عشق في بلاد حروبها لا تنتهي ( الفتنه و الثأر)

البارت 34

_
_
#عشق_في_بلاد_حروبها_لا_تنتهي
#تكملت_الجزاء_الاول الحلقة (34)
.
.
في الحلقة السابقه ...
قعد مراد يشبحلهم لين تسكر عليه الاسنسير وقعد مستغرب من اشكالهم ، رفع التليفون وهوا يسمع في هداية:مرااااد تي وينك
مراد فتح عيونه وقال:يانعن فيتهم
وسكر علي هداية وهوا يخبط في الاسنسير لبعد لحظات وصل بيه لدور الاول ، واول مانفتح شاف شباب موزعين علي المداخل وجت عينه علي واحد كيف بيتحرك بجيه رجع رص علي الطابق لي فيه محمد .
اتصل مراد طول بسفيان مرة تنين تلاته لكن مافيش اي رد  من سفيان ،نفخ مراد بالقوة وهوا يطلع من الاسنسير لنفتح ومشي يجري لغرفة محمد بس وقف مصدوم وهوا يشبح في سفيان طايح علي الارض وراسه دم ومحمد مهناش ، مسح مراد علي وجهه بصدمة وخش بسرعة كبه من الروشن وهوا يشبح في السيارات لمصفحة لتحركت من تحت المستشفي ............

قراءة متتعه
#البارت_الرابع_رالتلاتون

#احداث_سريعة_للحلقة_السابقة_لم_تذكر
قرب سالم من مراد لقاعد في السيارة ومنزلش وهوا شاد التليفون بين يديه ، سالم:معدي
رفع مراد راسه:لا بنبرم ندور مكان ندرس فيه السيارة وجاي معاكم هي
وخر مراد بالسيارة ومشي وهوا يرد علي تليفونة لشرين:ايوا سفيان
سفيان:تعالا كان تقدر محمد ناض
مراد:هي هي نا جاي
لف مراد سيارته وطلع بسرعة وكانت سيارة تلحق فيه من غير مايلاحظ .
.
.
سكر سفيان وطلع لمراد مدله التليفون وقال:امشي انت مانبوش نديرو الشبهه وفوتو لعزي
خدي مراد التليفون وقعد يشبحله:ان شاءالله تعدي علي خير
طلع سفيان تليفونه لشرين ورد طول:ايوا سيد كريم
عبدالكريم:شنو حاله توا
سفيان شبح لمراد لأشرله بيده:نا معدي
هز سفيان راسه لمراد لتلفت مشي وهوا يبي ينزل بالاسنسير بس لقاه كيف نازل نفخ وكيف بيتلفت بينزل من الدروج خبط في واحد.
بعد مراد وهوا يرفع في يده:سمحنا خونا
هز الشاب راسه:ولا يهمك
نزل مراد من الدروج تحت انظار الشاب اللي رجع تلفت وشبح لسفيان اللي خش في واحد من الممرات وهوا يتكلم بالتليفون ، قرب الشاب من الغرفة اللي فيها محمد وفتح الباب بشوية واول ماشاف محمد فتح عيونه بصدمة .
ضحك باسم بهزو وهوا يشبح لمحمد اللي راقد بين الاجهزة وقال:طلعت عايش
.
.
محمد:تي عدي يارا وانت مدايرلي فيها رقية اليومين هدين
ضحك مراد:بنحرشها فيك
محمد ضحك:عدي خير مانفتح جرحي عليك
رفع مراد يديه فوق كـ استسلام وطلع.
محمد تلفت لسفيان:عطيني تليفونك
سفيان مد تليفونه لمحمد وقال:اني قدام الدار
هز محمد راسه وهوا يكتب في رقم غالية وتصل وهوا يحط في التليفون علي ودنه ويراجي في ردها لجاه :الو مني
بتسم محمد وهوا يحس بشعور الراحة لما سمع صوتها:ماعاش تردي علي الارقام الغريبة
سكتت غالية وهيا تحاول تستوعب انه هوا وقالت:م..حمد
محمد نتبه لدوشه لبرا وقال:غلاي ، تو نكلمك بعدين.
