عشق في بلاد حروبها لا تنتهي ( الفتنه و الثأر)

البارت 40 والأخير

_
_
#عشق_في_بلاد_حروبها_لا_تنتهي
#تكملت_الجزاء_الاول
الحلقة (40) والأخيرة من الجزاء الاول 💛
.
.
في الحلقة السابقة
وزاد الشيخ من صوته وكمل والحاضرين يردو بأمين:اللهم بارك في هدا الزواج ، اللهم بارك في هدا الزواج ، اللهم بارك في هدا الزواج ، وأجعله زواجا مباركا طيبا ميمونا ، وأجعله بالسعدة والهناء مقرونا ، وبارك يارب في هدين الزوجين ، بارك فيهم ، وبارك لهم ، وبارك عليهم ، وأجمع بينهم يارب بالخير ، اللهم أحسن العسر بين هدين الزوجين ، وأرزقهم بدرية صالحة نافعة ، اللهم ألف بين قلبيهم بألفة طيبة ، ألهم ارزقهم الوأم والتفاهم والإنسجام ، برحمتك ياأرحم الراحيمين ، وبارك له فيها ، وبارك لها فيه ، وأجمع بينهما بخير ، ونسألك سأل ياألله يااالله ياالله ناصية هده الزوجه ناصية خير وبركة ، علي زوجها ، وأجعل قدومها خير وبركه ، برحمتك ياأرحم الراحيم ياأكرم الأكرامين يااارب العالمين ، يااارب تقبل منا وبالبركة الفااااااااتحة .........

قراءة ممتعة
#البارت_الأربعون_والأخير

اللهم دوم فرحتها ، ثم فرحتها ، ثم فرحتها ، ثم حبها لي 🙌💛
(الياقوت)
.
.
قرب رؤوف وحضن محمد وهوا يخبط علي ظهرة:وصار منك يارفيق
بعد محمد:اعطيني طريحة خير
ضحك رؤوف وضربه علي كتفه:غر كان مش جرحك قعد جديد بس ره كليتها هههه المهم مبارك زواجة الدهر ان شاءالله
بتسم محمد ورفع يدية فوق:ياااااارب
ضحك رؤوف ومحمد تلفت لمراد والجمعة لباركولة ، واول ماخدي نفس منهم بعد علي الزحمة وهوا يطلع في تليفونه ويتصل بيها......
.
.
نفخت غالية المتوتر وهيا تمشي يمين يسار يسار يمين في المظبخ والبنات مقعمزات فوق الرخامه ويتفرجو عليها .
خشت صفاء وصيحت:بطلي بطلي وانتم انزلو تقول صدارات
إيلاف:فيها استمتاع لما تتفرجي علي عروسه متوثرة هههههه
تلفتتلها سارة:وله هههههه
صفية ضحكت:غااالية فرفشي عاد وانتي كان حد يمسك تتفجري ههههه
غالية شبحتلهم شبحة ناريه لين سكرو افومهم بيديهم وايلاف نزلت تضحك قربت منها:تي نبصرو كنك عاد هههه
تنهدت غالية وشبحت لصفاء وروان لخشت:ياربي علاش تعطلو عارفه اني مستحيل حاجتي تكمل اكيد صااار حاجه
صفاء:مصح وجهك غر....
وسكتت وهيا تتلفت مع لبنات اول ماسمعو ضحكات وصيحات هيام و خديجة لجتهم وقالت:مبارك مبارك هههه
وقربت من غالية وحضنتها:مبروك ياغزالة منه المال ومنك لعيال
تحشمت غالية اللي تبكشت وهيا تبتسم وتسلم عليهم واللي يحضن واللي يبوس .
صفية جتها ومدتلها تليفونها:تليفونك يشرين ردي بسرعة هههه
خدت غالية وضحكت ومشت تجري لدار وخلتهم يتسهوكو عليها هههه .
سكرت غالية الباب وتكت واول مافتحت الخط جاها صوت محمد:هاااا حلالي هااا مرتي الغالية
ضحكت غالية وحطت يدها علي وجها:هههههه ياربي مش مصدقه
محمد:هههه مبارك علينا ياغلاي ربي يدوم وجودك في حياتي
غالية:الله يبارك فيك
محمد تلفت لصياح رؤوف:شني يابروو نمشو
رفعله محمد يده بمعني تمام ورد قال لغالية:غلاي تو بعدين نكلمك
غالية:باهي
وسكتت شوي وقالت بحشمه:نحبك
بتسم محمد:نعليا علي السماحة ههههه هش غادي خير مانجي نشيلك من تو
غالية:هههه لالالا خلاص باي
محمد:في أمان الله
__
.
.
رحمتك يالله ، عفوك يالله ، تيسيرك يالله ، غمرني ، ف الحمد لك 💛
(الياقوت)
.
