عشق في بلاد حروبها لا تنتهي ( الفتنه و الثأر)

البارت 25

_
_
#عشق_في_بلاد_حروبها_لا_تنتهي
   الحلقة 25
(الياقوت)
في الحلقة السابقة
وأول ماسكرت ميسم من هداية خش عبد السلام:قولي لعيشه توتي روحها
ميسم:بنعدو لحوش خالي
خش محمد عليهم وهوا لابس هديك السورية العربية يلي متع النص ويساوي في الفرملة متعة وشعرة قعد مبلول من الدوش وريحته ادوخ من قوتها:ديريلي قهوي ...
.
قراءة ممتعة 💛
#البارت_الخامس_عشر
.
وتلفت لجده:واتيين
ميسم:ونا مش واتيه
محمد شبحلها:لا انتي بتقعدي مع البنت
ضيقت ميسم عيونها ونفخت:واش خصني فيها نا
شبحلها محمد شبحه لين تحمحمت ميسم وخافت وهيا تتلفت وقالت:باهي من هيا هدي من مبدري ونا نسأل وماحد رد علي
محمد:ديريلي في كباية كبيرة
عبد السلام:هيا وقت نبو نعدو بدري وروحو بدري
وطلع وخلا محمد يشبح لميسم لتنفخ وتعاود وهيا ادير في القهوي وقال وهوا يرجع في شعره التالي:وينها البنت
ميسم شبحتله:قعده في الدار لا تبي تتكلم ولا توقف بكا
مسح محمد علي رقبته وهوا يفكر انه مش ح توقف بكي لين تشوفه بعيونها بس توا مستحيل يخشلها برغم يبي ومن كل قلبه يشوفها ويطمنها بس بعد لصار مع عائشة مش ح يقدر لانه زي لفيقاته من هدي ومن تكون ، حتي لو البنت مادنبها شي اضل بنتهم ومن صلبهم ف اكيد الكل ح يتحسس منها والمفروض حتي هوا يتحسس ويحط هدا الشي في دماغة زين.
__
شد سفيان يد سالم وخلاه يوقف وهوا يعيط:تي بشوية ياراجل اوقف
فك سالم يده من سفيان بالقوه وهوا قعد معصب وماخلا سبه ولا شتيمة تعتب عليه وماقالها علي غالية وعيلتها وعلي خوه محمد لحاسه واقف معاها:اخطاني ياسفيان مانبي نغلط فيك حتي انت
سفيان:باه اهداء شوي وفهمني شني صاير باش نساعدك
سالم:ماتقدرش تساعدني
سفيان:تي تكلم ياراجل باهي وفهمني
سالم خبط رشاده برجله لين تنطرت لبعيد وقال بعصبيه:يانعن فيتها بنت الكلب ماماتتش كان ماتت ره خوها الكلب طلع
سفيان رفع حواجبه وهوا بدي يفهم:كيف ماتت شن قصدك
سالم:لما عديت لطرابلس وعرفت ب احمد خو مجدي تحت يدين خوية النية لمادارله شي قعد ، قعدت ندور في حوشهم ولما لقيته تأكدت من بنت الكلب هدي فيه وحرقته بيش تموت وينحرق الحوش وينحرق قلوبهم عليها
وضرب يديه في بعضهم بعصبيه:بس ماماتتش
انصدم سفيان من طريقة تفكير سالم الوحشيه اللي من طريقة دوته وحركاته باين الحقد والشر لي في عيونه ولي في قلبه وقال:مش مستوعب هدا كله اديره انت
سالم شبحله:وندير اكبر من هكي مغير محمد مصبي في طريقي ره من امتك قاتلها وقاتل خوها
سفيان:تي شن تقتل شن دنبهم هما ياراجل البنت طفلة قعده معقوله بتحط راسك في راسها علي شي داره خوها
سالم عيط بتعصيب:كيف شن دنبها مش بنتهم
سفيان:وكان اخته تارك معاه مش معاها
سالم:تاري معاهم كلهم نا ، كان ماتت محروقه ره قلبهم تقطع عليها ره خديت تار خوية لقتلوه ظلم وخديت بتار شرف مرته
ضيق سفيان عيونه بعدم فهم علي اخر الجملة:بتار شرف مرته ؟؟ مافهمتش
نفخ سالم وتلفت بيمشي وهوا يرفع في يده لسفيان:نا ماشي لصاحبي
تنهد سفيان لهز براسه وهوا يحاول يستوعب في حالة الغموض لعايشها وتلفت رد للحوش بكل هدوء.
