_
_
#عشق_في_بلاد_حروبها_لا_تنتهي
الحلقة 26
(الياقوت)
في الحلقة السابقة
ضحكت رقيه علي ميسم وقالت:تعالي ساعديني نلبس دبشي
نفخت ميسم:لا حول ولا قوة الا بالله
رقيه:خشي رتاحي في دار ميسم يابنتي تو نجيك
هزت غاليه راسها وهيا تشبح لميسم لجت رفعت امها وغمزتلها:تو نجيك
وقفت غاليه ومشت وقفت قدام باب دار ميسم واول ماشافتهم خشو للممر التاني وخشو لدار تسللت وطلعت برا بس اول ماشافت محمد ومعه ولد.....
.
قراءة ممتعة 💛
#البارت_السادس_عشر
.
قعدت واقفه قدام الباب وتنفخ وماركزتش علي محمد لشبحها .
طبطب محمد علي كتف سفيان وقال:تو نجيك ياطيري
بتسم سفيان:خود راحتك يابرو
ولا سفيان للمربوعة ومحمد مشي لغالية لواقفه قدام الباب وعاطية بظهرها وسارحة.
محمد:غلاي
تلفتت غالية طول وشبحتله.
محمد:كنك مصبيه هنا
ضيقت غالية عيونها وضمت شفايفها علي بعضهم:نبي نمشي معاك
بتسم محمد وحك بقفا يده علي جبهته:نا مانيش عارف عليش قعد مارقالي منك يابنت
غالية:باللهي عليك ارفعني معاك ولا تمشيش تو يقتلوك هدوكم
محمد غمزلها بضحكه:يانعلي من بنتي السمحة خايفه علي
نفخت غالية وقالت بنفاد صبر:اهو قتلك يانمشي معاك ياتقعد هني جنبي
رفع محمد حواجبه وقال:معدي وانتي بتقعدي هنا
قلبت غالية شفايفها وقالت ودموعها نزلو وبتنقنيق:باللهي عليك اني خايفه هلبااا وفوقها ماعنديش حتي تليفون نتصل بيك ونسألك
محمد مسح علي وجهه بيده:احيه ياغلاي بطلي بكي باهي
مسحت غالية دموعها طول بس العبرة قعده فيها ، لين خلت محمد يبتسم ويتنهد:مش تبي انرد لكي خوك وردك لحوشكن ونخليكن في حالكن كان ماعديتش كيف مندير هضا كله
سكتت غالية شوي وهيا تمسح علي خدودها وركزت علي محمد ليشبحلها بطريقه وثرتها وهوا متكي علي حاشية الباب ، وقالت:باه مرات تصيرلك حاجه ولا يشدوك
محمد:كنك تفوليلي
غالية:لا بعيد السوء عليك لكن اني خايفه كان جوني هني وانت مش جنبي ويخدوني ويهددوك بيا
محمد:ماحد يقدر يوصل لكي هنا كان هضا مانجيبكش من الاول ، وبعدين كان غلاي دعتلي في صلاتها تو ربي يحميني
وضيق عيونه هلبااا وبرموشه الطوال لغطو علي عيونه بانو كانهم مسكرهم وكمل:بتدعلي وله
نفخت غاليه وهزت راسها بمعني اي لين خلت محمد يضحك بخفه ، وكملت كلام :باهي مرات نبي نكلمك كيف هي بنكلمك
محمد:علي هدي محلوله
غالية:كيف
رفع محمد يده وقرصها من خدها بصوابعه وباسهم:خشي جوا خلاص
وكيف غالية جايه بتزيد تتناقش ضغط محمد علي كلمته:خلاص غلاي خشي
هزت غالية راسها وتلفتت خشت وخلاته يشبحلها كيف تمشي ومره مره تتلفتله تشبحله وكأنه تبي تعبي عيونها بيه وتعبي قلبها بالأمان لتحس فيه منه.
__
تاني يوم الصبح ...
