عشق في بلاد حروبها لا تنتهي ( الفتنه و الثأر)

البارت 14

_
_
#عشق_في_بلاد_حروبها_لا_تنتهي
   الحلقة 14
(الياقوت)
في الحلقة السابقة
ردت غالية باب الجنان وطلعت تليفونها ليتصل ، بتسمت اول ماشافت من المتصل وردت:الو منو
منيا:وااااه نسيت عندك كراستي لحصاء الاحد عندنا واجب اكتبيهولي بالله
غالية:واااك عليك مصلحجيه نحسابك متصله تهدرزي عليا
ضحكت منيا:هههه امالا شن الا لقرايا ياودي
غالية حست بحد افتح الباب وقبل ماتتلفت شافت فار اخطم من قدامها وتصكها عيطه وهيا تتلفت تجري تبي تطلع من الجنان بس خشت في حد طويل وعريض وزي الخرصانه...
.
قراءة ممتعة 💛
#البارت_الرابع_عشر
.
قبها بالقوة رفعت راسها بتشوف بس تخبلت بشعرها لغطه وجها ونخنقت بالوشاح للتف علي رقبتها وكيف بتوخر فقدت توازنها وكيف بطيح بس حست بيد قوية لتفت علي خصرها وشدتها.
قامت غالية يدها وشدت جكيته وهيا تحول في شعرها من علي وجها حست بيه بعد وهوا يحول في يده وريحته اللي خشت حواسها ودخوتها وهيا تنح في شعرها والوشاح لغطاها واول ماشافاته عيطت بالقوة بس ولا قرب طول وهوا يسكرها في فمها بيده:اسسس فكينا من وجيجك
قعدت غالية ادف فيه وهيا تضرب برجلاها لين فكها بعدت عليه بمسافه كبيره وهيا تأشر بيدها بره وتشبحله بعيونها اللي ولو حمر وبيد التانيه تفك في وشاحها للتف علي رقبتها وخانقها:اطلع برا
طبس محمد راسه طول وتلفت وهوا يشد في باب الجنان وطلع برا وكيف بقول حاجه بس سكت وهوا يسمع فيها جت تجري وقفت ورا الباب وهيا تقول:ماتحلمش نقولولك علي مكان مجدي والله لو تطبق السماء ماك عارف مكانه
قعد محمد واقف برا ويده شاده في الباب المردود وهوا يبتسم:بنعرف وتو تحقي بعيونك
غالية تعصبت وحطت يداها علي الباب وهيا تبي تتكلم بجرائه وتسكر الباب بالقوة وتمزطله صوابعه
غالية:برا ان شاءالله تموت انت وعيلتك كلها تلحقو خوك الكلب ياماكش راجل تي انت عيل تافه اصلا اخخخ تفوه
وكيف بدف الباب دفه عليها بالقوه وهوا يشد في يدها بالقوة ورجعها تكاها علي الباب اللي سكره ولف يدها لشدها ورا ظهرها بالقوة ، وهدا كله بلمح البصر مالحقتش غالية حتي تعيط او ادفه او حتي تهرب منه
زمطت ريقها وهيا تشبحله ، عينها في عينه وقريب منها وهوا يشبحلها ، وهيا من الرعب صارلها شلال في النطق مايطلع منها حس غير انين بسيط من وجعها من يدها لشادها ولويها ورا ظهرها
محمد:نا قعد مستوعب انك بنت ونفوت في ام الرا اللي تفتفتي فيه لانك قعده عويله جاهله ساكت وماتهورتش وخربط لكي ام وجك
نزلو دموع غالية من الخوف وهيا ادف فيه بيدها من بطنه بس ولا تحرك ، حاولت اطلع صوتها وقالت:ن..ن..نننحيي
اول مامحمد شاف دموعها نزل عيونه طول وشبح لرقبتها الملفوفه عليها الوشاح ، بعد عليها وهوا يجبد في الوشاح من رقبتها اللي اول ماجبده تفك بسهوله معاه
