عشق في بلاد حروبها لا تنتهي ( الفتنه و الثأر)

البارت 28

_
_
#عشق_في_بلاد_حروبها_لا_تنتهي
   الحلقة 28
(الياقوت)
في الحلقة السابقه
رفع محمد يديه فوق وهوا يدير بصوابعة علامت النصر او الإستشهاد وقال:ونا لمعلم
ضحك سفيان ومحمد خش لدار وهوا شاد تليفونه ويشبح لمكالمات غالية ، بتسم وتكه علي السرير وهوا يتصل بيها ويتكي في راسه علي السرير ، ومن اول تشرينه ردت عليه:الو
بتسم محمد طول:قعده واعيه
غالية رشفت دموعها وهيا دمسح فيهم وتسلالة .....
.
قراءة ممتعة 💛
#البارت_الثامن_والعشرون
.
من جنب رقية الراقدة وطلعت من الدار ومشت لي وسط الحوش وقالت بتوشويش:انت كويس
محمد ميل براسه وهوا يدخل في صوابعة بين خصلات شعرة وقال:تبكي
غالية زادو دموعها نزلو:شن تبي امالا نضحك بعد ماسمعت صوت رصاص والله قريب متت من الخوف وفوقها تردش
محمد:لا رصاص لا سوء وينه الرصاص
غالية:اني سمعته بوداني شن بنكدب وداني وكان مش رصاص علاش عاش رديت عليا
محمد:ودانك هضم يبو القرص
قعدت غالية تمسح في دموعها وقالت:اني خايفه هلباا قريب متت انبكري نحسابك ابصر شن صارلك ولا احمد خوي دارلك حاجه
محمد بتسم:يانعلي من السمح لخايف علي
غالية نفخت:اوووف بطل اني نتكلم بجديات رهو ره
محمد:هههه وحتي نا نتكلم بجديات راهو ره هههه
قعدت غالية تنقنق وقالت بستفزاز:محمد
خدي محمد نفس وطلعة:ها يانبضه
قعدت غالية ترمش برموشها هلبا وهيا تنش علي روحها وماعاش عرفت شن ترد عليه ، لين رجع محمد قال:غلاي وين عديتي
غالية:عاش تدوي معاي هكي
محمد:كيف ندوي معاكي نا
غالية:نعرفش
محمد:كيف ماتعرفيش
غالية:محمد
محمد:يانبضه
غالية:زي توا هاا هكي تدوي معاي
محمد:ههههه باهي نا شن ندير في عمري كان عندي بنت عسل سمحه كيفك كيف تبيني ماندلعكش
غالية رجعت شعرها التالي وضيقت عيونها:انت غالط في العنوان راهو اني مش مرتك عائشة مرتك
محمد:اممم عادي ونديرك حتي انتي مرتي وندلعك شني رايك
رفعت غالية حواجبها:اني بنرقد باي
ضحك محمد:سلمها المتحشمه عدي يابنتي هي تصبحي علي خير
بتسمت غالية:قدامك كل خير
سكرت غالية منه ومسحت علي خدودها الحمر وهيا تبتسم لروحها وحاسه قلبها بيطلع من مكانه من كلامه معاها .
__
حنان:هدا كله صاير وهدا وين فتح ربي وقلتولي
فاطمة:وقسم بالله كان نندري هدا كله صاير ره امبكري قبل ماتطلع نتفتها بسنوني
نادين شبحت لتليفون فاطمة وهيا تشبح في رقم فارس وشبحت لأمها:فارس يتصل غدوا نجيكم
حنان:اهربي اهربي اصلا هدا لفالحة فيه كان مقايلتيلي من الأول ره هدا كله ماصارش
فرح:شن بديري هي ياماما غير كانت بتغلط لقلوب وخلاص
فاطمة تلفتت لفرح:اسكتي انتي يانية زيك زي اختك كان قالت شن صار معاها ره ماطيحتش من روحها لا لناجية ولا لنهي لكن والله فارس مسح علي قلبي وااااه كان هدا ره مارقدتش اليوم واني نسحن عليها
تنهدت نادين ووقفت وهيا تقرب باست راس امها:خلاص ماما غدوة نكملو والله فارس يستنا شكله
__
.
.
