عشق في بلاد حروبها لا تنتهي ( الفتنه و الثأر)

البارت 36

_
_
#عشق_في_بلاد_حروبها_لا_تنتهي
#تكملت_الجزاء_الاول الحلقة(36)
.
.
في الحلقه السابقه
وصلاها:تتزوجيني ياطشه
زادت غالية ضحكتها وردت:اي
ضحك محمد:تبي تولي مرتي هههه
هزت غالية راسها بمعني اي ، قرب محمد وباسها بالقوة من خدها التاني وبعد:وربي هكي سمحة وعسل يقطر امالا بالحلال كيف
سمعو صوت إلين لقالت:غلووووسة وينك ماما تبيك
شهقت غالية ونقزت بعدت من محمد لشد يدها
غالية:إلين
محمد باس يدها:عدي باهي تو نكلمك
ضحكت غالية:باهي باي
رجع محمد وجبدها وباسها من خدها:ههه هش غادي هش
بعدت غالية ومشت بسرعة وهيا طايرة من الفرحة ، وأول ماخشت من الباب لقت عائشة في وجها.
زمطت غالية ريقها بتوتر وكانت تبي تمشي وتتخطاها ، بس شدتها عائشة من يدها ودفتها قدامها.......

قراءة ممتعة
#البارت_السادس_والتلاتون

كن متأكد بأن الخيره فما ختارها الله ، وستكون بخير 😌👌
(الياقوت)
.
.
بعدت غالية ومشت بسرعة وهيا طايرة من الفرحة ، وأول ماخشت من الباب لقت عائشة في وجها ، زمطت غالية ريقها بتوتر وكانت تبي تمشي وتتخطاها ، بس شدتها عائشة من يدها ودفتها قدامها وقالت بكره باين من عيونها:اطلعي من حياتي انتي وهلك ياسر لباتك وخوك لداروه فيا
حاولت غالية تفك يدها من عائشة وضيقت عيونها وقالت:حولي يدك حني مادرنالك شي بابا شن خصه في اللي صار حولي
عائشه زادت ضغطة علي يدها وقربت منها:باتك هوا راس البلا كله من تحت راس باتك حقيت الويل
هدت غالية وشدت يد عائشة لشادتها من مرفقها وقالت:علاش بابا شن دارلك
دفتها عائشة بعيد عليها وحاولت تخفي دموعها وقالت بقوة:باتك وكلابه خسروني شرفي غتصبني ودمرني حسبي الله فيه الله لا يرحمه ولا يربحة ودنبي في رقبته لا يوم الدين وليصير فيك كله من عمايلة السوده
رفعت غالية حواجبها وماعاش عرفت شن ترد وهيا مصدومة وقبل ماتزيد تسال قربت عائشة خطوه منها وقالت:كل مانبحث فيك نزيد حقدي وكرهي علي باتك الكلب الله لا يرحمه لا هو لا خوك لقتلي راجلي وقهرني
ومشت وخلت غالية واقفه مصدومه ، تلفتت وولت طلعت ودموعها ينزلو وكلام عائشة يتردد في ودنها""...: باتك وكلابه خسروني شرفي غتصبني ودمرني حسبي الله فيه الله لا يرحمه ولا يربحة ودنبي في رقبته لا يوم الدين وليصير فيك كله من عمايلة السوده"" شدت غالية راسها وقعدت تبكي وهيا حاسه بنفسها هرب وأول ماغمظت عيونها شافت سليم كيف ضرب الرصاصة في راس بوها لطاح علي الارض ميت في وقته وزمانه
قعدت تهز في راسها وتبكي بقهر ووجع وصدمة :لالالالا خلاص خلاص لااااا لا
سمع محمد صوت وهوا كيف بيخش لحوشه ، رد ونزل واول ماشافها تبكي بالصوت وتهز في راسها ، نزل يجري :غالية
وكيف بقرب منها تلفتتله غالية ودفاته من عليها وصيحت:بعد انتم كدااابين بعدو رجعوني لعيلتي اني نبي بااااباااا نبي بابا
وقعمزت لوطه علي ركابها وهيا حاضنه روحها وتبكي وتناجي في بوها:بابا وينك بابااا
