عشق في بلاد حروبها لا تنتهي ( الفتنه و الثأر)

البارت 39

_
_
#عشق_في_بلاد_حروبها_لا_تنتهي
#تكملت_الجزاء_الأول الحاقة(39)
.
.
في الحلقة السابقه
ايلاف فتحت الخط وردت:شن تبي متصل
سفيان:اتصلت بنقولك وفيت بوعدي
ايلاف خدت نفس ودكرة اخر مكالمه ليهم وكيف وعدها انه مش ح يتصل بيها غير لما يتبت برائته ، رفعت راسها لروان لجت وقفت قدامها .
سفيان:اني قتلك مش ح نتصل الا لما نتبت برائتي واليوم بس تبتها اليوم وليت برئ قدامكم كلكم برئ قدامك وقدام عيلتك
ايلاف:قدام عيلتي
سفيان:اي قريب ح يعرفو
وسكت سوي وكمل:اني حبيتك ياايلاف حبيتك ومالمتكش لما كرهتيني وجيتي ضدي ، ربي يسعدك في حياتك ياحبي الاول ربي يسرلك طريقك كنت نبي نتبتلك انه اني ماخيبتش ضنك ولا طعنتك واهو تبته ونستأذنك
وسكر الخط وخلاها مش مستوعبه لقاله ومش فاهمه لو كلامه هدا حق ولا كدب .

قراءة ممتعة
#البارت_التاسع_والتلاتون
المفترض انك مهلكي ، فلماذا انجو كلما رأيتك 💕
(الياقوت)
.
.
طلعت صفاء وسكرة باب الصالة وخلت غالية و هداية لقربت اكتر وقالت:نعرف لداره محمد معاكن واااجد ، لكن لو تحقي اللي صار من عين محمد ح ديري كيفه وأكتر
غالية:باه لدارة ظلم ولا مش ظلم
هداية:ظلم اي وغلط ومايصيرش لكن الفتنه لصارات هيا الغلط محمد خوية دمه حار مايقدرش يشوف الغلط ويسكت وبدات الغلط في عيلته كيف تبيه يسكت ، ونحنا في وقتها شايفين الغلط منكم انتم لغتصبتو بنتنا وقتلتو ولدنا كنا جاهلين للحق
هزت غالية راسها ودموعها علي خدودها:نعرف و الله يسامحكم
وسكتت شوي وتنهدت وهيا تحاول تقنع روحها باللي تقول فيه وكملت:والله يسامحة هوا وخلاص توا وصلتوني لمكاني ماعاش نبي نولي معاكم
هداية سكتت وهيا تشبح لتليفونها لشرين برقم محمد ، سكرت الصوت وشبحت لغالية:محمد مش ح يولي لبنغازي من غيرك
غالية:واني مستحيل نمشي معاه
هداية:باهي وامي ترضي تزعليها هيا معتبراتك كيفنا ويخي اغلا منا ترضي تقعدي بعيده عنها
زاد صوت بكي غالية:اني ح نتصل بيها ديما
هداية قربت منها:باهي خلاص علاش تبكي نحنا نبوك معانا عشان معتبرينك بنتنا
غالية:باللهي عليك خلاص برو اني مانقدرش نعيش في مكان فيه الشخص لكن سبب في تدمير عيلتي مش ح نتقبله لو حتي كنت...
وسكتت غالية وهيا تنتبه انه تتكلم مع هداية وقعدت تبكي ، حضنتها هداية وفهمت شن كانت بتقول ، قعدت تمسح علي شعرها وقالت:يعلم ربي انه خوية لو كان يدري بالحق مادار فيكن هكي بالعكس كان هو لحماكم ، ماتخليش لصار ياغالية يأتر علي اللي جاي محمد رايدك وشاريك
وبعدتها وشدت وجها بين يداها وخلتها تشبحلها وكملت هداية :محمد صعب تفهمي شعورة بس توا ولي اول مرة كلهم انتبهوله انفضح بهتمامه فيكي وفرفشته بكل شي يخصك ، هوا غلط وغلطه كبير لكن هوا الوحيد ليقدر يكون لكي العيلة لراحت منك
مسحت غالية دموعها وقالت بهزة راس:لا مانبيهاش العيلة لبكونهالي هوا اني نبيشي ، مانكراهاش اصلا مانقدرش نكرهه لكن مانقدرش نولي معاه
هداية بعدت عليها وهيا تشبح لتليفونها لشداته في يدها ولقعد يشرين وقالت:باهي اعطيه فرصة قمعزي انتي وياه وخليه يتكلم معاكي
غالية:ماعاش فيه دوة خلاص باللهي عليك ياهداية قوليله يمشي من هني خلاص معاش نبي نشوفه ولا نكلمه بكل
كانت هداية بتزيد تتكلم بس غالية سبقتها وقالت وهيا تشد في يدها:باللهي عليك احترمو قراري
تنهدت هداية وهزت راسها بمعني زي ماتبي ، و وقفت وهيا تحضن في غالية ، واول مابعدت رجع محمد وللمرة التالته يتصل ، رفعت هداية التليفون وردت ، وغالية تلفتت وهيا تحاول تتمالك دموعها .