خشت نادين للحوش وهيا شاده زيد الراقد في حضنها ، وخش فارس وراها لنتبه علي هدوءها خش للمظبخ وخلاها تمشي تحط في زيد في فراشه ورجعت للمظبخ وهيا تفك في وشاحها وتلفتتله وقالت:جعان
تنهد فارس وتكه بظهرة علي الكرسي:لا ماخاطريش
اتكت نادين علي حاشية الرخامة وشبحت لوطه وقالت:اني مادرتلها شي
فارس:عارف
شبحتله نادين:اسفه من تحت راسي فسدت علاقتك حتي مع خالتك
فارس:انتي ماخصكش اصلا من لما قعمزت وهيا تخرط عليك واني متحمل
نادين تنهدت تنهيده من وسط قلبها:واللهي ماكلمتها ولا لقحت هوا اصلا قعده مادويتش معاها بكل
وقف فارس وقرب منها:حتي كان دويتي ، معاك حق اصلا الغلط مني من الاول رخصت من قيمتك المفروض درتلها حد من الأول
رفعت نادين عيونها فيه وقعدت تشبحله كيف رفع يده ورجع خصلت شعرها ورا ودنها:راك غالية يانادين انتي بديتي عيلتي كلها حسيتيني اكتر من خالتي ووقفتي معاي وكبرتي عقلك معاي شن نبي فيهم لقلب ليقلب مدام انتي جنبي مانبيهمش بناقص منهم
بتسمت نادين وهيا حاسه روحها وكأنها في حلم ماعمرها تخيلت كلام زي هدا يطلع من فارس ، حتي لو كان بسيط ، وبسيط هلبااااا بس حساته منه شي كبير ، زادت قربت منه ولفت يديها علي رقبته وحضناته:اني نحبك هلبااااا
حضنها فارس وباسها علي راسها:واللي في قلبي ليك اكبر من حب يانادين انتي امي وبوي وعيلتي راك
__
تاني يوم الصبح ...
علي الساعة 6:30
سفيان:قصدي خطر ره ماشي للموت برجليك كان اطيح في يديهم اتريح فيها
محمد حط البرنوس علي راسه وقال:متأكد يطلع ال 7
سفيان تنهد ورجع حط راسه علي المخدته وقال بستسلام:طول الايام لرقبته فيهم علي الساعه 7 يطلع يمشي لجبانة
محمد:تمام
وسكت محمد شوي وهوا يسكر في شفرته لعاطيها للعيلة ، وكمل وهوا يشبح لسفيان:اسمع عدي بعدين دورنا مطعم يدير في بازين
سفيان ضحك:قول شورما بيتزا همبورقة شن بازين ازح ههههه
محمد ارفع حواجبه ونزلهم:جاية انية فيه لا المليون ياراجل امبارح طول الليل ونا نحلم بيه
سفيان:ههههههه تو نقول لمرت خوي اديرهولك
محمد:انظيفة
سفيان:هههه اكيد وانظف من المطعم علي الأقل
محمد:هيوالله وقلها ادير معاه مسير
سفيان رفع حاجبة:وماتبيش دلاع وقلعاوي
ضحك محمد وعرفه يتسهوك وقال وهوا يتلفت يطلع من الدار:لالا تو ناخدوهن نحنا عادي مانبوش انتعبوها واجد
__
طلع احمد شريط لحبوب لكانو فيهم اربع حبات بس ، مسح علي جبهته وطلع زوز وزرطهم وهوا يرجع يدس في الشريط لحبوب في جيبه وتلفت للوندينو وغسل وجهه بالميه ومسح علي لحيته وشعرة لهملهم هلبااا وهوا يسمع في الطقطيق باب الحمام عليه ، زاد مسح وجهه من لمية وفتح الباب لحسام لبدي يدربك علي الباب.
بتسم حسام ووقف ادربيك:ساعة ياراجل ره في طبور وراك مش في حوشكم واكل الجو بروحك
احمد قرن حواجبه ورد بعصبيه:في ستين الف حمام في المقر ازح وجاي تخبط علي راس امي علاش
تحمحم حسام ونطفي حماسه في البصارة وقال:سامحني ياراجل ماقصديش كنت نبصر
خدي احمد نفس كبير وطلعة وحط يديه علي راسه وقال:تي ، تي لالا انت لسامحني غير مضايق شوي بالله ماتخدش عليا
حسام بتسم وطبطب علي كتفه:لالا ولا يهمك عادي ولينا خوت ومافيش بينا
وسكت شوي وهوا يشبح في الساعة لي في تليفونه و كمل:وخيرك نايض من توا
احمد:عندي مشوار
حسام:اني كيف جيت تبي نمشي معاك
احمد:لالا
وسكت شوي وكمل بتأتر:بنمشي لجبانة بنزور امي
حسام:ربي يرحمها ويغفرلها برا امالا واني بنخش نبدل حوايجي عندي مناوبه توا
احمد:تمام
وطلع احمد وهوا في باله ستين فكرة وفكرة ، وأولهم كيف بيلقا محمد تاني ، طلع من المقر وكانو هلبا عيون متبعينه عيون الصقر اللي لما شافوه خش للمقبرة سيبوه وعيون شخص تاني لقعد واقف يشبحله من بعيد وهوا مقعمز جنب قبر امه ويخربش في التراب القبر بيده وسارح.
