_
_
#عشق_في_بلاد_حروبها_لا_تنتهي
الحلقة 20
(الياقوت)
في الحلقة السابقة
بتسمت زي المهبوله من غير ماننتبه علي روحي ورجعت شبحتله وهوا يكلم ويعطي في الاوامر اصلا من لما عرفته وهوا يتأمر وبس
ضيقت عيوني وقلبت خليقتي اول ماشبحلي وهوا قعد يتكلم في التليفون ، مابيتش انحي عيوني واني نبعت في الشرارات التهديديه
.
قراءة ممتعة 💛
#البارت_العشرين
.
والكره اللي في قلبي كله ، بس ماعاش قدرت مش عارفه شن لصارلي واني نرفع في حواجبي ونشبحله كيف يبتسملي ويميلي في راسه ، كل حياتي مانحبش لولاد لطولو في شعرهم بس طالع عليه هوا يجنن مش تحسابوه انه طويل بكل لي كتافه لالالا هكي لي ودانه وكله مرجعه التالي وكانه مقصوص ، اوووف امالا رموشه وربي كأنهم تركيب لين عيونه يبانو مكحلات وسووووود عكس لون عيونه القهويات ولحيته لمحددها علي لخفيف .
ستاقطت بروحي في عز بتسامتي وهزيت براسي بالقوه ونش علي روحي وقلت بالقوه:واااااه شن نخرط هش هش هش برو بعيد
محمد:كنك
رفعت عيوني واني قعده انش علي روحي بيديا
بتسم وهوا يشبحلي:لنقنه حتي العقل طاير
نزلت عيوني واني مانبيش نشبحله ونزيد نفكر ب افكار وسخه زيه اخخخخخ وخلاص شكله كلامه حق حتي عقلي مهناك اووف
قعدت مقعمزه بهدوووووء ، طلب ماكله وكلينااا وخدي وجبتين نعرفش علاش بس احسن لانه ح نجوع ومش ح نتحشم منه وبنقوله نبي ناكل والله خاطفني وجايبني من الغرب لشرق اهو امالا يتحمل طلاباتي
__
طلعو محمد وغالية من المطعم وغاليه مشت ركبت للسيارة طول وهيا ماعاش بطلت استغفار وهيا تحاول تبطل تفكير فيه
ومحمد قعد واقف برا وهوا يحاول يكلم زياد اللي اتصل بيه اكتر من مره بس ماردش وكيف بسكر تليفونه اتصل ، ركب محمد السيارة وولاعها وبعدين رد علي زياد:الو
زياد:يافندي بدو يعرفو مكانك وفي اي لحظه تلقاهم قدامك ولا وراك وراهم متبعينك من اول ماطلعت من طرابلس لوح الشفرة لانه يترصدو في مكانك بيها وماتوقفش بالسيارة
وقبل مايتكلم محمد شبح للمرايا وشاف السيارات اللي جايات التالي لوح التليفون من الروشن طول وتحرك بالسيارة وهوا يجتاز في السيارة اللي جايه بتوقف قدامه وبتحاوطه.
طلع وهوا مستك ومش عارف يفكر او يخطط وهوا مستحيل بعد هكي يقدر يوصل لبنغازي مدامهم وراه وح يلحقوه
قعدو يضربو في السلاح جيهة السيارة تلفت محمد لغالية ونزللها راسها لوطه:اقعدي تحت ماتشيليش راسك
وقعد يجري ويخش في الطرق يحاول يضيعهم وهوا مش قادر يطلع من الروشن ويضرب بالسلاحه علي القومات زي المره لفاتت بسبب جرحه اللي حاسه نفك بكل من لخياطه وبدي يحس في روحه يعرق والوجع يزيد عليه اكتر وأكتر .
__
طلعت الدكتورة وهيا منزله راسها وتشبح لفارس اللي مقعمز علي الكراسي وهوا حاط مرافق يديه علي راكبه وشاد راسه بكفوفه ، والحاج فتحي وحنان لتبكي مقعمزين جنبه.
