_
_
#عشق_في_بلاد_حروبها_لا_تنتهي
الحلقة 22
(الياقوت)
في الحلقة السابقة
قعدت تبكي لين فرغت الدموع اللي في داخلها كلها واول مارجعت رفعت عيونها علي الروشن شبحت حد ينقز من السور شهقت وحطت يداها علي فمها.
تلفتت فتحت الباب وطلعت تجري ادور في محمد....
.
قراءة ممتعة 💛
#البارت_التاني_والعشرون
.
اللي اول ماشبحها جاية تجري وشعرها اللي مبلول يطير وراها واللي فيه لاصق علي وجها وهوا يشبح فيها تقرب منه ووقفت وهيا داهشه وقالت:خانب في خانب برا وحقربي
وقف محمد طول وهوا يتلفت لروشن دار المعيشه وشبح منه بس ماكان فيه حد وهوا قعد يكبه من روشن دار المعيشه سمعو صوت تخبيط وتبربيش جيهت الباب الرئيسي.
قربت غالية طول من محمد وهيا تدوي بشويه:سمعت وله
خاف محمد وهوا يفكر انه من الممكن جمعة الصقر عرفو مكانه وكان هما فعلا اكيد محاوطين الحوش ومافيش كيف يهرب منهم المره هدي.
شد غالية من يدها وهوا يجري جيهة داره وهيا تجري وراه ومش فاهمه شي.
خششها لدار وهوا يفتح في الدولاب ودفها دخلها فيه لين غالية صيحت:تي خيرك
اشر محمد بصبعه علي فمه:اششش ، ماتطلعيش من هنا قد مايصير ماتطلعيش ولا اطلعي صوتك تمام
شدت غاليه في يده بخوف:وانت
محمد:المهم انتي
زادت غالية شدت يده وهيا تقرب منه:لالالالا تخلينيش بروحي نبيك اني
بتسم محمد وقرب باسها علي خدها لين غالية توثرة:ونا مش مسيبك لكن كان قتلوني.....
فتحت غالية عيونها علي وسعهم وشهقت ودموعها نزلو وقصت عليه:يقتلوك
حط محمد يده علي فمها وكمل:فيه محل في نهاية الشارع عديله ورني برقم تو نكتبه لكي تلقيه علي الزيانه باهي
هزت غالية بمعني لا وهيا تبكي وتشد في يده اللي علي فمها ، تنهد محمد:ياطشه مش وقت عناد
ودفها في الدولاب وهوا يدير في حوايجه لمعلقات عليها وسكره وتلفت لزيانه وهوا يفتح في لقجر وكتب رقم وخلاه علي الزيانه وخدي سلاحه وسحبه وهوا يمشي للباب لوقف وراه وهوا يسمع في صوت خطوات رجلين قعد واقف وماباش يفتح ويستنى في حد يهد ويكسر الباب بس مرت تلت ساعه وماصار شي لين محمد ستغرب وقعد يلود علي الرواشن يشبح لو كان فيه شباب محاوطين الحوش بس مالقاش حد ، ولو للباب الرئيسي وهوا يفتح فيه بيد واليد التانية شاد بيها السلاح واول مافتحه شبح واحد مقعمز علي الدرجات رفع محمد سلاحه عليه طول اول ماشافه تلفتله لين الولد انخلع وهوا يرفع في يديه ويوخر التالي
محمد:من انت
__
عظم الله اجرك ، جملة مختصرة تشرح معني الفراق 💔
.
.
فرح مدت طاسة لمية وهيا ترعش مع بعضها لفاطمه لمقعمزه لوطه وحاطه نادين المغمي عليها علي رجلاها ، وحنان مقعمزه تبكي وهيا تمسلها في وجها وتحاول تفيقها
بخت فاطمه لمية علي نادين اللي نخلعت وهيا ترمش برموشها وتقيم في يدها تمسح في المية اللي فاطمه بختها علي وجها.
شبحت لي أمها لتبكي وتمسح علي وجها وتحضن فيها ، ستوعبت نادين شن صار والعبرة خدتها وهيا تاخد في نفسها لحساته هرب منها وتبعد في يدين امها وهيا تقعمز علي ركابها وتهز في راسها:ماتبكيش ، لالا ماعاش تبكووو فارس قعد حبيبي ماماتش
ووقفت وهيا تبي تطلع بس تلقاها بوها لمخشش عمر وشدها:نادين
شدت نادين بوها من يديه:بابا وين فارس وينه
الحاج فتحي:ستهدي بالله يابنتي ستهدي بيه
عيطت نادين وهيا تبي تطلع بس الحاج فتحي شدها وهوا يبي يهديها بس قعدت تعيط ودف فيه وهيا تندب في خدودها تبي تطلع ، لين الحاج فتحي عيط علي لبنات لقعدين يشبحو فيها ويبكو:زودو شدوها
ارتخت نادين وهيا شاده في بوها وتبكي بعبرتها من كل قلبها لين لوعت قلب بوها عليها:بابا باللهي عليك باللهي نبي نشوفه بالله جيبه يابابا ماتقوليش مات ماتقولوليش مااااات
الحاج فتحي حاول يقيمها وهوا يشد فيها في حضنه ويتغمر فيها:تعودي من بليس يابنتي فارس ماماتش
شبحوله لبنات وهما يتلفتو لأمهم لقربت منه:ماماتش امالا الرصاصه جت في من
رفعت نادين راسها لبوها وهيا قعده تبكي .