مسح احمد يده من التراب ومسح عرق جبهته بكم يده وطلع شريط لحبوب من جيبه وطلع حبتين من الشريط وقبل مايخدهم شبح يد فجأة شدة يده واول مارفع عيونه وشبح محمد ضيق عيونه ورخي يده ولحبوب طاحو في التراب
وبحركة سريعة دف احمد محمد ووقف وهوا يضيق في عيونه وضحك:ندور فيك في السماء لقيتك في الوطى
محمد رفع يديه الزوز وهوا يحاول يهديه وخليه يسمعله:نا جاي نبي نشيلك لأختك مش جاي نتعارك
احمد نقز عليه وضربه بوكس علي خشمه:تي اما اخت ياكلب اما اخت لخليت منها عاهرة وغتصبتها انت وصحابك
وكيف جاي احمد بيضرب محمد مرة تانية علي وجهه خواه محمد وشده من ياقت سوريته وضربه علي وجهه لين انفتح حاجبه ودفه طيحة علي الارض:نا راجل مش عيل  ياجاهل مانقربش من امانة سلمتهافي رقبتي مانخونش حتي عدوي في حاجه كيف هكي
ضحك احمد ومسح حاجبه ووقف وهوا يدعدع:ههههه علي اساس ماهددتنيش بيها من قبل تي انت ادير اكبر من هكي
محمد عيط بأعصاب:تي شني هددتك بحت في روحك ازف خلوك متشرد حولوك لمدمن مخدرات يبوك تجيب رقبتي وتقتلني بيش يفتكو مني من غير مايوسخو يديهم بدمي وتولي انت المدنب الوحيد خلوك لعبة بين يديهم
احمد :كداااااب تي كان مش منهم ره ماعرفتش شن درت ، هما بساعدوني خلوني نتأكد بزياده انك واحد كلب اصلا من قبل ناويني لكن ماقدرتش عليا ستقوية علي اختي العيل لماتعرف شي
محمد خدي نفس كبير ومسح علي وجهه بديه الزوز:احمد نا لأخر مرة بنقلها لك نا اختك مادرتلها شي قعده في حوشي معززه مكرمة مع امي وخواتي لا قربتها لا مسيتها
احمد قرب يبي يضربه بس محمد وخر خطوة واحمد طاح وعيط:كان ماتبي منها شي علاش ولعت النار في حوشنا علاش خديتها من حوشنا علاش ماخليتلهاش اخر حاجة قعدت من حقنا اخر شي قعد ملكها
محمد قعد ساكت من الاول وهوا ماعاش عرف شن يرد بس بعدها قال:سوء تفاااهم ومش نا لولعتها النار لكن وربي اختك مادرتلها حاجة
احمد:انم ماعاش تقولي مادرتلها شي خليت سمعتها في شارعنا وقدام جيرانا احرف من بنات الشوارع خليتهم يقولو عليها مش متربية وعاهرة  خليتهم يقولو هربت معاك ويألفو عليها في القصص وسخت سمعتها وسمعتي وسمعت بوي لتحت التراب
محمد ضيق عيونه:ماحد قال هكي هضم هم يوهمو فيك بس يعبولك في راسك ياحمار اوعي علي روحك ياسرك وهم زايد اختك سمعتها كيف المسك واصلا هيا مسك وماحد يقدر يوسخها
احمد ماعاش قادر يقرب من محمد ويضربه او يهاجمه وهوا حاس بألم في جسمه لي يبي لحبوب لأدمنهم وقال وهوا يحط في راسه بين كفوف يديه:لا انت وسختها انت خليت من لحنينه لعفيفة عاهرة قدام الناس قتلت امي وخديت امي التانية وخليت سيرتها علي السان ليسوة ولي مايسوة
ضرب محمد رجلة في التراب بعصبية وقال:ماعاش تقول عاهرة ازف
وسكت وهوا يمسح في وجهه بيديه الزوز وقرب قعمز قدام احمد علي ركابة وقال :باهي نا نسكتهن كلهن تعالي معايا نوض راهو هيا ترجا فيك نا ماخديتهاش منك
نزل احمد يديه من علي وجهه وشبح لمحمد:انت شن تبي مني اه تبي تقتلني تبي تاخدني وتدودرني اكتر ماودرتني الدنيا
ودفه بالقوة لين محمد طاح علي مرافق يديه وقبل مااحمد يهجم عليه يخنفه ، وقف محمد بحركة سريعة وبخفة وبعد وقال:نا نبي نشيلك من لبودروك فكر يااحمد نا بنخليك تفكر كان تبي اختك وتنقد روحك منهم بتلقاني قدام عيونك
ومشي محمد وخلا احمد مقعمز يشبحله وهوا يمسح علي رقبته وصدرة وحاس بضيق تنفس وبتشنش في جميع اطراف جسمه....
