عشق في بلاد حروبها لا تنتهي ( الفتنه و الثأر)

البارت6

_
_
#عشق_في_بلاد_حروبها_لا_تنتهي
   الحلقه 6
(الياقوت)
في الحلقة السابقه
هزة نادين راسها وفارس وقف وتلفتلها:تبي نجيبلك
رفعت نادين راسها:لالا تو نمشي بروحي غير نظم لمنادير ولبطاتين
وشافت لدار لمنكتها سي زيد وهما راقدين مشي فارس خش للحمام ونادين وقفت اظم في الدار وفي لمنادير لرقدو عليهم ، ومشت توتي في لفطور..
.
قراءة ممتعه 💛
#البارت_السادس
.
بلادي فقد من تقول ، بأن القاتل يورث ذنب قتله لأبنأه لكي يدفعون تمن قتله لشخص ما بدون اي ذنب لهم .
.
انفتح باب الشيلا وحط صونيه فيها شربه او بالاحره اميه مخلطه بطماطم لا غير ونص فردة خبزه ورجع سكر الشيلا لمظلمه ومش منور عليها غير بصيص الشمس من روشن عالي موصد بحديد لتهويه .
نهض احمد روحه بسيف وقعمز زين جبد الصونيه والخبزه وقعد ياكل والدموع ينزلو من عيونه دموع راجل اندل ونزل وتهانة كرامته علي خاطر بس بوه كان ضابط متواضع علي حاله مع الحكم السابق أليس محزن ان يعاقب الابن علي وظيفه كان يمتهنها ابيه لكي يعيلهم بها .
زمط احمد ريقه وتكه بظهره علي الحيط وهوا يفكر ، زعما غاليه كيف مدايره بروحها من معاها من بعد امي ورفع يده يمسح علي رقبته ويتحسس في جروحه من ضرب السوط ودموعه نزلو كأنه عيل صغير ، وينك يامي معقوله مشيتي موتي من غير مانشوفك من غير مانبوس راسك قهرتك علينا اني ومجدي قتلاتك سامحيني يامي سامحيني مش ذنبي انه وليت مذنب من لا شيء
مسح دموعه بديه الزوز وهوا يحاول يبطل بكي ويستغفر ربه وقعد يدعيلها برحمه ، نزل يده علي الارض وتحسس بيده وقال بهمس:مافيش تراب ولا رشاده
تنهد ووقف وهوا يسند في روحه علي الحيط لين قدر يوقف علي حيله وشبح لروشن العالي بكل وقال:ياربي اني لا متوضي ولا نعرف القبله وين ولا فيه تراب ولا رشاده باش نتيمم ، فتقبل مني يارحيم صلاتي وسامحني
ورفع يديه وكبر وبدي في الصلاة .
.
من الجميل ان يكون اتصالك بربك اقوي من جروح عميقه تعيق صلاتك ، او هم يعيق تفيكرك ، او ظلامات تعيق نظرك علي الصلاة ، جميل ان تسلم احكامك لرب الكون وتثق به بكل حواسك ، ذالك هوا الإيمان
.
__
قعمزة إيلاف فوق الرخامه وهيا تتنهد وتنفخ:ماتم حرب ليبيا لين اني نتفجر من نقاشات بابا وسراج العقيمه من التفاهم
قعمزة روان جنب امها لوطه لمفرشه البخشه وتقرض في الخضره:وماينبت ضرس العقل لسراج لين يجبلنا الجلطه بأذن الله
ضحكت إيلاف:ماما بالله لما كانو يوزعو في العقل وين كنتي داسه سراج
نجيه:ياناري وليدي اكيد كنت عطياته طريحة المزاق لوحده من عمايله ويعيط في وحده من التراكين لمدخنسه
ضحكو إيلاف وروأن وهما يتلفتو لرؤوف لخش عليهم:ضحكونا معاكم
إيلاف:والله طايحين نقرمو في سي سراج
خش سراج وضربها علي راسها لين نزلت من فوق الرخامه وهيا تشد في راسها وتشبحله بقرنة حواجب
سراج:بدل ماتقرمي فيا نوضي ديري مع امك يابايره
نفخت إيلاف:رؤوف كلمه ماعاش يضربني
كيف سراج بولي يضربها تاني ضربه رؤوف علي كتفه:فكنا من نشافها اركح انت وياها
وتلفت لأمه:يمه جعان امتي بطيب العصبان
نجيه:اصبر العفو شوي تانيه ويطيب
طلع وهوا يقول لسراج: باهي تعالا سراج نبيك في موضوع
ضيق سراج عيونه وشبح لروان لقعدة تشبحله وطلع وخلاها تفكر في نفسها""زعما خالد قال لرؤوف""
ستاقطت بعياط امها علي إيلاف:تي زودي ديري معانا وانتي تحوسي علي روسنا علي الفاضي
إيلاف:ماخاطريش
نجيه:شن هوا بالخاطر كان عليا مانديره رقبتي وكتقي بيتكسروغير علي خاطر خوك تو يمشي لصحراء ويقعد خاطره فيه