__
ميسم مدت مق القهوي لمحمد لخداه وأول ماطلع برا ، شبح سفيان لواقف هوا وجده قدام الباب ، حط القهوي فوق كوفني السيارة ومشي جيهتهم .
عبد السلام طلع تليفونه من جيب فرملته:ربي يهديه
محمد:وين عدا
تلفت عبد السلام وطلع لشارع وهوا يرد علي تليفونه وخلا محمد و سفيان اللي رد علي محمد:قال ماشي لصاحبة
محمد مسح علي وجهه ولحيته لنقصها شوي بالمكينة بروحة:نا معدي مشوار مع جدي بالله عينك علي الحوش
سفيان:ولا يهمك في عيوني
طبطب محمد علي كتف سفيان لتحمحم وقال:اني يافندي لازم نولي لطرابلس
لبس محمد نظاراته وقال:اها تمام بعد بكرا نعدو نا وياك
سفيان فتح عيونه بعدم ستوعاب:كيف بتمشي معاي ماتقدرش وانت الصقر يدور عليك
محمد:لا نقدر بكرا نعدو نشوفو المحور والشباب هنا ونوصيهم يجبو حراسه علي الحوش وبعد بكرا نعدو
سفيان:لكن خطر هكي يافندي هدا كان شدك تريح فيها
محمد:واحد بعقليته مايقدرش يمسكني بسهولة المهم اصبر علي يومين نعدل لمور هنا قبل تمام
سفيان:اكيد يافندي
__
كانت غالية مقعمزة وتبكي في الدار وهيا مش قادرة تبطل بكي حست بوحدتها في مكان مش ليها وفي مدينة مش مدينتها والاهم انها بروحها من غير خوها سندها اللي كان حاميهاا ، مسحت دموعها وهيا تتنهد وتحاول تهدي شوي ، وقفت وقربت من الروشن وهيا اطمن في روحها باش تبطل بكي بعد الصدمة لصارتلها لما شافت عائشه هني قدامها معناها محمد من وقتها يعرفها من وقتها يحمي فيها ومعاها ، حست قداش ماهوا غريب هلبا ومتناقض في شخصيته ، طيب وشرير ، ومجرم وبطل ، وملاك وسفاح ،
مسحت علي عيونها الحمر من كتر لبكي وشبحت من الروشن لبرا واول ماشافاته واقف علي سفيان زادت قربت من الروشن وحولت الستار شوي وهيا تشبحلة كيف واقف بهيبة وجديه بلبسة السورية العربيه متع النص والفرملة الحنية ومداير شعرة كله التالي بالمية اللي قعده ماجفتش زين من شعره ولحيته اللي شكله مساويها ، ولابس النظارات الشمسيه ، بجديات يبان ليبي بمتياااز ، نفخت غالية ودموعها رجعو تجمعو في عيونها وهيا حاسه بشعور اخي وغريب ، شعور بايخ انه كيف يسيبها بروحها هني كيف ماجاش وتكلم معاها مش هوا قلها بنتكلم مع جدي وح نجيك علاش ماجاهاش وطمنها زي مايدير في العادة ويكلمها بطريقته الغريبه اللي برغم غرابتها تريح فيها هلبااا ، والشعور الغريب انه لتفكر فيه كله مش منطقي لانه هوا ماسيبهاش هني بروحها اهو هوا معاها وعلاش بيتكلم معاها هوا بيحميها واهو وصلها لمكان امن باش هوا يقدر يمشي ويرجعلها خوها.
__
طقت ميست علي عائشة وخشت عليها:قالك محمد هياا
ردت عائشة بنبرت تعصيب:مانبيش نعدي
ميسم:قالي قلها تطلع توا توا وقت وباين عليه راقيله ره
عائشه:ونا شني بنديرله
ميسم نفخت:اوووف منكم كلكن باهي ، حد يفهمني شن صاير ومن البنت هدي
عائشه:وحده حقيرة كيف باتها وخوتها ، وخوك لنقنه انهبل وجابها هنا عندنا
ميسم ضيقت عيونها:شني
عائشة:خليني في حالي ياميسم باللهي وعدي قلهم مانيش معديه
وقبل ما ميسم تتكلم سمعو صوت محمد اللي صيح من قدام الباب:هياااا
ميسم:تربحي نوضي فكيك منه انتي تعرفيه لما يرقاله ماعاد يفطن شن قدامه
خدت عائشة نفس كبير وهيا تكتم في الغيظ لجواتها ودموعها اللي علي رمشة منها ينزلو.
