عشق في بلاد حروبها لا تنتهي ( الفتنه و الثأر)

البارت 38

_
_
#عشق_في_بلاد_حروبها_لا_تنتهي
#تكملت_الجزاء_الأول الحلقة(38)
.
في الحلقة السابقة
زياد وقف وخبط علي كتف سفيان لشبحله:هي نوض تلحلح بعدين بجيبو لمساجين ومعاهم مالك
مسح سفيان علي وجهه ووقف وهوا يراجي في اللحظه هدي من لما قاله محمد انه محبوس ، مش ح يعدبه ولا شي بس يبي ياخد منه حقه ويتعاقب علي العقوبه لربطها في رقبته بسبب ذنبه وجرمه هوا ....

قراءة ممتعة
#البارت_الثامن_والتلاتون

المخيف ليس بأن هناك سم يجري في عروقي ، بل هوا ان يكون صديقي هوا عدوي ، وعدوي هوا صديقي 💔
(الياقوت)
.
.
#أحداث_من_الحلقات_السابقة_لم_تدكر
وقف الصقر وهوا يشبح للبضعة والدخاير والكلاشنات لي في المقر وقال:عبو لكلاشنات ووزعو علي الشباب وعطوهم تصريحات لرفع السلاح
علي:تمام سيدي
طلعو من المخزن تحت انظار سفيان لي مش ملاحظين وجوده ، جي علي جنب الصقر وقال:سيدي واحمد شني نجيبه اليوم ولا غدوه
الصقر ضحك : نقولك جيبه جيبه واعطيه لعفن لي يبيه خل يقتل روحه بروحه خير مالبزو يدينا فيه حتي هوا ، وخليه في المقر هداكا تو يخرب الدنيا هني ، ولما يموت جيبوه هني باش نحوله قضية موت محمد في حالة ادمان منه
.
.
حدفله علي المخدر واليبرة علي الارض ، هرع أحمد طول وبرعشه وخداهم وهوا يفتح في اليبرة ويركب فيها بسرعة وحاس جسمه بيقتله من الألم وضربها طول وهوا يرفع في راسه لعلي لحطله اكتر من خمس جرعات علي المندار وطلع ببتسامه وخلاه يشبح للباب ويشبح للجرعات ودموعه ينزلو من غير اي صوت 💔
.
.
غمطت غالية عيونها وقالت بالعبرة:حاسة روحي ماعاش نعرفك انت مش خوي انت مش احمد ، توا بس نقدر نقول تيتمت خليتني بروحي خوي عايش ومخليني عند ناس غريبه خوتي عايشين ومش مدوريني صحيت يااحمد صحيت ياخوي
احمد:غالي.....
وقبل مايكمل سكرت في وجهه وهيا تبكي بالعبرة .
عيط احمد وهوا يشبح لتليفون ويبي يعاودلها بس مايقدرش لانه طلعله "الرقم مجهول الهوية" قعد يصيح ودموعه ينزلو:غاااالية باللهي عليك لا اتصلي اتصلي لااااا لا ياأختي لا يابنتي لا
ركع علي الارض وقعد يبكي بصوت العالي:يااربي هني وخيتي ياربي هناها ياربي ماتخليهاش تنقهر مني ومن حالتي وربي مافكرة في بيعت الحوش الا لما ماعاش قدرت نعيش بلا السم هدا مش قادر لا نعيش بلاه ولا بيه ، لا بلاه لا بيه ياربي ، لا بلاه ولا بيه يااختي  ، ااااه ياميمتي وينك تعالي خوديني وينك ياغالية وينك
قعد يبكي في مكانه لين رقد من غير مايهتم لا بصقع لا ب نو لا ب وين هوا مولي مش مهتم ب لبسه ولا تهنديمه ولا بأكله وبشربه عنده المهم ياخد لبلي ويريح جسمه وبس.
.
.
قعمز علي أرضية الحمام القذرة وحط جنبه جرعات المخدرات وقعد يشبح قدامه ودموعه ينزلو رفع كم سوريته وخدي اول جرعة وضربها في يده ليمين وهوا حاس كيف السائل يجري في عروقه زي السم وزي المسكن لهفت ألام الوجع طول ، قام كم يده التانية وضرب جرعتين فيها وهوا حاس بنشوة من المخدر .
