالية:عدي عدي تو بعدين نكلمك
صفاء:ايوا حني بدينا ندوو زيهم ههه باي
سكرت غالية وهيا تضحك وتتغمر في التليفون .
تنهدت علي افكارها وخدت الفوطه وحوايجها وخشت للحمام بدوش.
.
.
.
درس محمد السيارة في الجنان الحوش وهوا يشبح لي الرقم ليتصل بيه ، فتح باب السيارة ورد:ها
جاه صوته الدايخ والباين انه مش بوعية:نبي نجي نشوف اختي
محمد:اختك انساها خلاص
احمد عيط:تي خيرك انت هدي اختي نبي نشوفها قولي وين مكانك
سكر محمد الخط في وجهه وهوا يستاقط ب حاجه وقعد يشبح لتليفونه لتواني بعدين سكره طول .
ركب لحوشه طول وغير حوايجه ونزل وهوا لاهي في التليفون وينح في شفرته اللي كلمه احمد عليها وخلا الشفرة اللي يعرفوه عليها العيلة .
قعمز علي الدرجات وهوا يولع في تليفونه وتصل بيها.
واول ماردت عليه انفتح باب الحوش وطلعت وهيا ترجع في شعرها المبلول التالي وشاده الفوطه في يدها
بتسم محمد:احيه تي كيف ماتبينيش نبوسك اه
زمطت غالية ريقها وضيقت عيونها وقالت:محمد
محمد:خشي جوا وسكري علي روحك
قعدت غالية تشبح حوالينها وماخطرش في بالها تشبح جيهة الدروج وقعدت تلود علي روحها وتقول:وينك انت كيف عرفت اني برا
محمد:بحتي جيهة الدروج
تلفتت غالية وشبحاته مقعمز علي الدرجات ويشبحلها ويبتسم .
بتسمت وقالت:عادي نقولك حاجه
تنهد محمد:نا اللي بنقولك واجد حاجات كان ماخشيتيش
ضيقت غالية عيونها:انت صايع
وقف محمد ، وغالية خافت خشت تجري وسكرت الباب وهيا تسمع فيه يضحك:خوافه هههه تعالي من باب الكوجينه
غالية:مانبيش فاتحتلك ره
محمد:هههه تعالي صبي قدام الباب وماتفتحيليش
مشت غالية للباب المظبخ لكان فيه باب مرش يبين علي اللي برا وباب حديد شبيك ، وقف قدام الباب وشبحلها كيف قربت وقفت قدام الباب .
غالية:راك متزوج ره
محمد رفع حاجبه:كنك ماسكتيها في جرتي عارف متزوج
غالية ضيقت عيونها:عيب هكي كان ماتعرفش
محمد:نا شني درت
فتحت غالية فمها وقالت من غير ماتركز :شن مادرتش قول مراة تحضن فيا ومرة....
وسكتت وهيا متحشمه ومحمد كمل:ومرة نبوس فيك صح
مسح علي وجهه وقال:سامحيني ياغلاي نا راجل بطبيعي لما بنلقا بنت سمحة قدامي بنضعف
غالية:اه فهمت يعني لو لقيت بنت سمحة تانية تبوسها عادي
بتسم محمد وقرب تكه جبهته علي قزاز المرش ورد عليها وهوا يشبحلها كيف طبست راسها ورقتلها وقال:من الاخير انتي عاجبتيني واجد يابنت
رفعت غالية راسها ليه بصدمه ومحمد كمل وهوا يشبح لعيونها:نا مش عارف شن نقول ولا شن قعد ندير ، فاطن بالمشاكل اللي بين هلي وهلك مايحلهن لا عمر لا وقت مغير الفرق السن لبيني وبينك واااجد صح
قصت غالية عليه بلهفه وقالت:لا لكن مش هلبااا
محمد:هههه اي واجد لكن مش هلبا
بتسمت غالية:اي مش هلبا
محمد:هلبا ياغلاي وراسك هلبا
نفخت غالية بالقوة وهيا تشبحله.
محمد:افتحيلي
بعدت غالية وهيا تسكر في التليفون ، واول مافتحتله الباب جبدها ورفعها علي طوله وحضنها ، وهيا لفت يديها عليه وحاسه روحها وكأنها في عالم تاني ، وهيا بين يديه وكأنه كل همومها ح ينزاحو و كل مشاكلها هوا اميرها وبطلها  اللي ح يلقالهم الحل وياخدها لعنده .
محمد قرب من ودنها وهمس:انتي في القلب ياغلاي
وبعد شوي وباسها من خدها وكيف بقرب اكتر ويبي يبوسها علي خدها التاني بس تليفونه قطعهم وشرين .
تنهد وهوا يبعد يحط فيها علي الارض وهوا يحاول يضبط نفسه وقبل مايسكر التليفون رد:ايوا سالم
سالم:وينك مراد يستنا فيك
محمد:هي جاي
سكر محمد وتلفت شبحلها كيف ترجع في شعرها التالي وتنفخ بتوتر ، بتسم ونزل لمستوي طولها بطوله وهوا يقرب يشم في شعرها وباسها من خدها وقال:هش غادي هش دوختيني
ضحكت غالية وحطت يداها علي وجها.