طلعت ميسم وخلتها تلبس في وشاحها وتطلع لانها عارفه لو ماطلعتش محمد ح يقلبها فوق راسها علي عانادها مع محمد مافيش بصارة.
__
#في_طرابلس
طلعت فرح وهيا تنفخ وتعاود:معقولة توا اني لنمشي ونجي تقول فرخة وسي عمر تقول ملك مقعمز يلعب بالبلاستيش اراه مترزي فيه ان شاءالله ولما نتكلم يقلولي سكري فمك خوك صغير مايعرفش نهارات السود وخلاص
ردت باب الجنان وطلعت وهيا شاده شكارة الخبزة لنقصت عليهم في حوش نادين وهيا تلوح فيها القدام والتالي وتشكشك وتمتم مع روحها وتشبح لوطه وهيا تضرب في اللي تلقاه ملوح علي الارض ، وأول ماسمعت صوت ضرب السلاح اللي متعودين عليه وصار شي طبيعي في حياتنا رفعت راسها وهيا تقول بصوت مسموع:ناس ليبيا يكملو والرصاص والسلاح لي فيها مايتمش
بس اول ماشافت سراج لجاي قدامها قلبها قريب وقف من الخوف وهيا حاسة رجلاها اللي تبنجو ومن غير اي تفكير او تخطيط ، خدت نفس كبييير وقعدت تجري من الخوف لين سراج ستغرب من حركتها وتلفت قعد يشبحلها كيف حتي من باب الجنان خلاته مفتوح وماسكراته ، رفع حواجبه بستغراب وبتسم علي لاطافة وطفولة حراكتها اللي دل علي الخوف منه....
__
#في_بنغازي
بعد أذان لعشي بشوية حست ميسم بملل وهيا توقف وتمشي لدارها وتفتح في الباب بشوية وخشت وأول ماشافت غالية متكية علي السرير براسها وهيا مقعمزة علي الارض وراقدة سخفتها ، ردت الباب ومشت للمظبخ وهيا تفكر انه اكيد جعانة ياناري.
قلت دحي ودارتلها نص وحطتلها امية وحكة مشروب في صفرة وولت لدار بيها لقت غالية هدي المرة واقفه علي الروشن
خشت ميسم بالصفرة وقالت بستغراب لانه كيف شافتها راقدة:مسرع نضتي
تلفتتلها غالية وهيا تشبح فيها تحط في الصفرة علي الكمادينو لجنب السرير وتقعمز علي السرير وتشبحلها.
ميسم:درتلك نص دحي تعالي كولي اكيد جعانه
هزت غالية راسها بمعني لا:صحيتي مانبيش
تنهدت ميسم:شني اسمك
غالية:غ.الية
بتسمت ميسم:عاشة الأسامي نا ميسم
سكتت غالية ومادرتش ردت فعل لا بتسمت ولا سايرتها ، ياناري البنت من الخوف مش قادره تساير ولا تفكر في شي لين خلت ميسم تعاود تتكلم:تعالي قمعزي
قربت غالية وقعمزت علي السرير وهيا تتنفس بسيف وواضح تنفسها ملخبط وتاخد فيه بسيف ، حاولت ميسم تتكلم وتسحب منها الدوة وتهديها شوي:موليد كم
سكتت غالية شوي وبعدها مسحت أثار دموعها اللي علي خدودها وقالت:2001
ميسم:صغيرة بكل بطولت عمرك ان شاءالله
غالية:شكرا
ميسم:واني 97
غالية:العمر كله
ميسم ضحكت:وبطوله يااارب
وسكتت وهيا تحس في روحها بايخه لانه غالية لا ضحكت لا شي وهيا باين عليها متوثره وخايفه.