نزل محمد وقعمز علي ركابه قدامها:كنك ياغالية بطلي بكي وفهميني كنك
رفعت غالية راسها فيه ودفاته لين محمد اتكه بيديه علي الأرض التالي:انتم تكدبو انتم المجرمين مش بابا بابا مدار شي انتم لدمرتونا انتم لقتلتوه كان هدا مجدي ماقتلش خوك بابا ميديرش هكي كدابين عائشه تكدب مستحيل
ساوا محمد روحة وقرب منها و غالية قعدت تضرب فيه ودف فيه وهيا تبكي وتصيح عليه ونست جرحة لقعد يوجع فيه بسبب لكماتها بس تحمل وهوا يلف في يديه عليها وحضنها بالغصب وهوا يمسح علي شعرها:اششش ياغلاي
دفنت غالية راسها في سوريته لشدت فيها بيداها بالقوة وقعدت تبكي وتمتم:انت المجرم يامحمد انتم لقتلتو بابا هوا مادارلكم شي انتم ظلمتونا مش حني قتلتولي بابا وماما خليتوني يتيمة
قعد محمد يمسح علي شعرها ويبوس فيها من راسها وهوا يهمس في ودنها:نا اسف ياغلاي اسف نحنا الغالطين باتك مادار شي اهدئ انتي وبعدها لي تبي اديريه فيا ديريه
قعدت غالية تبكي في حضنه وهوا مابطلش يهمسلها باش تهدي ، وأول ماهدت غالية دفاته بشويه وهيا قعده شاده في سورته وشبحتله وقالت:بابا مادارش هكي وله
هز محمد راسه ورفع يده مسحلها دموعها:باتك مادراش شي
غالية:علاش باهي درتو فينا هكي
سكت محمد شوي وبعدها قال:الفتنه اوعر من القتل ياغلاي فتنو ودمرو عيلتين ظلم
غالية:انت عيلتك قعده اني عيلتي وين اه وين
وضرباته علي صدره بالقوة لين محمد تاوه وهوا يوخر ويشد في جرحة .
شهقت غالية ورجعت قربت منه وقالت من بين دموعها:محمد اني اسفه
زمط محمد ريقه ومعاه ألمه وشبحلها وكان وجها قريب من وجهه:نا لأسف ياغلاي سامحيني لدرته فيكم نا وخويا الله يرحمه ويسامحة واااجد ، واااجد لدرجة مش قادر نقرب منك منه
غالية:كان سامحتك ترجعلي عيلتي تقدر ترجعلي خوتي تقدر تخلي ماما وبابا يولو للحياة اه قولي
طبس محمد راسه وماعاش قدر يشبحلها ويشبح لدموعها ، شدتله غالية وجهه بين يداها وقماته ليها وقالت:اشبحلي يامحمد اشبحلي وقولي نقدر
قعدت تشبحله وهوا ساكت ويشبح لوطه ، بعدت يداها منه وهزت راسها:ماتقدرش وله به شن بيفيدني اسفك توا شن بنكسب كان سامحتك لا عيلتي ولا حياتي ولا خوتي بولولي بنقعد يتيمه بنقعد بروحي
و وقفت ومشت تجري خشت وخلاته مقعمز وصوتها وكلامها يترددو في مسمعه ، ووجع ضميرة اضعاف من جرح جسمه .
__
تاني يوم فضي الحوش والخوال والعمام كل حد روح لحوشه ومطراحة
خش محمد للمربوعة علي جده ليتفرج علي الأخبار ومقوي التلفزيون علي قوته وسالم مقعمز جنبه لاهي في تليفونه ، قعمز محمد جنب سالم وضربة علي راسه بشوية :السلام عليكم
شبحله سالم وبتسم:وعليكم السلام
جده:كيف حالك اليوم
محمد:الحمدالله
وشبح لسالم وقال:عدي جيب امي ونادي علي الصبايا يجن
ضيق سالم:عليش شني فيه
قعمز عبدالسلام زين ونقص التلفزيون وشبح لمحمد لقال:عدي نبي نقولكم علي موضوع
وكيف جاي سالم بيسأل أكتر غمط محمد عيونه وقال:عدي ياسالم
تنهد سالم ووقف مشي .
