عشق في بلاد حروبها لا تنتهي ( الفتنه و الثأر)

البارت 37

_
_
#عشق_في_بلاد_حروبها_لا_تنتهي
#تكملت_الجزاء_الاول الحلقة(37)
.
في الحلقة السابقة
بتسمت غالية:محمد
محمد غمط عيونه:هااا يانبضه
نفخت وهيا تقلب في شفايفها وقالت بصوت وااااطي:نقدرش نسامحكش اني ماهو نحبك
ماردش عليها محمد لين غالية ستغربت ورجعت قالت:الووو وينك
محمد بتسم:تحبيني واجد ولا شوية
تحشمت غالية وقالت:ماخصكش
محمد:هههه امانا من خصه ياطشتي
غالية:اوووف اسكت تحشمت
زادت ضحكت محمد:وربي كلك علي بعضك في قلبي من جوا ياغلاي
بتسمت غالية وهيا تحضن في روحها وتسمع في ضحكاته الهادية الرجولية علي حشمها منه...

قراءة ممتعة
#البارت_السابع_والتلاتون

عاشقا لبلادي ، ومتيما بإبنتها 💛🌙
.
(الياقوت)
.
.
تاني يوم الصبح....
كانت غالية في المظبخ توتي في الفطور مع ميسم وإلين تلعب جنبهم .
وريحت القهوي واصله لا برا والسفنز لجابة عبدالسلام والكيكة لتفحفح وصوت ضحكة إلين مع الجو لبدي يصقع كان جو حنون هلبااا ، وهتمام رقية ب غالية وقرب هداية وميسم منها خلاها تحس ب فرح بدي يغمر فيها  .
طفت غالية علي البكرج القهوي وهيا تشبح من الروشن وقالت بضحكه:لمطر تبشبش
شهقت ميسم:حي لمفارش علي الحبل نسيتهن
غالية نطت:تو نجيبهم كملي لي في يديك
تلفتت وطلعت تجري وميسم عيطت عليها:ياغالية حطي حاجة فوقك برد عليكي
طلعت غالية وماعدلتش عليها ، فتحت الباب وطلعت تجري من غير ماتلاحظ علي محمد لخشت فيه بالقوة لين عيطت:ااااه
بعدت غالية وهيا تمسح علي جبهتها وسمعت صوته لضحك برجولة وقال:كنه سمحي مستعجل
حولت غالية يدها من علي جبتها وشبحتله طول وبتسمت من غير راده منها وقالت:صباح الخير
قرب محمد وباسها علي جبهتها لين غالية تفاجئة وهيا ترفع في راسها ليه وتشبحله كيف وخر وقال:صباح غلاي السمح
بعدت غالية اول ماسمعت صوت ميسم لجت وهيا تصيح علي إلين:عدي لامك
تخطى محمد غالية لطلعت وهيا متلفتتله وتشبح فيه نزل وقام إلين في حضنه وقال:قديش مرة قلت لكي ماعاش تكشخي عليها
نفخت ميسم:تي اطير فيا
خشت هداية وهيا جايبة رقية لاول ماشافت محمد بتسمت:كيف حالك ياوليدي
باس محمد إلين لتضحك وهيا تبعد في يديه ليدغدغو فيها ، وحطها لوطه وقرب باس جبهت امه ويدها:الحمدالله كيف حالك انتي
رقية:الحمدالله
بعد محمد وهوا يقرب يشبح للفطور ويتسهوك علي ميسم:كنك مطرمتيهن عدي تو نا نكمل
ميسم شبحتله وعوجت فمها:بيش تبي امك تتبرا مني
ضحك محمد وتلفت لروشن لقرب منه وقعد يشبح لغالية ونسي هداية وامه وميسم ليهدرزو وسرح في اللي تلعب و فرحانة بالمطر اللي تبشبش والجو لمسحب ولبدي يصقع ويعلن اقتراب الشتاء 💛
بتسم محمد وحول الستار شوي وقعد يشبحلها كيف فاتحه يداها ورافعه راسها فوق وهيا تغمط في عيونها وتضحك بصوت العالي ، وكأنها بيبي واول مرة يستكشف في حبات المطر الناعمة.