وسكر قبل حتي ماترد عليه وهوا يشبح في الباب لنفتح وشاب دف سفيان داخل الدار لطاح من طوله مغمي عليه .
رفع محمد حاجبه وهوا يشبح لسفيان الطايح وبعدين رفع راسه وشبح لباسم لخش ورا الشباب لخشو قبله وقربو منه ، بتسم محمد وقال:كنكم تعطلتو رجيتكم واجد
بتسم باسم:سامحنا
وضيق عيونه وقرب من محمد وضرب بالكلاشن علي راسه.
.
.
.
#البارت34
صدا صوت باب لحديد لنفتح باالقوة خلا محمد يرفع راسه ويشبح في الصقر اللي خش والابتسامة علي وجهه ، تنهد محمد ورجع التكي بظهرة علي الكرسي اللي رابطينه فيه وقال بضحكه:وربي لك وحشه
قرب الصقر منه وهوا يجبد في الكرسي ورد عليه بنفس صيغته في الكلام:تي اني لمستاحشك يابرو الحمدالله علي السلامة
بتسم محمد وشبح لباسم اللي واقف ورا الصقر وقال:رجالك فاشلين هههه معقولة ليا سبوعين نرجا فيكم
الصقر:صار عارف روحك هدي نهايتك خلاص وامتي مانبي نجيلك نجيبك
هز محمد راسة وسكت شوي وقال:لا ياعشيري وراسك كان نا مانبييش ره قعدت تبرم علي روحك وانت ادور فيا
ضيق الصقر عيونه وبتسم:تو نشوفو من لبيبرم علي روحة
رفع الصقر يده وأشر لباسم والشباب يطلعو ، طلعو الشباب وطلع وراهم باسم لسكر الباب وراه.
ضيق محمد عيونه وستغرب من حركة الصقر لوقف وتلفت وقال:اليوم ههههه بنبراء دمتي معاك قبل ماناخد روحك
ورجع تلفت لمحمد المستغرب وكمل:وعلي فكرة احمد لضربك
محمد:نعرف
رفع الصقر حواجبه وزادت بتسامته:لا والله انت ماعارف حويجة ياوخيي ، السنين هدي كلها خليتك لعبة بين يديا ياكلب هههههه زي الكلب كل لنقولك عليه ادير فيه ، وكل لقلتلك عليه صدقته ومادورتش وراي ههههه زي خوك الجاهل
نزل الصقر لمحمد وخلا وجهه قبلاته وقال:شبحني واقف قدامه بطولي وعرضي وفي يده السلاح وماخداش بتار مرته مني هههههه
شد محمد علي سنونه وهوا يحاول يفك يديه من الحبل وقال:شني لي تبي توصله
الصقر شح الكرسي وقعمز قدام محمد وقال:اااااه نبي نقول الراجل لقتله خوك والعيلة اللي شردتوها وياناري لمساكين خليتهم طول عمرهم من مكان لا مكان وانت مش مهني روحك ولا مهنيهم هههه خليت الولد الصغير يهج والكبير طالع خاش علي لحبوس واخر شي جبت لامهم سكته ريحتها فيها وخديت بنتهم وشوهتلها سمعتها ههههههه
عيط محمد عليه بنفاد صبر:القصد
الصقر:القصد ياطقة انت لظلمتهم انت هههه اني ستخدمة خوك باش نصفي عبدالسلام لكان معرقل طريقي ولقيت خوك في وجهي هههه ضربت عصفورين في حجر خليت خوك إيهيج غضبه وينتقم من الشخص الغلط ونفتك منه ، ونشوه اسم عبد السلام باش سمعتي تنظاف ونولي في مركزه
نفض محمد روحة من الكرسي اللي محكوم فيه زين وصيح بغضب لين عروق رقبته بانو:ياولد ال...... وربي نقتلك ونخليك عبرة ياحيوان فكني ياكلب فكنيييييي
وقف الصقر وقعد يضحك:ههههه ونزيدك من الشعر بيت ههههه اني لغتصبت مرت خوك ههههه
طلع الصقر من الدار وخلا محمد يصيح وقالب الدار بصوته وهوا يحاول يفك روحة من الحبال الملفوفه عليه ومابطلش صياح لين حس روحة ضعيف تحت تأتير الالم لحاسه والم جرحة اللي بدي ينزف.