__
ضحك فارس وقعمز جنب نادين لدير في البازين ورد علي سفيان لي في التليفون:بالك يبي نديروله معاه حاجة تانية
تلفتت نادين لفارس:عادي اهو تو نديرله مزال بكري
ضحك سفيان لما سمع نادين وقال:ههههه لالا بارك الله فيكم حتي هكي ساد
فارس:خلاص امالا الساعة 3 نتلاقو علي الشط نعطيهولك غادي
سفيان:مية مية وقلها بارك الله فيك تعبنااااك
نادين رمشت بعيونها وقالت:مافيشي جميل ياحنة عقبال نعول في عرسك
فارس:ههههه سمعتها
سفيان:هههههه والله اقوي مرت خو هي
فارس:تمام بعدين نتلاقو
سكر فارس من سفيان ووقف قرب من نادين لتقرض في المسير وتتكلم:خسارة كان نندري عليه من امبارح ره درته علي الاقل لمسير جاه طايب شوي
لف فارس يديه علي خصرها وباسها من خدها:تي يحمد ربي صبح وعشية هوا جابة النصيب وبياكل من تحت يدياتك
تلفتتله نادين براسها وبتسمت:ياربي
ضحك فارس وباسها:ياربي محلاااااك هههه
__
في #بنغازي
كانت هداية واقفة ادير في الغدي وميسم تلود توتي في الصفرة جنبها ورقية تهدرز عليهم
رقية:والله ماتاكل في حويجة لوكال لخشلها يطلع كيف ماهو يانعلي كان مايطرالها حاجه
تنهدت هداية:باه تو نحط نا وياها بالك تتحشم مني وتاكل معايا
ميسم نفخت:انتي جايتينا ولا جايتيها
هداية:عيب لبنية تقطع القلب
ميسم:تستاهل اصلا لصيرلها هضا كله من عمايل باتها وخوتها
هداية:وهيا لبنية شن دنبها قعده صغيرة عويلة لما صار لصار حرام عليكي تحطي في الوم عليها
رقية:باللهي قوليلها نا كل ماندوي معاها تقول نتكلم مع حيط
ميسم:مش حيط ياامي لكن باللهي عليكي توا لما تبحتي فيها مايجيش في بالك موتت سليم مايجيش في بالك شن دار باتها في عيشة
هداية تنهدت:مايجيش البنت بريئة منهم هم من غير قلوب هم وحوش وكان هم هكي مايعنيش حتي غالية كيفهم
وقبل ماتزيد ميسم تتناقش اكتر خشت عائشة وهيا تتكلم وماركزتش علي شن كانو يهدرزو:جدي من مبدري وهوا يسأل علي لوكال امتي
تحمحمت رقية ولفت بكروستها وقالت:اهو قريب يطيب خلي نعدو جنبه الاهوه
__
في #طرابلس
غسل محمد يديه وتلفت لسفيان لحط الصفرة علي الرخامة وقال:ونبي شن رايك مش من الاخير
سكر محمد الشيشمة ومسح يديه وقال:تي من الاخير وربي يسلم يدياتها تستاهل جائزة
ضحك سفيان:ههههه تعرف قدااااااش ليا عليه البازين
مسح محمد علي شعره:ونا اخر مرة جدي الله يسامحة زهقلي كبدي فيه وهوا يمرس فيه بيديه
سفيان طلع تليفونه من جيبه وقال:اي بكل مبردها اللقطه هدي
محمد:عدي رد علي تليفونك تو نغسلهن نا
سفيان:لالا تو نغسلهم مش واعرات
محمد طبطب علي كتف سفيان:عدي ياولدي عدي مش جديد علي غسل لمواعين
سفيان:ههههه شكلك متعود
محمد:وحشيشتي
سفيان:سعدودها لبتاخدك
محمد غمظ عين وخشش يده في شعره وقال:هيوالله يابختها وخلاص
ضحك سفيان وطلع وخلا محمد لتلفت وهوا يلم في صواني ويحط فيهم في اللوندينو.
