عشق في بلاد حروبها لا تنتهي ( الفتنه و الثأر)

البارت الأول

_
_
#عشق_في_بلاد_حروبها_لا_تنتهي
   البارت 1
(الياقوت)
.
.
_ستكونين يوما يابلادي زاهرة كما كنتي لا تحزني ، فبتأكيد كما يوجد بيك الحمقه والناهبين مجردين القلوب ، بك ابطال حاملين المجد براياتك العاليا بفتخار 🥀🇱🇾
.
وقف قدام الباب بتبات وهوا يتلفت لمجموعة الشباب لوراه وقال بصوت اجش غليط متعصب:حوطو الحوش كويس
رد واحد منهم:اي يافندي
تلفت للباب وخبط بيده عليه ودفه برجله بالقوه لين كسره وخش وهوا يطلع في سلاحه ووراه زوز شباب ملتمين وجوهم زي باقيتهم خشو معاه اللي رفعو سلاحهم اول ماشافو مراة كبيره في العمر وولد واقف قدامها وباين علي وجهه الصدمه وقال بخلعه:شن فيه هدي حرمة حوش م...
وقبل مايكمل كلامه قرب الأفندي منه و شبحله بعيونه الباينات من إلتام وضربه بالمسدس من التالي علي جبهته لين طاح لوطه عيطت لمراه وخبطت ع وجها وهيا تبي اطبس للولد بس بحركه سريعه من الافندي طبس قبلها وشده من شعره وقامه وهوا يقول بصوت عالي:خدوه
عيطت لمراه بالقوه وهيا تخبط علي خدودها وتبكي وكانت تبي تشد الولد بس دفها الافندي التالي وقبل ماطيح طلعت بنت من الدار بسرعه وشدتها وقبل مايركز فيها الافندي عيط الولد عليه:ياحيوان ماتمسهاش
تلفتله الافندي بكل قوه وزاد ضربه بالمسدس من التالي من قوتها لين طاح هوا والشاب اللي شاده من علي يمينه وقال:خودوه خير تو مانقتله قدام امه
قاموه وهوا شبه فاقد للوعي وقبل مايطلع وقفاته جملة:حسبي الله ونعم الوكيل فيكم الله لا تربحكم ولا تختم عليكم حسبي الله ونعم الوكيل فيك انت
تلفتلها وشبحلها بنظره لين خلت قلبها يوقف للتواني من النبض وقال:خيطي فم بنتك ياحاجه خيرلك وخيرلها
وطلع بخطوات سريعه تابته وركب السياره لمصفحه الكحله وتحرك وتحرك وراه رثل من السيارات لمصفحه
طاحت لمراه من طولها وقعدت تخبط علي راسها ورجلاها بالقوه:واااه عليا وليدي واااه عليااا كبدي خدوه خدوه ياأمنه خدو ولدك ياأمنه
خشت البنت بسرعه وهيا تجيب في طاسة ميه وجت قعمزة جنب امها وهيا تبكي:ياماما مش هكي مديريش في روحك هكي ضغظك يرقي حسبي الله ونعم الوكيل فيهم الله لا تختم عليهم
شبحت أمنه لبنتها وقعده تخبط ف رجلاها:بيقتلوه حي عليا حي من بيقعدلي ماعندي سند غيره وااه سندنا يا غالية خدوه خدو خوك مشي فيها
خدت غالية نفس كبير وهيا تحضن في امها بالقوه تحاول تهديها وتخليها تبطل تخبيط في وجها..
__
وقفت قدام شاشة التلفزيون وفتحت يداها الزوز باش تخفي التلفزيون بيهم:والله ماتتحشم هي تي نوضو هيا
نفخ وهوا يحدف عليها في لمخده لجنبه :حولي يادراه وقسم بالله انوضلك نمرجك ضريحه
رفع الولد لمقعمز بين رجليه راسه وقال بكلمات متعثره: امجها تبي تيحه ماما(امرجها تبي ضريحه ماما)
فتحت فمها علي وسعه وهيا ترد تحدف في لمخده لجت في وجهه وهوا يضحك علي كلام الولد الصغير ويسمع في عياطها:والله ماتتحشم يافارس هي وقسم بالله ، ماتعلم في الولد الا في لكلام لميصلحش
سيب فارس يد لبلاستيشن وقعد يبوس في الولد ومداير ودن طرشه علي تنقريزها لين تلفتلها وعيط عليها:وااااااك يادراه واااك اسكتي اس اس اهو نضنا
ضيقت عيونها وضرباته برجلها ع ظهره ومشت وخلاته يضحك ويبوس في الولد:بطل بابا انت وله
وقف فارس وهوا يقيم في ولده في حضنه وقبل مايتلفت ويمشي سمع صوت تليفونه يشرين نزل ولده لوطه لمشي يدبدب بشويه للمظبخ وطبس جبد تليفونه واول ماشاف من بتسم ورد وهوا يسمع في صياحها:الو خالي
جاته وهيا تنفخ:تي هيا يافارس لعشي برد
زمط ريقه وهوا يتلفتلها ورد علي خاله:خير خالي حسه دوشه جنبك شن صاير فيه حاجه
ضيقت عيونها وقربت منه وهيا تشبح في ملامح وجهه شحبت وتغيرت ، قعمز علي الكرسي وطبس راسه وهوا يحط في يده علي شعره وقال بصوت رفعه العبره:ماتت
جاه صوت خاله من التليفوه وهوا يتحمحم وصوته باين عليه لبكي:الله يرحمها اي ماتت الله يصبرك ياولدي
طح التليفون من يد فارس وهوا يحط في يديه ع وجهه ، حس بيها قربت عليه وهيا تمس في شعره وتقول:فارس خير شن فيه من لماتت فارس
رفع راسه فيها واول ماشفاته كيف عيونه حمرررر والدموع بين رموشه لين قلبها وجعها وماعاش عرفت شن تسأل لين قال بروحه:امي ماتت ، ماتت امي امي يانادين ماتت
شد علي سنونه وضرب بيده المزهريه اللي علي الطاوله بالقوه لين نادين نخلعت وهيا تشوف في الدم لنزل من يده قربت منه علي طول بس فارس وقف وهوا يطلع وخلاها حاطه يداها علي فمها من الصدمه ومش قادره حتي تمشي لولدها لعيط علي طول حسه في المظبخ.
__
#نادين..
من صدمتي ماعاش عرفت حتي نتحرك ونمشي لزيد لعيط .تفكيري نشل انا مش عارفه نبكي نعيط ولا شن ندير بضبظ ، تلفتت لزيد لجاي يعيط من المظبخ يمرد طبست رفعته في حضني وحضنته وقعدت نبكي انا وياه نبكي علي ماما ماجده نبكي من الغربه لقتلتني نبكي علي حظي علي كل شي ونبكي علي بلادي ، وقفت بكي لما سكت زيد في حضني وحسيته غفي ورقد رفعته لداره ورقدته ع سريره وانا طلعت قعمزة في الصالون وقعدت نبكي ونفكر في فارس وين مشي وخلا تليفونه في الحوش وخلاني بروحي ، اكيد يبكي اكيد مجروح هلبااا ياربي صبرك ورحمتك ، ربي مايدوقني شعوره .