نزل محمد ورفع يده لشباب لوقفو وضربوله التحية ، وقربو يباركوله ، وبعدها خشو الداخل ، جبد محمد الكرسي:تفضل عمي قمعز
قالها وهوا يأشر لشاب الامن:عدي جيب كراسي لشباب
سراج:لالا عادي غير فهمنا شنو فيه
هز محمد راسه لشاب الامن بمعني برا جيب ، ولف لمكتبه وقعمز علي الكرسي وشبحلهم:مالك سعد ####
شبحو سراج و خالد لبعض بستغراب.
ورؤوف قال: خيره
محمد:كانت بينه وبين الله يرحمة مشكله
عبدالحكيم:اي خانب من ولدي تليفونه ، لكن سكرنا الموضوع وتم
محمد:كيف تم الموضوع
رؤوف:مشينا تفاهمنا مع لكبار وتنازلنا علي التليفون وعلي فلوسه ، هوا الفرخ متع دوة فاضية وقبل ماينقتل حمزة بيوم مداير مشكله هوا وياه
خالد:هوا توا محبوس حسب ماقالو
هز محمد راسه ووقف:اي محبوس
لف ومشي فتح باب المكتب وصيح لشاب:عدو جيبو مالك سعد ونادو لي زياد
مشو الشباب ومحمد تلفت رد لمكانه.
رؤوف:شني فيه يامحمد وترتنا
محمد:شوي وتفهم نبيكم تسمعو بودانكم
انفتح الباب وخش زياد ومعاه مالك والكليبشات في يديه اللي اول ماشافهم زمط ريقه وقلبه قريب وقف .
وقفو كلهم وزياد دف مالك وسكر الباب ووقف جنبه وهوا يشبح لمحمد لقال وهوا يجبد في مالك من مرفقه ووقفه قدام رؤوف ولولاد لوقفو وعبد الحكيم لقعد مقعمز ويشبحله بستغراب.
محمد:تكلم
زمط مالك وشبح لمحمد لرجع وقال بصياح:تكلم
شبح مالك لوطه وقال بصوت يرعش وبعبرة خوف:اني لما ، لما خنبت تليفون حمزة ، وصارت مشاكل ، دورة علي رقمه الجديد وبعتله مسجات تهديد باش ، باش يسكر فمه ويفوت التليفون ، وهداكا اليوم ، اليوم اتصل بيا وهددني انه بيرفع عليا شكوه وبيوريهم رسائلي ك دليل خفت من بوي وخوتي كان يسمعو بيا والله لما يقتلوني ، خنبت سلاح خوي وجيت قدام حوشكم
وسكت بخوف وحس بحركت سراج اللي قرب بس يد رؤوف شداته ، هز محمد مالك وقال:كمل
مالك نزلو دموعة وقال:كنت نبي نهدده بس واللهي ماكنت نبي نقتله كنت نبي ناخد منه التليفون باش نمسح الدليل ونمشي لكن هوا قعد يعاند ويسب
هجمو سراج وخالد عليه ورؤوف تلفت وهوا شاد راسه .
بعد محمد الشباب وصيح علي زياد:طلعه من هنا
سراج:وربي لما نقتلك يافرخ لحراااااام وربي لما نقتلك زي ماقتلت خوي
وكان يبي يلحقه لكن محمد شده وهوا يرجع في يديه ورا ظهره بحركه سريعة ولفته لعبد الحكيم لمنزل راسه وحاط يديه علي وجهه:حق باتك كيف حالته تبي تقتله عليك حتي انت .
ودفه وهوا يلف فيه ليه وقال بصوت عالي رزين:حط عقلك في راسك
سكت سراج وهوا يزربز في مكانه وتمالك اعصابة .
محمد:هوا عترف بالسانه قدام القاضي في النيابة ، يوم الاثتين عنده نيابة وفيها القاضي بينطق ب الحكم يا مأبد ياأعدام
خالد:ان شاءالله أعدام زيه مايستاهل يعيش
رؤوف:شني صارله باش عترف غريبه بعد السنين ادكر يعترف
محمد:فيه ناس وعوله ضميرة بيش ياخدو حقهم
واول مامحمد كمل كلمته سفيان خش عليهم ووقف قدامهم بكل ثقه ومرفوع الراس.......
__
.
.
لا تكن فظ مستهان بمشاعر غيرك ، ف أحيانا تنقلب الادوار ، وتكون انت من يستهين بمشاعرك ✋
(الياقوت)
.
مر الوقت وكانو لبنات مقعمزات يهدرزو .