واول ماردت هداية جاها صوت محمد العصبي وهوا شاد علي سنونه ومايبيش يعيط جنب الرجالة لبعد عليهم بـ مسافه بعيده وجي وقف جنب سيارته:كنك ماتردي كنك
هداية:سامحني كان صامت
محمد نفخ:تمام شني صار
هداية:مسكرة راسها خلاص محمد خليها علي راحتها
مسح محمد بيده علي جبته وخلا يده علي عيونه وقال من بين سنونه:اعطيها التليفون
هداية خافت من نبرة صوته وقالت:مش ح تاخده
رد محمد وقال بس بصوت اعلي:اعطيها التليفون ياهداية
نخلعت هداية وقربت من غالية ولفتتها ليها وحطتلها التليفون في ودنها من غير ماتستأذن منها لانه حست انه ح تعاند وح تنقلب فوق راسها هيا وياها .
ستغربة غالية اللي شدت التليفون وشبحت لهداية لقالتلها:وغلاوتي عندك كلميه لنقنه راقيله بكل هدا يخش لكي جوا ومايهمه حد
ضربت غالية رجلاها علي الارض بغل ودموعها علي خدودها وهيا ترد عليه بعياط:خيرك شني تبي مني قتلك اطلع من حياتي ياخي نبيش نكلمك اني كارهاتك افهم
بعدت هداية ووقفت قدام الباب وقعدت تشبح لغالية لجاها صياح محمد:اكرهيني كيف ماتبي لكن في حوشنا مش هنا ياغالية مش هنا
غالية ضحكت بهزوه من بين دموعها:قصدك حوشك اني ماعنديش حوش وماعنديش عيلة خليني هني في مدينتي مانبيش نتشرد ونمشي لمكان هوا مش مكاني
خدي محمد نفس كبيير وطلعة وهوا يوطي في صوته وقال:فاطن شني قلت نا ، حوشنا ياغالية حوشي نا وياك من يوم ربي حطك امنه في رقبتي ولا مكاني هو مكانك
غالية:لا اني وانت مانتلاقوش ماتجيش ومستحيل
ضرب محمد السيارة برجلة بتعصيب وقال:وربي عارف روحي غلطت ، وغلطت واجد اخرى ، لكن مش ب إرادتي افهميني ياغالية افهميني كنت جاهل الحق نحق فيكن انتم الظالمين مش ساهلة علي نخسر خوية لرباني نخسر باتي للمرة التانية كنت مانحق في شي مغير الدم
غالية صيحت من بين بكاها:تي اني خسرتهم كلهم خسرت عيلتي كلهم تي شن تقول انت اه شن تقول خسرت خوك خسرت بوك اني لا بو لا ام لا خو تي اني ماعندي حد حد راهو ماعنديش حد
سكت محمد وحط راسه علي الحيط وهوا يسمع في بكاها لخلا قلبه يدق بسرعة:سامحيني
قعمزت غالية لوطه وحطت راسها علي الكرسي وقعدت تبكي وماردتش عليه
رد محمد وتكلم:نا خسرت واجد ، مانبيش نخسرك حتي انتي ياغلاي ، اكرهيني لكن خليكي قدام عيوني
غالية:تي اني كارها روحي علي خاطر مش قادره نكرهك مش قادرة نشوفك مجرم
محمد:انتي قلبي ياغلاي عدي معايا
غالية غمضت عيونها:اني مانبيكش سيبني
محمد:نا نبيك
وسكت شوي وهوا يرفع في يده ويمسح علي شعره وقال بتوثر وخوف من نهاية المكالمة:مش تحبيني مش قلتيلي ماتسيبنيش
تعلا صوت بكي غالية لخلا محمد يتنهد بصوت العالي:كنك ياغلاي كنك ياقلبي
غالية:علاش ادير فيا هكي علاش
محمد:عشان نحبك عشان نبيك عشان مانقدرش من غيرك
قالها وهوا يمسح علي وجهه ويتلفت يمين ويسار ويسمع في صوت بكاها وشهقاتها ، حس انه خلاص حس بوجع في قلبه في روحه لدرجه حتي جسمه وجعه ، وكان بسكر الخط بس جاه صوتها اللي يرعش من رجفات بكاها:حت..حتي اني نحبك هلباا
رجع محمد التليفون لودنه ورد بسرعة:هااا
غالية ردت وقالت وهيا تحاول تنضم تنفسها:نحبك
تنهد محمد براحة و تكه علي سيارته:وربي نا لنحبك ، قلبي انتي قلبي
__
جميل ان تنال ماكنت تسجد له مطولا مع دموع ترجي لله أن يحققه لك 👌💛
(الياقوت)
.
