عشق في بلاد حروبها لا تنتهي ( الفتنه و الثأر)

البارت 9

_
_
#عشق_في_بلاد_حروبها_لا_تنتهي
   الحلقة 9
(الياقوت)
في الحلقة السابقة
بتسم محمد وخش لصقر لمقعمز وحاط رجل علي رجل وشاد تليفونه.
محمد:اووووبه تريتك جوك سمح بكل
شبحله الصقر وضحك:والله سمح بكل ياراس اليوم بنرتاح من غمه كانت علي قلبي الله لا تروعك
.
قراءة ممتعة 💛
#البارت_التاسع
.
ضيق محمد عيونه وسكت وهوا يحاول يفهم:اممم شني ناوي
رفع الصقر كتافه:ارتاح انت
وناض وقف وهوا يقرب منه وطبطب علي كتفه:هي نوض تسقد وقت والبوابه لفاها رجالي ساعتين ويجو تانيين يناوبو غيرهم
هز محمد راسه وهوا يشبح لصقر بنظرات غير مريحه لين الصقر حس بيه
الصقر:خيرك
محمد فتح الباب:ولا شي بس اوعك تعدي نبي لما نجي نحقك هنا لازمني اليوم انت
الصقر بتسم:تي من عيوني
طلع محمد من المكتب وسكر وراه الباب علي الصقر لرفع تليفونه وتصل:الو الشرقاوي جايكم تمو موضوعه ماعاش نبي نشوف خليقته
وسكر وهوا يضحك ويتنهد براحه
طلع محمد لشباب ليستنو فيه باش يمشو معاه واول ماشافهم قال:وين سفيان
زياد:اهو جاي
طلع محمد تليفونه من جيبه وهوا يشوف في رساله لوصلاته ورجعه في جيبه وقال:زياد نبيك اول مانعدي من هنا اطلع احمد
زياد ستغرب:قصدك نخليه يروح
محمد:اها توا مش بكرا وحتي انت عدي من هنا ماليكش لازمه نا بنتأخر بيش نوصل هنا وماعندي ماندير بيك الليله
هز زياد راسه:حاضر يافندي
طبطب محمد علي كتف زياد وأشر بيده علي الشباب باش يركبو السيارات وأول ماشبح سفيان جاي قاله وهوا يفتح في باب السياره:اوفا تعالا معايا
ضيق سفيان عيونه وتلفت وراه وهوا يمشي وقال وهوا يقيم في يديه ويأشر لروحه:تكلم فيا اني
محمد:اها بسرعه اركب معايا
سرع سفيان خطواته وضحك لزياد وهوا يقوله:اما الراجل طقه حق هههه مع السلامه
رفع زياد يده:مع السلامه
ركب سفيان مع محمد لتحرك وطلع وطلعو وراه زوز سيارات....
__
ضيقت نادين عيونها وهيا تحط في يداها علي صدر فارس ودف فيه برا:ماتخشش اقعد برا ، برا لحوشنا ولا دور وين تنتلف لين يروحو
مسح فارس علي وجهه:تي نحي يادوده نبي ناخد الشحن باه ونطلع
نادين هزة راسها:الا اقعد هني اني تو نخش نجيبه
فارس:بنسلم علي خالتي
نادين:الا لما تروح تعالا سلم عليها في السياره
فارس:تي نحي يادراه خير امك نحي بنخش الحمام
نادين:حتي حني في حوشنا عندنا حمام برا غادي
فارس:دودة قسم بالله كان ماتنتلفي علي ام وجي لما اركك كف
نادين ضيقت عيونها وربعت يداها ونفخت بيأس:اووووف باه كان قتلك مانبيكش تخش
فارس:وعلاش
نادين:هكي هكي مش انت راجلي خلاص مانبيكش تخش تروح خالتك وبنتها بعدين تعالا
فارس:واني نبي نخش نحي
ناجيه:فارس
تلفتت نادين وراها علي طول وهيا مش عاجبها
خش فارس وقرب سلم علي خالته:شن حالك
ناجيه:الحمدالله اهو خش خش هدرز علينا ستاحشتك
بتسم فارس وخش وماشبحش لنادين بكل لنفخت وهيا تخش للكوجينه وتخبط علي الطاوله لين تلفتتلها فرح اختها لتغسل في الماعين:خيرك
نادين:ياحنه اكيد بخش بشوف حبيبت القلب
ونفخت وقعمزت: حتي هما قداش ليهم ماشافو بعض تراهو مستاحشها
ونفخت وهيا تشبح لفرح لتكت علي الرخامه وترمش بعيونها وتهز برجلها بملل:فروح زعما قعد يحبها
بطلعت فرح هزان:ره فاتو سناتين وانتي مرته توا وام ولده حتي لو كان يحبها بينساها بس اللي ديري فيه وشدانك ليه قدام الباب وتلميحاتك هدو هما لي بخلوه يدكرها
نادين:امالا تبيني نخليه يخش من غير مانعارض نبيه يحس انه اني نعرف ومانبيشي يقابلها
فرح جت قعمزت جنبها:ياحماره خليك ريلاكس تعاملي عادي ولا كأنك كنتي تعرفي انهم خاطبين او يبو بعض اساسا المهم توا المهم انه توا راجلك انتي مش راجلها وبري غيظيها وتكلمي قدامها معاه برقه ووريها انه يبيك انتي باش تبعد كان في بالها فكره سوده
وقفت نادين علي طول لين خلعت فرح:تي خيرك
نادين ساوت قصتها وبلوزتها:مش قلتيلي بري اهو بنمشي وتي الصفر مابين جيتك وتو بتجي فاطمه
مشت نادين وخلت فرح تمد في شفايفها:عليك نادين وخلاص
خشت نادين لدار التقعميز لأول ماخشتلها شافت نهي لمقعمزه مقابله فارس وتبتسمله ، ضيقت عيونها وجت قعمزت جنب فارس.