هداية:وين جدي يامحمد
ركز محمد وطلق الستار وتلفتلها:هااا
هداية:وين جدي بنحطو لفطور
محمد:في المربوعة هاتو خلي نشيلة
رقية شبحت لميسم:ديري لخوك قهوي
علي خشت غالية اللي حطت المفارش علي الطاولة .
شبحلها محمد وقال:لالا خلي غلانا اديرها ليا نجربو القهوة الطرابلسية
تحشمت غالية ووجها ولا احمر وماقدرتش تشبحله وهيا تشبح لرقية لشدت يدها وقالت ببتسامة:هههه لالا بنيتي مش شورها القهوة برا لختيك
محمد رفع حاجبة وقال بضحكه:هيوالله لقيتي غلانا  ونحنا في الكرعين رحنا
شبحت ميسم ببتسامه لهداية لقالت:اشية علي غلانا
شبحلها محمد وغمز:غلانا امانا شني
بتسمت غالية وهيا تمسح علي خدودها وحست بالجو سخوون من خجلها من كلام محمد قدام خواته وامه اللي شبحت لغالية وقالت:هههه لنقنه ناويك اليوم هضا عدي ديريله القهوي سلم بنتي وعدي انت لجدك
بتسم محمد وماباش يشبح لغالية وهوا يقرب ورفع صفرة الفطور وطلع .
قربت ميسم من هداية لقامت إلين في غمرها ووشوشت:حقيتي خوك كيف يدوي مع البنت
تلفتتلها هداية وضحكت:كنك انتي وكان دوي معاها
رفعت ميسم حاجبها:تستعبطي انتي من امتي خوك ياخد ويعطي مع لبنات ولا وفوقها يدلع فيها هههه يانعلي لنقنه الحيط عشق هههههه
سكتت هداية وتلفتت قعدت تشبح لغالية اللي ادير في القهوي وتهدرز علي رقية وتضحك وخدودها قعدات حمر.
__
.
.
سكرت صفاء المدكرة ونفخت:خلاااااص عيت وحقربي
شرين تليفون ايلاف لضحكت:هدا الدكتور بأذن الله ح يطلع الروح منا من البحوت والكوزات
هزت صفاء راسها بمعني اي وتنهدت وايلاف طلعت تليفونها وردت علي بوها:هي بابا اني طالعة
سكرة وشبحت لصفاء وهيا توقف وضم في كتباتها:بابا برا تو بعدين نجيك اوك
صفاء:تمام نراجي فيك
مشت ايلاف تجري وخلت صفاء اضم في كتباتها وحطتهم في شنطتها وطلعت تليفونها وهيا خاطرها تتصل بي رؤوف بس في نفس الوقت متحشمه ، وخايفه تتصل وتلقاه مشغول.