طبس محمد راسه لوطه وصوت انفاسة مسموعة من الغضب حاس الم قلبه الم تفكيرة اكبر من الم الجرح اللي في جسمه .
غمظ عيونه وجي بين عيونه جثة عبدالسلام كيف ملوحة في ساحة المقر مع جثت ناس تانية من النظام السابق ، كان اول مرة يخش فيها للمقر في وقتها وكان ثاير علي موتة خوه ، لما شبح جثت عبدالسلام نظرلها نظرة حقد وشر وانتقام ماظنش في يوم انه بيخزي روحة بيلعن روحة انه معطاشي حقه انه يندفن زيه زي اي شخص بدل مايندفن في حفرة وحده ومعاه ستين واحد ، يندفن بطريقة تقهر ومألمة بطريقة مايندفنش بيها حتي الكافر 💔
__
خبط سالم الباب برجلة:مش معقولة لا توا ماتدروعنه وين ، خوية من امس مخطوف وانتم مقمعزين هنا
قرب مراد شد سالم :الشباب مدايرين جهدهم
سالم:تي اما جهد وهم مش عارفين كان هوا هنا ولا في طرابلس تي لعب عواويل هضا
تلفتله سفيان وعيط:زود دور عليه انت مش خوك زود دور مكاني
قرب خال محمد حمد:خلاص ياشباب مش وقته هضا تو
شد سفيان راسه الملفوف بالشاش وهوا حاسه بيتفجر من الالم وتلفت وهوا يبعد ويتصل ب زياد:شن صار معاكم
زياد:شي الدنيا هادية هني دورنا في كل مكان وبعتنا جواسيس بس مافيش شي
سفيان سكت شوي ودكر كلام محمد هداكا اليوم
"""سفيان بتسم:تي وينك يافندي الدنيا مقلوبه ههههه
محمد ضحك:مقلوبه علي راس الصقر
سفيان:هههه اما افكارك جهنمية ، توا نقدرو نهجمو عليهم ونضمنو الانتصار
محمد:لالا مازال مانضمنو شي
سفيان:شن مازال
محمد:اليوم لبروح فيه لطرابلس عدي لمقر ال#### هضا مقر الصقر الجديد فيه شباب غادي زعميتهم يدربو ، نبيك تخش كواحد منهن وتفجر مخزن الدخاير لغادي
وسكت محمد شوي مع ضحكه:وخود معاك منوم حطه في المية ولا دوا اسهال او اي حاجه هههه شوف امورك عشان ماخاطريش في معركة تخسرنا واجد ارواح
ضحك سفيان:هههه نبي نعرف حاجة هتلر شني يقربلك
محمد:ولد سيد جد باتي ههههه تي عدي يارا """
زياد:الووو سفيان وينك
سفيان:اسمع اني غدوة جاي ماديرو شي لين نجي
زياد:اصلا ماعندنا شن نديرو
سفيان:تمام
__
مسحت غالية دموعها وشبحت لميسم لتبكي وتتكلم:والله امي تهبل كان تدري عنه
قربت مريم من ودن اختها مها لمقعمزة جنبها وشوشة:بحثي كيف دموعها مانشفوفش بكل تي واضح تحبه
ضربتها مها بمرفقها علي بضنها لين مريم عيطت وهيا اضيقلها في عيونها ، شبحتلهم حنين بطرف عينها وقربت من ميسم لحاضنه ميسون وتبكي وقالت:خلاص بأذن الله كيف ماربي نقده من الموت ح ينقده من يدين هدين المجرمين
ميسم:ان شاءالله
خشت عليهم هداية وهيا شاده ولدها ليبكي وهيا تبكي معاه وقالت بنفاد صبر:باللهي عليكن خدوه والله ماقادره نتحمله
وقفت غالية بسرعة وقالت:عادي ناخده
هدايا:تعالي
قربت غالية وخداته منها بشوية وهيا تشبحلة كيف اول ماشداته هدي شوي وقعد يناغي وينقنق بشوية ، حضناته وقعدت تهز بيه ودموعها ينزلو وهيا مركزه علي نظرات مريم عليها لمضايقتها اكتر ماهيا ضايقة بيها الدنيا ، حست بتليفونها لهز في جيبها ، قلبها دق وهيا تقعمز علي السرير وتحط في البيبي وطلع فيه من جيبها وشافت مني .