شبحتلها امها حنان:شن وتيتو لعشي
هزت نادين راسها بمعني اي
حنان:امالا غر نوض نشوف الحوش ونجيكم
نادين:فاطمه مشت خليك
حنان:ندير دوره ونجيكم
طلعت حنان وناجيه قعدت تهدز علي فارس:بتستقر هني
فارس:لا والله المده الجايه منولو لتركيا
ناجيه:العفو علاش الغربه حاره ماحسنلك غير بلادك اقعد هني علي الاقل مانستاحشوكش ، وانت ترتاح من الغربه يقولك من طلع من داره قل مقداره
لودت نادين عيونها وقالت في خاطرها""هدا لناقص والله باش تزيد تتلصق فيه الست بنتك""
نادين:خدينا حتي علي غادي كانها بلادنا تعودنا
نهي شبحت لفارس:تتعودو بس ح تحنو علي الرجعه
فهم فارس قصدها طبس راسه وقال:بالعكس مرتي وولدي معاي علي من بنحن كان هما معاي
بتسمت نادين وشبحتله.
ناجيه شهقت:العفو وخيرنا حني ماتستاحشش فينا
ضحك فارس:انتي ياخالتي مكان لميمه الله يرحمها كيف مانستاحشكش
تحمحمت نهي اللي وجعها رده وقالت:تلودو تلودو ومرجوعكم هني مهما يكون مكانك هوا مكانك
شبحلها فارس ونزل عيونه من غير اي كلمه ، واول ماتلفت لنادين لقاها تشبح لنهي وعيونها كلها غيط وتتنفس بسرعه ، بتسم وقال:وين زيد امالا
مابتش نادين ترد عليه ولا تشبحله.
ناجيه:عند جده قالو ياوخيتي عسل اول ماخشينا جي لهنيوه طول
نادين نطت وقالت:غير كانت شاده شكلاطه كان هدا ره ماعدل عليها
وبتسمت بسيف لين خلت فارس ينخسها بمعني اسكتي.
نهي:بالعكس والله قعد يلعب معاي وحبني والله عسل بكل ينزرط زرط
كيف جايه نادين بترد عليها قص فارس:نادين نوضي شوفيهم حسه خالتي وفاطمه جو
زمطت نادين كلمتها وشبحتله شبحه نااار وناضت بغل غلها...
__
الخونه للخوانه زي النار الوالعه ، تهب و تولع في اللي يجي قدامها ، يعني كل ماينخان يزيد طغيان 💔
.