وبعد تفكير مطول خدت نفس وتشجعت وحطت علي رقمه وتصلت ، بس خافت وحست بتردد وكانت بتسكر بس شد الخط ونادا عيطت صفاء بضحكه وسكرت طول وهيا تضحك وحاطه يدها علي فمها ، قعدت تشبحله شوي وبعدها تحشمت انه تعتبر دارتله تشرينه وسكرت ، قوة روحها وكيف بتعاود تتصل بس رؤوف سبقها وتصل ، خبطت صفاء علي خدها وقالت:حشمممم حالك ياصفاء حشم حالك وخلاص
فتحت الخط وردت:مش قصدي ره نشرين غلطت بس فيك سامحني
رفع رؤوف حواجبه وأشر لصاحبة لواقف قدام المكتب ويهدرز هوا والموظفين بمعني سكر عليا الباب وقال:اها عرفتك اصلا غالطه مش متعلم بتصالاتك
صفاء:اممم شن جوك
رؤوف:الحمدالله
صفاء بعدت التليفون ودفلت عليه وهيا حاسته يدوي من راس خشمه ورجعت التليفون وهيا تتحمحم وقالت:شكلك مشغول مانعطلكش
رؤوف:لا اني لمانعطلكش اكيد عطلتك علي اللي بتتصلي بيه
صفاء:لا عادي اني ماعندي بمن نتصل اصلا
رفع رؤوف حاجبه:مش قلتي بتتصلي بحد وغلطي فيا
نفخت صفاء وستفزتها طريقة كلامه:اووووف منك اني متصله بيك لا بحد تاني لا بتالت غير تحشمت لانه درت تشرينه وزي العبيطه سكرت من الخوف
ضحك رؤوف وتكه علي كرسيه بظهره:خايفه مني ههه شني بناكلك اني
صفاء زادت تحشمت وهيا تضحك:ههههه لا بس هكي تحشمت
رؤوف:ههه ياحليلي علي المتحشمين مني هههه وصار بتكلميني شني ستاحشتيني
حطت صفاء يدها علي وجها بحشمه:رؤوف خلااااص ماتندمنيش انه اتصلت بيك
رروف زادت ضحكته:هههه لالالا خلاص سكتت هااا غير قوليلي باه ستاحشتيني
صفاء:هههه شوي
رؤوف:هههه وقسم بالله اني هلباااااااااا مش عارف لما بنتزوجك كيف بنسيبك وبنجي لصحراء هههههه
صفاء:هههه ياربي خلاااص يارؤوف
رؤوف:هههه تمام تمام ياعيون رؤوف انتي
بتسمت صفاء وقعدت تهدرز عليه مابين جاها بوها ، حست بحبه وحنانه عليها وكيف متقبلها ومتمسك فيها ، لو كان حد غيره بعد التطنيش لدارتهوله ره سيبها وفضل كرامته عليها ، بس رؤوف صبر عليها حسسها انه يبيها حلاله ورايدها بكل حلاتها 💛
__
.
.
غالية:خليك اني توا نخششه
هداية بتسمت:هههه والله مرتحتيني منه نجك لي وخلاص
بتسمت غالية وقامت محمد الصغير ومشت لدار ميسم .
وبعدها وقفت عائشة وقامت صفرة القهوي ، ومشت للمظبخ وعيون ميسم عليها لين خشت للمظبخ ورجعت تلفتت طول وقالت:حي ياحي كان عيشة تسمع غزل محمد في غالية امبدري لما تقلبها علي روسنا نحنا
هداية فنصت فيها:كنك انتي حولتي بصارته لغزل
ميسم:تي واضح من عيونه لنقنك نيا بنة الحب واضحه ياخيتي
نفخت هداية وشبحت لامها:هدي بنتك كله تفهم فيه بالمقلوب
رقية:عندها الحق
ضحكت ميسم وشبحت لهداية وقامت حواجبها:حقي يامعمية حتي من ماما فطنت
هداية شبحت لامها:كنك يمه حتي انتي كلنا نعرفو محمد يحب يبصر عادي والبنت صغيره واجد عليه
هزت ميسم راسها:صح ياماما بينهم قريب 15 العام
رقية:وكان صغيرة شني مايستاهلها ، نا وليدي ونعرفه كويس رايد لبنية ، وهوا علي سرير الموت ووصاني عليها
فتحت ميسم عيونها علي وسعهم وقربت من امها:الله شني قالك
رقية ضيقت عيونها وضربتها علي راسها بشوية:افطني لروحك وسكري فمك قدام بنت سيدك
تنهدت ميسم:تي باهي يمه حسستيني بنعدي بنقولها ليها
هداية:باهي وكان طلع كلامكن مزبوط شني بنقولو لعيشة
رقية:كنها عيشة ماعندها ماتقول بنيتي ومكانها هنا معززة مكرمه ، لكن محمد من حقه ياخد بنت لبنوت واللي يبيها ولختارها
ميسم:صح تسامحني فيها لكن كيف مامحمد جبر بخاطرها وتزوجها وستر عليها يحقله يتزوج البنت لي يبيها مهما يكون تقعد ارملة خوه
ضربتها هداية:يعطك حبه في جلاطة السان اسكتي انتي
وتنهدت وهيا تتكه علي الحيط جنب امها وتفكر .