قعمزة إيلاف بتطريم شفايفها:حتي هوا من رؤوف ولدنا لعسل ياحنه وحني ارانب
نجيه شبحتلها:سكري فمك وديري
__
قعمز فارس علي المرشبيدي ورد علي الشخص لمعاه في التليفون:ياريت والله عادي ، وكان ماقدرش حتي رقم تليفونه ساد ، صحيت ياقدر ماقصرت برو مع السلامة تصبح علي خير
سكر فارس التليفون وهوا يشبح في باب الحوش لنفتح وطلعت نادين:خيرك مقعمز في الجنان
فارس:كنت نتكلم في التليفون
نادين:هي خش تعشي
وقف فارس وخش هوا ونادين لمفرشه البخشه في وسط الحوش وحاطه لعشي ، قعمز فارس وقال:وين زيد امالا
نادين:واااه اسكت فرحانه قريب انطير رقد بكري اليوم
ضحك فارس وقرب بياكل بس رفع راسه لنادين لبتخش المظبخ وقال:تعالي تعشي
نادين:لالا تعشي تعشيت اني
فارس:تعالي قتلك
نادين:منظم الكوجينا
فارس:تعالي خير مانقلبه
نفخت نادين بالقوه بس اول ماجت عينها علي فارس اللي ضيق عيونه وشكله تعصب رفعت يداها فوق وقالت:لالا والله ماصارت يانفختي رديلي نجي ورجلي فوق رقبتي
وجت قعمزت طول قعد فارس يضحك وياكل وهوا كل مايشبحلها يضحك ويبطل ماكله لين رقهالها:اسكت عاد عقدتني
فارس:هههه مفهمتش اني انتي عبيطه غبيه ولا الكوميديا عاليا عندك ولا التعصيب حيرتيني
رقصتله نادين حواجبها:هيا دبريلي حترت معاك هيا دبريلي
وقعدت تصفق وتغني وطربق في صوابعها ، تلفت فارس جنبه لقي مخده عزقها بيها لين نخلعت وشدت لمخده بقوتها:سكري فمك ماصدقتي انتي فتحتي موال
تنهدت نادين:الله يسامحك
قعدت تنقب من لعشي وتشبحله كيف ياكل ومبتسمه لين رفع راسه فيها:خيرك
نادين:شي ، اي مافيش اخبار علي سفيان
مسح فارس يديه بالفوطه وفمه وتكه علي المندار:كلمت ولد صاحبي خوه يخدم مع الصقر عطيته اسمه بالك يعرفه ولا يدور عليه
نادين:زعما كان لقاه يكلمك
فارس:مانعرفش مانستغربش لو مارضاش يكلمني
سكتت نادين وهيا تشبح في فارس كيف تغير وجهه وباين عليه متلخبط بين افكاره
__
فتحت غاليه عيونها بشويه وقعدت في فراشها من غير ماتتحرك وهيا تشبح في صفاء لراقده في لفراش لجنبها وحاضنه اختها حلا الصغيره ، نزلو دموعها وقلبها انقبض وهيا تدكر في امها لي سكرة اسبوع وهيا تحت التراب وهيا بعيده عليها حست بوحدتها الموحشه ، تنهدت وناضت قعمزت وهيا تتلفت يمين وتشبح في خديجه لراقده وجنبها صفيه اخت صفاء لأصغر منها تلفتت يسار وقعدت تشبح لصفاء لراقده وحاضنه حلا وبعدها راقده ساره لواخده تلاته منادير بحالهم وهيا رجل في الغرب ورجل في الشرق ، زرت غالية الضحكه وهيا تنوض توقف بشويه وخشت الحمام توضت وطلعت خشت لدار وهيا تستاقض لتليفونها لمعاد شفاته ، قعمزت علي سرير امها وهيا تدكر انه صفاء قتلها انه حطتهولها في قجر الكمدينو متع دار النوم ، فتحت لقجر ولقاته طلعاته وفتحاته اللي اول مافتحاته لقت صاحبتها منيا باعتتلها رساله فتحتها وكان مكتوب فيها(غاليه حبي ستاحشتك اولامس جيتك وخشيتلك في الدار بس لقيتك راقده مابيتش انوضك ، المهم امتحاناتنا الاسبوع الجاي لا لبعده حاولي كيف تجي ماضيعيش عليك السنه ، تو نكلمك غدوه)
تنهدت وسكرت التليفون ووقفت خدت متع الصلاة والصلايه وطلعت صلت في الصالون وقعدت تبكي وتدعي لامها وبوها ولخوتها لين رقدت في مكانها
__
قعمز محمد جنب امه وهوا يلبس في بوتيل الجيش:كنك قعد بدري ولا ماعجبكش الجو هنا
رقيه:لالا هوا هضا ريفت علي ميسم وسالم وهدايا ونا خلاص اهو جيتكم وخديت بخاطرك
محمد:بكيفك
ووقف باس علي راسها:بكرا نحجز نا وياك وعائشه
بتسمت رقيه:بتعدي معانا؟
محمد:اها فكيني من قطاف جدي
ضيقت رقيه عيونها:انت مايعرف دوك كان جدك