وقف الحاج فتحي هوا وحنان لما شافو الدكتورة تقرب من فارس وقالت:انت زوجها
رفع فارس راسه واول ماشبحها وقف:اي
نزلت الدكتورة راسها بأسف:اسفه المدام اجهضة الجنين
حس فارس وكأنه من ضربه ب رصاصه في نص قلبه ، وهوا يفتح في عيونه ويمسح علي وجهه و يسمع في الدكتوره لكملت كلامها:وفقدت دم هلبااااا اليوم ح تقعد مابيت لين دمها يتعدل
تلفت فارس من غير مايريد حتي عليها ومشي وهوا يسمع في صوت الحاج فتحي ينادي عليه بس ماعدلش عليه وهوا يطلع من القسم والمستشفي بكل
__
قعمزت هيام وهيا تشبح لصفاء لشبحتلها وقالت:اسمعي اتصلي بالناس وقوليلهم ماصارش كيف بنستقبلوهم والدنيا مقلوبه والقصف فوقنا
هيام:عيب ياصفاء عطيت كلمه للمراة وبعدين حني بدينا نديرو في العراس تحت القصف والرصاص تعودنا خلاص
تنهدت صفاء:واااك ياماما تفكيري كله عند غالية شن زعما مدايره مع الكلب لخطفها وعلاش خاطفها ياناري لبنيه صغيرة شن يبي فيها
هيام:حسبي الله ونعم الوكيل فيه اكيد شافها من غير سند ولاد لحرام كترو يابنتي ربي يستر وخلاص
مسحت صفاء دموعها وقالت:والناس لخطبوها شن صار فيهم
هيام:والله علمي علمك بس بعد مايعرفو انه نخطفت تو ماعاش يجوها بكل تو بيبداء الشكوك عليها لبنية ياناري
صفاء:تفوه علي الناس بدت قلوبهم ميته و تفوه علي الحياة اللي هكي
__
قعد محمد شادها علي الخط بالسيارة يجري وماوقفش بكل الا لما شاف انه قريب يوصل لمنطقة "قمينس"
درس السيارة وتلفت خدي شنطة الظهر متعه وسلاحه اللي جنب الفودره وهوا يشبح لغالية لرفعت روحها وقعمزت علي الكرسي وقال:انزلي
نزل محمد وغالية قعدت في السيارة مش مستوعبه ولا حاجه وهيا خايفه ومرعوبه وحاسه خلاص انها قد ماهربت ح تموت او الأسواء انه ح يصير زي ماقللها محمد انه ح تلقا روحها في واحد من حياش الدعارة.
مافاقتش علي روحها الا لما محمد فتح الباب وهوا يصيح:انزلي
شدت غالية في الكرسي وهيا تبكي وقالبة شفايفها زي البيبي وقالت وهيا تهز في راسها:لا مانبيش
عيط محمد بأعصاب وتكنطه بكل:غالية مش وقت عنادك انزلي
زادت غالية من بكاها:بنموتو خلاص هما مش ح يسيبونا الا لما يقتلونا
تنهد محمد وهوا يمسح علي وجهه وحاس ب يده خلاص تبنجت من كتر الوجع وماعاش حاس بيها.
قرب وقعمز برا السيارة قدامها علي رجليه وهوا يشبحلها كيف تبكي بصوت .
محمد:قتلك نا لو كان نسلم روحي مانخليهم يمسوك
مسحت غالية دموعها وهيا قعده تبكي:لالالا خلاص عيت اني ماعاش نبي نهرب خليهم يقتلوني ونرتاح
نفخ محمد وهوا مش عارف كيف يتصرف معاها وهوا خلاص اعصابه مس قادر يشدهم ورجع عيط عليها:شن تحسبيهم بيقتلوك طول هضم كلاب ضاله مايقتلوكش لين ينهشو من لحمك وتموتي تحت يديهم
زادت غاليه في بكاها اكتر لين محمد ستاقط بروحه ورجع قعمز بس هدي المره قعمز علي ركابه:صدقيني طول ماانتي معايا مش مايقدروش يمسو شعره منكي بس طاوعيني وماتعانديش
مسحت غالية دموعها وهيا تاخد فيها العبرة من كتر لبكي وشبحتله كيف وقف وباين انه يتألم من يده.
نزلت وسكرت باب السيارة ، قرب محمد منها وشد يدها وشبحلها:تقدري تجري
شبحت غالية لرجلاها ورفعت راسها لطريق الطويلة وفيه حياش بعدها تلفتتله:كله هدا بنمشوه علي رجلينا
تلفت محمد التالي وقال:اها لازم مانضيعوهم ونا عندي حوش في منطقه قريبه من هنا
قالت غالية بتنقنيق:بس اني رجليا يوجعو
شبحلها محمد وماقدرش مايبتسمش من طفولتها:خلينا نعدو تمشايا ولما تحسي روحك ماعاش تقدري قوليلي باهي
هزت غالية راسها وتحركو من مكانهم بسرعه .