.
ضحك فارس لفرحة سفيان لقال:وقسم بالله كان نلقا ناخد ميكروفون ونمشي في شارعنا ونقول يااااناس اني برئ برئ واااك ههههه
فارس:واني معاك برا ديرها
سفيان:تحسابني زارط امالا ههههه خلي العقل يهداء ياراجل وانت ماصدقت تجشع
فارس:ههههه ياعن شكلك ياراجل تي برا قلهم فديت من الغربة نبي نولي بكرامتي ازح
سفيان:بأذن الله ياخوي ستنى شوي بس وح تروح وراسك مرفوع
فارس:ان شاءالله والله عيت
سفيان:وربي ماك طبيعي ياخوي توا واحد عايش برا وبخدمته ومتزوج وبصغارة وبحوشه ومرتاح ، يتعب ويستاحش هالبلاد الخاربة ههههه
فارس:بلاد خاربة وله لكن والله لا تركيا لا شطاني يسوا ظفرها بلادك بلادك تي نعيش فيها بحربها ب قصفها راضي
سفيان:انت وطني هلبا ههههه
فارس:ههههه تم موضوعك وتعالا جرب
سفيان:ياعيني جايك جايك
سمع فارس صوت دوشت زيد ، وصوت سفيان لقال:تمام ياغالي تو نتصل بيك غدوة
فارس:تم ماشي
سكر فارس ووقف كبه علي ممر الباب الرئسي وهوا يشبح لنادين لكيف مروحة من حوش الجيران.
نفخت نادين وهيا تحول في الطاقية والجيبوطي متع زيد:يااااربي اني جايبة بني ادم ولا اراكوز شنو هدا اعقل اعقل
هرب زيد منها وخلاها توقف وتصيح:زييييد تعاااالا
واول مانتبهت علي فارس لمتكي راسه علي الحيط ويشبحلها ، قعدت تنقنق وكملت وهيا تقرب منه وتحول في وشاحها وجيبوطيها:ديرلي حل مع العفريت هدا والله هبلني معقوله مكبش في ستارات الناس وطيح عليه السكه الحشمه
ضحك فارس لجبدها من يدها وباسها من خدها وهوا يلف في يديه علي خصرها:هههه ربي يجازي فيك علي عمايلك ياحبي
قرنت نادين حواجبها وحطت يداها علي صدره:والله ماكنت زيه هي
فنص فارس فيها وقال بضحكه:ياكدابة هههه
ضحكت نادين ولفت يداها علي رقبته:قصدي شوي مش هلبا
قرب فارس وحرك خشمك علي خشمها بخفه وبعد وقال وهوا قعد قريب منها هلبااا: وحياتك لا النخاااع يشبهك ، شن رايك نجيبو بنوته تشبهلي
نادين:اممم
وقبل ماتتكلم سمعو صوت تكسير في المطبح ، غمظت نادين عيونها وخبطت راسها علي صدر فارس لضحك وعيط:زييييييد
__
ضحكت روان:ومصدقتيه ياهبله تي هدا واحد مريض فاضي ماعنده مايدير ، يبي يشوشلك تفكيرك علي الفاضي وانتي زيه مريضه تصدقي فيه
نفخت إيلاف وطاحت علي السرير التالي وقالت:تو نشوفو ، كان ليقول فيه حق ولالا
روان ضيقت عيونها:شن قصدك ماتقوليش بتكلميه والله نحرش فيك امك راهو
ايلاف:لا بس اكيد كان عنده حاجه بيقولها ح يراجي رؤوف لين يروح
روان هزت راسها بأسف ووقفت:ان شاءالله ربي يروف بحالك وخلاص يامريضه
وطلعت وخلت ايلاف تشبح لسقف وتدكر في كلام سفيان.
