عشق في بلاد حروبها لا تنتهي ( الفتنه و الثأر)

البارت 19

_
_
#عشق_في_بلاد_حروبها_لا_تنتهي
   الحلقة 19
(الياقوت)
في الحلقة السابقة
فارس شد نادين من مرفقها وقربها من نهي:تأسفي قتلك
حاولت نادين تفك يده ودموعها نزلو وقالت بعياط:اني ماقلت شي لا قلتلها لا رخيصه لا من لكلام لقالاته ولو هيا قالاته في روحها عادي فهيا رخيصه اي واهو اني نقولهالها
ومن غير مايحس فارس علي روحه ضربها كف وهوا يدف فيها علي الطاوله لجت علي بطنها بالقوة .
نهي عيطت وهيا تقرب من نادين:لا يافارس مش باهي للعيل علاش درت هكي
حس فارس قداش مانادين تافها ومتع مشاكل لما شاف نهي كيف قربت منها...
.
قراءة ممتعة
#البارت_التاسع_عشر
.
حتي بعد ما أهانتها وهيا تحاول تساعدها بس نادين قعدت ادف فيها وباين عليها توجعت
قربت ناجيه وشدت نهي من يدها وجبدتها:ربي مرتك ياولد اختي كان هدا ح تقطعك من الناس كلهم
وطلعت وخلاته يتلفت لنادين لقعده شاده في الطاوله وحاسه بألم في بطنها ، قرب ولفها ليه وهوا يشد فيها من دقنها لين نادين قعدة تحولاه في يده وتبعد فيه .
فارس:الرخاص الي زيك بس مايصدقو حصلو علي راجل مش نهي اللي احسن منك ماتسوي ظفرها انتي
ودفها التالي لين طاحت لوطه وهيا تبكي ومارفعتش راسها فيه وهوا يطلع ويقربع في الباب بالقوه وخلاها تبكي بالقوة حست روحها انها رخيصه حق رخيصه عنده هوا ورخيصه لانه فعلا ماصدقت حصلاته وولت مرته واول ماشبحت لوطه شافت الدم ينزل من بين رجلاها عيطت وهيا تلصق في رجلاها في بعض وشاده بطنها وتصيح:لا ياربي لااااااااااااااا
__
#غالية
تلفتله بستغراب واني نسأل:هدي مش طريق المطار
رد عليا من غير مايشبحلي وهوا باين من ملامحه متوجع من الرصاصه:بنكملو بالسيارة مانقدروش نعدو من المطار
نفخت واني نرد نشبح لروشن وتكيت عليه براسي واني نفكر ، في يومين بس نقلبت حياتي فوقي لوطي ، لا هيا حياتي مقلوبه من 7 سنين بس توا بزياده قد ماشفت من رعب وخوف ماشفتش زي اليومين هدو علي المرتين خلاص ح نموت بس نطلع في اخر لحظه زي الشعره من العجين ، وكله بسبب من .
واول ماتلفتت بنشبحله جت عيني في عينه حولت عيوني طول ورجعت تكيت راسي علي المرش .
اللي كان خطر حياتنا الوحيد اني وخوتي ولا مصدر الامان الوحيد ليا ، الله علي الدنيا كيف تقلب الموازين اني توا مع الشخص اللي خوه قتل بابا قدام عيوني الشخص اللي اول ماطلع يبي ينتقم لخوه نتمناله في الموت هوا نفسه اللي انقدني من الموت .
تنهدت بالقوة ودكرت خديجه وصفاء وعمتي هيام ، اكيد يحسابوني انخطفت ولا حاجه واااه تراهم خايفين عليا هلباااا ويدورو فيا .