__
#في_بنغازي
ميسم:يمه خلاص الولد قال كويس غير شفرته محروقه
هزت رقيه راسها:لالالا محمد ماعمره فوت يوم مايكلمنيش فيه ابصر شني صايرله وليدي قلبي مش متريح يالاه
طبطبت هداية علي ظهر رقيه:اهدي ياأمي وتفألي خير بأدن الله بكرا يوصل هنا وتحقيه بعيونك مافيه شي
رقيه:ان شاالله يااارب مش ناقصني حرقة كبد اخري
تنهدت هداية وشاورت لميسم براسها ، ووقفت هيا وياها ومشو للمظبخ .
تلفتت ميسم لهداية اللي شدت بطنها اللي طالعه قدامها من الحمل:الحق الحق حتي نا قلبي مش مريحني حاسه جايتنا مصيبه هك كبرها
هداية:و هضا اللي جاب سالم وعيشه ماقالش وينه وعليش ماجا معاهم
ميسم:قال بجي بكرا وبس وماقالش حاجه اخري اطمن بكل
نفخت هداية:ان شاءالله خير والله كان صارتله حاجه هوا الأخر نموت نا وامي في جرته
__
طبس محمد وهوا ياخد في المفاتيح من محبس الغرسه وهوا ينفض فيه من التراب وفتح الباب وتلفت شبح لغالية لتشبح للحوش وقال:تعالي
خشت غالية وراه وهيا تشبح للحوش اللي كان اول ماتخشي فيه صالة كبيرة ويسارك فيه ممر مش طويل تركبيله بدرجتين نهايته زوز ديار مقابلات بعض وبينهم حمام وعلي الإيمين دار المعيشه بحمامها مفتوحه علي المظبخ وفيه باب تاني يطلع علي الصالة البرانية.
قعدت غالية اتبع في محمد لسكر الباب وخش وهوا يلوح في الشنطه علي الارض ، وكان يمشي ويلوح كل مره في حاجه مره طاقيته مره لمفاتيح ونح الجاكية ولوحه لين وصل لدار المعيشه وقعمز علي المندار وهوا يحول في تشرته اللي معبي بالدم.
قعدت غالية اتبع فيه واول ماقعمز وحول تشرته شهقت من منظر الدم اللي ملطخ جسمه والوشاح اللي حوله وهوا يشبح في الخياطة المفكوكه.
اتكه علي الحيط وهوا يرخي في روحه ويمسح علي وجهه بوجع ويحاول ياخد نفسه وشبح لغالية اللي قعده واقفه ودموعها نزلو من منظره
محمد:تقدري تخيطي الجرح
هزت غالية راسها طول ب لا
وقف محمد وهوا يتخطه فيها وفتح دولاب المدخل وطلع صندوق الاسعافات الاوليه ورجع قعمز وهوا يطلع في اليبره والخيط وحاول يدخل الخيط في اليبره بس مش قادر يحرك يده
رفع عيونه طول وهوا يحس علي غالية اللي قربت وقعمزت قبالة وقالت:عطيني
عطاهملها ومن كتر ماغالية ترعش قعدت اكتر من مره تحاول ادخل الخيط لين دخلاته واول مارفعت راسها لقاته يشبحلها توثرة وقالت من غير ماتحط عينها في جرحه:لازم تمشي المستشفي
قرب محمد منها لين حست لهواء كله ولا ريحته اللي اول مره تشم زيها وهيا تشبح للجرح اللي ضمت فمها وملامح وجها توجعو من عمقه والدم لنازل منه وهيا تسمع فيه:هيوالله فكرة سمحه لكي بيش يقتلوني وتتريحي مني
ماركزتش غالية علي كلامه هلبا وقعدت تنقنق لين دموعها رجعو نزلو وهيا تشبح للجرح:حار وله اه كتفي وااااه عليا
ضحك محمد عليها وهوا مانحاش عيونه منها:ياناعليا من الحساس
غالية ولا تسمع فيه كانت خايفه من الجرح وهيا تفكر كيف بتخيطه واول ماشبحتله لقاته قريب زادت توثرة وخافت اكتر وقالت وهيا قعده تنقنق:لالالالا نعرفش اني ره مش ح نقدر نخيطه
محمد:حاولي ونا نساعدك
وتلفت لعلبة الاسعافات وخدي قطنه فيها معقم وتلفت لكتفه وهوا ينظف في الجرح وحول الدم اللي عليه واللي قعد ينزل وشبح لغالية لتنقنق:هي ماتخافيش ونا نساعدك
قربت باليبرة وهيا ترعش وتحاول تبطل رعاش ومحمد كان يحاول يشد انينه باش مايخوفهاش ويخليها تتشجع وتكمل لما تشوفه مايحسش وقعد يساعد فيها وهيا مره مره تشبحله تقوله يوجع فيك وهوا يهز في راسه بمعني لا ويشبحلها كيف متوجعا وكأنه الجرح فيها من الخوف ، قعد يفكر قداش ماهيا بيبي وحساسه صح انها قويه ولسانها يالطيف الطف والجاواب علي راس اللسان بس طفولية هلباااا وسمحه علي قولته .
