عشق في بلاد حروبها لا تنتهي ( الفتنه و الثأر)

البارت التالت

_
_
#عشق_في_بلاد_حروبها_لا_تنتهي
الحلقه 3
(الياقوت)
في الحلقه السابقه
تلفت بوها وأول ماشبحها بتسم:نادين
ضحكت نادين ووقفت زيد لوطه وقربت من بوها وحضناته:ستاحشتك هلباااا
طبطب الحاج فتحي علي ظهرها وبعد عليها :حتي اني يابنتي تو بعدين نهدرزو اني بنمشي نوصل خوك لحوش خالتك ونجي
بتسمت نادين لعمر وهزة راسها:باه
.
قراءة ممتعه 💛
#البارت_التالث
تبا لأوليائك الدين جعلو من بلادي بحرا من دماء شعبها 💔
.
#نادين
تلفتت لفارس لقعمز علي ركابه يبوس في زيد قعدت ساكته ونشبحله باين عليه مجروح مرهق تحت عيونه اسود اكيد مش راقد:حياتك الباقيه
هز راسه من غير مايشبحلي وهوا يقيم في زيد في حضنه وقعمز بيه علي حاشية المرشبيدي تنهدت وقلت:سفيان عرف
حط زيد لوطه ومسح علي وجهه وقال:لا من بيقوله تي حتي زيارة مافيش زي العالم والناس
عندكم علم انه من لما سفيان انحبس يعني من سناتين لا توا لا كلموه ولا زاروه ولا حتي حكموه باش يرتاح ويرتاحو اهله ، للاسف هكي الحبس عندنا في بلادي ، قربت منه وقتله:امس رقدة هني
قال وهوا يوقف وبتسم لزيد لينادي فيه بكلمات متعثره:لا
ضيقت عيوني:مالا وين رقدت
تحمح وقال:في المقبره
رفعت حواجبي وحسيتها جتني في الصميم قعدت واقفه شوي نتأمل فيه لين تلفتلي وقبل مايقول حاجه قربت وحضنته بالقوه لين حسيته بادلني الحضن همستله:ربي يرحمها ويجعل مثواها الجنه
حسيت بنفسه اللي تعالا واني نسمع في زيد لقرب منا وهوا يقول:ماما ماما
فارس:حاس روحي عيل صغير نبيها نبي امي نبي بوي نبي عيلتي حتي بلادي كرهتها من بعدهم
نزلو دموعي وااه قد ماوجعني حالنا وجعني حاله شعوره اللي مانقدرش نحس بيه وان شاءالله مانحس بيه ، قعد حاضني بالقوووه اول مره نحسه انه بحاجتي بعد عليا وهوا يمسح علي وجهه وياخد في نفس كبير وطلعه حسيته وكأنه يبي يطلع كل اللي يوجع فيه بتنهيده هدي
__
تكمشة في بعضها وهيا تحضن في اليرغان وتشم في ريحته تحاول تحس بيهم تحس بامها وبوها وبخوتها وتشم ريحتهم غمضت عيونها وقعدت تبكي بقهر تبكي من كل قلبها لو الدموع ينزلو دم ره نزلو من الألم اللي حاسه بيه داخلها حاسه روحها بتموت وتتمناه بس لا حولا لها الا انها تراجيه تراجيه وترجو ربها انه ياخدها ليه بسرعه ، طق باب الدار عليها وخشتلها مرت جيرانهم خديجه لقربت منها وقعمزت علي حاشية السرير وقعدت تمسد علي شعرها:حبيبتي غاليه نوضي كولي حاجه مايصيرش تقعدي هكي
هزة غاليه راسها بمعني لا من غير ماتتكلم ، تنهدت خديجه وقالت بستسلام بعد عدت محاولات فاشله:باهي اني وصفاء و ربيعه ضمينة الحوش اني توا عندي موعد في اليل تو نجيك باهي
قعدت خديجه تشبح لغاليه لتبكي وماردتش عليها طلعت وردت عليها الباب بشويه