روان:نوضي رؤوف يتصل شكله جي
ايلاف:ردي عليه قوليله يخش صفاء بتشوفك
تلفتتلها صفاء وضربتها علي فمها:نشوف طياح سعدك
غالية:اي وشني فيها عمي مهناش حقيرة ستغلي فرصتك
روان:تبي نقوله اوقفو شوية هدرزو في الجنان عادي
صفاء هزة راسها وفنصت فيهم:لا هبلتو انتم
غالية ضيقت عيونها:وربي لما يسيبك من تقالتك هدي خيرك انتي ماقلنالك إعملي معاه الفحشاء والمنكر عادي كان طلعتي شفتيه خطيبك هوا مش صاحبك ره
ضحكت روان:فحشاء ومنكر يعطيهالك ههههه
ضربة صفاء غالية علي راسها:نقصي نقصي من اللسان راك تزوجتي
نفخت غالية:هالحاجه لكبيرة المهم قوليلة يخش
صفاء:لا
ايلاف:سكري فمك
خدت ايلاف تليفونها وتصلت ب رؤوف ووقفت وصفاء تشبحلها:تعالي ياكلبه
غالية قربت منها وقالت بشوية:اسكتي هدي فرصتك ترضيه
سكتت صفاء وشبحت لغالية وضيقتلها عيونها:شطانه انتي
بتسمت غالية:شكرا ههههه
.
.
رؤوف:علاش شني بندير بنخش
ايلاف:صفاء بتشوفك
رؤوف:مش وقتها هيا اطلعو مستعجل
حست ايلاف من صوته ان فيه حاجه وردت من غير اصرار:هي طالعين
سكرت وقربت وهيا تاخد في شنطتها:قال مستعجل مرة تانية ان شاءالله هي روان
تغير وجه صفاء وحست انه ردها برغم كانت ماتبيش بس حستها لقطه بايخة .
طلعت صفاء وهيام وصلوهم لبرا ، واول مارؤوف شبح هيام نزل وسلم عليها وماباش يرفع عيونه لصفاء لسلم عليها من غير كلام ، ماكانش زعلان منها ولا حاجه كان باله مش مع حد كان يفكر في كلام سفيان وبس .........
.
.
""سفيان:الله يسامحكم ياعمي لكن قلبي داعي عليكم لا يوم الدين حرمتوني من شوفت امي قبل ماتموت ظلمتوني قبل ما ادورو علي الحق ، سامحني فيها ربي مايردش دعوة مظلوم واني دعيت عليكم كلكم غربتو خوي في سبت التار وحرقتو قلب اميمتي عليا وحرقتوني اني""
__
.
.
غالية:زعلتي
تغطت صفاء وقالت:توا في الدار تلاته اسرة علاش مضايقتيني ولاصقه فيا
لفت غالية يداها علي صفاء وقالت:مه نحبك
صفاء دفتها:هههه شن اديري في بروفات انتي
غالية:مصحك ياوجه الفقر مايمشيش معاك الحنية
صفاء تنهدت بصوت.
تلفتتلها غالية:زعلتي منه
صفاء:لا عادي اصلا اني من الاول مانبيش نشوفه
غالية:بلا جو اني مش ايلاف ادوي
صفاء رجعت تنهدت:الصراحة اي كان خاطري نهدرز معاه فيس تو فيس
غالية قعمزت:اتصلي بيه
صفاء هزت راسها:لا تي امبكري ماشفتيشي ماشافش حتي لخليقتي
غالية نفخت وتلفتت لتليفونها لشرين.
صفاء:محمد
غالية هزت راسها:لا ميسم
وردت:الو
ميسم:كيف حالك كنتنا
ضحكت غالية:هههه الحمدالله حماتي
ميسم:وربي هي فطنة انكن تبو بعض مسمحكم ياربي
غالية:هههه شكرا
ميسم:ههههه جو تحشمت هههه شن جوك
غالية:الحمدالله شن حالكم انتم وحال ماما رقية
ميسم:عال العال من لما كلمتها هداية امبدري وقتلها تم القران وضحكه مافرقتهاش
غالية:اي كلمتها امبكري عيت وهيا تتغزل فيا ههههه
ميسم:اي كلماتك هداية
غالية:اي قريب تهبل من لكساد هههه قتلها تعالي قتلي مانقدرش
ميسم:لنقنه جدي وسالم مدايرين فيها الواجب بطلباتهن ههههه
غالية شبحت لصفاء لنقزت فوق السرير وقالت:رؤوف
ضحكت غالية:ردي غبو بسرعة
ميسم:اش قلتي
غالية:لا مش عليك غر قوليلي
.
.