غالية:هوا اممم ، محمد شن يقربلك
ميسم:خوية
رفعت غالية حواجبها:خوك
هزت ميسم راسها بمعني اي ، تحمحمت غالية ورجعت قالت:وعائشة شن تقربلكم
ميسم ضيقت عيونها:وانتي من وين تعرفي عيشة
سكتت غالية وماردتش علي سوألها لخلا ميسم تحس باليأس بمعرفت من هدي ورجعت جاوبت علي سوؤل غالية:عيشة مرت محمد
وهني الصدمة الحقيقيه لخلت غالية تقول ومن غير وعي:شني
ميسم استغربت ورجعت قالت:مرته
خدت غالية نفس ومسحت علي خدودها الحمر من كتر لبكي وقالت في نفسها "طلع متزوج هدا" ، ودكرت حاجه خلتها ترجع تشبح لميسم وقالت:انتي تعرفي خالتي رقية
ضحكت ميسم هدي المره بتنقنيق:فهميني انتي مني و وين تعرفي ماما وعيشه وخوية محمد
غالية:امك
ميسم:اي ماما
غالية:يعني ام محمد
ميسم:اكيد مش امي بروحي
ضحكت غالية لانه حست روحها غبية وقعدت ميسم تضحك معاها....
__
باس محمد راس امه ورجع قعمز زين:السموحه منك يمه بس كنت مطر وربي
رقيه:نا ناقصني ياوليدي رعاش وحرق دم
عبدالسلام:السلاح والقتل والحرب مش شورنا ياولدي هضا لكلام مش لنا نحنا هضا ليه ناسه
محمد:مش نحنا ولاد لبلاد ياجدي كيف مش لنا لكلام
خاله حمد:الحرب ليها ناسها ونحنا ناس مدنية الحرب مش شورنا
محمد:الحرب لا تعرف مدني من عسكري ولا كبير لا صغير كان ماوقفو الرجالة والعقول لكبيرة تريح فيها لبلاد ياخالي لصاير في ليبيا ينحل لكن يبي ناس واعية ليها قوتها ومركزها بيش تحل الموضوع
حمد:اي والله كلامك صح لكن وينهم الناس هدين توا مافيش الا الطاغي وخوه
عبدالسلام:صدقت ياولدي توا كلهم يفكرو في مصالحهم وماتهمهم لا بلاد ولا الشعب
.
.
.
ب حرف ال ح حربا دمر وطني الكاسر...
ب حرف ال ع عشقا ذاب بخلايا روحي لوطني الدامي💔
(الياقوت)
.
.
.
رقيه:حتي لي يبي صلاح لبلاد اول مايوصل للكرسي يطغي
خشت هنادي بنت خاله بالصفرة القهوي وضيفتهم
رقيه:ماتحسبوش بحسابنا في لعشاء يابنتي بروحو
حمد:لا وصلتو خلاص توا
محمد:لالا ياخالي مره اخرى ونا تاعب اليوم كيف روحت
حمد:المرة الاخري السنة الجايه
ضحك محمد:هههه لالا نجي بأذن الله
رقيه:لا تو نجو مره اخري ومعانا ميسم وسالم
هنادي:قريب يطيب ياعمتي
رقيه:صحتيين نحنا هوا هضا
__
في #طرابلس
روان:شن قصدك
ايلاف جبدت الكرسي وقعمزت عليه:قصدي انه خوك حاساته بيلعب بديله هدي تاني مرة يسأل علي البنت معناها ابصر شن بديرلها
تلفتتلها روان:وفرح شن دخلها في فارس خيره خوك هدا فيوزاته مطربقه ولا شن
ايلاف:والله علمي علمك اني خايفه يديرلها حاجه ويصيرو المشاكل الشارع كله يحب عمي فتحي كلهم ح يوقفو معاه وياحشمت بوي بعدين
خش رؤوف عليهم وقال:خيره بوي
تلفتوله روان وايلاف بخلعة وشبحو لبعض .
روان:ياحشمت بوي كان ماطلعناله القهوي توا مع الراجل هاك خود القهوي
ايلاف توثرة وماعاش تكلمت .
__
في #بنغازي
درس محمد السيارة ونزل نزل امه بمساعدة جده وأول مادخلها قالت:وينها
شبحتلها عائشه وخشت لدار من غير ما تتكلم وهيا نااار في داخلها ودموعها علي خدودها ونقهرت من ردت فعل رقيه لما قالولها في السيارة علي غاليه كيف قعدت اطفطف عليها وزعلت عليها وحتي من دموعها نزلو علي خاطرها.