لوح ليبر قدامه وحاس بغمة علي قلبه بضيق نفس وكأنه حد يخنق فيه من رقبته والدم بدي ينزل من خشمه ، غمظ عيونه من غير مايحاول يعيط او يناجي حد ، وهوا مستسلم يبي يموت يبي يلاقي ربه ويقوله ياربي شفت شن دارو فيا ، شفت ياربي اني نتحرت والانتحار حرام ، لكن هل انتحاري اني حرام انتحاري انه نبي اريح روحي من عيشة الدل والقهر عيشة لكلاب حرام ، نقتل روحي من حياة هانوني فيها ودلوني فيها وخلوني مدمن ، حياة خدت مني بوي المقتول ظلم وخدت امي واني بعيد عليها وماشفت حتي دفينتها ، خدت مني خوي اللي هرب باش ماينقتلش حتي هوا ، خدت مني اختي لحماها عدوي لشردني لقتل عيلتي ، اختي لنتمني انه تعيش حياة خير مني ومن خوي ومن امي وبوي ، تعيش بس متاكد ح تعيش ناقصه بدونا ، الله غالب ياربي هدي قهرة ليبي مظلوم وظلموه هلبا ، هدي ولت حالت الليبيين 💔
طاحو يديه علي الارض ورتخي جسمه وفمه قعد يطلع منه في رغوة ، وروحة طلعت زي ماطلعت من بوه وامه من قبله .
طلعت روحة مع احلامه لضاعت ، حلمه انه يكون روحة في خدمته ، يتبت لبوه انه حتي هوا يقدر يدير لروحة امبراطورية زيه بس للاسف مات بوه ومات حلمه ومات هوا ، حلمه انه ياخد سيارة لخوه لما ينجح من الجامعة خوه لقتل باش ياخد حق بوه واهو خوه هرب وهوا مات مع حلمه ، حلمه انه يتزوج بالبنت لحبها من صغره حبيبته لقعد محافظ علي حبها سر في قلبه من غير مايقول لحد علي حبه ليها لين يتقدملها رسمي ، حبيبته صفاء اللي ماعمرة تمني غيرها بس برضو حلمه ضاع وهوا مات 💔
مقسي الحياة ، حين ترسم لك طريق لا يتمناه حتي المجنون الدي ليس به عقل 💔
(الياقوت)
.
.
#الحلقة38
.
.
رقية:لا حولي ولا قوة الا بالله ، لا حولي ولا قوة الا بالله ياربي
محمد اشر بيده لميسم وقال وهوا مطبس راسه وقال:عدي ناديها ليا
مشت ميسم تجري وهداية قالت:الاحسن نقولوها ليها نحنا
محمد سكت وهز راسه ووقف وطلع لأنه ماعنداش وجه يقابلها بيه ، مش قادر يشبحلها ويقولها خوك مات ، احمد مات ياغالية ، وكله مني انا ، سامحيني لو ماخششته سريب لحبوس ما صار فيه هكي ، لو مالفقتله تهمة المخدرات ماشدوشي هديكا الليله وعرف الصقر انه يخصني ، لو سيبتكم في حالكم من الاول وما ظلمتكمش ره حياتكم مش هكي ره علي الاقل خسرتو بوكم وحني خسرنا خونا وتم الموضوع ، بس ااااه منك لله ياظالم منك لله 👐
.
.
رقية تلفتت لغالية لجت ووراها ميسم متاتره عليها.
غالية شبحت لهداية ورقية وعائشة لمقعمزه جنبهم ، ضيقت عيونها وهيا ادور بعيونها علي محمد لانه ميسم قتلها محمد يبيك برا بس وينه هوا بس ماقترتش تقول هكي وقالت:نعم ماما
طبطبت رقية علي كرسي الصالون لجنبها ، وقالت:تعالي قمعزي حداي هنا
قربت غالية وقعمزت ، وقعمزت هداية جنبها ، تلفتتلها غالية وشبحتلها ورجعت تلفتت لرقية وقالت وهيا حاسه انه في حاجه:شني فيه خيركم
رقية شدت يدها وقالت:انتي تحملتي واااجد يابنيتي واكيد خسرتي بوك وامك وصبرتي علي فراقهم وفراق الولدين واااعر وعرفتي هضا مكتوب وقضاء وقدر صح
هزت غالية راسها:مافهمتش اني مافهمتش شن تبو تقولولي اه شن صاير
هداية نزلو دموعها وشبحت لامها لقالت بعبرة وهيا قعده شاده يد غالية لي مش فاهمه شي:حياتك الباقيه في وخيك يابنيتي ربي خدي امانته فيه
نزلو دموع غالية طول وهيا تجبد في يدها وتهز في راسها:لالا
هداية شدتها من كتافها:كلنا ليها ياغالية كلنا ليها ترحميله توا بس
فكت غالية روحها ووقفت وعيطت بالقوة:لااااااا لا ياربي لاااااااااا
غمط محمد عيونه بالقوة لكان واقف برا مع جده ولما سمع عياطها حس بقلبه انقبض ، لانه في الاكيد كل ألامها بسببه هوا وبس.
وقفت هداية وهيا تشبح لغالية للفت بيها الدنيا وحست كل قوتها تبخرت ، ومن غير ماتحس بروحها طاحت وفي ودنها صوته هوا ونظرته وكلامه ليها .
قربو هداية وميسم لعيطت:غاااالية
وقفت عائشة وقربت منهم وهيا حاسه ولاول مرة بالشفقه علي حال غالية ، مشت تجري جابت امية:رشن عليها
خدت هداية لمية وهيا تبخ علي وجه غالية اللي مش حاسه ب ولا شي .