طلعت صفاء من الدار ومشت لي وسط الحوش بس لقت خواتها متصدرات يتفرجو خشت للمظبخ وردت:الو
رؤوف:اهلين
صفاء:اهلين بيك شن جوك
رؤوف:الحمدالله
وسكت من غير مايقولها وانتي لين حست صفاء بضيق وطرت تدوي:اي خيرك شكلك مش فاضي ولا لاهي
رؤوف:لالا غير مضايق شوي
صفاء:خيرك
رؤوف تنهد وقال:ولا يهمك شي شني اخبارك انتي
صفاء:لا يهمني قولي خيرك مش وقت اخباري
بتسم رؤوف:صايره تطورات
صفاء نفخت:انت زعلان مني وله والله ماكان قصدي امبكري تسهوكت وجي تسهويكي علي راسي
رؤوف:اممم عادي تعودت عليك
صفاء:شني تعودت علياا
رؤوف:علي تسهويكك وعلي الا مبلاة متعك
صفاء:من اللي مش مبالي بتاني ورفض يشوفه
رؤوف بتسم:قصدك علي مبكري ، هههه عارف ايلاف هيا لمخططه حكتلي في السيارة ، جاب ربي ماخشيتش وشفتيني غصب عليك
صفاء فتحت فمها من طريقة كلامه.
رؤوف:وينك
صفاء:مصح حتي وجهك باهيو ، مصحك والله مصحك اني صح درت هكي قدامهم بس كنت نبي نشوفك ونهدرز معاك ، لكن انت تخلق في الاعدار وماتبيش تشوفني
رفع رؤوف حاجبه:مصح حتي وجهي صاار عيب ره اني خطيبك
صفاء:ونبي تتسهوك انت هدا وين ادكرت انك خطيبي ومبكري لما سلمت عليا من راس خشمك تقول خاطبني بالغصب
رؤوف:ههههه خيره حبي متكنطي
هدت صفاء ونتبهت علي روحها انه تصيح وتكشخ ،غمظت عيونها بالقوة وقالت:اه اسفه مش قصدي
وكيف رؤوف بيتكلم صفاء قصت عليه بخوف انه يفهمها غلط:لا قصدي ره وهامني وكنت نبي نشوفك ومستاحشاتك هلبا
ولما قالت اخر كلمه ضحك رؤوف:ههههه تي الحمدالله ياربي الحمدالله واخيرا نزلت عليا رحمته ونطقتي
قعدت صفاء تضرب في جبهتها بيدها اكتر من مرة وتسمع في رؤوف لكمل:هههه تي وينك تحشمتي هههه تي وحتي اني ستاااحشتك ياحبي وماعاش نقدر نصبر من غيرك شني رايك نحددو موعد العرس
بتسمت صفاء ونفخت:توا شن جاب الموضوع هدا
رؤوف:هههه خششتيني في بعضي شني متخيله مني يعني
__
.
.
جميله هيا البدايات التي تنتهي ب جمع قلبين تحبا في الله 💛
(الياقوت)
.
شبحت غالية محمد خش عليها انتظار ردت علي ميسم وقالت:هي تصبحي علي خير سكري ياسرك
ميسم ضحكت:هههه فهمت فمهت محمد يرن وله
غالية:تي سكري
سكرت ميسم وهيا تضحك وغالية ردت علي محمد طول:الوو
محمد:من كنتي تكلمي
غالية:في ميسم
محمد بتسم:بااهي كيف حال مرتي
ضحكت غالية:الحمدالله
وسكتت شوي وقالت قبل مايتكلم محمد:كيف حال راجلي
محمد:ههههه مرايف عليكي وااااجد
غالية:يانعليا حتي اني مرايفه عليك واجد راهو ره
محمد ضحك وتكي علي الكرسي المتحرك وهوا ينزل بيه التالي وهوا يولع في السبسي:هابا عليكي اللهجه راهو ره
غالية:اوووف مايعجبك عجب سيورني نتعلمها
محمد:تو نعلمها لكي نا
غالية:وينك انت
محمد:في البلكون عليش
غالية:صوت ريح خش الداخل صقع خيرك مقعمز برا تو تمرض قعده مافرحتش بيك
تعلت ضحكت محمد:ههههه احيه علي الجلاطة السان احيه هههه
غالية:تي نتكلم بجديات اني
محمد:ميصيرلي شي ياطشه ماتخافيش تو تفرحي بيا ونفرح بيكي ماعاش فيه مهرب تو حصلت عليكي
غالية:باه خش الداخل
محمد:واااك وانتي سكنتي ماعندي وين نخش جدي قالب الدار بتنخيط ومايكتبها علي تاريخ نتمرقد جنب سالم نلقاه تاني يوم فوقي
ضحكت غالية بصوت العالي:ههههههه ضحكتني هههه
بتسم محمد وغمظ عيونه وقعد يسمع في ضحكتها لرجعتله الروح ، وحاس روحة فرحاان لفرحتها ولكونها بدت مرته وحلاله.