صفاء يتصل بك ، تنهدت غالية ومسحت دموعها وفتحت الخط وهيا ترفع في البيبي في حضنها :الو
صفاء:خيرك ماترديش ليا من امبارح نتصل
طلعت غالية من الدار وردت:صفااء
حست صفاء بصوت غالية لواخداته العبرة:خيرك شن فيه
وشهقت صفاء:ماتقوليش صارت ف...
قصت غالية عليها بسرعة:لالالالا بعيد السوء عليه بس خطفوه
رجعت صفاء شهقت وقالت:ماماتش لكن قتلوه ، نعدلها علي محمد ماماتش لكن خطفوه لا حولي ولا قوة الا بالله
نفخت غالية وهيا تشبح للبيبي لغمظ عويناته ورقد في حضنها ، نزلو دموعها وقالت:صفااء حاسه روحي بنموووت مش قادرة نشبح في وجه حد كل لمرو بيه من تحت راسي كله من خوي
صفاء تنهدت وهيا تتحمحم:احم هوا اني نبي نقولك احمد اتصل ب بابا امس
ضيقت غالية عيونها:وشن يبي
صفاء:يبي يبيع حوشكم
شهقت غالية:شني
زادو دموع غالية اللي ماعاش عرفت شن تعبر وقالت بعد صمت لاحظات:تعرفي حاساته مش خوي مش عارفه اني خوي مايعرفش يشد سلاح مايعرفش يقتل خوي مستحيل يشوفني ويسيبني ويمشي  اني احمد خوي مستحيل يتخلا علي الدكرة الوحيدة لي من بوي وامي هدا مش خوي ره
نزلو دموع صفاء:حتي من بوي قال متغير هلبا قال قاله يبي يبيعة في اسرع وقت واول واحد يبي يشري بيعه علي خاطر مستحق لفلوس
شبحت غالية قدامها كرسي مشتله وقعمزت عليه طول وهيا حاسة رجلاها ماعاش حاملينها :مش عارفه شن بنقول
صفاء:هدا حوشك زي ماهوا حوشه يعني كان ماتبيشي ينباع مش ح ينباع
غالية:اصلا كيف بيبعه والوراقي وعقد الحوش انحرقو مش مفروض يمشي يطلع بدالهم
صفاء:اي صح مش عارف ماسألتش بابا علي هدا الموضوع الحق
نفخت غالية وسكتت شوي وبعدها قالت بسرعة:صفاء عادي تجيبيلي رقم احمد من بوك
صفاء رفعت كتافها:تمام
غالية:توا نبيه
صفاء:باه بري مداما بابا مقيل نخنب التليفون ونبعتلك الرقم
غالية:باي
__
قعمزت خديجة ام عائشة جنب رقية وقالت:عيب عليكن والله ماقلتولنا قلبي تقطع تمروج عليه يانعليا قريب هبلت
رقية بتسمت بفرح:اسموحة ياوخيتي مش باليد خفنه عليه سلامته كان يسمعو بيه لقدر الله يدروله شي
خديجة:الحمدالله توا اهم شي سلامته الغالي
شبحت ليلي لهداية لمقعمزة جنب عائشة لمطبسه راسها وهيا تحاول تشد دموعها قدام رقيه .
شبحت رقية لعائشة وقالت:كنك ياعيشة
هداية:راسها يمه
مسحت عائشة دموعها بسرعة ووقفت:بنعدي ناخد حبة راس
مشت عائشة وقعدت رقية تشبحلها بستغراب وبعدها تلفتت لهداية:كنها مرت خوك
هداية:متأتر يمه لاتوا ماسمعت صوته لا شافاته
خديجة:مش يكلم فيك يارقية
رقية:مرتين بس ياوخيتي وبسرعة بسرعة
خديجة:العفو ياربي كنه ماطمن مرته عليه وكلمها
ليلي:تحسبيها ساهله ياامي التليفونات كلهن مراقبات تراهو
__
.