__
منتصر:حني قدام حوشة سيدي
الصقر:ماتخليشي يقتله نبيه عايش
منتصر شبح لأحمد اللي مقعمز جنبه وشاد السلاح بيده ويهز برجله بتوتر وبألم من جسمه ، ورد علي الصقر:تمام سيدي
سكر منتصر من الصقر واحمد تلفتله قاله:بتعطيني اليبرة بعدها طول
منتصر بتسم:نعطيك زوز لكن رد بالك تقتله نبو نعجزوه عن الحركه بس ومانخلوشي يهرب منا
هز احمد راسه....
.
.
"ومن يرفض الرحيل عن الدنيا بين احضان الحبيب وعلي همسات منتظرة من من يحب"
(الياقوت
.
سكرت غالية باب المظبخ بعد مامحمد مشي لسيارة وخلاها وخشت تجري مشت طلعت من باب الرئيسي وتشبح فيه كيف واقف علي السيارة وهوا شاد تليفونه .
حط محمد تليفونه في السياره وولعها ونزل مشي يفتح في الكنشيلو وعيونه في ساعة اليد متعه واول مارفع راسه وتلفت شبحها تشبحله وتبتسم .
ضحك محمد علي الجنب وغمزلها ورفع يده مسح شعرة وفي نفس اللحظه نتبهو منتصر واحمد علي محمد لواقف قدام الباب.
فتح احمد الروشن ورفع سلاحة وصوب علي محمد.
منتصر:صوب علي رجلة
هز احمد راسه وطلق الرصاصة اللي من الم جسمه ماركزش لو هيا علي رجله او علي صدره ، ومن بين بسمات محمد لغالية ومن غير مايسمع صوت ولا يشبح شي حس بشي سخون خترق صدره.
نزل محمد راسه وشبح مكان الطلقة ونزل يده لترعش وهوا يمس في الدم السخون لتدفق منه ورجع رفع راسه لأول مارفعة جت عينه علي احمد اللي في السيارة و شاد المسدس لستقرت رصاصتة بين صدرة ، شح منتصر احمد من تيشرته وفك منه السلاح وهوا يصيح:ياعن شكلك يا ولد ال..... قتلك اضربه في رجله ماتفهمش يابهيم
قعد احمد يرعش ورجع تلفت يشبح لمحمد ، لخدي نفس كبيرر وطاح علي ركابة ومايسمع الا في عياط غالية لجاته تجري وشداته من ضهره وطاح في حضنها وهوا يشبح فيها تبكي ويسمع في صوتها ينادي في اسمه.
غالية:محمد محمد نوض باللهي عليك نوض محمد
دموعها كانو سابقيين صوتها ، وحسها اللي اطلع فيه بسيف ، يداها صوتها يرعشو وقلبها بيوقف ، قعمزة علي الأرض وساوت راسه علي صدرها وهيا تشد في خده ودموعها ينزلو علي وجهه:م..محمد تمشيش باللهي عليك ماتموتش محمد لا باللهي عليك
مدت يدها وشدت يده اللي شاد بيها مكان الرصاصة ورفعت راسها وهيا تشبح في السيارة اللي تحركت بس قبل ماتتحرك شافاته وشافها ، عرفاته وحتي هوا عرفها من ، عرفت من هوا عرفاته كويس ، وهوا ستاقط ب روحه شن دار وفي من داره بس بعد شني .
طبست غالية راسها لمحمد لفاتح عيونه وفاتح فمه يحاول ياخد النفس ودموعه خانوه ونزلو وعيونه حمر ويقاوم في روحه يخليهم مفتوحات.
عيطت غالية عيطة من وسط قلبها عيطه علي الشخص لردلها حياتها لرجعلها حياتها وعلي خوها اللي خسرها كل للقاته ، طلعت صوتها لكسرها حتي هوا وهرب وبعد محاولة قالت:محمد لا باللهي عليك لا مش مستحيل تسيبني مش تقولي انتي قلبي مش اني بنتك كيف بتسيب بنتك بروحها
حولت يدها من جرحة ومسحت بيها علي جبهتها وخدها لي ولو دم ونزلتها شدت خده وكملت:حتي انت قلبي خليني نموت اني لكن انت باللهي عليك لا محمد
كان محمد يشبحلها ويقاوم في رغبته في النوم في نوم طويل نوم مافيش منه رجعة ، رجعة تخليه يشوف الوجه الوحيد لريح فيه من بعد امه .
نزلت غالية براسها وتكت جبهتها علي جبهته وهيا تسمع في صوت نفسه العالي ودموعها لقعدو ينزلو علي خدوده هوا وقالت بهمس وبصوت يرعش:اني نحبك يامحمد اني نحبك هلبا انت قلبي وربي انت حياتي تسيبنيش رد بالك تسيبني لانه ح نموت واللهي ح نموووت
وبعدت براسه شوي وقعدت تشبحله كيف ضم فمه وهوا يزمط في ريقه ويبتسملها وهوا خلاص يستسلم لمصيرة يستسلم بكل رحابة صدر ، عيطت غالية عيطه خلت الشارع كله يطلع من أثارها من بحت الالم لي فيها
حست روحها وكانها في حلم حاسه بروحها رزينه وهيا تحس في الجرات اللي يبعدو فيها علي محمد وهيا تصيح ب قلة حيلة وب صوت تعب وأرهقته الصدمه : لاااا محمد لااااا
وقبل ماتغمط عيونها شافت عبد السلام وهوا مطبس علي محمد ودموعه علي خدوده ...............
.
.
.
#يتبع_للبارت_لبعده
____________________________________
بداء كتاب الرواية في 2019 / أبـــ4ٰـــريل / 7
تم وضع قَفلة لـ الرواية في 2019 / سبتــ9ٰـــمبر / 25