بطلت غالية ضحك وحست انه سكت يسمع في ضحكتها وطت صوتها وقالت:محمد
محمد:ها حلالي
رجعت غالية ضحكت:ههه خيرك سكتت
محمد:مسامحتيني
ردت غالية طول:اكيد اني مسامحاتك ، صح مرات نحس غلط نحبك ونكلمك لكن اني مانرتاحش الا جنبك انت وليت كل شي في حياتي
محمد:ربي يقدرني انسيك كل لعشتيه ونخلي الضحكه ديما علي وجهك
حطت غالية راسها علي لمخده وبتسمت براحة وبحب كبييييير لشخص هدا ، الشخص اللي ماتخيلاته انه ح يكون سبب في سعادتها ، انه بتلقى سند بوها وخوها وحتي حنان امها فيه هوا .........
__
.
.
تاني يوم...
وقفت صفاء علي غالية:نوضي ندير عليك دورة اليوم راك بتمشي وانتي تقول مش عروسه
غالية وقفت ببتسامه عريضه:اي اي حق هيا ديري عليا دورتك
ضحكت صفاء:واااه ماصدقتي
غالية:هههه مه كنت نراجي فيك امتي تقوليها
صفاء:اكيد مش ناسياتك بس قبل نحسابش انه بتمشو بعد غدوة
تنهدت غالية:تعرفي نبي نمشي ونفس الوقت مانبيش كلهم هني واني بعيده
ضيقت صفاء عيونها:من هما
غالية تجمعو دموعها في عيونها:امي وبوي واحمد
قربت صفاء وقلبها وجعها علي غالية:ياقلبي الله يرحمهم ماتبكيش حرام هكي تعدبي فيهم
هزت غالية راسها ومسحت دموعها .
__
.
.
تمنيته يباق لي ، حبيبي ونور عيوني ، دعيت ربي في كل صلي ، بدموعي الناجي يكون نصيبي ، الحمد ليه ماخيب دعائي ، وخلاه اليوم يبقي حلالي 💛😍
(الياقوت)
.
تاني يوم الصبح ....
ركبت غالية لسيارة وهيا تتلفت تشبح لمحمد ليهدرز مع مفتاح ، رجعت شبحت قدامها لحوشهم ومسحت دموعها .
فتح محمد الباب وركب وتلفتلها واول ماشاف دموعها رفع يده ومسح علي خدها:كنك يابكايا
شبحتله غالية وقلبت شفايفها:ستاحشتك
ضحك محمد وشبح قدامه لطريق وشبح لمراية السيارة وشبح مفتاح قعد واقف وراه ويشبحلهم:بنحضنك لكن عيب قدام لعرب
ضحكت غالية ومسحت دموعها ، ولع محمد السيارة وتحرك وهوا يشد في يدها ويبوس فيها .
.
.
__
.
سكرت هيام التليفون وخشت للمظبخ:ام رؤوف كانت تتك...
واول ماشافت صفاء تبكي شهقت:خيرك العفو
صفاء:شني خيرني ستاحشت غالية
عوجت هيام فمها :العفو ماليهاش 5 ساعات ماشية عوج يسي
تنهدت صفاء ومسحت دموعها:خيرك ماما شن تبي تفضلي
هيام:قتلك ام رؤوف اتصلت بيا
صفاء رفعت حاجبها:شن تبي ، قصدي ان شاءالله خير
هيام:قالت بتجي الاحد الجاي يبو يحددو وقت للعرس
بتسمت صفاء:بالحقااا
هيام ضحكت:اي ان شاءالله خير ويتمم عليكم بالخير
صفاء:ان شاءالله
هيام:ضمي الكوجينه زين وغسلي اماعين لغدي فكينا من حناك قالت بتجي بعدين
عيطت صفااء:واااااك عليا قوليلهم نبو العرس سبوع الجاي حني ، فديت من حناي فديت
طلعت هيام وهيا تضحك وخلت صفاء اضم وتنكرز .
__
.
.
ميسم قعمزة جنب رقية وقالت:وجعتني ياربي قالتها والدمعة في عينها
رقية:الله يسامحها تبي تخرب بيتها
ميسم:ماما عندها حق ره مهما يكون محمد يعزها ومحترمها لكن مش ح يعدل بينهن ح تكون غالية ليها الافضلية
رقية سكتت:ربي يستر لما بيسمع محمد
وهيا قالتها وسمعو صوت الباب يدق وصوت دوشه
طلعت ميسم تجري وفتحت الباب وهيا تشبح لجدها ومحمد واقفين مع حمد وولاده وهداية وغالية واقفات مع لبنات ، مشت بسرعة وحضنت غالية لضحكت وحضنتها ..
تلفت محمد وشبح لغالية لتضحك والفرحة باينه من عيونها ، بتسم وهوا يطلع في تليفونه من جيبه ويرد علي عمه :الو عمي
عبدالرزاق:شني وصلتو
محمد:اي وصلنا
عبدالرزاق:باهي نا نرجا فيك تعالا
محمد ضيق عيونه وقال بعدم فهم:تمام شوي وجاي
.
