عشق في بلاد حروبها لا تنتهي ( الفتنه و الثأر)

البارت التاني

_
_
#عشق_في_بلاد_حروبهاء_لا_تنتهي
البارت 2
(الياقوت)
في الحلقه السابقه
كنت جايه نبي نسمع بس لقيت روحي نشوف كيف بابا مات بين عيوني وقبل مانوخر ونمشي نطلعلهم سمعت طلقة نار تانيه تلفتت لروشن علي طول وقلبي بين يديا واني نحساب انه قتلو واحد من خوتي بس شبحت خوي مجدي شاد سلاح وقتل هداكا الكلب لقتل بابا .....
.
قراءة ممتعه💛
#البارت_التاني
.
من بعد هداكا اليوم ولت حياتنا أسواء من الجحيم نفسه ، مجدي خوي هرب بعد ماأمي عطاته دهبها باش يقدر يتصرف ويعيش واحمد خوي لكبير ولا يتلاقا في تهديدات من جهات امن ومره مره يجو يهدو علينا ويرعشو فينا علي خاطر بابا كان ضابظ  في النظام السابق ، كل حساب بابا لي في المصرف سحبوه وقعدنا علي لحديده احمد قعد هوا الوحيد مصدر العيش لينا برغم انه بعد لصار طردوه من خدمته ك طيار وقعد يخدم في كل مكان باش يعيشنا اني وماما تبهدلنا ولت حياتنا جحيم من حوش لا حوش نهربو من التهديدات بس يلقو فينا في كل مره ، في وقتها كنت صغيره بس ماما غرسة فيا الخوف بأن كل مايخش حد علينا لازم ندرق روحي وحتي لو شفتهم ماتو مانطلعش كانت هكي تقولي هيا واحمد خوي كبرت بكابوس مرافقني انه لازم مايشوفونيش كان هدا ح نكون الضحيه الوحيده ، لين ولت حال لبلاد مستقره شوي بس للاسف قعده التهديدات هدي بس اخف من قبل بهلبا لكن مجدي خوي قعد هارب وفعلا ماعاش نندرو عليه وين ، ماعاش نندرو كان هوا عايش او ميت .
__
عبق نسيمك غير ، فايح اصيل الهيل ، عبق نسمتك يبلادي محلاه ، يزهر ورود اصيلا ياحلوة التبسيمه 💛
.
نزلت نادين من الطياره وهيا تستنشق في الهواء لهب علي وجها ببتسامه ودمعه عابره علي خدها ادكرة كل لاحظه عاشتها فيها الله قداش ماستاحشتها قداش مابكت علي فراقها وفراق ناسها الغاليا ، قعدت واقفه في مكانها تبتسم وعيونها تلود في كل مكان في المطار تلفتت اول ماسمعت صوت فارس:هيا
هزة راسها ومشت وراه وهيا شاده زيد في حضنها لين شبحت خال فارس معاذ من بعيد ، تنهدت ورفعت راسها شبحت فارس اللي ملامح وجهه متحجره باين عليهم الألم واضح ، تنهدت وهيا تشبح قدامها لمعاذ لقرب من فارس وحضنه علي طول بس فارس مادارش اي ردت فعل او بادله الحضن ، بعد معاذ وشبح لفارس وقال وهوا يطبطب علي كتفه:خسارتي اكبر من خسارتك اني فقدت اخت وام
هز فارس راسه بشويه وقال:خلينا نمشو وقت علي الجنازه
__
#نادين
اول ماوصلنا لشارعنا شبحت الخيمه المنصوبه قدام حوش فارس قعدت نشبح في الشارع وفي حوشنا من بعيد ودموعي مابطلوش بكل قصدي ليا سناتين بعيده ماشفتش لا امي لا بوي لا خوتي عايشه في غربه ، وقف خالي معاذ السياره ونزلت اني وزيد وهما مشو للجنازه قعدت واقفه قدام الخيمه وخايفه نشبح للحوش ولسياره لي فيها فارس صح انه كمية المشاكل اللي بينا مخليتنا بعاااااد علي بعض وديما نحس فيه بعيد عليا بس لأول مره يجيني احساس انه ماعاش نعرف حد الا هوا نخاف نقعد من غيره وكأني بيبي صغير خايف امه تمشي وتخليه في حوش جده هكي احساسي اني توا خديت نفس واني نمسح في دموعي وخشيت للخيمه لكانت معبيه ناس اللي يبكي واللي يهدرز ودوشت صغار يتجارو يلعبو ، زمطت ريقي وزدت ضميت زيد المستغرب ومشيت خشيت للحوش اللي اول ماخشيتله شبحت امي لمقعمزه في الصالون وتبكي وأول ماشبحتني زاد صوت بكاها ، حطيت زيد لوطه ومشيتلها نجري حضنتها واني نبكي ، نبكي من الشوق لقتلني وعلي ماما ماجده وعلي كل شي حسيت قلبي محررووووق ومافيش من يطفي ناره
__
مسح وجهه بديه الزوز وفتح باب السياره ونزل وهوا يطلع في مفاتيح الحوش ويفتح في الباب اللي اول مافتحه وسكره وراه سمع صوتها:محمد
نح محمد البوتيل العسكري والتجيبوطي وخشلها في الصالون:نعم ياامي
قرب منها وقعمز علي ركابه قدامها وهوا يبوس في يداها لرفعتهم وهيا تمسح علي شعره:كنك تعطلت ياولد الساعه 2 لا امتي بتقعد في الخدمه لدمرتكن هدي امتي بتسيبها ياولدي كان تبي رضاي سيبها ياسر مدارت فينا وفي خوك
قعمز محمد زين وقال:وين عيشه
تنهدت امه وهيا تمتم:ربي يهديك ياولدي ريي يهديك ، ياناري من مبدري وهيا جنبي لين نعست وخداها النوم عدة رقدت
قعد ساكت شوي وهوا يشبح لصورة خوه لمعلقه في الصاله وبعدها قال:امي نقتل خوه
شهقت امه وضربت خدودها:لا ياولدي لا اقتله هوا هوا لقتل مش خوه
ضرب محمد يده علي الأرض وقال:كأنه نشقت الارض وبلعاته مافيش مكان مادورتش فيه ياأمي يانلقاه ياوالله نقتله عيلته ماني فاطن لشيء لا امه لا اخته لا خوه
قال اخر كلامه وهوا يفكر فيه كويس .