__
.
.
.
مانبي صوبك لا قربك لكن صوبي وقربي عندك ...😂✌
(الياقوت)
.
.
.
تاني يوم الصبح كانو فرح وفاطمه عند نادين اللي من اول ماناضت بكت بكت وبعدين نسمطت وهيا تحضن في بطنها وماعاش كلمت ولا حد وتبكي بصمت وبس .
ركب فارس وهوا يشبح في فاطمه وفرح اللي طالعين من غرفة نادين وقربو منه
فرح:كيف رقدت قلنا ننزلو نفطرو
فارس مسح علي شعره وهوا مطبس:تمام عندكم فلوس
فاطمه:اي عندنا
مشو فرح وفاطمه وخلو فارس اللي فتح باب الغرفه وخش وهوا يتكه عليه ويشبحلها كيف راقده علي جنبها وحاضنه بطنها ، قرب منها وقعمز لوطه علي رجليه وهوا يشبح لوجها اللي تعبااان واصفر .
تنهد فارس وقرب بيده منها وهوا يمسح علي خدها ويمس في عيونها اللي الدموع مابطلوش نزول منهم ، حس انه تفتح في عيونها بعد يده من وجها وشد يدها وقعد يشبحلها كيف ترمش في رموشها اكتر من مره وهيا تحاول تشبح زين واول مااتضحة الروئيه وشفاته قامت روحها وهيا تجبد في يدها منه وترجع في شعرها اللي جي علي وجها التالي
وقف فارس طول وقعد يشبحلها كيف قعمزت ودموعها لبدو ينزلو وقبل مايتكلم طق الباب وخشت فاطمه وفرح ومعهم نهي اللي اول ماخشت انصدمت نادين:انتي كيف عندك وجه جايتيني
نهي قعدت واقفه علي الباب وفاطمه وفرح يشبحو لبعض بمعني شن صاير ورجو شبحو لنادين
فاطمه:خيركم شن صاير
نادين تعصبت وهيا مش قادره توقف او تتحرك هلبا من الوجع لحاسه فيه وحاولت تصيح:اطلعي
فرح:نادين خيرك
نهي:خلاص يافرح خليها اني بس وجعني ضميري وحسيت لصارلك بسببي رتاحي خلاص اني ماشيه
اتصل تليفون فاطمه لطلعت برا ترد وفرح اول ماأشرلها فارس براسه باش تطلع طلعت طول وخلت نادين تصيح:اطلعي من هني اقلبي وجهك خير مالحقك ب ولدي اطلعي طلعوها الحقيره التافها من هني طلعووووها
فارس ماعاش تحمل وقال وهوا يحاول مايعليش صوته وتلفتلها:تي انتي شن اه ماتحسيش حتي بعد ماخسرتي ولدك قعده تتسلطي بلسانك لبايعتيه مع البنت
نادين ماقدرتش ترد عليه وهيا حاسه بروحها فااشله ولسانها ارتبط وهيا تشبحله ودموعها ينزلو وبس وقالت بصوت يااادوب يطلع منها:اطلع برا
نفخ فارس وقرب منها بس نادين عاودت وهيا تاخد في نفسها بسيف:ماتقربش مني اطلع من هني اطلع انت والرخيصه هدي
عيط فارس:ناااادين
قعدت نادين تبكي لين قلبه وجعه بس في نفس الوقت متعصب لا المليون منها وضرب رجله علي رجل السرير وقال:اصلا لصير فيك كله شويه وتستاهليه
وطلع وخلاهم وعيونه حمر وشاد علي قبضت يده بالقوة من العصبيه وهوا يوقف قدام الأسانسير ورص علي البطمه ، تنهد وهوا يمسح علي وجهه وطبس وسند بيديه علي ركابه وماقدرش يمشي ماتحملش كلامه اللي طلعه في لحظة غضب برغم فعلا حس انه لكل لصايرلها تستاهله بسبب لسانها هوا مشكلته مش في نهي ولا تهمه نهي اساسا لهمه لسان نادين اللي قعد يجرح بسبب غيره ماليهاش داعي غيره من بنت مادارت شي ماقربتش منه ولا حتي تكلمت في الماضي قدامها وهيا حافظه السانها باش ماتجرحهاش ، كان هدا تفكير فارس اللي تلفت ورجع للغرفه.