صفاء:شن حالها
رفعت خديجه كتافها:والله شن حالها بكون ربي يصبرها وخلاص قعده صغيره وشافت هلبا وقعدت بروحها ياناري
ربيعه:اني بنمشي لحوش عيالي امي مريضه
صفاء:واني بنمشي لخواتي بروحهم في الحوش ماما ليها عالقه تلاته ايام في حوش جدي في طريق المطار قالو فيه اشتباكات غادي وماقدرتش تروح
ربيعه: اي اختي قالت الضيء ليه يومين ماجاهمش ياناري
خديجه:ربي يفرج علي لبلاد وخلاص امالا اني عندي موعد غر انوض بنمشي بكري باش نروح ونجي هني
ربيعه:نتلاقو امالا
__
هجم احمد علي محمد وضربه بقبضة يده علي خشمه لين محمد رجع التالي وشد خشمه لدم نزل منه من قوة الضربه ، وقبل ما أحمد يزيد يتهجم خشو شباب شدوه وبدو يضربو فيه ومحمد ماعاش قدر يتكلم معاه ولا يردله ضربته بسبب خشمه لقعد يصب في الدم وماعاش قدر يوقف بسبب راسه لي لاد بيه وحس بدوخه طلع برا وسيبهم يضربو فيه قبل مايتهور ويقتله بطلقه ويرتاح وينتقم لخوه ، خش لمكتبه وقعمز علي الكرسي:زيااااااااد
خشله زياد علي طول وهوا جايب معاه شيشة اميه وكلينكش وعطاهمله:بيموت تحت يديهم يافندي هكي مش ح تعرف مكان مجدي
صب محمد علي راسه شيشة لميه وعيونه يقدحو في الشرار من الغضب:الكلب ولد الـ...... خليهم يربوه وكان مات مات ، جيبلي السياره بنعدي
زياد:اااا هوا الصقر بجي وقال يبيك وباين انه متغايض منك ومن تصروفاتك وماعجباش تسكيرة التليفون لدرتهاله
ضحك محمد ومسح وجهه بيده من لميه:لا صقر لا بقره حي علي امه حي جايه يوم ولد الـ..... يتعنتر عليا نا وحد مستارضي كلب
ونفض راسه من لميه وتكه علي الكرسي بظهرا وقال وهوا يشبح لزياد:عاودها له تمام
تحمحم زياد وقال وهوا يطبس في راسه:بتقعد ولا نجيبلك السياره
مسح محمد علي خشمه وقال من غير اي مبالاء:جيبها
__
خش وقربع الباب وهوا يرفع في صبعه بتحذير:اسمع ياولد الدم نزل لا الركاب واللي صار صار وياسرنا اني بوه يعني كبدي وماك حاسه زي ماحسيته اني والله لا تسامحه هداكا الكلب بس انه انت ولا واحد من خوتك يقرب علي فارس ويزيد يعلي الدم اني متبري منه
قبض علي يده بالقوه بتعصيب وضربها في الحيط:غرقو حوشنا بدم خوي كيف ماتبينيش نغرقهم بدمهم كيف يابوي
شبحله بوه:حمزة الله يرحمه واني قتلك ماك حاسه اكتر مني ومن امك
ورفع صبعه وكمل:اسمع مواضيع الثارات مانبيها نقعدو نقتلو في بعضنا بالحرام رب السماء موجود وهوا ياخد حق المظلوم ، كلمه وقص يا رؤوف انت توا لكبير والعاقل كلم خوتك وعقلهم والا والله الشاهد علي كلامي لاني بوكم ولا انتم ولادي لا يوم الدين
وطلع عبد الحكيم وسكر الباب بالقوه وخلا رؤوف اللي جاته اخته علي طول:سلم وخيي امك تموت لو زاد مات واحد فيكم باللهي عليك وغلاوتي عندك ركحو السيرا