__
خبطت نجيه علي خدودها وهيا تقعمز علي الكرسي وتشبح في ايلاف لتتصل وتعاود وتشبح لروان لتكبه من فوق السور تشبح في الناس الملمومه
نجيه:يانهاري لحرف ياغبارتي السوده قتله قتله يانهاري لحرف ياياماتك السود يانجيه
ايلاف سكرت التليفون ويداها يرعشو وكلها ترعش اصلا ، وهيا تشبح لروان لنزلت من علي الكرسي:وااه ياإيلاف والله كان قتله لما نتشردو وسفيان مامخلينا في حالنا بعدها
ايلاف قعمزت جنب امها:يانهاره لحرف نحسابوه عقل
نجيه خبطت علي رجلاها:عارفاته اني واللهي لعرفته مابيقتلني غيره اااااخ ياسراج اااااااخ قتلت الولد علقت رقبه في رقبتك
وهيا قعده تخبط خشو خالد ورؤوف اللي دف سراج الداخل بالقوة وخش وراهم بوهم عبدالحكيم.
وقفت نجيه طول وجاته تجري:قتلته درت رقبه في رقبتك يانهاري لحرف ياياماتي السود
عيط عبدالحكيم وهوا يرفع في صبعه علي سراج لمنطقش ب ولا حرف وهوا يشبح وساكت:ياولد الكلب تتعدا علي الناااس اخرتي يجوني يقولولي زود شد ولدك راهو بيقتل
ضربه رؤوف علي كتفه بالقوة وهوا يكشخ:إحمد ربك انه ماماتش تحت يديك كان هدا ره خربت حوشنا وضيعتنا
عيط سراج:اي بنقتله وياريت مات وربي ماني مسيبه لين نطلع روحه ولد الكلب
شبح عبد الحكيم الكرسي لجنب الباب لكانت واقفه عليه روان تشبح في العركه ، شده وحدفه عليه بكل اعصاب وهوا يهجم عليه وشده من شعره:تبي تقلبها فوق روسنا تي خوه لقتل خوك خوه خوه مش هوا انت ماتخافش علي خواتك ماتخافش علينا حني ، كان قتلته شن بيدير فينا سفيان راهو يخدم مع الصقر مع ملشيات يجي يمسحنا ويركبلنا العار في خواتك
ودفه علي الارض وهوا يضرب فيه برجليه لين جو خالد ورؤوف حزوه منه.....
__
فتح محمد المربوعه البرانيه وشبح للشاب:تفضل خونا
خش الشاب للمربوعه وقعمز وهوا يشبح لمحمد لقعمز جنبه وهوا يشبحله من فوق لا لوطه وقعد شاك فيه وهوا يحط في سلاحه في خصره
الشاب:سامحني بالله خويه من الخوف معاش فطنت لي شي اول حوش حقيته زقبت فيه طول
ضيق محمد عيونه:خير ان شاءالله من شني هارب
الشاب:تي ياراجل مسكتني بوابه وهميه مني منك خدو هاتفي ونزلوني من السيارة واول ماحسيت بصفوني هربت منهم لقيت حوشك زقبت فيه من غير مانفكر
محمد:لا حولي ولا قوة الا بالله مادورش خوية الحوش حوشك ، لكن فطنو بيك خشيت هنا
الشاب:لالا ريحتهم بين الشوارع
محمد:كم نفر
الشاب:والله ماادري عنهم بس واجد كانو بسياراتهم مجموعه كبيرة ماخلولي شي لا فلوس لا هاتف
محمد:الحمدالله علي سلامتك المهم انت والحديد والفلوس كله يتعوض
__
مابطلتش نادين بكي ونواح وهيا كل ماتتهور تبي تمشي يشدو فيها فرح وفاطمه وامها تهدي فيها ، وترجع تقعمز وتبكي وهيا شاده تليفون فرح وتقرا في رسالته الاخيرة وتزيد تنقهر وتبكي لين فات الوقت وجي الحاج فتحي نادا عليها تمشيله ، طلعت نادين تجري وهيا تلبس في عبايتها ووشاحها كيف مايجو ومشت للحوش وهيا تشبح في معاذ لطلع من باب الحوش وهيا خشت جري.
الحاج فتحي:تي زود نسيفو عليه بسيف كيف بيقعد هكي
معاذ:هدا راسه مسكر قد ماشديت فيه مايبيش يمشي
الحاج فتحي:علي الاقل يشوفوه كان فيه كسر ولا حاجه مايجيش مايمشيش نرفعوه حتي للمستوصف لهني
تنهد معاذ:قلتله ياحاج والله مابي
تنهد الحاج فتحي وهوا يقعمز علي واحد من لكراسي لكانو الشباب الشارع لبعد ماحزو العركه خشو قعمزو في الجنان وقعمز جنبه معاذ وقعدو يهدرزو.
أنت تقرأ
عشق في بلاد حروبها لا تنتهي ( الفتنه و الثأر)
Actionرواية تحكي علي أحداث واقعية ، تناقش خطورة انتشار الفثنة والتأر ومعانات الأهالي بسبب هدا الشي ، وبين هدي الفثنة والتأر تخلق قصص عشق منها مأساوية ومنها تتوج بتأج العشق 💛
