_
_
#عشق_في_بلاد_حروبها_لا_تنتهي
الحلقة 16
(الياقوت)
في الحلقة السابقة
خبطت خديجه علي خدودها وهيا تبكي:ارفعوها للمستشفي البنت مافيهاش نفس
حطها محمد علي الارض وهوا يضغظ علي صدرها ونزل يسمع في دقات قلبها الضعيفه رفع وجهه لوجها وهوا يزمط في ريقه وشد خشمها بيد وبيده التانيه شد دقنها وقرب من شفايفه بشفايفها وهوا ينفخ في فمها...
.
قراءة ممتعة 💛
#البارت_السادس_عشر
.
اكتر من مره وبعد يضغظ علي صدرها ورجع يديرلها في تنفس اصطناعي ، واول ما بقرب للمره التالته بديريلها قعدت غالية تكح وهيا تفتح في عيونها
صفاء:شربوها اميه
وقف محمد علي ركابه وقامها في حضنه:لا الاحسن نعدي بيها المستشفي
وقفت هيام:لالا بارك الله فيك درت واجبك تو نرفعوها
ماعدلش محمد عليها وهوا يوقف وطلع بيها حطها في سيارته وهيا زي الدايخه
جوه راجل خديجه ايمن وبو صفاء مفتاح وقفوه.
ايمن:البنت امانه في رقابينه حني نرفعوها بارك الله فيك انت لا حد هني
فتح محمد الباب وقال:تفضلو عدو معايا بس مش ح تعدي مع حد غيري ، بنت خالتي نا اولي بيها منكم
شبحو ايمن و مفتاح لبعض ورجعو شبحوله
ايمن:تمام نجيب العيلة ونلحقك بالسيارة
ركب محمد وهوا يقيم في يده ومشي بيها وهوا يخبط في الدومان:كلب كلب كلا غر تعدي علي خير بس كان ماقتلتك ياسالم بديا
وتلفتلها وهيا متكيه علي الباب ومغمي عليها زاد محمد من سرعة السيارة...
__
ركبت خديجه مع ايمن وهيا اظمن في هيام ولبنات انه اول ماتشوفها وتظمن عليها ح تتصل اظمنهم .
شبحت خديجه لأيمن وقالت:كيف تخلوها تمشي معاه راجل براني
ايمن:تي اما براني الراجل ولد خالتها
خديجه شهقت:ولد خالتها اول مرة نسمع عندهم خاله من يوم يومي نعرف انهم مقطوعين من شجرة
ايمن:والله علمي علمك بس الولد يدوي شرقاوي اكيد قاطعين بعضهم وكل واحد عايش في جيها
تنهدت خديجه:مرات
__
وقفت نادين قدام باب المظبخ المردود وهيا تسمع.
نهي:هههه حتي اني مانيش مروحه لين نشوفك ، وااااه باش ننكمشو لالا شن نستناك في الجنان ، حتي اني نحبك باي نستني فيك
وخشت نادين وهيا تهد عليها سكرت نهي التليفون علي طول وتلفتت لنادين:نادين
نادين قربت وهيا اضيق في عيونها:شن اديري هني بروحك
نهي توثرة:اه هوا لا ولا شي كنت نهدرز اني وصاحبتي واهو جايه تعالي خلينا نشربو الشاهي
وطلعت وخلت نادين واقفه ومش عارفه شن اللي قعد يصير:انىي اكيد الحمل مأتر عليا اكيد
ومشت قعمزت معهم وهيا مركزه علي نهي اللي تضحك وزاهيتلها غير العاده ، لين ضرب نادين الشك وهيا تفكر ، يعني شن صار في يوم وليله معقوله كلماته حن عليها وردلها شن صاير نبي نعرف ياربي من لكانت تكلم فيه وبتستناه في الجنان من يجينا معقوله فارس؟ وسكتت وهيا اطبس في راسها وتشد في بطنها بين يداها
قعدت مهبيه تسمع في تهدريزهم وضحكهم وهيا مركزه علي نهي اللي مره مره توقف تشبح من الرواشن
لهت نادين شوي مع زيد اللي ينقنق وقعدت تهدرز عليه بشويه باش يسكت ، واول مارفعت راسها بتشبح نهي لقتها مهناش.