بينما هما كانو يهدرزو كانت عائشة تسمع في تهدريزهم كله وهيا واقفه قدام باب المظبخ ، رجعت التالي وتكت علي الحيط ودموعها علي خدودها ، مسحت دموعها وطلعتلهم وكأنه ماسمعت شي .
.
.
__
مذنب ، وذنبي إني عشقت وأنا عسكري ، والعسكر لا يعشق سوى وطنه ♡
(الياقوت)
.
.
حط محمد طاسة القهوي وشبح لجده:عليش مش من حقي
قعمز عبدالسلام زين وقال:لا حقك ونا قلت لامك تشاورك بناخدلك وحده من صبايا خالك حمد وكان تبي اخرى توا نكلمه نا تو
مسح محمد علي وجهه وقال:لالا ماتكلماش نا
وسكت محمد شوي وحسها رزينه علي السانه بس تحمحم وقال:نا نبي نستر علي لبنية الغرباوية
رفع عبدالسلام حواجبة:الغرباوية ؟! لكن صغيرة واجد
محمد ماعرفش شن يرد لانه عارف كويس انها صغيرة.
عبدالسلام تنهد:يصير خير لبنية ماعندها حد مانبوش نستغلو وحدتها وصغر سنها عشان هكي خلي امك تشاورها قبل
ماعاش رد محمد بكل ولا نطق ب حرف قعد ساكت ، ومتحشم في نفس الوقت ، شرين تليفونه لطلعة من جيبه واول ماشاف رقمها تحمحم ووقف طلع برا ورد ببتسامه:سمحة قهوتك
ضحكت غالية:صحة صحة
محمد:هههه علي قلبك ياقلبي
غالية:امبكري حشمتني عاش تدوي معاي هكي قدام ماما رقية وخواتك نتحشم
حط محمد يده في جيبه وهوا يتكمش بسبب الريح لمصقعة ورد بضحكه:اخطيني من حشمتك يانعليا من ماما رقية هههه هدي ماما نا راهو ره نغار نا
غالية ضيقت عيونها:وحتي ماما اني هيا قتلي ناديني هكي وخصنيش فيك غار اطربق حاجه تخصك هدي وبنقول ماما رقية برا ملح
طلع محمد لسنه ونتشه وهوا يضحك علي كلامها وتصروفاتها الطفولية:هههه يانعن فيتك ادوي زين ياقرده
قلبت غالية شفايفها:باهي بنقولها ماما
محمد:ههههه نغااار
غالية:كيف تغااار العفو حسستني انها حبيبتك
محمد:وهيا حبيبتي وقلبي ودنيتي كلها نا امي هيا حبي الاول ياغلاي
تنهدت غالية ودكرة امها وقالت بعبرة باينه من صوتها:ربي يخليهالك
حس محمد بيها وقال طول:نبصر عليكي ياطشه امي هيا امك ونا باتك يابنتي
بتسمت غالية ورفعت كتافها وهيا تسمح في دمعه خانتها ونزلت:محمد
محمد:يانبضه
غالية سكتت شوي وقالت:شن صار في احمد خوي
محمد:مش عارف ماعنديش عليه معلومات
غالية:كدااب
محمد تغيرت لهجته طول وقال بجدية:اعرفي شني تدوي عليش بنكدب كان نعرف راهو قلت لكي لنعرفه
غالية خافت من لهجة كلامه وقالت بسرعة:قصديش بس انت ديما ادس عليا وتبينيش نزعل