وقبل مايتلفت محمد ويمشي قالت رقيه:اسمع كان ماعندك شي قيس العصر تعالالي نبي نعدي نشوف لبنيه
محمد بستفهام:بنت مني؟
جت عائشه وحطت القهوه قدام رقيه لقالت:لعدينالها امس نبي نعدي ياناعليا تكسر الخاطر بكل لا ميمه لا بات ولا خوت مقومين تكسر الخاطر نشيلولها تمويل وسبيزه
تعصبت عائشه لقالت وهيا تحاول ماتعليش صوتها:تحني علي اللي خوتها وباتها قتلوني وقتلو ضناك
رقيه:لبنيه ماذنبها شي وبعدين نحنا احسن منهم ديري الخير وكبيه في البحر
خدي محمد القهوه وقال:تمام العصر نجيكن
وطلع وخلا عائشه تتلفت لرقيه:نا مانبيش نعدي لوحده كيفها انتي ياعمتي ماتعرفيهنش اصبايا لكيفها من تحت لا تحت ماتطلع لحد غريب عيلتها كلهم شياطين ربي ياخدهن وينتقم منهن
رقيه:عيب عليك ياعيشه سواد القلب مش باهي
سكتت عائشه ومن داخلها تغلي وتتحسب
__
نفخت ايلاف لقعمزت جنب روان لتتفرج علي التلفزيون ومنسجمه
حدفت ايلاف التليفون جنبها وقالت:ادراه هدا فددني ماعاش يبي يبطل عليا
قلتلها روان وعيونها في التلفزيون:من هوا
ايلاف:رقم من صبح ربي يتصل علق فيا
تلفتتلها روان:رقم من
ضيقت ايلاف عيونها:ونبي كان نعرف علاش ماردش ، قسم بالله كان اتصل مره تانيه لما رد عليه ونسمعه وسخ ودانه الكلب هدا ناس تحارب وتنقتل وهوا يتسهوك علي خلق ربي
روان:فكك منه تو يسمع صوت بنت يزيد يعنكش ديريله حظر وفكك
رفعت ايلاف كتافها:ماما امتي بتروح
روان:مرات تبات اليوم حناي مريضه
خدت ايلاف تليفونها ووقفت:نديرلك معاي نسكافي
زادت روان قوت التلفزيون:ديري ديري واونا ضاربه في لفريز تلقيه في الحفاظه الصفره ماتلبزيش تاني
مشت ايلاف للمظبخ وحطت تليفونها علي الطاوله وفتحت التلاجه طلعت لحليب وطلعت حفاظت النسكافي من لفريز ، حطت البكرج علي النار وصبت لحليب سمعت صوت رساله وصلتها نقصت علي لحليب وقعمزت علي الكرسي وهيا تفتح في الرساله (ردي ياايلاف) ضيقت ايلاف عيونها وقالت:ماتطلع غير صفاء تتسهوك
اتصل التليفون وهوا بين يداها فتحت الخط وردت:الو من معاي
...:ايلاف
نخلعت ايلاف ووقفت وهيا تسكر في الخط ، وتشبح لتليفون لبين يداها ومصدومه.
خشت روان تجري سكرت علي لحليب لفيج ويعاود:يدهب شيرتك ياايلاف اكتر ماهي مدهوبه فاش لاهيا ولحليب من الفجان لين نزح
شبحتلها ايلاف وقعمزت علي الكرسي وردت تشبح لتليفون لرجع يتصل
روان:تي خيرك تقول شبحتي بسم الله لعظيم لونك اصفر ودراه هدا خيره معاش سكت ديريله حظر
شبحتلها ايلاف وقالت ودموعها نزلو وهيا تشبحلها:هدا سفيان
زمطت روان ريقها وحست رجلاها معاش حملوها وهيا تجبد في الكرسي وتقعمز عليه بفم ساكت وهيا تشبج لتليفون لحطاته ايلاف قدامها علي الطاوله وتشبحله وتبكي
__
سكر فارس باب الحوش وهوا يطلع في تليفونه لشرين ويرد عليه واول مارفع راسه شبح سراج نازل من سيارته قدام حوشهم حط التليفون علي ودنه وقال:الو
...:فارس
نزل فارس عيونه من سراج وتلفت وقال:سفيان هدا انت
سفيان:شن حالك
فارس:كيف حصلت رقمي تي عيت وتشنتطت واني نحاول نوصل فيك
سفيان:حتي اني تعبت باش قدرت نوصل فيك
فارس:وينك انت وشن حالك وكيف مداير
سفيان:اني ، بديت نخدم مع جمعة الصقر
فارس:عرفت وياريتني ماعرفت اكيد انت مافيكش عقل اكيد دماغك ط.....
وتسكر الخط في وجهه شبح فارس لتليفون ورد عاود بس يعطي فيه الرقم المطلوب خارج نطاق التغظيه ضرب برجله السور وقبل مايزيد يحاول..
.
.
.
#يتبع_للبارت_لبعده
________________________________
بداء كتابة الرواية في 2019 / أبـــ4ٰـــريل / 7
تم وضع قَفلة لـ الرواية في 2019 / سبتــ9ٰـــمبر / 25