.
.
فات الوقت وجي الليل والعيلة ملمومه وهديكا رقية مش سايعتها فرحتها ، واول ماشافت غالية لجت حضنتها وعيت وهيا تبكي علي احمد في حضنها وتشكيلها وبعدها تغير جوها لما لبنات قعدو يهدرزو عليها .
.
.
فتحت ميسم باب الحوش ودفت الباب وبعدت :هي خشي
خشت غالية وهيا تشبح للحوش وقلبها يدق.
ميسم:خودي المفتاح نا بنعدي
غالية تلفتتلها وقالت بسرعة:وين بتمشي
ميسم:اش وين بنمشي بنعدي انتي خشي حوشك محمد شوي ويجي تخافيش
غالية قالت بتنقنيق:ضمنتيني هلبا تعرفي
ضحكت ميسم:ههههه اصلا بالعاني قلتها لكي هههه خشي خشي
نزلت ميسم تجري وخلت غالية تاخد في نفس وطلع فيه ، سكرت الباب وخشت للحوش ، حطت لمفاتيح علي الطاولة وهيا تشبح للحوش تلفتت لصالة اللي مقابلة المظبخ المفتوح خشتلها وهيا تقرب علي قزاز ليفتح علي البلكونه ووقفت قدامه وبتسمت ، رفعت يدها وهيا تشبح لتليفونها لشرين ، ولما شافت صفاء ردت:الو
صفاء:شتاحشتك
غالية:مسرع اني قعده ماستاحشتكش
صفاء:والله ماتتحشمي هي وقسم بالله اني وحده فاضيه متصله بيك بري اقلبي وجهك
ضحك غالية وعيطت وهيا تنقز في مكانها:لالالالا هههههه حمارة نبصر وربي
صفاء:خلاص اقلبي وجهك كنت نبي نظمن عليك وشكله جوك سمح هههه
غالية:اي سمح بكل علي قولتهم ههه
صفاء سمعت صياح حناها:اوووف واني مش سمح من هالعزوز الخاربة
غالية:حناكم عندكم قصدك واااه الحمدالله مشيت قبل مانشوفها هههه
حناها:ياااافرخة وينك
صفاء صيحت:جااااية جااااية الربي في العدي
وردت علي غالية لتضحك:جاب ربي مشيتي قبل ماتشوفيها كان هدا ره خرب يومك بشوفتها هي باي باي قبل ماتجيني ب عكزتها
غالية:باي سلميلي علي الكل عادا حناك هههه
سكرت الخط وهيا تضحك ، وكانت بتتلفت بس نخلعت لما حست بيدين لتفو علي خصرها لفتت راسها طول وأول ماشافاته تنهدت بضحكه:انت
باسها محمد من رقبتها وهوا حاضنها من التالي:خلعتك
حطت يداها فوق يديه وهيا حاسه بتوتر حد الموت ، لفتها محمد ليه وقامها لمستوي طوله وقرب باسها علي خشمها بخفة ،وبعد شوي وقعد قريب هلباااااا منها وقال:ربي يباركلي فيكي
بتسمت غالية وقربت هدي المرة هيا لين خلت محمد يبتسم ورجع باسها علي خدها .
وماقطعش لحظتهم الا اطقطيق الباب ، بعد محمد وضيق عيونه:تو كلهن بيدكرو مواضيعهم
ضحكت غالية وحطت يداها علي صدرة ودفاته:نزلني عيب نخلوهم يراجو
نزلها محمد وبعد وهوا يهز في راسه:هيوالله عيب ههههه عدي افتحي
مشت غالية تجري ومحمد خش لدار وهوا يحول في تيشرته للوحة علي السرير وخش للحمام فتح الدوش وتلفت للمراية لقرب منها وقعد واقف قدامها وهوا يدكر .
""""طبست عائشة راسها وقالت:ربي يسعدك ياولد عمي لكن نا خلاص ماعاش نبي نظلمك معايا اكتر
وكيف محمد بزيد يتكلم شبحتله عائشة:لو سمحت محمد ماتصعبهاش ويشهد ربي مافي قلبي عليك حاجه بس خلاص طلقني
مسح محمد علي وجهه بديه الزوز وشبح لوطه وقال:سامحيني كان قصرة في حقك
هزت عائشة راسها:حطيتني فوق راسك بارك الله فيك انت لسامحني
قرب محمد منها وشد راسها وباسها من جبهتها وبعد خطوتين وقال:انتي طالق"""
.
.