.
-حين يكون العالم نظيف ، تكون نفوس البشر قذرة 👥
.
.
رفعت غالية التليفون وهيا تشبح لرقم احمد ، خدت نفس كبير وهيا تشبح لميسم الراقده علي السرير وجنبها البيبي وقفت وسكرت باب الدار بطقة وتكت عليه وهيا تتشجع وتتصل بيه ، حست وكأنه اول مرة تتصل ب خوها من الرهبة ، قعد يرن مرة تنين تلاته:الو
تعبو عيون غالية بدموع وقالت بصوت واطي:احمد
نفخ احمد وهوا يشد في راسه وغمظ عيونه بالقوة من الصداع:تي من معاي
ركزت غالية علي صوته المتغير وقالت:اني غالية
فتح احمد عيونه طول وقال:غالية
غالية:اي
سكت احمد شوي وبعدها قال:كيف حصلتي رقمي
ضيقت غالية عيونها:شني يعني ماتبينيش نوصل فيك
احمد:لا مش هكي
غالية قصت عليه:لا هكي انت تغيرت هلبا انت مش احمد خوي
احمد:غالية انتي مش فاهمه
رجعت غالية قصت عليه وهيا تحاول ماتعليش صوتها وتفيق ميسم: شن هوا لمش فاهمه اني اللي فاهمه انت حاولت تقتل محمد شبحتك بعيوني ، وفوقها شبحتني وماعبرتنيش حتي .
احمد:انجبرت اندير هكي
غالية:كيف انجبرت كيف ، حطيتني امانه عنده وجاي تقتل فيه ، تي هوا دارلي كل شي حطني عند عيلته وحماني هكي تجازيه
سكتت وهيا تحاول تاخد النفس ورجت كملت:وتبي تبيع الحوش الحوش اللي اخر دكرة من ماما وبابا اللي سكرت راسك مانبيعوشي وقت اشد حاجتنا للفلوس خليتنا نسيبوه مسكر ونمشو نأجرو ولا تبيعة وتوا جاي بتبيعة
احمد سكت وماعاش عرف شن يرد ، واصلا مايقدرش يرد شن بقوللها يعني والله بنبيعة باش ناخد بيه مخدرات
غمطت غالية عيونها وقالت بالعبرة:حاسة روحي ماعاش نعرفك انت مش خوي انت مش احمد ، توا بس نقدر نقول تيتمت خليتني بروحي خوي عايش ومخليني عند ناس غريبه خوتي عايشين ومش مدوريني صحيت يااحمد صحيت ياخوي
احمد:غالي.....
وقبل مايكمل سكرت في وجهه وهيا تبكي بالعبرة .
قعدت تبكي لين فرغت كل طاقتها او مافرغتهاش بس لين عيت من لبكي ، مسحت دموعها وشدت تليفونها وخشت علي الرسائل لبينها وبين محمد لبدت كل ماتستاحشه او تحس بالضيق تخش وتبعتله (محمد باللهي عليك ولي اني مستاااحشاتك هلباااا)...
__
مرو يومين وماحد عرف مكان محمد والكل حايسين عليه ، وهما مش عارفين يدورو عليه لا في طرابلس ، ولا في بنغازي ، وحتي سفيان اللي قعد شاك او تاكد من وجود محمد في المقر اللي قاله عليه مش قادر يتحرك لانه خايف لو يدير الخطوة لقالة عليها محمد وهوا مش موجود معاهم تنقلب فوق روسهم .
.
.
فك باسم يد محمد من الحبل وقال:كول ياكلب كول نهايتك قربة علي الاقل تموت وانت شبعان هههههه
طبس محمد لصفرة اللي فيها نص فردة خبزة وتفاحة وبعدها علي الجنب وبحركة سريعة جبد باسم وطيحة علي الارض بيد وحده وشده من رقبته لين باسم تشنج.