محمد تنهد:غلاي نا خوك وبوك توا بس
غالية:معناها احمد فيه حاجه وانت تكدب
محمد:غاااالية
غالية نزلو دموعها وقالت:خوي فيه حاجه صح
محمد:كنك بتقلبيها نكد
غالية:لانه عارفاته شن فيه تي احمد ابصر شن فيه حتي اتصلت بيه وتكلمت معاه ماعودليش ولا عبرني بكل تقول مش اخته
صيح محمد:انعن فيتك ياغالية يانعن شكلك نا شني خرطت اه نا شني هوا لخرفته لكي مش قتلك ماتتصلي بحد ولا نا كلب ننبح تحقي فيا قدامك كلب ننبح
نصمتت غالية من صياح محمد لطلع من اتره جده وسالم لي جي يجري من قدام الباب :كنك
خدي محمد نفس وشبح لجده وسالم وهز راسه وهوا ينزل في التليفون وسكر في وجها الخط وقال:شي شي
خلاهم مستغربين وخش للمربوعة خدي مفاتيح سيارته وطلع لشارع وين مامدرسها وركب وهوا يضرب في الدومان بيده ويشبح لتليفون لشرين برقمها رجع وسكر الخط في وجها وحدفه جنبه وهوا يتكه بظهرة علي الكرسي السيارة ودكر لما فاق في المستشفي قعد يسأل علي احمد وبعت شباب يدوروه من بين الشباب لشدوهم بس ماحد لقاه ولا عرفو وين هوا .
نفخ ورجع ضرب الدومان بيده لين توجع من جرحه لشده بيده وبيده التانية خدي التليفون من الكرسي وفتح الخط وكان يبي يزيد يكشخ عليها بس اول ماسمعها شارقه من لبكي وتتكلم:م..محمد اني اسفه والله ماقصدي بس هدا خوي مانقدرش مانتصلش
محمد:نا كلب ننبح مه ومايعدلوش عليه
غالية نفخت بتنقنيق:محمد
محمد عيط:هااااا هااااا
غالية:قتلك اسفه اني
محمد:تأسفي ومرة اخرى عاوديها باهي
غالية:تزيدنيش باللهي عليك ياسر مجروحة منه
محمد سكت وماردش ، رجعت غالية تكلمت وكملت وفي صوتها عبرة بكي:اني والله اتصلت نبي نعرف علاش دار فيك هكي كنت مش بوعيي ومش هامني غير نعرف علاش دار فيك هكي ، وفوقها سمعت من بنت جيرانا انه بيبيع حوشنا نقهرت منه كنت نبي نعاتبه بس لقيته مش هامه لا اني لا حوشنا ولا شي وماعبرنيش ولا عاود حتي بعد ماسمعني نبكي
اضايق محمد من نبرة صوتها وقال:هوا مايقدرش يعود لكي عشان رقمك خاص
ضيقت غالية عيونها:كيف خاص
محمد:مايطلعلاش رقمك يطلعله الرقم خاص او رقم مجهول حاجه كيف هكي
مسحت غالية دموعها وقالت:هدا علاش ماقدرش يعاودلي معناها
محمد غمظ عيونه بتنهيده ورجع فتحهم وقال:غالية نا لما نقول لكي حاجه ماعاش اديري عكسها نقول لكي غرب يعني غرب مش شرق
نفخت غالية وهيا تمسح في وجها من دموعها:اسفه
محمد:تمام توا ...