خشت غالية لدار وهيا ادور بعيونها فيه واول ماشافت تيشرته علي السرير ، تلفتت وكانت تبي تطلع بس في نفس اللحظه فتح محمد باب الحمام وشبحها:غلاي
وقفت غالية ورجعت تلفتتله بس لما شبحاته مش لابس تيشرته ، رجعت تلفتت وحطت يداها علي عيونها وقالت:انت ألبس اني بنمشي للمظبخ
رد محمد بسرعة:لااا خليكي
وقرب منها بضحكه وهيا قعده عاطياته بظهرها ومغطيه وجها بداها ومتحشمه هلباااا ، لفتها محمد ليه وحول يداها من علي وجها بس غالية مابتش تفتح عيونها وقالت وهيا حست بجسمه المبلول قريب منها هلبااا:حول
محمد:بحتي فيا
هزت غالية راسها لين خلت محمد يضحك وهوا يزيد يقرب ، وقامها في حضنه لين غالية شهقت وفتحت عيونها وعيطت:شدير انت
باسها محمد علي خشمها:نلعب مع بنتي
زمطت غالية ريقها لما محمد حطها علي السرير وقعد فوقها وهوا يقرب من شعرها لحول منه التوكه وقعد يشم فيه ، وهوا حاس بخوفها وتوثرها لخلوه يبعد ويرقد جنبها ويلف في يديه علي خصرها وقربها منها وهوا يخلي في وجها قبال وجهه وقال ببتسامه:كنك متحشمه
هزت غالية راسها:لا عادي
محمد باسها من خدها:باهي عليش خدودك حمر
قعدت غالية تشبح لعيونه الناعسه وبرموشه الكتيفه تقول مسكرهم قلبت غالية شفايفها :ماهو هوا نعرفش
ضحك محمد وزاد حضنها وغالية من غير قصد حطت يدها علي جرحه وضغظت عليه لين محمد بعد من عليها وهوا يتأوه ويشد فيه .
وقفت غالية علي ركابها وهيا تشبحله وقالت:اسفه اسفه
ساوا محمد روحة وقعمز وهوا يجبد فيها لين قعمزها في حضنه ، وشد يدها وحطها علي الجرح لين غالية عيونها تعبو دموع وهيا تشبحله:يوجع فيك وله
محمد:يانعلي من البكايا عادي مايوجعش واجد
رفعت غالية يدها ومست كتفه اللي نصاب لما طلعها من المستشفى ، وكان اتر الرصاصة قعد موجود ، قعدت تمس في جروحه بداها ومحمد يشبحلها ويرجع في شعرها ورا ظهرها ، قرب من ودنها وباسها بخفه وقال:نحبك ياغلاي
شبحتله غالية وبتسمت وهيا تمسح في دموعها:حتي اني هلبااااا
تكه محمد جبته علي جبهتها وقال:ماعاش نبي نحق الدموع في عيونك نبي الضحكه ديما مرافقاتك ياغلاي
قربت غالية اكتر منه وحضناته ........
.
.
__
.
.
بعد مرور تمانية شهور 💛
وقفت غالية قدام دار لعرايس وهيا لابسه الفيلو لطالع عليها يهبل مع شعرها الاسود لخلاته علي ظهرها العاري مع لفات بسيطه مع طرحة طويلة كانت كيوت وناعمه وجميلة .
تلفتت لميسم لقربت وفتحت الدار لمظلمه وشبحت لغالية:خشي
ضيقت غالية عيونها:خيرها ظلام ازح متاكده انها دار لعرايس
ضحكت ميسم:تي خشي بلا دلع عرايس
زادت غالية ضيقت عيونها وقامت الفيلو بداها واول ماخشت انفتح الضي وبانلها محمد لواقف في نهاية الدار وهوا لابس البدلة الرسمية وقدامه تورطه وعليها شمع لكان يولع فيه .
ضحكت غالية وزدت خشت وخلت ميسم تسكر في الباب وتخليها في صدمتها .
رفع محمد راسه واول ماشبحها ضحك وهوا يمسح علي لحيته لمساويها وتلفت وهوا يحاول يستوعب جمالها ورجع تلفتلها وهوا يقرب منها ويشبحلها كيف حاطه يداها علي خدودها وتضحك ودموع الفرحة في عيونها:ياربي
قرب محمد اكتر وهوا يشبحلها بعشق ، وشد يداها وقرب باسها علي جبتها وبعد وقال:كل سنه وانتي جنبي عقبل مليون شمعة
غالية:ياربي مش مصدقه كيف عرفت انه اليوم عيد ميلادي
محمد:نا لنعرف
تنهدت غالية ودموعها نزلو:واللهي نحبك
رفع محمد يديه ومسح دمعاتها:اششش نا مداير لكي عرس وعيد ميلاد بيش تفرحي مش تبكي
ضحكت غالية وبعدت عليه وهيا ترفع في يداها وتوري فيه في الفيلو:حلوه
ضحك محمد :تي السماحه كلها انتي تعالي
قالها ومد يده ليها ، شدة غالية يده وقربو علي التورطه ، رفعها محمد بين يديه وقربها من غالية لطفت الشمعات وهيا تضحك .