ودفها من علي الباب علي الجنب لين لصقها في الحيط وطلع وهوا يقربع في الباب لين نخلعت وهيا تمس في رقبتها لولت حمره من الوشاح لخداه معاه
__
قعمزت ايلاف علي الكرسي جنب سراج ليشرب في القهوي ولاهي في تليفونه وشبحت لروان لمقعمزه بين خالد ورؤوف
رؤوف:القهوي زي وجهك
روان:هدي ايلاف دارتها
رؤوف بتسم:امالا زي لعسل
شبحتله روان بربع عين:ياعيني ياعيني علي المصلحجي واااه لهدرجه المصلحه الذل الانسان اخز
ضيق خالد عيونه:مصلحة شن
كيف روان جايه بتتكلم قص عليها رؤوف:شي شي تتسهوك
خالد:اندير روحي صدقت توا ولا كيف
ضحك سراج وهوا قعد يشبح لتليفون:اعمل حالك ميت
تنهدت ايلاف وهيا تلكلك:اممم امبكري تلاقيت ب اخت مرت فارس عند حوش لامين
شبحتلها روان وهيا اضيق في عيونها بس غمزتلها ايلاف باش تسايرها في الدوه ، فهمتها روان وقالت:خيرها
ايلاف شبحت لخوتها لكل واحد لاهي في تليفونه:قالت بيسافرو لتركيا السبوع الجاي او لبعده
كلهم شبحولها وروان نتبهت عليهم وخافت بس قالت:قصدك بيولو بكل
سراج خبط علي الطاوله بالقوة:الحيوان ريته بيهرب
خالد بتسم بهزوه:جبان
ضيقت ايلاف عيونها:وعلاش جبان ياما درتو فيه ياخالد وهوا ماليشي ذنب
شبحلها خالد شبحه هوا وسراج قريب كلاها باها.
سراج:شن انتي نسيتي املا خوه شن مداير ره خوه قاتل خوك
روان نطت:مش ناسيين لكن هوا ماذنبه شي خوه القاتل ولا بدي حتي القتل يورتو فيه للخوت والصغار
خالد:لا بس عيلته كلها مدنبه كلهم مدنبين كان ربوه صح وخلوه راجل ره ماشدش سلاح علي عيل وسترجل عليه
سراج رجع اتكه علي الكرسي وضحك بهزوه:هه راجل تي حرام فيه كلمة راجل علي الاقل الرجاله يعترفو بشي لدروه مش هوا نكر زي العيل تقول ماشفناشي بعيونا
نهضت ايلاف روحها وهيا تشبح لروان لشبحت لسراج:علاش هوا نكر
سراج:الكلب قعد يألف في قصه ويفبرك فيها حيوان كان يحصل بين يديا بس والله لما نفرغ فيه مخزن كامل ومايطفي النار اللي فيا
ايلاف شبحت لرؤوف الساكت وقالت:شن قعد يكدب
ماباش رؤوف يرد عليها وقعد ساكت.
خالد:والله كان كنت معاكم وسمعته يكدب وينكر كان هجمت عليه وريحت البشريه من منافق جبان زيه
سراج:قعد يقول نبي نساعده اني ماقتلاتش ويقول فيها عيني عينك ولا حتي خاف من ربي
شبح خالد لرؤوف:قصدك هدا لما رفعتوه للقسم
هز رؤوف راسه:اي
ايلاف ماعاش صبرة وقالت:باللهي عليك احكينا شن قال
تحمحم رؤوف وهول يحك في لحيته وتنهد وقعد يحكيلهم ....
__
نفخت نادين علي وجه زيد اللي راقد عليها ويسكرلها في خشمها ويقلها تكلمي ولما تتكلم يبدا يضحك لين يسيخ وهيا تضحك لضحكه:خلاص عيت برا لبابا
شبحلها فارس لمقعمز جنبهم شاد الريمود ويقلب في المحطات:مايجيني حد اني
بتسمت نادين وشبحت لزيد اللي وقف ومشاله وهوا يبرك عليه ودارت زيه ناديه لين طيحوه لوطه ، وهما يضحكو ويبوسو فيه.