__
صفية مدتلها طاسة لمية بضحكه:خيرك العفو متحشمه
خدت غالية طاسة لمية وشربت:مش عارفه
وتلفتت لصفاء للاهيا في تليفونها وتبتسم وقالت بعيطه:تي سيبي الشقفه ازح اني متوترة شن بيقولي عمي مفتاح زعما
صفاء رفعت فيها عيونها وسكرت التليفون وحطاته جنبها:مش عارفه بس اكيد ح يدويلك علي قصة المشيه لبنغازي
سارة:نحس انه بابا مش ح يخليك تمشي
صفية:حتي اني
غالية:ومحمد مستحيل يخليني هني بعد ماعرف انه نبي نمشي معاه
تنهدت سارة ورفعت يداها فوق وقالت:يااااارب ارزقني ب واحد زي محمد ، والله حتي بعيوبه راضية بيه غير نبيه كوبي منه
ضحكو غالية وصفية وصفاء ضربتها علي راسها:تحشمي
ضيقت سارة عيونها:اوووف ياااا كنك كنك
غالية:واااه عليك قعمزتي خمس دقايق مع هداية وبديتي تدوي زيهم واني ليا فوق الاربع شهور عندهم راسي مسكر ماتعلمت منهم غير حقي والنون لزيدو فيها في اماكن مانعرفهاش بزبط 😂
صفاء:غبر فيك اما نون هدي هههههه
خشت هيام عليهم:لولو تعالي هي عمك يبيك
رجع التوتر لقلب غالية لوقفت وهيا تزمط في ريقها ومشت لصالة مع هيام.
غالية:السلام عليكم عمي
مفتاح:وعليكم السلام بنتي
قعمزت غالية قبالت مفتاح وهيام قعمزت جنبها :ان شاءالله خير ياعمي
مفتاح:والله هدا عندك كان خير ولا شر
ضيقت غالية عيونها بعدم فهم ومفتاح كمل:انتي بحسبت وحده من بناتي واعز ، والله شاهد محبتك من محبتهم
بتسمت غالية مجاملة وهيا تستني في الباقي من مفتاح لرجع وكمل:واني لاني مال منك ولا نبيك تمشي لناس برانية لكن هالراجل الشراقوي اصر ياخدك ، وعندي اني كلمتين ياتطلعي من حوشي لحوشه عروس ياتقعدي هني وهوا يمشي في حال سبيله
رفعت غالية حواجبها وتلفتت لهيام ورجعت تلفتت لمفتاح لقال مكمل كلامه:والراجل شاريك يبي يقرا فاتحتكم بعد غدوة وتمشو لبنغازي ولبتقوليه انتي بيمشي ياايه يالا
هزت غالية راسها وهيا تمسح علي خدودها بتوتر...........
__
.
.
لكل انسان نصيب حلو ، ف يااااااارب عاجلا وليس أجلا 🙌💛
(الياقوت)
.