__
#غاليه
...:أعود بالله من الشيطان الرجيم
خديت نفسي وانا نلهت بسيف ونضت قعمزت ونمسح في عرقي من الكبوس لشفته أعود بالله من الشيطان الرجيم ، كبوس هوا كبوس وبس تلفتت جنبي شبحت ماما مهناش قلبي غزني هلبااا نضت علي طول ندور عليها في الحوش والنادي لين لقيتها في دارها هيا وبابا راقده علي السرير وشكلها غفت مابيتش نفيقها ليها يومين من لما رفعو احمد خوي ماذاقتش طعم النوم رديت الباب عليها ومشيت درت عليا الوضؤ وصليت ركعتين ودعيت وقعدت نقرا في القرآن لين نعست سكرت المصحف وحطيته جنبي ورقدت بملاية الصلاة في مكاني واني نفكر في حلمتي لا كبوس مش حلم.
انخلعت علي صبح ربي علي دقات الباب لقويه لخلتني من الخلعه انوض واقفه من نومي مشيت نجري للباب وقلت:مني
سمعت صوته اللي ستوعبت انه الخوف هداكا اللي تربيت معاه معقوله يصير:افتحي
حاولت نطلع صوتي اللي هرب:م..مافيش حد في الحوش اني وماما بس
قعدت اراجي فيه امتي يرد عليا بس قعد نصيب ساكت..
__
بتسم بخبث وقال:لا حشيش لنقنه مش من مستواه خليها قضية حبوب تقل الميزان شوي
جاه الرد من سماعة التليفون:حاضر يافندي بس مرات عنده واسطه وتنقلب علينا
رد محمد وهوا يشبح للحوش اللي قدامه:لبلاد كلها مقلوبه جت علينا خلينا نقلبوها حتي نحنا هني روحك ودير لقتلك عنه
سكر محمد التليفون وفتح باب السياره ونزل وهوا يشبح لشباب لكيف بينزلو من السياره التانيه رفع يده وقال:خليكم
وتلفت وهوا يمشي جيهت الحوش لين وقف قدام الباب رفع يده ودق باب الحوش بالقوه لين خلا غاليه تنوض واقفه مخلوعه من قوة التبرزيم ، خدت نفس ومشت تجري وقفت ورا الباب وقالت برعشت خوف بانت من صوتها:مني
نزل ايده من علي الباب وقال بصوت عالي خلا الرعشه تسري في جسم غاليه اللي الافكار قعدت تجيب فيها وترفعها وهيا تسمع في صوته المتعصب:افتحي
شدت ملاية الصلاة علي روحها وقالت بصوت متقطع هارب:م..مافيش حد في الحوش اني وماما بس
زمطت غاليه ريقها وقعدت تراجي في رده بس ماجاها شي لين حست انه مشي بس قبل ماتصدق انه مشي وتفتح الباب جاها صوته:نا جاي نبي امك ناديها
خافت غالية وسيباته ومشت تجري لدار امها لخشت عليها زي الأعصار تنادي:ماما ماما نوضي بسرعه لشد احمد خوي برا يبيك
نحت غاليه الشرشاف علي أمها وهيا تمسلها في وجها باش تنوض:تي ياماما نوضي
خدت غاليه نفس وهيا تبعد وتحاول تاخد نفسها لهرب من الخوف وتفتح في عيونها زين وتشبح لإمها لقعده راقده:ماما
زمطت ريقها وهدت نفسها شوي وهيا تقرب منها وتشد في وجها بين يديها:ماما خيرك نوضي اني نكلم فيك لشد احمد يبيك ماما نوضي باللهي عليك ماما خيرك ماماااا
قعدت غاليه تهز في امها اللي مش داريه بشيء وتنادي فيها بطول حسها وتعيط لين ستوعبت انها امها مش ح تنوض بعدت وهيا ترعش ووجها احمر ودموعها علي خدودها وتردد في:ماما موتي ماما ماتت
بعدت علي امها ووقفت علي حيلها وهيا ترشف في دموعها وقعدت ضامه روحها وتشبح لأمها وتسمع في تخبيط الباب وهيا مصدومه مش قادره تستوعب معقوله الكبوس لحلمت بيه تحقق وبهدي السرعه ، و لهدرجه الناس ماعاش في قلبها رحمه يقتلو في الشباب يحسابو انه قتلوه خلاص واللي وراه امه بوه وعيلته ماطنوش انه الحسره تقتل .