خش سفيان وهوا يتكلم في التليفون وشاد تليفون محمد يشرين ، تلفتله محمد وهوا يغسل في يديه بسرعة  وخدي من سفيان التليفون لعطاهوله و تلفت طلع وخلا محمد يجبد في كرسي الطاولة ويقعمز وهوا يرد:ها ياريحت الجنة
بتسمت رقية:الحمدالله لرديت
محمد:هههه سامحيني يالميمية كان بعيد علي
رقية:كيف حالك
محمد:بخير ونعمة مدامك طيبة
رقية:تعالا حداي نولي في خير خيري
محمد:ان شاءالله ياامي
وسكت شوي وقال:كيف حالكم انتم وحال جدي
رقية:الحمدالله ناقصنا انت بس
محمد:و...وكيف حال لبنية
رقية تنهدت:يارويحتي عليها لا تاكل لا تشرب واللهي خايفه اطيح علينا يوم اخر من قلت ماكلتها
محمد ضيق عيونه:كيف هكي عليش ماتغصبوهاش ماتخلنهاش هكي يصرلها هبوط
رقية:شن بنديرلها ياوليدي والله قد مانغصب فيها تنقش تنقيش واليوم تغدت عندنا هداية وحطت هيا وياها باهي يخي كلت معاها شوي
محمد:باللهي ياامي ردي بالك عليها امانة في رقبتي راهو
رقية:وهيا بنيتي وسط القلب مكانها ماتوصينيش علي بنتي انت لرد بالك علي رويحتك سلم ولدي نحنا مالينا غيرك
محمد:ان شالله ياغالية هي في امان الله توا
رقية:مع السلامة
سكر محمد من رقية وهوا يتنهد وقعد ساكت ويفكر شوي ، حط التليفون علي الطاولة ووقف غسل لماعين ورتب المظبخ وخدي تليفونه وطلع من المظبخ مشي خدي دخانه من جنب سفيان لمقعمز يتفرج وطلع في البلكونه
رفع محمد تليفونه قدامه وحط علي رقمها وتصل ، وهوا يحط في السبسي في فمه بيد وولعة واول ماسمع صوتها الطفولي:الو
شد السبسي بين صوابعة ونفخ الدخان وبتسم:مرحبا
كانت غالية شاده بنت هداية إلين ومقعمزين في جنان برا بروحهم.
تلفتت إلين لمقعمزه جنب غالية وقالت:من
اشرتلها غالية بصبعها وردت علي محمد وهيا تساوي في تقعمزتها:مرحبتين
محمد:كيف حالك
غالية:الحمدالله وانت شن حالك
بتسمت غالية وباست إلين وقالت:تعرف من جنبي
محمد ضيق عيونه:من
غالية:إلين
محمد:اووووو حبيبت الخالو عطيها ليا
حطت غالية التليفون علي ودن إلين لقالت:من
محمد:خالووو ريفت عليكي واجد
ضحكت إلين من قلبها لين غالية بتسمت.