ضيقت عيونها ووقفت ومشت للمظبخ بس ملقت حد مشت للحمام طقطقت ماحد رد عليها فتحاته مافي حد فتحت باب الرئيسي وشافت الجنان كان فاضي سكرت الباب وهيا تتنهد و ولت للمظبخ وهيا تدوي مع روحها:وين مشت هادي
وتكت علي الرخامه وهيا تفكر رفعت راسها لباب الكوجينه وهيا تسمع في تقربيع علي الباب ضيقت عيونها وهيا تقرب تفتح فيه واول مافتحاته وكبهت علي ليمين شبحت نهي واقفه في نهاية السور وتهدرز مع حد مدرقه الحيط قعدت واقفه تسمع بس ماسمعتش لانه كانت تدوي بصوت واطي ، قعدت نادين شوي بس ماجتهاش الجراءة تمشي تشوف مع من واقفه خافت ، اي خافت يطلع لي في بالها صح خشت الداخل ودموعها نزلو وهيا تمسح فيهم وتحاول تتعود من الشيطان ، طلعت من المظبخ وكانت تبي تمشي جنبهم بس انفتح الباب وخش فارس وتلفتت وهيا تشبح في نهي تطلع من الكوجينه ومبتسمه وخشت تجري جنب لبنات
قعدت نادين واقفه وتشبح لفارس لحول سبيدروه وشبحلها ببتسامه:خيرك
نادين:وين كنت
فارس:كنت مع بوك
نادين ضيقت عيونها:متأكد
فارس:شن متأكد شن متعوده عليا نكدب عليك
__
ايلاف قعمزت علي الكرسي وهيا تشهق:ياحليلي عليها وباه شن صار توا
صفاء مسحت دموعها:توا كيف روحت منها جارتنا خديجه قالت قعده راقده ودارولها الاكسجين وتغديه
ايلاف:ومن قعد معاها
صفاء:ممنوع المرافقه بس قالت ولد خالتها قعد قدام المستشفي
ايلاف:اه باه
صفاء:عندك علم انه اول مرة نسمعو انه عندهم خاله والله غريب واني ابصر وين شفته الولد هدا والله شايفاته لكن نسيت وين
ايلاف:هوا مش وقته بس هههه بالحق دارلها قبلة الحياة هههه
صفاء:تحشمي ياللي ماتستحي توا وقت صياعة
ايلاف:والله علقت في راسي ههههه
صفاء:هوا الصراحه حتي اني علقت في راسي هههه
ايلاف:اطلع ياحق ربي باه قوليلي هوا حلو هكي يعني لما تنوض غالية ونحكولها ما تنقرفش منه ههههههه
صفاء:لا الحق وااااه يقتل هوا محلاه هههه تي هدي ح تسيخ علينا لما بنقولولها هههه وااااك درقي وجهك صيعتيني معاك
__
زياد:يافندي لازم نبعتلك الأمن خطر عليك تقعد بروحك في مكان عام
اتكه محمد بظهره علي كرسي السياره وهوا يعدل في المرايا ويشبح في السيارة اللي ملاحظها طول اليوم تلحق فيه وقال وهوا يجبد من الدخان ويطلع فيه من خشمه:لا كان صار لصار نسيبلهم السياره هدي ونعدي بالاخري من غير مايحسو عليّ
زياد:تمام يافندي
سكر محمد وفتح الباب لوح السبسي وعفس عليه وهوا ينزل ويسكر في السيارة وقف للحظه وهوا يلاحظ في حد نزل من السيارة لتلاحق فيه ، خش للمستشفي وهوا ملاحظ الخطوات اللي وراه زين قعد يلود في الدور الاول ويخش ويطلع من مكان لا مكان ويقصد انه يخش في جيهة التحليلات وسحب الدم يعني جيهات الزحمه لين ريحه وطلع في الاسانسير رص علي الدور الرابع وركب .
أنت تقرأ
عشق في بلاد حروبها لا تنتهي ( الفتنه و الثأر)
Actionرواية تحكي علي أحداث واقعية ، تناقش خطورة انتشار الفثنة والتأر ومعانات الأهالي بسبب هدا الشي ، وبين هدي الفثنة والتأر تخلق قصص عشق منها مأساوية ومنها تتوج بتأج العشق 💛