ضيق محمد عيونه وقال:وربي خل نطلع و السلاح لبتطلع منه الرصاصة في راس الحيوان الصقر نفسه لبتطلع منه رصاصة في كراعك
انخنق باسم لقعد يحاول يبعد محمد لقدر يفك يده التانية بخفة وهوا يجبد في التاليفون لطاح من جيب باسم اول ماطيحة وحطه في جيبه من غير مايلاحظ باسم.
تسكر النفس علي باسم اللي قعد يفرفش واول مامحمد خف عليه يده ضربه باسم علي جرحة لين محمد عيط وهوا يوخر بالكرسي التالي ويشد في مكان جرحة بألم.
قعد باسم ياخد في النفس بكل قوته وهوا شاد رقبته ، واول ماخدي الاكسجين الكافي صيح:ياااااابهااايم لبراااا زودو اربطوه
خشو الشباب بسرعة وجو ربطو يدين محمد لقعد يتوجع من جرحة .
قام محمد راسه لباسم لوقف وهوا يضرب في الصفرة برجلة وقرب من محمد وضربه بوكس علي وجهه لين خشم محمد صب دم وقال:خسارة فيك الماكلة ياكلب
وطلع وخلا محمد عيونه نااااار من التعصيب ، ونفس الوقت جرحة والالم مخليه ضعيف ومع الحبال الملفوفه عليه .
شبح لجيبه لحط فيه التليفون قام خصرة وخشش يده المربوطه في يد الكرسي في جيبه وطلع التليفون البيلة ، واول حاجة خطرت في بالة انه يدير التليفون صامت وخش داره طول .
انخلع اول ماسمع سهم باب لحديد انفتح لوح التليفون بين رجليه وسكرهم علي بعض بسرعة .
خش باسم ليشبح للارض ويدور بعيونه وهوا يتصل بالتليفون لي شاده في يده .
شبح لمحمد لحاط راسه لوطه ومغمظ عيونه ، قرب منه وخبطه علي راسه :هي انت
ماردش عليه محمد ، رجع باسم خبطه وشد شعرة بالقوة ورجع راسه التالي ومحمد شي ماباش يفتح عيونه ، لين خلا باس يستغرب وهوا يشد فيه من دقنه وقرب بوجهه عليه وقال:نكلم فيك
فتح محمد عيونه وخبطه برراسه علي خشمه بالقوة لين باسم طاح التالية بالقوة وهوا يشد في خشمة بعيطه.
محمد:هدي بيش مرة اخرا تعرف علي من تمد ايدك
تنفس باسم بالقوة وهوا قعد شاد خشمة ، وقف وهوا كيف بقرب من محمد بس خش واحد من الشباب وقال:باسم زود الصقر يبيك بسرعة
رفع باسم يده لمحمد وقال:موليلك ياكلب
طلع باسم وخلا محمد يشبحله لين سكر الباب.
__
مسح سفيان علي وجهه بعصبية وشبح لزياد ليضحك وقال:وقسم بالله يوم تاني لما ياكل مني طريحة
زياد:هههه تي خليه يدوي ماتحطش في راسك الولد خوه مخطوف معدور
سفيان:تي اما معدور يعرف شن يدوي وهوا شادها في جرتي يحسابني خديم بوه
قال كلامه وهوا يضرب في الكرسي برجلة ويتلفت يطلع في تليفونه لدار صوت معلن وصول رسالة ، فتح تليفونه وهوا يخش يقرا في الرسالة لخلت عيونه مفتوحات علي وسعهم وكان مضمون الرسالة( نا في المقر #### لقتلك عنه دير لقوتلك عليه ووتي الشباب اول متم لقتلك عليه يهجمو طول ، واليوم مش بكرا ياسفيان )
رفع سفيان راسه لزياد الواقف قدامه ولاهي في تليفونه وقال:عرفت مكان الطقة
شبحله زياد بستغراب وهوا مش فاهم شي ........
__
.
.
.
#يتبع_للبارت_لبعده
____________________________________
بداء كتاب الرواية في 2019 / أبـــ4ٰـــريل / 7
تم وضع قَفلة لـ الرواية في 2019 / سبتــ9ٰـــمبر / 25