تلفتله وقلت:عادي تعطيني تليفونك نبي ندير مكالمه
تلفتلي وهوا يضق في عيونه:لي من
لجحي علي قولتك في خاطري اكيد وقلت:لجيرانا اكيد خايفين عليا
رجع تلفت قدامه ورد:لا
رفعت حواجبي:شني
محمد:لاا
شديت نفسي واني نحاول مانعيطش عليه ونجبد ام السلاح اللي قدامي ونفسدله كتفه التاني وتلفت لروشن واني نخبط في رجليا بكل صحتي :اااااااييييي
ياعن فيته رجليا نسيتهم طبست طول ونحيت السبيدرو نتحسس عليهم واني نسمع فيه:حولي الكويش بيش مايوجعوكش
تلفتله واني قعده مطبسه:تي شن هوا الكويش هدا
بتسم بخفه وشبحلي:يانا علي من الغرباويه لمسكرة
قلت من غير مانفكر:ويحليلي من الشرقاوي المغلوق غلق اللي يحاول يخفف دمه اللي زي القطران
وااااه عليا شن قلت حطيت يديا علي فمي طول واني نقيم في روحي ونشبحله كيف بلوحني من الروشن ، بس قعد يضحك وهوا يزيد في سرعة السيارة لين انضربت في كرسي السيارة براسي
__
#ايلاف
اوووف ياربي خيرني شن صارلي بديت نفكر فيه هلبااا وهدا غلط وغلط كبير لانه قعده مش متأكده كان ماقتلاش حق ، اوووف ياايلاف اوووف
انخلعت من سراج لخش هاد علي المظبخ:اوفي ديريلي نص جعان
تلفتله برفعت حاجب:اوفي؟؟ انت سراج ولا من بزبط
بتسم وقعمز علي الكرسي:ازح اطيري النيه من الواحد يدلعك تي ديريلي يافرخه نص جعان بنولي للمحل
تلفتت وقعدت نقلي في دحي واني نفكر زعما لو حتي تبتو برائته وجي وخطبني ح يوافقو والله علي جتتهم ياخدني حتي لو كان مش قاتل بس مش ح يعطوني ليه لانه اول شي متع مليشيات والجو هدا.
نفخت واني نحول في الطاوه من فوق النار ، بطلي حلم ياايلاف لانه سفيان حلم بعييييييييييييد مستحيل نقدر نوصله .
درتله نص وسخنتله الشاهي ودرت لروحي معاه وقعمزت جنبه وقعدت نفكر مع روحي لين قاطعني وهوا يسأل:هوا حوش الحاج رجب كم عنده بنت من غير اللي متزوجها الكلب
رديت واني نرفع في كتافي:عنده زوز فاطمه وفرح
هز راسه واني ضربني الشك تلفتله واني نضيق في عيوني:علاش بتناسب
رفع فيا حاجبه وشبحلي بربع عينه:لو تكون اخر بنت ماناخدها ونعادل الكلب خو لمسخ المجرم
__
وقف محمد السياره علي الجنب وهوا يرجع في راسه التالي من الألم وغالية تلفتتله وهيا مستغربه:خيرك وقفت
بس اول ماشافاته كيف مرجع راسه التالي وهوا يقيم في يده يشبح في الجرح خافت:انت كويس
محمد:كويس مافيا شي
غالية قربت وهيا تمس في كتفه بشويه ورجعت شبحت يدها وهيا تشهق:دم ينزل
محمد:مانحسش فيه عادي
غالية ضيقت عيونها:علي من تكدب شوف روحك كيف باين عليك الوجع
شبحلها محمد وهوا يميل في راسه:انتي من وين متعلمه الجلاطة اللسان هدي
غالية:اكيد مش منك لأنك انت بروفيسور فيها
بتسم محمد ورفع حواجبه:والله
لاحظة غالية علي روحها انه بدت تاخد وتعطي معاه حتي ولو عراك بس ماتبيش هكي تبي تدكر علي طول انه خوه قاتل بوها وهوا يبي يقتل خوها تلفتت وربعت يدها بغل .