حط محمد التورطه وقرب من غالية:يانعليا من سمحتي لكبرت
ضحكت غالية وكيف بترفع يداها لصدره بس محمد شدهم وحطهم ورا ظهرها وقرب باسها بخفه وبسرعة علي خدها وقال:ماتحاوليش تقربي يديك مني
غالية:ههههه والله مافيها صنه
محمد:تي من خشيت الصالة وصلتني بنتها
غالية:سيبنا من الحنه توا نبي نقولك حاجه
محمد قرب منها بهيام وهوا يستنشق في ريحتها وريحت شعرها :قولي
قعدت غالية ساكته وتحاول تخليه ينتبه:محمد ركز معاي
محمد ضحك ونزل باس كتفها:وربي ماعمري ركزت معاكي اكتر من توا ،  قولي هي
غالية:هوا اني فيا حاجه
هز محمد راسه:شني فيكي
غالية رجعت وقالت بأصرار:فييا حاجه
محمد:هههه باهي شني هيا
غالية ضحكت:هههه انه اني فيا بيبي
ركز محمد وبعد شوي وهوا يضيق في عيونه:شني
غالية:فيا بيبي يعني بتولي بابا
هزت غالية راسها ورجعت قالت:لا مش بابا اني قصدي بابا لبيبنا حني الزوز
مسح محمد بيديه الزوز علي لحيته وهوا يتحرك في مكانه ويشبحلها.
وبعدها قرب منها وشد وجها بين يديه:قصدك انتي حامل
هزت غالية راسها بمعني اي وشدت يديه اللي علي وجها :وانت تعرف حتي كلمة حامل
ضحك محمد اللي رجع بعد وحط يديه علي وجهه ونزل سجد وهوا يحمد في ربي لين غالية قعدت تضحك ودموعها نزلو وهيا تشبح فيه كيف رجع وقف وقرب منها هلبا وقال:انتي نعمة وربي
غالية:فرحت
شدلها محمد وجها وباس جبهتها وبعد وهوا يتكي في جبهته علي جبهتها ، وقال:وسكتي
رفعت غالية يدها وهيا تمس في عيونه لمدمعة وقالت ودموعها ينزلو علي خدودها:تبكي
محمد:غلاي
غالية:عيونها
محمد:وربي ماحلمت بالضنوة الا معاكي
ضحكت غالية:حبيبي انت حمار في التعبير زيد وضح فهمتش راهو ره
خبط محمد راسه في راسها بشوية:لنقنك فاهمتيني مغير تبي اتعبيني بجلاطة السانك
غالية:هههه لااا هههه واااه اليوم حلو هلبا عرسي وعيد ميلادي ووجودك جنبي واللهي نحبك هلبااا
لف محمد يديه علي خصرها وباسها من كتفها وحضنها:قلبي انتي ياغلاي ربي مايحرمني منكي
حضنها وهوا حاس وكأنه ملك العالم بين يدية ، معاها بس رجع طفل مراهق يتعلم في كلمات العشق باش يقولهملها ويقدر يعبر علي الجزاء البسيط من حبه ليها ، معاها عرف معني الابوة ، معني انه يملك مراة يكون هوا الراجل الوحيد والاول في حياتها ، واهم شي معني الحب ، لحاس فيه اتجاها مايقدرش يعبر عليه هيا حبيبته ومرته وبنته واخيرا ام صغاااارة ❤
.
.
حلو لما تذكر ماضي ملئ بالمعناة وسنين وعذاب وقهر وبكي وكسر خاطر ، في حاضر تتمني مافيشي مستقبل من كتر ماهو حلو ولقيت فيه اللي ضاع منك في هالماضي ...
.
.
لكن في نفس الوقت مصعب شعور لما ترجع بعد سنين لمكانك وارضك مشتاق لحضن امك وشوفت خوتك ، ولراحت حوشك ، بس فجاة تلقي لا ام لا خوت وتلقي حوش محروق خالي 💔
شد راسه بيديه بصدمه وبعدم فهم وهوا يشبح للحوش المحروق:ياااربي
مفتاح:مجدي
تلفت مجدي لمفتاح اللي قعد يشبحله بصدمة انه هوا نفسه مجدي بشحمه ولحمة لغاب غااب وفي اللحظة الاخيرة طلع ..............................
.
.
.
#قَفلة_الرواية
#عشق_في_بلاد_حروبها_لا_تنتهي (الفثنة و التأر)
كتابة ، (الياقوت)
____________________________________
بداء كتابة الرواية في 2019 / أبـــ4ٰـــريل / 7
تم وضع قَفلة لـ الرواية في 2019 / سبتــ9ٰـــمبر / 25