__
بتسمت نهي اللي اول ماطلع فارس وهيا تمسح في دموعها وتقرب من السرير اللي مقعمزه عليه نادين.
شبحتلها نادين وهيا مش قادره تصيح او تعيط ولا تتحرك مش قادر غير تبكي وبس ، قالتلها بصوت هااااادي:انتي شن تبي مني اطلعي من حياتي
زادت ابتسامة نهي وشدت في حديدت السرير:هههه انتي لبتطلعي من حياتنا قعده ماشفتي شي هدي البدايه برغم ههههه كنت مفكرتلك بفكرة اجهاض اوعر من هكي بس طلع ربي يحبك
قعدت نادين تتنفس بالقوه وهيا تشبح لمكان وااااحد بس لمكاااان جرحها اكتر من كلام نهي لكملاته:فارس ليا اني علي يديه تربية وعلي يديا عرف الحب اني اول واخر بنت تخش قلبه وكان يبيك ره مارجعليش توا وكارهك ومش قادر يتحمل حتي يشبح لخليقتك
خدت نادين نفس وهيا تحط في راسها علي لمخده وتخلي فيها تشبحلها ومن غير ماتعدل عليها غمطت عيونها ولا اخر لاحظه وهيا تشبح لنفس المكان ودموعها ينزلو من غير صوت ......
__
ناضت غالية وهيا حاسه ظهرها بيتكسر من المندار قعمزت وهيا تتكلم وتحك في عيونها:وااااك ظهري شوقني الرقده لوطه
واول مافتحت عيونها وشبحت حوالينها رجعلها شهد العقل واللي صار كله معاها اللي يشبه الحلم تنهدت من وسط قلبها وهيا تحول في الشرشاف ووقفت ولبست عبايتها لملبزه بدم محمد علي بجامتها اللي ليها ايام لابستها نفخت غالية وهيا تلبس في وشاحها:حاسه روحي زي الجيفه نبي لوادجو تام وفي الشك نولي زي ماكنت
طلعت من الدار وهيا تشبح لدار لقدامها اللي فيها دار نوم كامله بس مبارح لما دلها محمد باش ترقد فيها وخشت وشبحت حوايجه وريحته ماليه الدار وحاجاته فيها تحشمت ترقد فيها بدات انها متأكده انه ح تتخيل حاجات هيا تكره وتستنبد في روحها انه تفكر فيها وطلعت رقدت في الدار هدي.
طلعت لصالة وهيا تكبه لدار المعيشه لكان محمد راقد فيها وهوا متمدد علي لفراش وحاط يده المجروحه علي بطنه ويده التانيه حاطها علي راسه.
قعدت تشبحله وتدكر في مبارح كيف خافت هلبا واول ماكملتله وشبحت الدم لنزل قعدت تبكي ، وهيا تمسله في جرحه بيدها واليد التانيه حاطتها علي كتفه .
حست بيده اللي رفعها ومسح دموعها وصوته اللي متوجع وهااااادي بس رجووولي هلباااا:سامحيني
رفعت عيونها فيه وهيا تنحي فيهم من علي جرحه وكانت بتتكلم بس اول ماشافت انه قريب علاها هلبااااا صوتها هرب والسانها ارتبط وهيا تشبح في عيونه لكانو حمر ونص مفتوحات بس كأنهم مسكرات بسبب رموشه
سكتت غاليه وقعدت تشبحله زي المسبوها وهيا تلاحظ علي محمد اللي تماده وهوا يمس في خدها وقعد ينزل بيده لرقبتها اللي تبان بسبب الوشاح المرخي وكمل:دخلتك في مشاكل ماليكش دخل فيهن
ورفع يده وهوا يشبح لقصتها الكيرلي لطلعت من الوشاح تنهد وهوا يرفع في رجله وحط يده عليها وهوا يميل في راسه ويشبحلها كيف نزلت راسها لوطه وهيا متوثره وصدرها يرقي وينزل وتشبح للوشاح اللي كان رابط بيه كتفه وقالت:الوشاح كله دم باش بتغطي الجرح
تلفت محمد وشده بيده:تو ندبر
بعدت غالية عليه وهيا توقف ووقف محمد وراها ودلها علي الدار
أنت تقرأ
عشق في بلاد حروبها لا تنتهي ( الفتنه و الثأر)
Actionرواية تحكي علي أحداث واقعية ، تناقش خطورة انتشار الفثنة والتأر ومعانات الأهالي بسبب هدا الشي ، وبين هدي الفثنة والتأر تخلق قصص عشق منها مأساوية ومنها تتوج بتأج العشق 💛
