_
_
#عشق_في_بلاد_حروبها_لا_تنتهي
الحلقة 23
(الياقوت)
في الحلقة السابقة...
وقبل ماسفيان يخش للمربوعه اتصل تليفونه تاني واول ماشافه لقاه زياد رد طول عليه:الو زياد
زياد:شن الجو
سفيان:تمام
زياد:شن لخبار
سفيان:اهو قعد نستني في الطقه هدا لماعاد اتصلا لا جي لا شي
زياد:ماعاش يقدر يتصل لانه تليفونه مراقب
سفيان ضيق عيونه:كيف مراقب خدي شفرة جديده
زياد:هههه ياشاطر تليفوني مراقب وهوا اتصل بيا وعرفو مكانه ونسي ماسكرش تليفونه تعقبوه طول
.
قراءة ممتعة 💛
#البارت_التالثه_والعشرون
.
فتح سفيان عيونه علي وسعهم:ياعن شكلك سكر ام التليفون ياولد الكلب
وسكر عليه وهوا يحول في الشفرة ويكسر فيها بين تلاته وياخد في نفس:الكلب ومازال فاتح ميعاد معاي باش يطبولي هني
وخش للمربوعه.
__
فتح محمد الباب وهوا يدخل في الشكاير للمظبخ ويفتح فيهم يطلع في الحاجات ويستف في التلاجه.
طلعت غالية من الدار وهيا تعطس وتكح ، تلفت محمد وهوا مضيق عيونه ويشبح فيها كيف تعطس وجت وقفت قدام المظبخ.
محمد:كنك
غالية رفعت كتااافها وعطست وهيا تحط في يداها علي فمها:شكلني بنمرض
وعطست مره تانية لين محمد قرب وهوا يجبد في شكارت لكلينكس ويفتح فيها ومدلها واحد وخداته منه وهيا تشبحله كيف رفع يده ومسلها جبهتها:سخونه يابنت
توثرة غالية من لمست يده ، ورفعت طول يدها حولتهاله من جبهتها وضيقت عيونها:ماعاش تمسني
بتسم محمد ونزل يده:عدي تريحي
غالية:لا بنطيب
محمد:عدي انتي نا تو نطيب
عطست غالية مره تانيه لين نزلت ب راسها لوطه ، مسحت خشمها ورفعت راسها:اطيب انت
وشبحت ليده اللي مش قادر يحركها:بيدك هدي
قعد محمد يشبحلها كيف خشمها وخدودها حمر وعيونها مدمعات من العطس واكتر شي نتبه عليه كيف اضم في شفايفها علي بعض وهيا تزمط في ريقها لين غمزاتها يبانو ، حول عيونه منها علي طول وهوا ياخد في نفس كبيير ويمسح علي وجهه:اها عدي تريحي تو ندبر اموري
تلفتت غالية لطاولة وهيا تشبح في الحاجات لشراهم ، رفعت كتافها وخشت قعمزت علي الكرسي:بنتفرج عليك امالا
شبحلها محمد وضحك:علي شني بتتفرجي
غالية:كيف اطيب
وقالت بكل غرور وهيا تتلفت لشكاير وتفتش فيهم:باش كان صارت حالة طارئة ننقد طول
ضحك محمد وتلفت وهوا يطلع في الطنجرة:هيوالله
__
فتحت نادين عيونها علي صوت التليفون ليتصل علي الكمادينو ، نهضت روحها طول وهيا تتلفت تاخد فيه واول ماشافت من ردت طول:انت كويس
غمط فارس عيونه وهوا يحس في جرح يده ورقبته لانه بدي البنج يتحول مفعوله:اي كويس
نادين نزلو دموعها وقالت بالعبرة:فارس باللهي عليك خلينا نمشو من هني خلينا نولو لتركيا اني ماعاش قادره نعيش في خوف انه نخسرك
فتح فارس عيونه ودكر كلام نهي هداكا اليوم " وكلهم خوفوني واني خفت نتزوجو ويتعرضونا او تصير فيك حاجه واني نقعد هكي خفت يصيرلك زي توا تتغرب باش تهرب حياة التعب ماحد يقدر يتحملها حياة رعب وخوف" ، وقال:تعبتي معاي وله
مسحت نادين دموعها وقعده نبرة صوتها واخدتها العبرة:اني نتعب من غيرك يافارس
سكت فارس وحس ب فرق الفرق بين شخص يحبك بكل عيوبك وميزاتك بمشاكلك وبأسوء حلاتك ، وبين شخص اول طيحه ليك يسحب يده من يدك ويخليك تندفن بروحك
فارس:نادين
نادين:نعم
فارس:سامحيني
شدت نادين علي بطنها وصوت بكاها تعالا حست انها محال تكون هيا البادية في الفراق معاه مستحيل تبعد وتخليه .
عارفه روحها انه هدا ترخيص لعزت نفسها ولكرامتها بس تحبه والقلب لما يحب ينسى الكرامه والكبرياء ينسى روحه ينسي حياته كلها وهيا هكي توا .