خش سالم للحوش وهوا ينادي:امي
طلعتله هداية من المظبخ:كنك
سالم:تعالو كلكن للمربوعة محمد يبيكن
ضيقت هداية عيونها:ان شاءالله خير شني فيه
سالم رفع كتافة:والله علمي علمك تعالن، قولي لعيشة وميسم وجيبي امي
هزة هداية راسها وخشت قالتلهم وخدت ولدها من امها ومشت طقت علي غالية لماطلعتش من دار ميسم بكل وخشت:غاليتنا عادي تشيلينا شوي
بتسمت غالية لعيونها حمرر من لبكي ووقفت وهيا تقرب من هداية لي لاحظت عليها وقالت:كنك فيكي حاجة حد مضايقك
مدت غالية يداها وهزت براسها:لالا مافيا شي عطيهولي
بتسمت هداية ومدتلها البيبي وطلعت.
حطت غالية لوليد علي السرير وهيا تلعب عليه وفي تفس الوقت دموعها علي خدودها شدت تليفونها وتصلت ب صفاء بس اول ماجاها مشغول سكرت طول .
__
نفخت صفاء وهيا اتسكر في الخط قبل مايكمل التشرين وقلبها يدق :مايبيش يرد عليا اكيد يعني بعد لدرته شني مازال بيرد عليا امالا وااااك
نفخت وسكرت تليفونها وطلعت لصالة واول ماطلعت تلقتها حناها ، هاتي جيبي نوضي ضمي ياصفاء واخر شي زودي ديري لغدي ونبي رشده .
كانت صفاء متحمله بسيف وتتحرك و ادير وفمها ساكت ، لانه ماتبيش ادير مشاكل وصفية يناري ادير معاها اما سارة ف حناها ماتقدرش تدوي معاها علي خاطر ترد عليها وطول في السانها وحناها ماتقدرش عليها زي صفيه وصفاء هههه.
قربعت صفاء الصونية علي الرخامه وهيا تنفخ وتحارف ، خشت عليها امها وهيا جايبتلها تليفونها لشرين:هااك تليفونك يشرين اطلعي تو نكمل غير ماتوريش روحك لحناك فكينا منها
صفاء:خيرها عليا ازح تقول مش بنت ولدها تقول بنت الخدامه
هيام فنصت فيها:اسكتي وسكري فمك تو تسمعك بري اقلبي وجهك قتلك تو نكمل اني
خدت صفاء تليفونها واول ماشافت رؤوف هوا لكان يتصل زادت نفخت ومشت خشت الدار وهيا طايرتلها ، خدت نفس ورجعت اتصلت بيه .
رؤوف:ايوا
صفاء:اهلين
رؤوف:اهلين بيك
انفتح عليها الباب بالقوة لين نخلعت ونزلت التليفون لوطه وهيا تشبح لحناها لخشت وهيا تعارك:والله ماتتحشمي لا تستحي مخليه امك الرزينه ياناري تحط في الغدي وانتي فاتحه معاد الله راك مترزيه في الشقفه نوضي نوضي
جت هيام تجري:خلاص ياعمتي اني لقلتلها تمشي وهيا دارة كل شي اصلا ، وصفية معاي
طلعت حناها وهيا تنقرز وخلت صفاء تشبح لامها وتصيح:يااني ياهيا في الحوش فديت فديت تعامل فيا تقول جايبيني من تشاد نخدم عليكم ديري معاها حل ولا تروح لخربتها
هيام اشرتلها بصبعها بمعني اس وتحملي وسكرت عليها الباب وخلتها تنفخ واول ماشبحت لتليفون ضربت علي خدودها وشدت التليفون وقالت:الو