#بعد_يومين_في_طرابلس
ضيق عبدالحكيم عيونه وقال بستغراب:شني يبو نهار احرف علي راس سراج كان يطلع من تحت راسه
رؤوف :لالا يابوي كان هدا محمد قالي شكله علي موضوع حمزة الله يرحمه
عبد الحكيم:ان شاءالله خير وخلاص امتي قالك تعالا
رؤوف شبح لساعة لقاها ال 9 :هوا اليوم فاتحته بنمشو للفاتحه وبعدين منها نمشو للمقر
عبدالحكيم:ان شاءالله خير ومايطلعوناش بموضوع جديد
هز رؤوف راسه وقعد يشبح لتليفونه وهوا يشوف في رسالة لوصلاته من صفاء ولكان محتواها(الحمدالله علي السلامة)
وقف رؤوف:اني بنخش انظم اموري
عبد الحكيم:خش خش
خش رؤوف وتصل ب صفاء لردت طول لين رؤوف ضحك:شكلك مستاحشتيني هلبااااا
بتسمت صفاء:ياربي حشيشتك تحشمني
رؤوف:هههه شني حالك ياحبي
صفاء:الحمدالله ، عادي نطلب طلب
رؤوف:وحقربي لعرفت اتصالك مش بلاش
ضحكت صفاء:هههههه حرام عليك والله اتصلت باش نقولك الحمدالله علي السلامة
رؤوف هز راسه:اي شني تبي
صفاء:عادي تجيب ايلاف اليوم انت جاي جاي لجيهتنا
رؤوف فتح الشنطه متعه وقال:تمام تمام
حست صفاء انه مزاجه تغير وكيف بتتكلم رؤوف سبقها وقال:كيف واصل قعد بحوايجي ودنيتي نبي انظم اموري تمام لما يحلالك طلب تاني اتصلي بيا
نفخت صفاء وقالت زي الغبية:تمام
ستاقطت ب روحها وكيف بتتكلم سكر رؤوف الخط في وجها ، عيطت صفاء:وااااااااااك من الساااني وااااك ياربي علاش مانعرفش ندوي زين معااااه علاااش علاااش
وتلفتت وهيا تعيط مخلوعة:واااه كلبه خلعتيني
رفعت غالية حواجبها وقربت منها:خيرك تعيطي بروحك
تنهدت صفاء:علي خاطر غبيه توا كيف قوليلي برضية
تنهدت غالية وقعمزت علي السرير ورقدت:مبعده منك الحق
شبحتلها صفاء علي الجنب وعزقتها بالمخده ورقدت جنبها وقالت:خزي
غالية:عاوديله باهي
صفاء:لا مش توا لانه كيف مروح ويبي يلود علي روحة
غالية:عدرك قبيح
تلفتتلها صفاء براسها:تعرفي اللي يوجع فيا ديما نزعل فيه ، بس مايفوتش اليوم الا ويتصل بيا ، اللاحظ من نبرت صوته زعلان وانه يبي يعاتبني بس مش قادر
غالية:نبي نعرف كيف متحمل يقعد معاك
صفاء:زودتيها راك
غالية:تي انتي زودتيها الحق مابعده
صفاء ضربتها برجلها وقالت: انتي لمبعده منك هالمحمد حصل فيك حصلة شينه
قعمزت غالية وهيا تنقنق وقالت:تعرفي من ولامس نتصل بيه مايبيش يرد عليا الدماغول هدا مش عارفه علاش
بتسمت صفاء:يانعليا من لستاحشة حبيبها اهو تهني ساعات قليلة وتولي مرته
غالية سكتت ودموعها تجمعو في عيونها ، قعمزت صفاء وهيا تشبحها:تي خيرك
غالية:اخي بنتزوج وخوي ليه سبوعين ميت اخي علي الدنيا
صفاء سكتت وهيا تشبح لغالية لقعدت تبكي ، قربت صفاء منها وحضنتها وهيا تحاول تغيرلها جوها:كبرتي وبتتزوجي قبلي ياحقيرة مايطلع منكم ياجيل الألفين
ضحكت غالية من بين دموعها:امالا شني فالحين
صفاء:ههههه اني مش عارف محمد كيف بيتحملك بطولة السان هدي
غالية:اس مانقدرش نطول الساني عليه هلبا هلبا زيكم هكي كان هدا يقلبها علي راسي
صفاء ضيقت عيونها:ايوا حني بدينا نخافو ، ههههه اصلا انتي تبي عشرة محمدات في حياتك
غالية مسحت دموعها:غر ناخده هوا ماعاد نبي شي
صفاء اتكت علي الحيط:الله من قال بياخدك اللي ماخليتي شن دعيتي عليه وتوا تتمني فيه
غالية:اي ربي يسامحني ، ان شاءالله ماستجابش لدعواتي
__
.
.
أبي و أمي ، أخي و أختي أنت 💛
(الياقوت)
.