تنهد رؤوف تنهيدت غضب وهوا يحاول يضبظ اعصابه وقال:ان شاءالله بس ماتقوليش لأمي ماترعشيهاش
__
#إيلاف
اسمي إيلاف من موليد 99 نقرا اقتصاد حني زوز بنات واربعه ولاد قصدي تلاته لانه توأمي مات من سنتين ولد جرانا قتله بسلاح قدام حوشنا قعد منظره بين عيوني لا حد اليوم منظر الدم منظر خوي كيف ياخد في نفاسه الاخيره ، لا حد اليوم كل مانغمض عيوني نشبح في منظره نقعد نايضه طول الليل برغم نكون نعسانه بس نفكر خوي توأمي اللي نولدنا في يوم واحد من بطن وحده تحت التراب ابصر كيف حاله واني هني راقده شي يوجع داخلي ينحرق انه مات صديقي حبيبي ، اني وحمزة اكتر من قراب اسرارنا حكاياتنا عمايلنا وكلامنا كله مع بعض توأم بجد وحقيق ، حرقلي قلبي وقلب امي وبوي عليه الله يحرق قلبه ، في يوم وليله قلب حياتنا وخدي خوي من غير حق الله يقهره زي ماقهرنا زي ماقتلنا قلب ناير حوشنا ، مستحيل ننسى هداكا اليوم كان من اوله يوم اسود ، فقت علي صوت عراك كان صبح بكري ممكن الساعه كانت 9 او 10 نضت من مكاني نجري لي وسط الحوش انادي علي خوتي لين شفت اختي روان للقيتها واقفه قدام الباب وتندب في خدودها قربت منها بسرعه وسألتها خيرك شبحتلي وقتلي:خوك حمزة مداير عركه مع ولاد الميدان وجايينه للحوش
حطيت يديا علي خدودي واني ندعي مايصير شيء ، خوي حمزة من عشاق الكوره وكان في منطيقتنا فيه ميدان يلعبو فيه الشباب وحمزة ديما يمشيله يلعب ومره في المرات خنبو تليفونه غادي وخوي كان يعرف الولد لخنبه ويومها ندكر هدرزلي عليه انه متع ملشيات ويخنب في حياش الناس انصدمت وقتها انه واحد موليد 99 مداير هدا كله
المهم قعدنا اني وروان علي الملال قدام الباب وامي كانت بايته في حوش جدي علي خاطر حناي مريضه ومبطلتش اتصال وكانها حست هيا و رؤوف لي في الصحراء يخدم ماقدرناش اردو عليهم خفنا يحسو وصوت لعراك لكان قوي ..
فات الوقت وخشو خوتي مع بوي لعارك في حمزة اللي اول ماشفته شهقت كانو ضاربينه علي عينه لين موليه زرقه وخشمه دم ، قعمزو وقعدو يتناقشو وفهمو حمزة انه ماعاش يتكلم علي تليفونه وخوي سراج قاله اني تو ناخدلك التليفون لتبيه ، ومن طبع حمزة انه مش متع مشاكل بكل ف رضي من غير مايكتر دوه باش مايغيطش بوي ، و لما قعد يهدرزلي قعد يقولي انه الولد هدا لخنب تليفوني وجاي يضرب فيا علنا والكل مصدقينه وخايفين منه ماحد وقف معاي وفعلا ماحد وقف معاه من لبيوقف معاه والولد صاحب ملشيات اكيد ح يخافو ، هداك اليوم حمزة قعد في الحوش وماطلعش بكل بسبب خوف بابا وخوتي عليه مرات الولد يديرله حاجه في قالوله ماتطلعش وطول اليوم وهوا معاي نهدرزو ، في الليل اتصل خوي خالد بيا وقالي قولي لحمزة يجيني في المحل يكسد معاي وفعلا قلت لحمزة لفرح انه بيطلع من الحوش لانه كسد