شبح سفيان لمحمد لسوق:عادي نحط تليفوني في الشحن
هز محمد راسه وهوا يشبح لتليفون لشاده في يده وهوا شاد في الدومان ويسوق ، حط سفيان تليفونه في الشحان وفتحه طول وهوا يشوف في الرسائل و المكالامات الفائته اللي من ايلاف ، تنهد بالقوه لين محمد تلفتله:كنك
سفيان:لا شي
شبح محمد قدامه وهوا يشبح من مراية الباب وراه بس مالقاش سيارات الشباب ضيق عيونه وخف من السرعه شويه وهوا يشبح في زوز سيارات جايات قدامه وفيه شباب ملتمين طالعين من الرواشن وقبل مايفكر او يدير اي شي بدو يضربو بالسلاح ، نزل سفيان لوطه علي طول ومحمد لف السياره بس طلعو زوز سيارات من الجيها التانيه وحجزوه في الوسط ، طبس وطلع سلاحه وبدي يضرب وهوا يسوق وماباش يوقف وهوا يسمع في صوت سيارات يسطربو شبح لسفيان لفتح الروشن ويبي يضرب بالسلاح عيط عليه:انزل تحت
دار سفيان ودن طرشه وقعد يضرب بالسلاح
ومحمد قعد يشوف في السيارات لجو قدامه ك حمايه ويضربو في الجمعه لهجمت عليه وقف السياره ونزل وهوا يفتح في السلاح ويعبي فيه برصاص ويشبح لسفيان لنزل وقدم مع الشباب ليضربو من ورا السيارات لحمو بيها سيارة محمد لكيف بقرب وهوا يشد في السلاح بين يديه زين حس بسلاح انحط علي راسه وصوت قال:اوقف
وقف محمد وقعد يشبح في الشباب لبعاد عليه بمسافه وكلهم لاهين في الضرب لصاير غادي ، رفع محمد يديه فوق وهوا يسمع في صوت عرفه لي من كويس:حط سلاحك لوطه
طبس محمد بشويه وحط سلاحه لوطه ووقف وهوا يلود بشويه واول ماشاف وجه زياد ضحك:وصار منك
ضحك زياد وهوا يدكر.....
__
رفعت غالية يداها فوق وهيا تدعي:ياااارب إجمع شملنا اني وخوتي يااارب فرج علي وخيي وفك اسره منهم ياارب وجع قلوبهم زي موجعو قلبي
نزلو دموعها وغمظت عيونها واول ماغمظتهم شبحت عيونه كيف لما هد عليهم وخدي احمد ، فتحت عيونها طول:يارب خود حقنا منه يارب وجعه احرق قلبه زي ماحرقلي قلبي وقلب امي علي خوي ياربي انتقم منه وحرقله قلبه يااارب
وقعدت تبكي بصوت عالي ، سمعت صوت الباب يالي يدق بالقوه خافت وهيا تشبح لساعه لكانت 12:30 خافت وهيا تمسح في دموعها وتهمس بشويه:زعما صفاء
وقفت ومشت جيهت الباب وهيا ساكته لين جاها صوت خلاها ترعش وهيا تفتح في الباب طول
حطت غالية يداها علي فمها وهيا تشهق من لبكي:احمد
قربت منه علي طول وحضناته...
__
ضحك زياد وهوا يدكر لما محمد طلع ، مشي لشيلات طول وهوا يمشي لشيلة احمد وخشله وهوا يقول:هي اطلع بسرعه
ضيق احمد عيونه ووقف بستغراب:نطلع وين
هز زياد راسه:بسرعه قبل ماحد يلاحظ
طلع احمد وهوا مش قادر يمشي زين ويتكه علي لحيوط ، سخف عليه زياد لقرب منه وحط يد احمد علي رقبته وساعده يطلع ، وركبه في السيارة وركب وطلعو من المقر.

حط زياد يده في جيبه بطلع تليفونه بس مالقاش تليفونه ضرب الدومان وقال:ايح علينا
شبحله احمد اللي من الارهاق وتعب يتحرك ببطي:خيرك
شبحله زياد:بنولو للمقر نسيت تليفوني
لاد زياد وولا بس علي مسافه بعيده سمع صوت رصاص
احمد:صوت ضرب
زاد زياد قرب اكتر وشاف فيه سيارات لبوات يضربو جيهت المقر وجمعه كبيره داخله للمقر لبسهم عرفه كويس لبس جمعة مأسسة الدوله ، ضحك وهوا يوقف في السياره بعيد في مكان متركن:هوا معاهم صار ، هدا علاش قالي روح اليوم ماليكش لازمه
احمد:شني
..
نزل زياد سلاحه وقرب من محمد:يصير مني وعلاش مايصيرش
مسح محمد علي وجهه ونزل خطف خدي سلاحه من علي الارض وهوا يسحب فيه:اها يصير
وضرب تحت رجلين زياد طلقتين بضحكه لين زياد نقز بخوف:كنت فاطن بحفرة الصقر ليا هااا يابيوع
وتلفت وهوا يلاحظ صوت الرصاص خف هلباااا سيب زياد ومشي بخطوات سريعه جيهت الشباب يشوف في الوضع لكان تام والشباب محاصرين جمعة الصقر وكان فيه زوز مقتولين.
.
.
.
#يتبع_للبارت_لبعده
____________________________________
بداء كتابة الرواية في 2019 / أبـــ4ٰـــريل / 7
تم وضع قَفلة لـ الرواية في 2019 / سبتــ9ٰـــمبر / 25