رؤوف:ايوا
ضربت صفاء جبهتها بكف يدها:اسفه والله حناي خشت عليا
شد رؤوف ضحكته وقال:لا عادي معدورة سمعتها
صفاء ادكرة روحها لما ماردش عليها شن دارة وحست انه ردهالها بدوق باش يحسسها انه هيا لمقصره مش هوا وخلاها في وجها :اني ، نبي نتأسف منك علي كلامي امس
رؤوف:هوا نبي نقولك ولا يهمك بس للاسف هوا مش هامك فعلا بس عادي
صفاء:اوووف عاد مش لهدرجة اكيد هامني مهما يكون اني مانبيش نجرحك ولا نكسرك لكن مانبيش نكدب عليك
رؤوف:اووو شكله توا بتكسريني وبتجرحيني تفضلي تفضلي قولي
سكتت صفاء شوي وقالت:انت كويس ومشاءالله عليك وراجل وربي يشهد كلامي من قلبي طالع بس اني اسفه مش جاهزة لزواج
ضحك رؤوف بهزوة:مش جاهزة ولا فيه غيري
صفاء:لا وحقربي لا ولاني متع جو التكليم واصلا انت اول شخص نكلمه في التليفون وربي شاهد عليا
سكت رؤوف وختصر بوجع باين من كلامه:تمام يابنت الناس انتي في حالك واني في حالي وباذن الله اول ماروح من الصحراء نفسخ كل شي قبل مايولي رسمي
صفاء حست بضيق في صدرها وقالت بسرعة:رؤوف
رؤوف:تفضلي
صفاء:باللهي عليك ماديرش هكي
مسح رؤوف علي لحيته وغير التليفون علي ودنه التانية وقال:شني تبيني ندير امالا ، باللهي عليك لا اني ميت فيك وقعدي معاي وعطيني فرصة ، يعني كان قتلك لكلام هدا بتغيري رايك
صفاء:مش هكي بس اني ، مانبيش نجرحك بجديات معزتك كبيرة عندي
هز رؤوف راسه:تمام استمري معاي
صفاء ضيقت عيونها:كيف
رؤوف:مش ماتبيش تجرحيني خلاص استمري معاي هدا مايجرحنيش
حطت صفاء يدها علي خدها وسكتت وماعاش عرفت شن ترد عليه.
رؤوف:ههه خفتي ، علي العموم كنت نجرب فيك واكيد مش ح نستمر بالغصب عليك
صفاء:تمام خلينا نستمرو
رؤوف:لا مانستمروش هيا مش بالغصب
صفاء:مش بالغصب اني نبي
رؤوف:لا ماتبيش
صفاء صيحت:شن انت قعد في قلبي قتلك نبي خلاص
ضحك رؤوف:هههه شني تحسي انتي
صفاء:اشعر باني متخلبطه وحقربي وحناي زادت لخبطتني
رؤوف:خلاص باهي فكري زين لانه لي بينا مش لعبة
صفاء:عارفة وهدا علاش نبي نكمل ولانه واتقه انك مش ح تخدلني ف حتي اني مانبيش نخدلك
رؤوف:واني مانبيش تخدلي روحك باش ماتخدلينيش
بتسمت صفاء علي كلامه وهتمامه:انت حلو هلبااا
رؤوف:هههه ماعاش فهمت اني
صفاء:شكرا رؤوف لانك تحسس فيا انه فيه حاجات حلوة في الرجالة
رؤوف:وشكرا لانك اتبتيلي انه مافيش حاجة حلوة في جنس حواء
صفاء:حرام عليك
رؤوف:هههه ماعاداك انتي طبعا
سكتت صفاء وتحشمت هلبا وماعاش عرفت شن تقول وهيا أتاتأ ورؤوف قعد يضحك عليها .