في #طرابلس
فاق فارس علي صوت زيد اللي راقد جنبه ويتفرج علي التلفزيون ، تلفت فارس وأول ماشافه بتسم وهو يقرب من راسه ليه وباسه من خده:بطلي نايض
ضحك زيد ولف يديه حولين رقبت فارس: :بابا تاحستك ني
حضنه فارس وهوا يضغضغ ويبوس فيه وزيد يضحك بالقوة ويصيح لين جتهم نادين اللي تتأفأف:بدينا عاااد وانت بطل تو ينوشك علي رقبتك ولا علي يدك
شحها فارس من يدها وطيحها فوقه لين عيطت وهيا تحاول ماتمسش رقبته:يااافااارس رقبتك
قرب فارس راسه من رقبتها وباسها:خيرها رقبتي مافيها شي
نادين ضحكت وهيا تحس في زيد لبينهم يصيح:حول مزطنا الولد
بعد فارس شوي وخلا زيد لهرب من بينهم وهوا يعيط عليهم:يالبي يالبي منتم
ضحك فارس:هههه احرف زيك
ضيقت نادين عيونها وشداته من رقبته بالقوه لين فارس عيط:اااه تي رقبتي خيرك
نادين:مش ماتوجعش فيك
فارس:هههه باه تعالي شوي
بعدت نادين:لالا نوض هيااا بابا وخالي معاد قالو بيتغدو هني
رجع فارس اتكه علي لمخده:تعالي شويه بس مستاحشك
رفعت نادين حاجبها وبتسمت:مستاحشني
فارس هز براسه:هلباااااا
ضحكت نادين وقربت منه وهيا تبوس فيه من خده:ياروحي
ضحك فارس ولف يديه علي خصرها وردلها البوسه علي خدها :ياعمري والله مستاحشك لانممم تي اني ولا شي بلاك يانادين
حضناته نادين وهيا حاسه روحها بطير من الفرح وفي نفس الوقت مش فاهمه مش علي اساس ولا يكلم في نهي ويحبها علاش قعد متعلق فيها علاش مصر علي انها ماتسيباش ؟
__
مسح احمد علي رقبته وهوا حاس روحه غريب في مكان كله سلاح وشباب غريبين الاطوار لي فيه مقعمز في جيها وسبسي ورا سبسي ولي فيه مقعمز ويهدرز عادي ، تنهد ومسح علي جبهته ، واول ماحس بيد علي كتفه رفع راسه وتلفت وهوا يشبح في شاب لحول يده وبعد وهوا يبتسم ويمدله في شيشة لمية:خود خود ياراجل شكلك محروق من النو
خدي احمد شيشة لمية من الشاب وبتسم:اي نو الجو هلبا
الشاب:اي الصيف خش عاد والله شكلنا بننحرقو
وسكت شوي وكمل:شكلك جديد في الخدمه
هز احمد راسه:اي جديد
الشاب:تعالي تعالي نخشو في المكيف ونكسبو معرفة جديده
خش احمد ورا الشاب لقعمز علي الكراسي لداخل المقر وقعمز جنبه وقال:انتم ديما هني
الشاب:فيه شباب حتي مستقرين هني ههه يعني يرقدو وينوضو هني والجو تمام بس اني توكات نجي يوم بيوم
احمد:واني شكلي بنولي زيهم
الشاب:الاسم الكريم
احمد:اسمي احمد
الشاب:تعيش وتسمي واني حسام
__
في #بنغازي
ركب محمد السيارة ومد كيسة لسفيان لستغرب وهوا يشد فيها:شن هدا
محمد طلع باكو التليفون من الكيسه لعنده وتلفت حطها في الكرسي التلاني وفتح الباكو وطلع التليفون وهوا يركب في الشفرتين فيه:تليفون
سفيان:ماكانش فيه داعي ياراجل
محمد بتسم وهوا يفتح في التليفون:ولينا خوت مافيش بينا رسميات
سفيان بتسم علي كلمت محمد لفرحاته وقال:توا وين بنمشو
محمد ولع السيارة:للمحور نبي نوصيهم يكترو من البوابات
وتلفت شبح لسفيان:وفتح تليفونك وديرلي رنه
سفيان:تمام
__
لبست غالية عبايتها ولفت وشاحها زين وفتحت الدار وطلعت راسها شبحت يمين يسار مالقت حد طلعت وسكرت الباب وقعدت تمشي بشويه لين وصلت قدام باب المظبخ.
أنت تقرأ
عشق في بلاد حروبها لا تنتهي ( الفتنه و الثأر)
Actionرواية تحكي علي أحداث واقعية ، تناقش خطورة انتشار الفثنة والتأر ومعانات الأهالي بسبب هدا الشي ، وبين هدي الفثنة والتأر تخلق قصص عشق منها مأساوية ومنها تتوج بتأج العشق 💛