شد فارس نادين بين يديه وهوا يبي يشد زيد اللي هرب ويصيح ويضحك:هبت هبت نا هبت
ضحكت نادين لرفعت راسها لفارس:ههههه خلاص حول والله ماعاد انعاودها
شدها فارس من بطنها:اي ماعاش بتعاوداها
وقعد يضغضغ فيها وهيا تبعد فيه وتصيح:لالالا ههههه مش كويس ره هههههههه حول اني حاامل مش كويسههههههه
بطل فارس علي طول وهوا يلف فيها تحته ويمس في بطنها بشويه:بديتي تتوحمي زي قبل
خدت نادين نفسها وهيا داهشه وهزت راسها:اي جايتني علي المربه واااه وقضتني فيه
بتسم فارس وطبس باس بطنها ورجع شبحلها وقال:شن رايك اذوقيه مني
هزت نادين راسها:لالا ماخاطريش اصلا شكلا التوحيم بجي عليك ههههه بنبدا نكرهك وااااع
ضيق فارس عيونه وحول من عليها وقعمز:اياح علينا بديريلي زي في زيد امالا حتي الصنه لوحتيهالي ازح
ضحكت نادين ومدت يدها لزيد لجاها تغمرها:بس طلع نسخه مصغره منك شوف شوف
شدت وجه زيد لقعد يرمش ولفتاته لفارس:نفس لعيون والخشم ياناياته القنينين وااه
وزادت تغمرت زيد وهيا تشبح لفارس لقال:مانبيهمش اني صغاري يشبهولي هني روحك وفكينا من جو كارهاتك وكارها صنتك
ضحكت نادين وسيبت زيد لجي تبعها ، وقعمزت جنب فارس وهيا تلف في يداها علي رقبته وتبوس فيه من خده:ياروحي اللي مايبينيش نكرها ياحليلي نااا
بعدها فارس وهوا يدف في زيد اللي جي حتي هوا شدله خدوده:تي حولو خنقتوني
ضحكت نادين:ههههه علي من تخطر جايك يقرصلك في خدودك هههه
ضحك فارس وجبد زيد قعد يضغضغ ويبوس فيه
__
#غالية
اني مش عارفه نرعش من الدوش اللي كيف طلعت منه او من الرعشه لمبكري حصلتها من الجحش لا والله هوا مش جحش هوا غورلا  دماغول مجرم ، ياربي رعب رعب كيف شدني ماقدرتش حته ندفه او نزحزحه من مكانه ، كله كوووووم وعيونه كيف كأني شبحت لعيون حيوان مفترس والله ، ياربي خيرني اني دويت معاه هكي غبيه حماره كان دار فيا حاجه ولا غتصبني حي عليا غبيه اني هدا واحد ماعنداش ضمير كلب وحقير تراهو حطني في راسه وحفظني صم.
انفتح الباب عليا فجأة لين حطيت يديا علي قلبي بخلعه.