حس محمك بيها اللي تلفت وهوا يحاول يتماسك ويتحمل وجعه لبنغازي وولع السيارة وتحرك وهوا يشبح لغالية طبست تمس في رجلاها من فوق السبيدرو
محمد:حولي سبيدروك بيش يتهوو
غالية:وكأني منحياته اصلا وااااسع هلبااا هوا
رفع محمد حاجبه:مش 37 ؟؟
غالية رفعت كتافها:مرات نلبس حتي في 36 شكله نوعيته حجم كبير
بتسم محمد:الطول هضا كله علي كرعين طشه
غالية:ربي هكي خلقني طويله ورجلي صغيره
وتلفتتله وهيا اضيق في عيونها:ولا حسد هدا
ضحك محمد وهز راسه بتسهويك:هيوالله حاسدك
رجعت غالية تلفتت لروشن وهيا تنفخ وتشبح لرجلاها من فوق وتحس فيهم يوزوز هلباااا
__
بعد مافارس طلع من الحوش قعد يلود في الشارع وهوا يدخن سبسي ورا سبسي وهوا متعصب ، وحس روحه يفقد في عيلته واحد ورا واحد ، وأهو فقد خالته بسبت غيرة نادين اللي ماليهاش دعيه والسانها السليط ، نفخ وهوا يمسح علي جبهته وفكر في سفيان ، دخل يده في جيبه بطلع تليفونه باش يتصل بيه بس مالقاشي قعد يدور فيه في جيوبه بس مالقاشي نفخ وقال:اكيد نسيته علي المدخل
__
تلفتت غالية لمحمد وهيا تبي تتكلم بس متحشمه كل مابتجي تتكلم تسكت وترجع تتلفت لروشن لين محمد لاحظ عليها بس ماباش يتكلم
غالية:امتي بنوصلو
محمد:مزال واجد
نفخت غالية وكيف بتتكلم بس تنهدت ورجعت اتكت علي الكرسي ، وهيا تفكر ، اوووف ياغالية خلاص بنخش الحمام واااه مش قادره حتي نتنفس .
ورجعت تلفتتله وتبي تتكلم بس زي العاده سكتت وكيف بتتلفت تكلمه
محمد:تكلمي مانعضش نا
ضيقت غالية عيونها:لا باللهي عضني
واول ماتلفتلها محمد تحمحمت وخافت:احم هوا اني يعني اوووووف شي مانبي شي
وتلفتت قدامها وخلاته مستغرب خيرها ، ورجعت سألت:هوا مزالت هلبا هلبا
بتسم محمد:وزيدي هلبا اخري
شبحتله غاليه وهيا تقلب في شفايفها:الله
وشبحت قدامها وهيا تقول في وسط نفختها:شن بصبرني
ضحك محمد بخفه وقعد يخف في سرعة السيارة ودرسها قدام مطعم وطفاها وشبحلها كيف تشبح للمطعم وقالت:خيرك وقفت
لبس محمد برنوسه وقال ببتسامه وهوا يلبس في النطارات:هي انزلي مش تبي الحمام
نصدمت غالية وقالت وهيا تشبح فيه يفتح في الباب:من قالك بنخش الحمام
محمد:انزلي هههههه
ضربت غالية وجها بكفوف يداها:حشششمه حشمه
ونزلت وهيا تشلك بهداكا السبيدرو لكبير والعبايه لقليمتها فوق ونص السروال يبان هههه وتجري وراه
خشو للمطعم وسأل محمد القرسون علي مكان الحمام
القرسون:تفضلو من الجيها هديكا
بتسم محمد للقرسون وشبح لغالية لقالت:ماعاش تشبحلي
وسي محمد ماعاش قدر يبطل ضحك وهوا يشبح فيها تمشي قدامه وتنفخ بمنظرها المزري والجاسكار البودري يشعشع من بعيد
واول ماحست بخطواته وراها تلفتتله وهيا تنقص في صوتها باش الناس مايسمعوهاش:تي وين ماشي معاي
محمد رفع كتافه بستعباط:للحمام
غالية رفعت حواجبها:ونبي
محمد ضحك:هههه كنك عادي كيف بنتي انتي
غمظت غالية عيونها وهيا تاخد في النفس بتعصيب وفتحت عيونها وقالت:ماتخلينيش ألم عليك الناس
حول محمد البرنوس وفاتها وهوا يمشي لطاوله لوراها وخلاها تتلفتلها ، وحطت صبعها في فمها وهيا تنتش فيه وقلبت شفايفها بحشمه وهيا تشبح فيه قعد يضحك عليها وهوا يقعمز علي الكرسي .