مسحت وجها بداها وطلعت من الدار تجري لباب الحوش لأول مافتحاته هجمت علي محمد لكان عاطي بظهره وهيا تضرب وتعيط بطول حسها لين الجيران طلعو:حسبي الله فيكم حسبي الله قتلتو امي قتلتوها بحسرتها علي خوتي وبوي الله ياخد فيكم حقنا خليتونا نكرهو بلادنا ماما ماتت ماتت ارتاحو وليت يتيمه لا ام لا اب لا خوت لا حد اقتلوني وريحو روحكم
دفها محمد من عليه وعيط علي الشباب لجو يجرو اول ماشافو غاليه هجمت عليه:خليكم غادي
وقفو الشباب بعيد ومحمد قعد واقف يشبح في غاليه كيف جوها الجارات يهدو فيها وهيا تخبط في روحها وتقولهم:ماما ماتت ماما مشت ماعندي حد كلهم خدوهم لكلاب هدوم دمرونا الله يدمرهم
رفعت غاليه عيونها في محمد وهيا تبكي وتعيط عليه:ان شاءالله ادوق لدقته ان شاءالله ينحرق قلبك انت وعيلتك كلها زي ماحرقت قلبي انا وعيلتي
شدوها الجارات والجيران بصمت مايبي حد يتكلم او يدخل كل حد نفسي نفسي مايبيش يطلع لسانه ويلقا روحه في الحبس
__
نفخت نادين وهيا اضيق في عيونها:هاتيه نبي نوكله
تلفتتلها البنت ومدتلها زيد:يشبه فارس هلبا
خدت نادين زيد في حضنها وقالت:اكيد بيشبها ولده ، فطوم تعالي
كتمت فاطمه ضحكتها وهيا تشبح لأختها فرح لقعمزت جنب بنت خالت فارس:ماتخديش عليها اعصابها تعبانه
هزة نهي راسها:لا عادي
خشت نادين للمطبخ وحطت زيد علي الرخامه وهيا تساويله في حوايجه
فاطمه:حماره عيب عليك تعاملي في البنت هكي
تلفتتلها نادين:لا مش عيب كيفي وبعدين حني في عزي مش في عرس جايتلي علي سنكت عشره ولا تقول خالتها لميته الله يرحمك ياماما ماجده الله يرحمك
تنهدت فاطمه وربعت يداها:الله يرحمها مافي حد ماجاش الناس كلها تحبها فيهم الخير لي في جاي من بعيد بكل برغم لبلاد مقلوبه
بتسمت نادين علي الجنب بهزوه:شن تبي فيهم توا لما ستحقتلهم مالقت حد كلهم لاموها انه ماربتش صغارها زين وقالو ماعرفتش تربي لا هيا لا عمي صلاح الله يرحمه توا لما عرفوها ماتت جو وقالو باهيا يااختي الناس منافقين في بلادي
سكتت فاطمه وهيا تشبح لفرح لخشت عليهم:نادين
تلفتتلها نادين:نعم
فرح:فارس في حوشنا قال يبيك
مسحت نادين فم زيد من الزبادي:فاطمه خلي زيد عندك بالله...
قطعت عليها فرح وهيا تقرب تبوس في زيد:لا قال يبي حتي زيد
نادين:من معاه في حوشنا
فرح:خوي عمر بس يراجي في بابا بيرفعه لحوش خالتي
لبست نادين زيد جيبوطيه وقماته وهيا تلف في وشاحها وتفكر في فارس تبي تشوفه لانه من امس لما حطوها قدام الحوش ماعاش شافاته. طلعت من حوش فارس ومشت لحوشهم وأول ماخشت لجنانهم لقت بوها وفارس وخوها عمر قربت منهم:اسلام عليكم
تلفت بوها وأول ماشبحها بتسم:نادين
ضحكت نادين ووقفت زيد لوطه وقربت من بوها وحضناته:ستاحشتك هلباااا
طبطب الحاج فتحي علي ضهرها وبعد عليها :حتي اني يابنتي تو بعدين نهدرزو اني بنمشي نوصل خوك لحوش خالتك ونجي
بتسمت نادين لعمر وهزة راسها:باه
قعدت تشبح لبوها لطلع...
.
.
.
#يتبع_للبارت_لبعده
____________________________________
بداء كتابة الرواية في 2019 / أبـــ4ٰـــريل / 7
تم وضع قَفلة لـ الرواية في 2019 / سبتــ9ٰـــمبر / 25