__
فتح محمد لقجر وخدي كاشيك وتلفتلها وهوا ياخد في فازو الشكلاطه لطايحه فيه من بين يداها وخدي منه وقال:ياسرك تو يرقالك السكر
حطت غالية الكشيك في فمها وهيا تلحس فيه:وشن خصك انت ماسد خدمتني واني مريضه وخليتني نعجلك ونقرطلك لمقطع علي قولتك
ضحك محمد وحط الفازو قدامها وهوا يزمط في ريقه من الشكلاطه ويشبحلها كيف رافعه رجلاها علي الكرسي التاني والعباية قايمتها لا نص رجلاها ووشاحها حاطاته حط وقصتها طالعه محاوطه وجها الدائري الابيض ، وهيا تلحس في الكشيك الشكلاطه ووجها كله ملبز ورايح حاله ومنظرها يهبل تي يقتل هلبااا ومغري لين محمد تحمحم وهوا يجبد في الكرسي من تحت رجلاها لين قريب طاحت وهيا تعيط:تي خيرك
مسح محمد علي رقبته وهوا يتلفت يشبح في الرشده:تحركي وتي الصفرة
غالية ضيقت عيونها:مصح حتي وج....
تلفتلها محمد وهوا رافع حاجبه لين غالية زمطت عقاب الكلمة وهيا تعكس في الدوه وتضرب في جبهتها بكف يدها:وجهي مقعمزه ومسيباتك ماعنديش حق
تلفت محمد وبتسم وهوا عارف كويس انه عكست الدوه علي روحه ، وخلاها تنش علي روحها وتوتي في الصفرة وهيا اتمتم تسب فيه .
__
تاني يوم الصبح فاقت صفاء اللي اصلا ماجاها النوم بكل وهيا طول الوقت تدعي انه مايصيرش من جيانهم ومايصيرش من الخطبه هدي بكل ، كان داخلها نااار جيها مشغولة علي احمد لتدعيلة في كل صلي و من جيها ميته خوف وتفكر في غالية اللي ابصر وين خداها هداكا ، تنهدت وهيا تطلع لأمها لتنادي عليها:نعم ياماما
هيام:اطلعي مع بوك جيبي صفرة بكلاوة وكيكات لضيافة وخودو عصير فرش فراولة ولا مانجا ولا خودوهم الزوز وجيبو شكلاطه لعندنا قريب اتم وجيبو حلاويات مع النسكافي وكان تجيبوه حتي هوا مخلط واتي من كفي لاتي خير وخير
صفاء:اوووف علاش هدا كله ولا بوي نزل معاشه تبي تفلسيه
حدفتها هيام بالفوطه لتلمع بيها في مراية الصالون:بري خير مانمرجك توا وانتي من امس لنقولك عليه تقولي علاش علاش وقالبه وجهك ياوجه الفقر بري البسي بوك قريب يجي يرفعك
نفخت صفاء وخشت لدار وهيا تشبح في صفية وسارة لابسات ، ضيقت عيونها:علي خير انتي وياها
سارة:معاااك ياحنه وين يعني
صفاء:قعمزي انتي وياها وبري عاوني امك
صفية:باللهي عليك خلينا نمشو خاطرنا نطلعو
صفاء صيحت: خلاص امالا برو انتو واني مقعمزه
خشت هيام:خيركم تصيحو
سارة:بنتك النفسيه هدي قلنالها نسايروك قعدت تصيح
صفاء:حترمي نفسك ياناقصه رباية اكبر منك اني
هيام صيحت:ياسر ياااسر ياياماتي السود منكم وحولي منك ليها العباية وزودي عاونيني لا ماشيات لا جايات من بيدير معاي امالا
وطلعت وهيا تكمل وتصيح:خمس توااااني مانلقاكمش قدامي بجريده الخضره اليوم لين تقولو وااااه
نفخت سارة وهيا تشبح بمكر وغيظ لصفاء لتلبس في عبايتها بهدوء
__
شد عصام يد محمد بيديه الزوز وهوا يسلم بحرارة:بارك الله فيك ياخويه ماقصرت
محمد بتسم:مادرت شي نا هضا واجبي
عصام:عسي ان تكرهو شيء وهوا خيرا لكم بالعمله لصارتلي كسبت معرفت راااجل
محمد طبطب علي قلبه:والله ومعرفتك شرف ياخويه
طلق عصام يد محمد لوصله لتاكسي لنزل بعد مامحمد قاله نبيك دقيقه.