__
خش فارس للحوش وهوا يمشي للمدخل لمقابل الباب وخدي تليفونه وقبل مايطلع شرين تليفونه لشافه ورد:ايوه عمي
حاج فتحي: شن حالك ياولدي
رد فارس وهوا يطلع ويسكر في الباب:الحمدالله وانت شن حالك والله امس قبل منجي نسأل عليك لهيت
حاج فتحي:الحمدالله من عند ربي ياولدي تعالا والله ديما مكسد في هجنان بروحي طاسة جاية وطاسه ماشيه شاهي احمر ومره اخضر
ضحك فارس:صحيحه
حاج فتحي:سلمك سلمك غر بنقولك لبنات مشو لنادين طقو طقو مافتحتش طالعين ولا شن قلقو عليها
فارس ستغرب وتلفت لباب الحوش:لا والله اهو اني قدام الحوش تو نشوفها
الحاج فتحي:امالا قلها تجي هني خالتها جايه
سكر فارس من الحاج فتحي وولا فتح الباب وهوا ينادي:ناااادين
قعد يدور فيها في الديار بس مهناش واول ماخش للكوجينه شبحها مقعمزه ولافه يداها علي رجلها اللي ضامتهم في بعض وكلها ملضخه بالدم لسايح علي ارضية المظبخ ، قرب بسرعه وهوا حاس قلبه بيطلع من بين طلوعه:ن..ن.نادين
واول مامسها طاحت وهيا فاقده وعيها زاد قلبه يدق وهوا يشبح لدم ، شد وجها بين يده ودموعه بين رموشه وهوا يفيق فيها بس كان مغمي عليها ومش حاسه ب ولا شي .
__
#غالية
اوووف كنت بنموت لو ماخشيتش بس والله دكي كيف عرفني بنخش للحمام ، يالله المهم عرف ههههه لانه علي شوي درتها في السيارة ههههه ، كملت وغسلة يديا وطلعت واني نولي لدماغول المجرم .
طلعت واني نشبح فيه كيف مقعمز علي الكرسي ومنزل روحه شوي ورافع رجله حاطها علي حديدة الطاولة وهوا ابصر في من يكلم في تليفونه لشاده بروس صوابعه ، الحق الحق بعيد عن اللي صار كله قبل ، كان مش منه ره توا اني تحت يدين هدوكم المجرمين هوا حتي هوا مجرم زيهم وحقير بس نقد حياتي ، لحظه لحظه ياغبيه اصلا لو مش من تحت راسه ره اني توا في أمان واستقرار نفسي وعصبي ومش متلاحقه من عصابه ولا مليشيات ولا بلي اسود اغبر علي راسه ، اوووووف
مشيت قعمزت قدامه وقعدت نشبح في رجليا اللي يوزوز وااااه يحرقو فيا من لوطه وحاسه دم ينزل مش قادره حتي نمشي زي العالم والناس
تنهدت واني نرفع في راسي ونشبحله كيف يتكلم بكل جديه يخوف شخصيته زي زي زي مانعرفش قبل بنشبهه بالحديد بس لحديد يصدي بس هوا لا ، بجديات لو اني كليتها الرصاصه ره متت في وقتي وزماني حتي لو ناشتني نوشان مش خشت فيا زيه .
بتسمت زي المهبوله من غير ماننتبه علي روحي ورجعت شبحتله وهوا يكلم ويعطي في الاوامر اصلا من لما عرفته وهوا يتأمر وبس
ضيقت عيوني وقلبت خليقتي اول ماشبحلي وهوا قعد يتكلم في التليفون ، مابيتش انحي عيوني واني نبعت في الشرارات التهديديه ...
.
.
.
#يتبع_للبارت_لبعده
____________________________________
بداء كتاب الرواية في 2019 / أبـــ4ٰـــريل / 7
تم وضع قَفلة لـ الرواية في 2019 / سبتــ9ٰـــمبر / 25