قعد محمد يشبح لدار لخشتلها والباب لقربعاته شوي ومسح علي رقبته وخش ورا جده لدخل امه في وسط الحوش وقعمز علي المندار جنب جده لشبح لدار لطلعت منها ميسم وسكرتها وهيا تقرب:واخيرا روحتو
محمد:جيبيلي اميه
مشت ميسم تجري للمظبخ
عبد السلام شبح لمحمد:نا مش راضي بقعدت البنت عندنا
محمد اتكه علي المندار بظهره وتنهد:خلاص تو نشيلها لمكان اخر بس مانيش مسيبها وراخي بيها
رقيه:لا ترخي بيها ولا تشيلها لمكان اخر تقعد هنا جنبي البنت كيف بنيتي وهيا ماتعلمش شني دار باتها وماليهاش دنب
عبدالسلام:حتي كان يارقيه حقي عيشه كيف علي الاقل نشيلوها مكان اخر تقعد فيه
رقيه:كان علي عيشه تو تلين اهو راجلها يكلمها ويفهمها
مسح محمد علي رقبته وهوا يحرك في يده المصابة بشوية:نا مدبيا تقعد هنا عشان بعد بكرا بنولي لطرابلس مانبيش نعدي ونقعد نفكر فيها
وشبح لأمه وكمل:وعيشه انتي زيدي فهميها انها فتره مؤقتة مش مطوله هنا
رقيه:ياناعلي من بختها مالقتها من خوها المحبوس ولا من حوشهم الله يسامحك ياوليدي الله يسامحك
تمتم محمد بشويه:الله لا يربحك ياسالم
وشبح لميسم لجابت لمية ومدتهاله.
رقيه شبحت لميسم وقالت:غالية جوا
ميسم:اي في داري
رقيه:تعالي شيليني ليها
محمد زمط لميه وهوا يحط في الطاسة علي الارض وقال:لا ناديها هنا
رقيه:باهي ناديها
ميسم تلفتت وهيا مش فاهمه راسها من رجليها ومشت لدارها:غالية
تلفتتلها غالية لكيف سلمت من الصلاة:نعم
ميسم:تعالي
وقفت غالية:وين
ميسم رفعت كتافها:مغير تعالي ماما ومحمد يبوك برا تعالي بالك نفهم حاجه
اول ماسمعت غالية اسم محمد مشت ورا ميسم طول وهيا تفكر في ستين فكرة وفكرة وخايفه ومرعوبه من غيره بدت تحس فيه انه هوا الأمان وكأنه اليد اللي مستحيل تغدر بيها وطلعت لي وسط الحوش وشفاته مقعمز علي المندار وهوا يتكلم مع امه وجده بس أول مارفع عيونه وشافها سكت
شبحت رقيه لغالية كيف عيونها وخشمها حمررر من كتر لبكي ورايحة صفرة لين حست قلبها وجعها وهيا تمد في يدها:يانعلي علي بنتي تعالي ياغاليتي
مسحت غالية دموعها وهيا تحول في عيونها من محمد وتشبح لرقيه ومشت قعمزت قدامها علي ركابها وحضنتها وقالت:ستاحشتك
رقيه باست علي راسها:نا لريفت عليك يانعلي وجك اصفر رايح
بعدت غاليه وهيا تمسح في دموعها بيداها ازوز و قعدت شاده في يد رقيه وهيا واقفه علي ركابها ووراها واقفه ميسم اللي رافعه حواجبها وفي خاطرها بتموت من الفضول
رقيه مسحت علي خد غالية الاحمر وقالت:ماعاش تبكي خلاص اهو انتي جنبي ونا كيف اميمتك وله
عبد السلام لما شاف غاليه رق قلبه لشكلها باين عليها صغيره وشايفه هلبا من الدنيا:والحوش حوشك يابنتي
شبحتله غالية كيف قال كلمته ووقف مشي وهوا مش قادر يتقبلها مهما يكون تكون بنت واخت العيلة لخسرتهم ولدهم وشوهت سمعت بنتهم
زادت غالية شدت في يد رقيه وقالت:لكن اني نبي نولي لطرابلس نبي خوي
محمد:مش توا خليني نلقا خوك وبعدين ساهل
رقيه:ونا ماتبينيش
هزت غالية راسها:لا نبيك اصلا ستاحشتك هلبا ديما نفكر فيك
رقيه:يانعلي يابنتي كان ندري عن لبصير ره شلتك معايا لهنا وماهمني حد
سكتت غالية شوي وشبحت لمحمد ورجعت شبحت لرقيه وبعدها قالت:ماكنتش نعرف انك ام محمد
بتسم محمد ورقيه ضحكت:هههه لما جيناك مابيتش نقول لكي نا من خفت تخافي مني
غالية:اي الصراحة كان قلتيلي ره خفت وممكن لزيتكم
ضحكو ، ومحمد مسح علي وجهه وهوا يضحك من طولت السانها ، وتحمحم وقال:نا بعد بكرا معدي لطرابل.....