احمد:خيرك ماتسمعيش فيا انطق ليا ساعه
نحيت الفوطه من شعري وهزيت راسي:والله ماسمعتك بالك من الفوطه
هه من تفكيري ياخوي وعملتي السوده ماسمعتكش ، طبست نبي نقيم حوايجي لطاحو من السرير:خيرك مش قلت بترقد
وشبحتله لقيته مبتسم وقالي:العيلة ردو عليا
هزيت راسي واني مش فاضيه نفكر في رد الناس والخطابه بالي كله عند الدماغول المجرم
احمد:عجبتيهم وقالو بحددو موعد لرؤيه الشرعيه
تعرفو من قوت التلفيته لتلفتهاله لين رقبتي وجعتني وحسيتها انتلصت من مكانها وقسم بالله ماعندهم درة دوق وقلت بعيطه:كيف
احمد ياناري ستغرب وقالي وهوا يضيق في عيونه:تي شن كيف عجبتيهم من شن تشكي انتي باش يرفضوك
تنهدت واني نهز في راسي وماعرفتش شن ارد شن يعني برد بالله بنقوله طلعتلهم في حوايج ايامات الغبارة من ايامات جدي وحناي صغيرين:اه لا لا بس مسرع ردو ماليهمش سبوع يعني حتي اني مرات ماعجبونيش الناس امه باين عليها وحده حرفه بتسودلي اياماتي معاه لالالالا انا مايسوالي نعيش فوق امه هدي اللفعه حتي حكة الطماطم تحاسب فيا عليها
رفع احمد حاجبه بفهم عليا وعلي دوتي وتلخبيطي وقال:والله مافي غيرك اللفعه والحرفه واصلا هوا مايسكنش فوق اماليه عنده حوش ارضي وبروحه وبعيد علي اماليه فوقها
واااااه ياربي سكتت واني اللاوح في الخلاص علي السرير وقبل مانتفجر ونتكلم قال:قلتلهم يجو الأثنين باش توتي روحك
قلت واني فاتحه عيوني بصدمه:ومن قالك مووو...
سكر باب الدار في وجهي ومشي وخلاني ننبح بروحي ااااخ تفوه عليك ياوخي وعلي ويهي مالات عليك انت وعريس الغفلا
تنهدت وتلوحت علي السرير وغمظت عيوني واني نشبك في صوابع يديا مع بعضهم ، توا كيف بنطفشه هدا احسن شي نقوله انه اني علي علاقة ونحب حبيبي هلبااا؟
ونبي وكان يطلع عيل كرك يعاود لأحمد والله نطيح من عينه وفمه وخشمه بعدين ، اووووف اووووف اني من وين بنلقاها من عريس الدحناس ولا من..
ياربي رموشه مطولهم وقسم بالله اطول من رموشي.
ضربت جبهتي بكف يدي بالقوة ، تو باللهي شن جاب ارموشه في الخط تي ان شاءالله ينحرق هوا ورموشه وقسم بالله لو يسلموهولي هكي دايخ شوي لانه مستحيل نقدره صاحي خرسانه لوح حديد مصدي  ، المهم دايخ هكي شوي اول شي رصاصه في كتفه باش يتوجع وبعدين رصاصه في رجله باش يتألم اكتر واخر شي رصاصه وسط قلبه باش يموت وقتي وقتي ، ونفرمه فرم صغير صغير الكلب هدا ولوحه للكلاب ينهشو من لحمه...
جبدت اليرغان وتكمكمت وطول الليل ومامشاش من بالي بكل مره ندكر شكله عيونه فمه لحيته ورموشه وننقلب ندعي عليه من وسط قلبي لين رقدت وياريت مارقدت واني طول نومي نحلم بيه يعدب فيا
___
تاني يوم الصبح...