وقبل مايكمل قطعت غالية وقالت:تزعلش مني مش اني بنتك
بتسم محمد وهوا يتنهد بصوت العالي ويمسح علي شعرة:اااااه ياغلاي ااااه انتي شني مدايرة فيا
غالية ضحكت من بين عبرتها لقعده تاخد فيها وتجيب:ههههه نقولك حاجه وبعدين تنساها
ضحك محمد:هههه قولي
غالية:وحقربي انت احلي حاجه صارتلي في حياتي
محمد:لالالا مانبيهاش هدي قوليلي نحبك تره
قعدت غالية تضحك وتحشمت هلباااا وهيا تتكلم:نحبك هلبااااااا
محمد: احية وخلاص ياقلبي نا كيف بنزعل منك فهميني كيف هههه هش غادي توا بعدين نكلمك تمام
غالية:تمام باي
بتسم محمد وسكر منها وهوا يضحك ، حط علي رقم زياد وتصل وهوا يتحمحم :الو يافندي
محمد:عدو لمقر الصقر لقديم وفتشولي علي أحمد
زياد رفع حواجبه وشبح لسفيان لمقعمز لوطه وحاط يديه علي وجهه ، تلفت زياد وتحمحم وقال:هوا يافندي حني لقيناه وو
ضيق محمد عيونه وكانه زبط: و شني
زياد:لقيناه ميت
خدي محمد نفس كبييييير وكانه حد طعنه في جرحة لضغظ عليه بيده قاصد انه يوجعه وهوا يرجع في راسه التالي ويسمع في زياد لكمل:ميت في الحمام حشاك متعاطي جرعة زايده ، وللاسف لقيناه متعفن شكله ميت من ايام وماحد يندري عليه لانه المقر فاضي
محمد:لا حولي ولا قوة الا بالله ، لا حولي ولا قوة الا بالله
زياد تلفت لسفيان وقال:سفيان هوا لخش شافه وهوا في حالة يافندي الله لا تروعك موته ماتودها لعدو ، لدرجه سفيان دموعة نزلو ومش قادر يدوي لا حد توا من الصدمة
محمد فتح باب السيارة باش لهواء يخشلة زين:شيلوه للمستشفي يغسلنه ونا بكرا جايكم
زياد:لا يافندي بندفنوه اليوم حق الميت دفنه ياسر الايام لقعد فيهم
محمد تلخبطت عليه وقال بتعصيب:كلمة هيا ارجو لبكرا
زياد:تمام يافندي زي ماتبي
سكر محمد علي زياد لمستغرب من ردة فعله وقرب من سفيان:تي نوض كلنا ليها ياراجل هوا جاه دورة وحني قعدين نراجو
سفيان:صاعبة ياراجل صاعبة موته ماشفتش كيف ملوح في عفن الحمام يوجع ماشفتاش غير مرتين لكن والله وجعني
زياد تنهد ودكر لما طلعة من المقر ورجعه لحوشه كان انسان هادي مسالم لبعد حد واجعة بس مايبيش يدير زي سفيان مش علي خاطر ماشافاش زي ماشافه سفيان لا لانه عارف ليخش في مخشيشهم واللي يخدم في هدي الخدمه يتوقع موته في اسواء الحلات💔✋
قعمز زياد جنب سفيان لقال:الطقه امتي جاي
زياد:غدوة ، تعرف
وسكت شوي وضحك بهزوة:سبحان اللي يغير لحوال لكان يكرهه وعدبه عداب مش عادي وخلاه خريج حبوس وشرد عيلته وتوا حسيت من صوته تأتر لموته وقسم بالله لو رجيت شوي ره بكي
سفيان:علي خاطر ظلمه هلبااا من غير مايعرف الحق مع من ربي يرحمه وربي يصبر محمد
زياد وقف وخبط علي كتف سفيان لشبحله:هي نوض تلحلح بعدين بجيبو لمساجين ومعاهم مالك
مسح سفيان علي وجهه ووقف وهوا يراجي في اللحظه هدي من لما قاله محمد انه محبوس ، مش ح يعدبه ولا شي بس يبي ياخد منه حقه ويتعاقب علي العقوبه لربطها في رقبته بسبب ذنبه وجرمه هوا ....
__
.
.
.
#يتبع_للبارت_لبعده
____________________________________
بداء كتاب الرواية في 2019 / أبـــ4ٰـــريل / 7
تم وضع قَفلة لـ الرواية في 2019 / سبتــ9ٰـــمبر / 25