وقعد ماكملش صيحت غاليه:حتي اني منمشي معاك
شبحولها ورقيه قالت:شني بتعدي معاه يابنتي هوا بحق موضوع خوك
ضمت غالية شفايفها وهيا تمنع في دموعها ينزلو وتشبح لمحمد كيف شاد يده المصابه وقال:انتي اقعدي هنا ونا يومين ونرد
غالية هزت راسها ورجعت قالت بعناد:لا ارفعني معاك مانبيش نقعد بروحي اني
قعدت ميسم تشبحلها كيف تدوي مع محمد خوها العصبي الثور بهدي الطريقه وهوا قعد ماقال ومادار شي.
شهقت رقيه وقالت:ونحنا مش جنبك
محمد:نا جايبك هنا بيش ماتقعديش بروحك وعارفك تعزي امي اهو جبتك ليها وميسم وجدي معاك نا لازم نعدي
رفعت غالية كتافها ودموعها نزلو وقالت:لا ماتمشيش تو يقت...
فنص فيها محمد طول ورفع حواجبه بمعني اسكتي ومن حسن حظه غالية فهمت طول وزمطت باقي كلمتها وقعدت تبكي:اني نخاف بروحي نبي نمشي معاك ولا انت اقعد هني جنبي
بتسم محمد وكان عاجبه الشعور اللي تحسس فيه بيه انه تبيه وتبكي علي خاطر مايمشيش ويسيبها.
رقيه:يابنتي ياغاليتي خليه يعدي علي الاقل يدير حل لحوشكم ولخوك
غالية:خيره حوشنا
شبحت رقيه لمحمد لقال:انحرق
شهقت غاليه وحطت يداها علي فمها وزات تبكي:هدا علاش ماعاش رديتني لحوشنا والله هداكا اليوم شميت صنة البنزينة وشفت حد في الجنان
ضغظ محمد علي قبضة يده وتمتم:ينعن فيتك ياسالم
رقيه قربت من غاليه وحضنتها:يانعلي دميعاتك غالية ياغالية
مسحت غالية دموعها وفتحتهم وهيا حاطه راسها علي صدر رقيه وقعدت تشبح لمحمد لرفع عيونه وشبحلها وهيا ترشف في دموعها والعبرة واخدتها تنهد وبتسملها بس هيا زادت طرمت شفايفها ودموعها نزلو.
ضيقلها محمد عيونه مع بتسمه ووقف وقال:بأذن الله مانولي الا وتام موضوع خوك والحوش
رقيه:بأذن الله وبنيتي بتقعد جنبي
نفخت ميسم وهيا تشبح في محمد كيف خطم من جنبها وقرصها من خدها وقلها:رايفت عليكي
تلفتتله ميسم:ونا اكتر
ضحك محمد وطلع وقلبه نااار من دموع غالية اللي حاس روحه المسؤول علي كل شي صارلها واللي يصرلها واللي بصرلها ، تنهد وتكه علي الحيط وهوا يطلع في باكو الدخان والولاعة من جيب السورية العربيه وحط سبسي في فمه وولعة وهوا يشبح في سفيان طالع من المربوعة وجايه.....
__
رقيه:بأذن الله خوك يولي ويجي ياخدك وكان رضي خوك استقرو هنا في بنغازي
مسحت غالية دموعها:غر يطلع هوا
رقيه:بأذن الله طالع ربي يمهل ولا يهمل
ميسم:لو سمحتو يعني ابي افهم شو عم بيصير وغليتنا هدي من تكون
ضحكت رقيه علي ميسم وقالت:تعالي ساعديني نلبس دبشي
نفخت ميسم:لا حول ولا قوة الا بالله
رقيه:خشي رتاحي في دار ميسم يابنتي تو نجيك
هزت غاليه راسها وهيا تشبح لميسم لجت رفعت امها وغمزتلها:تو نجيك
وقفت غاليه ومشت وقفت قدام باب دار ميسم واول ماشافتهم خشو للممر التاني وخشو لدار تسللت وطلعت برا بس اول ماشافت محمد ومعه ولد.....
.
.
.
#يتبع_للبارت_لبعده
____________________________________
بداء كتاب الرواية في 2019 / أبـــ4ٰـــريل / 7
تم وضع قَفلة لـ الرواية في 2019 / سبتــ9ٰـــمبر / 25