بروحه معانا اني وروان ، طلع وخلانا انا وروان في الكوجينا نوتو في لعشي بروحنا في الحوش مامرتش خمس دقايق والا نسمعو صوت رصاصه وعيطه قويه قدام حوشنا شبحت لروان لحطت يدها علي قلبها وحطت لي في يداها وطلعت تجري واني لحقتها غطينا روسنا وطلعنا لجنان وهيا تقولي نفتحو الكنشيلو نشبحو واني من خوفي نقلها نعرفش اني خايفه وبس ، بس روان كانت جريئه وفتحت الباب اللي اول مافتحناه طاح حمزة علينا وكله دم وخرت روان وعيطت واني قعدت زي العرصه واقفه ونشبح في خوي لملوح قدام الباب مضروب برصاصه في صدره ونشبح في ولد جيرانا سفيان لواقف وباين عليه الصدمه وهوا شاد السلاح ويشبح لخوي حفظت ملامح وجهه لكنت نحبهم بس وليت نكرهم كره معمي كره مابعده كره واني نسمع في صوته يقول مش اني لقتلته ياإيلاف ويحدف في السلاح من يده معقوله حبيبي الشخص اللي برغم كل لنقال عليه حبيته طعني وخلا كلام الناس الصادقه عليه وقتل خوي ، بعد ماشبحت المنظر هدا ماعاش نندري علي روحي الا واني في السرير مغمي عليا.
هديكا الايام من اصعب ايام حياتي ايام متلخبطه توقعنا الولد لخنب تليفونه هوا لبديرله حاجه او يتعرضله او حتي يقتله ، بس طلع سفيان وقتله من غير اي سبب يدكر حتي في العمر بعيد علي عمر حمزة هلبا
مافهمتش علاش قتله مش يحبني مش يبيني علاش قتل روحي وقتل قلبي معاه ، رغم سيرته الحقير كانت ماتصلحش بكل ومعروف انه متع ملشيات ومع هدا كله حبيته تعلقت فيه ولا مره قالي حاجه علي حمزة انه يكرهه او حاجه بس اهو قتله وقتلني معاه ودفن روحه في عز حياته.
__
خش للحوش اللي تعود اول مايخشله لازم يسمع اسمه:محمد
سكر محمد الباب وهوا ينح في بوتيله وخش وهوا يشبح للمظبخ لصنة الماكله تفوح منه خش للصاله وهوا يقرب من امه ويبوس في راسها بتسمت امه رقيه وقالت:كنك اليوم مروح بدري
شبحلها محمد وقال:انقنك ماتبينيش نعدي ره
ضحكت رقيه وقالت:نا لنبي والله دوم عليك ياوليدي
جتهم عائشه واول ماشافت محمد بتسمت وقربت منه علي طول:محمد كنك راجع توا تبي نحطلك اوكال
تحمحم محمد ومسح علي شعره اللي طاول وواصل لتحت ودانه وقال:لا نا جاي نبي نشيلكم لعزا
شهقت رقيه وحطت يدها علي قلبها:واااه عليا جدك مات
تنهد محمد وقال بسرعه قبل ماتزيد رقيه تنوح:نموت نا يمه وجدي مايموتش ولا حصان طروادة ماشاءالله
كتمت عائشه ضحكتها وهيا تشبح في رقيه اللي تنهدت وهيا تمسح علي قلبها وتشبح لمحمد بعثب:عيب عليك جدك هضا
هز محمد راسه:اها جدي لقريب تبرا مني وهججني من الشرق عندك حق
وقبل ماتتكلم رقيه كمل محمد وقال:..
.
.
.
#يتبع_للبارت_لبعده
____________________________________
بداء كتابة الرواية في 2019 / أبـــ4ٰـــريل / 7
تم وضع قَفلة لـ الرواية في 2019 / سبتــ9ٰـــمبر / 25