تلفت الشيخ لمفتاح وقال:ف إذا قبلت بهدا الزواج يامفتاح قول معاي بسم الله
مفتاح:بسم الله
الشيخ:الحمدالله
مفتاح:الحمدالله
الشيخ:والصلاة والسلام علي رسول الله
مفتاح: والصلاة والسلام علي رسول الله
الشيخ:أشهد الله وأشهدكم إني زوجتك
مفتاح:أشهد الله وأشهدكم إني زوجتك
الشيخ:غالية عبدالسلام ####
مفتاح:غالية عبدالسلام ####
الشيخ:للمرغوب بها محمد ناصر ####
مفتاح: للمرغوب بها محمد ناصر ####
الشيخ:علي سنة الله ورسولة
مفتاح:علي سنة الله ورسولة
الشيخ:وبالصدقين المدكورين في هدا المجلس
مفتاح: وبالصدقين المدكورين في هدا المجلس
تلفت الشيخ لعبد السلام لمقعمز علي يمينه وقال :قول معاي ياحاج عبدالسلام بسم الله
عبدالسلام:بسم الله
الشيخ:الحمدالله
عبدالسلام:الحمدالله
الشيخ:والصلاة والسلام علي رسول الله
عبدالسلام: والصلاة والسلام علي رسول الله
الشيخ:قبلت بموكلي محمد ناصر ####
عبدالسلام: قبلت بموكلي محمد ناصر ####
الشيخ:ورضية بزواجه من غالية عبدالسلام ####
عبدالسلام:ورضية بزواجه من غالية عبدالسلام ####
الشيخ:علي سنة الله ورسولة
عبدالسلام:علي سنة الله ورسولة
الشيخ:وبالصدقين المدكورين في هدا المجلس
عبدالسلام: بالصدقين المدكورين في هدا المجلس
شد الشيخ يد مفتاح وقال:قول بسم الله وعلي بركة الله
مفتاح:بسم الله وعلي بركة الله
الشيخ:زوجتك غالية عبدالسلام ####
مفتاح:زوجتك غالية عبدالسلام ####
الشيخ:الي المرغوب بها محمد ناصر ####
مفتاح:الي المرغوب بها محمد ناصر ####
الشيخ:علي سنة الله ورسولة
مفتاح:علي سنة الله ورسولة
الشيخ:بالصدقين المدكورين في هدا المجلس
مفتاح:بالصدقين المدكورين في هدا المجلس
وشد الشيخ بيده التانية عبدالسلام وقاله:قول معاي ياحاج عبد السلام بسم الله وعلي بركة الله
عبدالسلام:بسم الله وعلي بركة الله
الشيخ:قبلتها منه لموكلي محمد ناصر ####
عبدالسلام:قبلتها منه لموكلي محمد ناصر ####
الشيخ:ورضية بها زوجة له
عبدالسلام:ورضية بها زوجة له
الشيخ:علي سنة الله ورسولة
عبدالسلام:علي سنة الله ورسولة
الشيخ:وبالصدقين المدكوريين في هدا المجلس
عبدالسلام:وبالصدقين المدكوريين في هدا المجلس
رفع الشيخ يديه قدامه وقال:بسم الله الرحمن الرحيم ، الحمدالله ، والصلاة والسلام علي رسول الله ، اللهم صلي وسلم عليه وعلي من ولاه ، اللهم صلي علي محمد وعلي آل محمد ، كما صلية علي إبراهيم وعلي آل إبراهيم ، وبارك علي محمد وعلي آل محمد ، كما بركة علي إبراهيم وعلي آل إبراهيم ، في العالمين إنك الحميد المجيد .
وزاد الشيخ من صوته وكمل والحاضرين يردو بأمين:اللهم بارك في هدا الزواج ، اللهم بارك في هدا الزواج ، اللهم بارك في هدا الزواج ، وأجعله زواجا مباركا طيبا ميمونا ، وأجعله بالسعدة والهناء مقرونا ، وبارك يارب في هدين الزوجين ، بارك فيهم ، وبارك لهم ، وبارك عليهم ، وأجمع بينهم يارب بالخير ، اللهم أحسن العسر بين هدين الزوجين ، وأرزقهم بدرية صالحة نافعة ، اللهم ألف بين قلبيهم بألفة طيبة ، ألهم ارزقهم الوأم والتفاهم والإنسجام ، برحمتك ياأرحم الراحيمين ، وبارك له فيها ، وبارك لها فيه ، وأجمع بينهما بخير ، ونسألك سأل ياألله يااالله ياالله ناصية هده الزوجه ناصية خير وبركة ، علي زوجها ، وأجعل قدومها خير وبركه ، برحمتك ياأرحم الراحيم ياأكرم الأكرامين يااارب العالمين ، يااارب تقبل منا وبالبركة الفااااااااتحة .........
.
.
.
#يتبع_للبارت_الأخير
هههه حبيت نشارك معاكم فاتحتهم 😍
يااارب يجمع بين كل تنين حبو بعض في الله وفي نفسهم ويكونو خير لبعض 💛
____________________________________
بداء كتابة الرواية في 2019 / أبـــ4ٰـــريل / 7
تم وضع قَفلة لـ الرواية في 2019 / سبتــ9ٰـــمبر / 25