درس محمد سيارته قدام المقر الجديد وهوا ينزل وشاد القهوي في يده وخش للمبني اللي اول ماشافه زياد وقف وجاه طول:فندي
محمد :صباح الخير
وقام طاسة القهوي بيشرب
زياد:صباح النور خير جاي شن فيه
وقبل مامحمد يشرب الرشفه بعد الطاسه شوي وشبح:حقك علي ياراس سامحني هي تو نروح
زياد حاول مايبتسمش:لا مش قصدي هكي
شرب محمد من القهوي وقال:مش مهم وين الجمعة
زياد:في الهنقر يحرسو علي المتدربين الجدد
تلفت محمد خش لمكتبه وأشر لزياد بيده يجي وراه ، قعمز علي الكرسي لقدام مكتبه وقال:اجمعلي20 عسكري ولا 25 بكرا بنعدو للمدينه الحارة
زياد:مداهمه
هز محمد راسه:اي فيه روس مخدرات حددت مكاناتهم كان نمسكوهم تكون ضربه قويه
زياد:بأذن الله
وسكت شوي وتلبك وهوا يتحمحم وكل مايجي بيدوي يسكت
محمد:هات شني عندك
زياد:احمد
رفع محمد راسه طول وجت في راسه غالية:كنه
زياد:امبارح زي ماتعرف جو الشرطة القضائيه وخدو ملفات لمحبسه كلهم لهربو لما هجمو علي المقر وواحد منهم احمد
رفع محمد حاجبه:كيف ومن امتي الشرطه القضائيه ياخدو في الملفات لمحبسه من غير مانكون حاضر
زياد:مانعرفش قالو الامر جاي من السيد علي واليوم بيطلعو دوريات بلقطوهم باش يقاضوهم
وقف محمد طول وطلع بسرعه....
__
ايلاف:هلو حبي
صفاء:اهلين شن الجو
ايلاف:تموم وانتي شن جوك وشن اخبارك وشن ردك ههههههه
ضحكت صفاء:ههههه مازنانه يافرخه
ايلاف:مه فرحانه بتولي مرت خوي
صفاء تنهدت وقالت من فوق قلبها:قلت لماما وبابا وقالولكم تفضلو بس علي النصيب يعني كان مصارش مش تزعلي ولا تبطلي تصاحبيني ياإيلاف
ايلاف:لالا بأذن الله فيه نصيب مخصنيش كان هدا لا صاحبتي لا نعرفك ههههه
صفاء:ايلاف بالحق نكلم فيك صحبتنا مستمره كان صار او لا
ايلاف:نبصر عليك اكيد اني ماخصنيش صار ولا مصارش ومش تافها علي خاطر نصيب ربي كاتبه نقطع علاقتي بوتيني اللي مانقدر نعيش من غيره
بتسمت صفاء برياحه:اوك ريحتيني
__
شبحت غالية لأحمد اللي يتفرج وسارح مع الاخبار
نفخت غالية وفكت منه الريموت:مليت اني ره عيت من الحرب خلينا ننسو شوي خلينا نتفرجو علي رسوم
شبحلها احمد وفك منها الرموت:رسوم عينك مش رسوم خليني نتفرج ونشوف شن صاير في لبلاد
غالية:وااااك باه حط فيلم رعب ولا اكشن ارحم
احمد:نوضي ديرينا حاجه حلوه لاهي روحك اني مانيش مغير
ضرباته غاليه علي كتفه ومشت للمظبخ ، شحت الكرسي وقعمزت عليه وقامت رجلاها علي الطاوله وقعدت تلعب بالكرسي وهيا مقعمزه عليه وتوخر بيه وترجع تحطه علي رجليه وتوخر بظهرها توقفه علي رجليه الزوز وهكدا وهيا تفكر بصوت عالي:بندير بسبوسه تو بتتشردع مني السمدينه في الكوجينه كلها وفيها تطيب عسل ودوه هلبا اوووف وكان بندير سينابون اول شي القرفه ماعندناش وفيها حلي علي الرخامه وتمزريط وزبده واااه ماخاطريش وكيكه مش جايه فيها النيه
وتنهدت وهيا تتلفت تشبح لروشن المظبخ وعينها في الكنشيلو الجنان المردود:سبحان الله يايسكر الباب ياالكنشيلو بس يسكرهم الزوز مع بعضهه ده شي مستحيل علي احمد خوي
ونفخت وهيا قعده تشبح واول ماشافت الباب انفتح وجت عينها في عين محمد طاح بيها الكرسي التالي بعيطه منها
.
.
.
#يتبع_للبارت_لبعده
____________________________________
بداء كتاب الرواية في 2019 / أبـــ4ٰـــريل / 7
تم وضع قَفلة لـ الرواية في 2019 / سبتــ9ٰـــمبر / 25