إلين:حتي نا رايفت عليك خالو نا بيك راهو نبي نعدو نممو بيزااا
ضحك محمد:مكبر بطنك ياطشة حاضر لما نجي بنغازي نشيلك ناخد لكي  بيزا ههههه
إلين:نحبك وااااجد خالو
محمد:نا لنحبك ياقلبي هي عدي توا وعطيني البنوته لحداك
تلفتت إلين لغالية ومدتلها التليفون:هاكي كلوسه بيكي خالو
ضحكت غالية وباستها وخدت التليفون وهيا تسمع في ضحكت محمد لخلت من دقات قلبها يزيدو وقالت:خيرك تضحك
محمد:ههه لا شي ياغلوستي هههه
ضيقت غالية عيونها بضحكه:اوووف ياااا يااسر هيا ادلع فيا راهو ره
محمد:احيه منك ياغلاي ادوي زين
غالية:الا نبيش ندوي زين زيك
محمد:هههه غلاي
غالية:قتلك مانبيش
محمد زادت ضحكته:باهي هههههه اسمعيني باهي
غالية:خيرك
محمد:نعم مش خيرك
غالية:كنك
محمد ضحك بخفة علي تسكير راسها وتحمحم وقال:عليش ماتكليش زين
غالية:شن جاب سيرت الماكلة
محمد:هكي جت لما قالولي ماتكليش
غالية:لا ناكل عادي علي قد نيتي
محمد:كان تبيها علي النية ره ماحد ياكل لازم ماتاكلي كويس وتشدي صحتك
غالية:كيف بناكل واني مانعرفش علي ديار خوتي وكان يشربو ياكالو مرتحاين ولا لا
محمد:كلامك مزبوط لكن حتي نفسك عليها عليكي حق صح وله ديري بالك علي روحك بيش لما احمد يجي يلقاك كويسه عيب عاد يقول كنكم ماتوكلوش في اختي
ضحكت  غالية:ههه لا توكلو فيا بس اني خاطريش
محمد تنهد بصوت وجبد من السبسي وقال بصوت واطي:باهي كولي عشاني
بتسمت غالية وقعدت تمسح علي خدودها:حاضر
محمد بتسم:نجيك ليا ، عدي كولي توا هي
غالية:خاطريش توا
محمد:ايح علي نحنا شن كنا نخرفو قبل شوي
غالية:ههه باااهي خلاص
وسكتت شوي وقبل مايتكلم محمد قالت:محمد
محمد:ها يانبضه
نفخت غالية:ادوي زين
محمد ضحك:هههه لا ياقلبي بيش مرة اخر نقول لكي ادوي زين تسمعي لكلا
ضكت غالية لين خلت محمد يتلخبط.
تحمحم محمد:عدي هي تصبحي علي خير
غالية:وانت بخير باي
ضحك محمد علي طفوليتها وسايرها: في أمان الله هههه
__
تاني يوم ...
فاقت غالية علي صوت تليفونها الهزاز ، فتحت عيونها وشبحت لسرير لكان فاضي ورقية ماهناكش.
تنهدت وناضت قعمزت وتكت علي السرير وهيا ترد:الو صفاء
صفاء:غالية ستااااحشتك هلبا ولي هني
غالية علي طول عيونها تعبو دموع وقالت بعبرتها:وحتي اني وحقربي ستاحشتكم وعيت هلبااا
نفخت صفاء:متمنية الموت
مسحت غالية دمعة نزلت من عينها وضيقت عيونها وقالت:خيرك صفو شن صاير
صفاء:غالية نبي نقولك حاجة
غالية:قولي
صفاء خدت نفس وقعدت ساكته لين غالية رجعت وقالت بنفاد صبر:تي قولي خيرك
صفاء:اني نحب خوك احمد هلبااااا
ساوت غالية تقعميزتها ورفعت حواجبها وماعاش عرفت شن ترد وهيا تسمع في صوت صفاء لكملت:نحبه هلبا ياغالية مش قاادرة ناخد غيره مش قادرة نوافق نتزوج غيره ، تعرفي اليوم بجي خو إيلاف للمقابلة الشرعية ، تخيلي بس قعد ماصار شي وحاسه قلبي بيوقف من لوجع ومن فكرة انه بناخد غيره مابالك لو صارت الدوة حق والله نموت ره لفراق يقتل لفراق يموت ياغالية واااعر واااعر فراقة .
نزلو دموع غالية لماعاش عرفت شن ترد وهيا تسمع في صوت بكي صفاء لصارتلها هستيريا وماعاش قدرت توقف بكي لين سكرت الخط علي غالية لقعدت تبكي وهيا حاضنه روحها .
طقطق باب الدار عليها وخشت ميسم:قلت لكي ماما تعالي افطري
واول ماركزت ميسم علي غالية اللي متكية علي السرير وتبكي بالعبرة ، تلقائيا قربت منها وقعمزت قدامها:كنك تبكي
رفعت غالية راسها في ميسم وزادو دموعها ....
.
.
.
#يتبع_للبارت_لبعده
____________________________________
بداء كتاب الرواية في 2019 / أبـــ4ٰـــريل / 7
تم وضع قَفلة لـ الرواية في 2019 / سبتــ9ٰـــمبر / 25