__
رقية:الله لا تربحة ان شاءالله خلانا نتقتلو في بعض
شبح سالم لهداية لجت وقفت جنبه وتشبح لجدها لقال:الفتنه اشد من القتل خربنالهم حوشهم وخربو حوشنا الله لاتسامحه ان شاءالله
هداية:قول ياجدي ربي يسامح سليم ياناري ضرهم وخلانا نحنا بعده نضرو فيهم
هز محمد راسه ورفع عيونه وشبح لعائشة المصدومه:اي نحنا لضريناهم مش هن ياعيشة
شبحتله عيشة ودكرت كلامها امبارح مع غالية ، تلفتت وطلعت وخلت محمد يوقف وهوا يشبح لتليفونه ليشرين ، طلع برا ورد علي سفيان:ها يارفيق
بتسم سفيان:ليك وحشه ههههه
محمد:جايكم جايكم هههه
تحمحم سفيان وقال:نعرف مش وقته لكن بنقولك صاحبك رؤوف ال### صح
محمد:اي لقتلة خوه
سفيام قال كردت فعل وبسرعة:ماقتلتاش اني
محمد:ماقتلتاش باهي عليش لما جاني للمستشفي اختفيت
سفيان:اني مانبيش ندير مشاكل وكان شافني ره صارة مشكله ونقاش ماليشي نهاية لكن اني واللهي ماقتلة خوهم يافندي ممكن انت عاشرتني ووليت تعرفني كويس ضميري مش ميت لدرجة نقتل شخص
محمد تلفت وشبح غالية طالعة من باب المظبخ وتتكلم بالتليفون قعد يشبحلها وسرح لين سفيان رجع تكلم:الوو يافندي
محمد شبح لوطه ومسح علي شعرة لطول:ماتفكرش في الموضوع هلبا عشان منتهي
سفيان:كيف
محمد:مالك سعد ال## هضا ولد جيرانكم
سفيان:اي هوا هدا يافندي والله شبحته بعيوني قتله
محمد:توا هوا في الحبس عنده قضية تجارة مخدرات
سفيان فتح عيونه وضحك بفرح:ههه ياداير يالاقي يعني توا نقدرو يافندي نحققو معاه
محمد:اي وهدي مهمتك كلم زياد نا كلمته وفهمته شني يدير والعيل لكي لكن رد بالك ماتستخدمش معاه العنف واجد عشان يقدر يرفع عليك قضية عنف
سفيان:تمام تمام يافندي وشكرااا هلبااا
محمد:خليه يعترف وبعدها اشكرني
سفيان:ان شاءالله هي سلام
سكر محمد واول مارفع راسه تلاقو عيونه مع عيونها لكانت واقفه وتشبحله ، قعدو يشبحو لبعض فترة وبعدها غالية خشت بسرعة وخلاته يتنهد ويمسح علي جرحة ، تحرك من مكانه وخش الداخل وهوا يمشي لدار عائشه .
واول ماخش تلفتتله عائشة لوقفت:محمد
سكر محمد الباب وتلفتلها وقرب وقال:البنت اخطيها كافي لدرناه فيها وفي هلها ياعيشة
عائشة:وكنك مهتم فيها هكي
محمد:البنت امانه في رقبتي كيف تبيني امانا مانهتمش بيها
عائشة:مش عارفه لكن حاسه انت قلت هكي عن هلها بيش تاخدها من غير ماحد يعارض
وشبحتله وكملت:معقوله اطلع خوك الغالط عشان مصلحتك وضيع حقي عشانها
ضيق محمد عيونه:شني تحقي فيا غاوي صبايا
وعلا صوته لين هداية وميسم لكيف خاشين نخلعو في المظبخ:نا اكتر من مرة نعدي لكي فيها ياعيشة لكن هنا وبس افطني شني اطلعي من فمك
عائشة علت صوتها وقالت ودموعها تجمعو في عيونها: هضا كله عشانها
صيح محمد:وطي حسك
وخرت عائشة بخوف ومحمد خبط يده في الحيط بالقوة لين جرحة وجعة وغمظ عيونه بالقوة بوجع وقال وهوا يتلفتلها ورافع صبعة في وجها:اخر مرة نقولها لكي حسك يعلا ماتلومي كان روحك ، والكلام لقلتيه كان نسمعة نعاد تلقي روحك في حوش هلك ياعيشة ، كيف ماظلموك ظلمتي البنت ونا لما نقول كلام ونعوده لكن معناها واثق منه مش مطلعة من راسي
وتلفت وطلع قربع الباب بالقوة وطلع من الحوش .
.
سكرت غالية الباب بشوية وتكت عليه وهيا تفكر.....