راجل التاكسي:تفضل خوية خود راحتك
طبطب محمد علي كتف الراجل وخدي تليفونه لمدهوله:بارك الله فيك
وتلفت محمد وهوا يكتب في الرقم ويتصل بيه اللي عارفه كويس ح يرد طول:الووو مني معايا
محمد:يانعلي من المحترم
فتح سالم عيونه علي وسعهم:محمد
محمد:اي محمد ياكلب لكلاب تي قسم بالله غير نوصل لبنغازي بس لما تاكلها تاكلها الطريحه
سالم زمط ريقه وتحمحم:وعليش
محمد شبح لراجل ليهدرز مع عصام:خود سيارتي وتعالا انت وسفيان لستراحة قمينس
سالم:عليش
محمد :دير كيف ماقتلك حاولو قبل المغرب توصلو
سالم:تمام لكن ....
سكر محمد في وجهه الخط ومشي لراجل ردله تليفونه وتلفت لعصام ومدله فلوس باش لو حتاج حاجه في الطريق وبمينات الله باش قبلهم منه.
وخش الداخل وهوا يسكر في باب الجنان وقبل مايخش شبح للكلب بوب اللي مقعمز في جيها وراقد قرب منه وقعد يلعب عليه وأول ماتلفت شبح غالية واقفه تشبح في الورد وتتمشي جنبه ، وهيا تفكر وسرحانه ، سمعت صوته وراها:عجبوك
تلفتتله غالية طول ورجعت شبحت للورد:اي حلو
بتسم محمد وهوا مركز في وجها اللي رايح اصفر وباين انها بتمرض ، رجعت غالية شبحتله وسألت:امتي بنمشو من هني
مسح محمد علي شعره وهوا يدخل في صوابعه بين خصلاته:اليوم
رفعت غالية عيونها:اليوم ؟ باه وين بنمشو
محمد:لبنغازي
تنهدت غالية وربعت يداها ورجعت سألت:باه هوا حني وين توا
محمد:نحنا في قمينس
ضيقت غالية عيونها:وين
محمد:قمينس
رفعت غالية حواجبها:اه
بتسم محمد علي منظرها.
غالية:باه كيف بنمشو لبنغازي
محمد قرب من الورد وهوا يدخل في يده بين أغصان الورد وقال:خوية وصاحبي جايين ياخدونا
غالية:باه لما بنمشو غادي شن بصير
قطع محمد وردة وطلعها من بين الأغصان وهوا يشد فيها بيده المصبه ويده التانية يحول في الشوك اللي علي غصن الوردة:شني بصير بتقعدي فتره عند هلي مابين لقيت حل لخوك
غالية نفخت وعيونها في الورده لبين يديه:علاش باه مانقعدوش هني ماتقدرش تلقا الحل لأحمد وحني هني
رفع محمد عيونه فيها:نا مانقدرش نتحرك بيكي
غالية:علاش اهو كنا مع بعض وقدرنا نهربو منهم وتقدر تلقا لأحمد حل واني معاك
محمد بتسم:وانتي معايا نا مدرت شي مغير لهروب بس لو انتي مش معايا ره قدرت نيدير وااجد امور
غالية:زي شني
محمد:زي عرفت مكان لقعد يلحق فيا وبيقتلني ره قدرت نحمي هلي بدل مانا بعيد عنهن وقدرت نطلع احمد او هربته معاك لي هنا بعيد عن طرابلس فترة وواجد امور
قعدت غالية تشبحله وفي داخلها تفكر كيف قادر يفكر ويخطط ويشغل عقله وفيه ناس بيقتلوه تي هوا فكرة انه حد نويلك الموت تخوف مابالك فيه ناااس ، او مجموعة من الناس تلحق فيك وبتقتلك تي كان اني ره سلمت روحي ورتحت من الدوشه وعداب لهروب.
__
نزلت صفاء من السيارة:خلاص يابابا تو انزلهم اني ، انت برا لخدمتك
شبحلها مفتاح:باهي غير سكري باب الجنان راك تنسيه مفتوح
صفاء :باهي حاضر
خشت صفاء وحطت الحاجات ونادت علي سارة اللي تكنس في الجنان:زودي شدي البكلاوه والكيكه دخليها
جت سارة خدتهم منها وصفاء طلعت بتجيب صندوق المشروب وهيا كيف قماته جت عينها في عين احمد لواقف قدام حوشهم وهوا مصدوم من منظر الحوش المحروق ، شهقت وهيا تحط في يدها علي فمها وتشبح فيه كيف دموعه علي خدوده وأول ماشافت ايمن راجل خديجه جايه خشت وهيا تبكي سكرت باب الجنان وقعمزت لوطه وهيا تبكي بالصوت علي منظره علي حالته علي دموعه وفي داخلها تنحرق انه مايستاهلش ابدا ليصير فيه مايستاهلش يعيش عيشت لكلاب لي هوا عايشها.
أنت تقرأ
عشق في بلاد حروبها لا تنتهي ( الفتنه و الثأر)
Actionرواية تحكي علي أحداث واقعية ، تناقش خطورة انتشار الفثنة والتأر ومعانات الأهالي بسبب هدا الشي ، وبين هدي الفثنة والتأر تخلق قصص عشق منها مأساوية ومنها تتوج بتأج العشق 💛