__
سفيان صيح:تي باهي علااااش نبي اليوم اني
زياد نفخ:تي خيرك انت مانقدروش لين يحولوهم للحبس هدا انت عارف غادي السيد كريم بديرنا سين وجيم وحتي الطقه قالي اصبر لين يحولوه هني
ضرب سفيان الارض برجله:وامتي يجيبوه الكلب هدا امتي بتجيبوهم هني ازح
زياد:سفيان انت راجيت سنين مش صاعبه عليك تراجي يومين ، اصبر وكبر عقلك وخليك هادي باش تاخد حقك ، التهور هدا يريح منك كل شي
تنهد سفيان وتلفت ومشي وهوا مش قادر يصبر بعد ماعرف انه في الحبس ، بس فكر في كلام زياد كويس ومايبيش يدير حاجه يخسر بيها تقة محمد .
__
قوي محمد المسجل وتكه علي وكرسي السيارة بظهره ورجع راسه التالي .
شبح للكرسي لجنبه اول ماتليفونه شرين ، مد يده وخداه واول ماشاف من بتسم طول وفتح الخط:اسمعي ياقلبي
ستغربت غالية من رد محمد لقرب التليفون من المسجل وزاد قوا الاغنية ، عيني عنك ، يبو يخشو ، بيني وبينك ، تنحط يديا في يدينك ، ومنديرو اللي في بالهم ، ياحبيبتي ، شن درنااالهم ياحبيبتي ، شن درنالهم ياحبيبتي .
حط محمد التليفون في ودنه وقال مع لغنية بضحكه:شن درناالهم يخطووونا ويشقو في حالهم
غالية:نحسابكش تعرف تغني
محمد:هيوالله مه نا دماغول
غالية شدت ضحكتها:اي صح
محمد ضحك:هوا حقا شني معناها
غالية ضيقت عيونها:هوا يعني زي الغول لالا مجرم ممكن ولا سفاح قاتل عفريت
محمد:ههههه من الاخير قولي مانعرفش
غالية قعدت تضحك لانه بجد ماتعرفش شن معناها:ههه نعرفش لما كنا صغيرين احمد خوي يقول فيها لمجدي علي خاطر شيطان وعنايدي
محمد:غلاي
غالية:خيرك
تنهد محمد:الله ينعم عليكي
رجعت غالية ضحكت:ههه كنك
سكت محمد وهوا يسمع في ضحكاتها وبعدها قال:يجعل ماتغيب عنك الضحكه ياقلبي
تحمحمت غالية وبطلت ضحك وهيا مبتسمه ومحمد كمل وهوا يحط في السبسي في فمه وقال وهوا يولع فيه:مسامحتيني
ماردتش غالية عليه وقعدت ساكته.
نفخ محمد الدخان وقعد ساكت ، قعدو ساكتين فترة وكل واحد يسمع في انفاس التاني ومحمد مرة مرة ينفخ في الدخان لخلا غالية تنفخ حتي هيا وقالت:يعطك ابصر شن يسمو فيه ياسر من الدخان
محمد:يعطيني انتي ان شاءالله حاضر ياقلبي
فتح محمد الروشن ولوحة وكمل:وها كبيته
بتسمت غالية:محمد
محمد غمط عيونه:هااا يانبضه
نفخت وهيا تقلب في شفايفها وقالت بصوت وااااطي:نقدرش نسامحكش اني ماهو نحبك
ماردش عليها محمد لين غالية ستغربت ورجعت قالت:الووو وينك
محمد بتسم:تحبيني واجد ولا شوية
تحشمت غالية وقالت:ماخصكش
محمد:هههه امانا من خصه ياطشتي
غالية:اوووف اسكت تحشمت
زادت ضحكت محمد:وربي كلك علي بعضك في قلبي من جوا ياغلاي
بتسمت غالية وهيا تحضن في روحها وتسمع في ضحكاته الهادية الرجولية علي حشمها منه.........
.
.
.
__
#يتبع_للبارت_لبعده
____________________________________
بداء كتاب الرواية في 2019 / أبـــ4ٰـــريل / 7
تم وضع قَفلة لـ الرواية في 2019 / سبتــ9ٰـــمبر / 25
اسم لغنية /شن درنالهم ياحبيبتي ، لـ احمد هاشم