عيطت رقية:يانعليا بنتي كنها كنها
قعدت ميسم تضرب فيها علي خدودها وترعش:نوضيي باللهي عليك
فشلت هداية لشبحت لعائشه:عدي نادي محمد بسرعة
طلعت عائشة تجري وهيا داهشه:محمد
تلفتلها محمد طول:هاا
عائشة:البنت طاحت علينا
هرع محمد بسرعة وسالم لحقه ، واول ماشافها طايحة لوطه حس بدنيا لفت بيه وبوجع في قلبه قرب بسرعة وهوا يبعد في ميسم لبعدت .
هداية:مافيهاش نفس يامحمد مافيهاش
نزل محمد وحط راسه علي صدرها وهوا يسمع في دقات قلبها الضعيفه ، بعد وقامها في حضنه وطلع بيها يجري لسيارة من غير ما يراجي حد ، لحقاته هداية وسالم يجرو ومشو معاه .
__
.
.
-حقي بالحق ، لا حقي بالانتقام والثأر ✋
(الياقوت)
.
دف الشاب مالك في غرفة التحقيق بالقوة وطلع وسكر عليه باب لحديد ، قعد مالك يشبح للغرفة بخوف ورهبة وهوا يقرب من الكرسي وقعمز فيه بخوف .
وبعد دقايق انفتح الباب وخش سفيان لي لابس البدلة العسكرية ، واول ماشافه مالك وقف طول وعيونه انفتحو وقال:انت شنو ادير هني
تلفت سفيان لزياد لخش وسكر الباب وراه ووقف قدامه وشبح لسفيان بنظره بمعني هوا ليك توا .
قرب سفيان لمالك لقعد يشبحله ويشبح لزياد بخوف ورعبة.
سفيان:قعمز
قعمز مالك من غير اي صوت وقال:نبي المحامي متعي وينه كيف تحققو معاي من غير المحامي متعي
زياد ضحك ، وسفيان جبد الكرسي وقعمز قدام مالك وقال:انت لقتلت حمزة
مالك:لا ماقتلتاش وطلعوني من هني كلنا نعرفو انت لقتلته
قام سفيان يده وضربة كف من الروح لا روح:كلهم ظلموني ياكلب بسببك خسرتني تلاته سنين من عمري تلاته سنين
وقرب شده من ياقت تيشرته وضربه بوكس علي خشمه لين صب دم وعيط مالك:حوووول اني ماقتلة حد
ضربه بركبته علي بطنه ودفه علي الحيط وشده من رقبته خنقه وعيونه شرار:والله اربيك وربي نقتلك ياولد ال.....
قرب زياد طول وحاول يبعد سفيان لخانق مالك اللي ماعاش قادر يتنفس .
صيح زياد:تي حول ياراجل ماضيعش روحك بسبت واحد زيه حول واني اللي ح نخليه يعترف باللهي عليك اطلقه ياسفيان
طلقه سفيان وهوا يخبط فيه علي الحيط بالقوة ، واول مابعد عليه سفيان طاح مالك لوطه وهوا يحاول يلقط انفاسه .
__
.
.
.
نزلو دموع هداية اللي شدت في يدين غالية اللي شارقه في بكاها وتحاول تتكلم:احمد خوي احمد
هداية قربت منها وحضنتها وهيا تبكي:كلنا ليها ستهدي بالله ياغالية تعدبي فيه هكي
غالية:نبي نموت اني اقتليني باللهي عليك نبي عيلتي نبي خوي نبي ماما مش قادره اني قلبي يوجع
كانت تدوي وصوتها تاااعب تبي تصيح تبي تعيط وتكسر بس حاسه روحها فاشلة هلبا فاشلة وكأنها في كبوس مرعب ومش قادرة تطلع منه
حول محمد الستار واول ماشافها حاضنه هداية وتبكي ومن شكلها ومن صوت بكاها امبين عليها الوجع امبين عليها قداش هيا تاااعبة .
بعدت غالية هداية ورفعت عيونها اللي تلاقو ب عيون محمد سكرت عيونها طول وقالت:اطلع برااا
تلفتت هداية طول لمحمد لزاد تقدم وخش من غير اي صوت ، رجعت غالية فتحت عيونها وجتها قوة وصيحت:ماعاش نبي نشوف وجهك اطلع من حياتي كله منك كله منك انت
شدتها هداية وهيا تبي تهديها بس محمد شد يد هداية وقال:اطلعي خليني معاها شوية
بعدت هداية وهيا تشبح لغالية لرجعت صيحت:لاااا مانبيش لااا انت اطلع
محمد:هداية اطلعي
طلعت هداية وقلبها علي غالية وخلت محمد زاد قرب من غالية اللي فكت التغدية من يدها بالقوة لين حستها وعيطت:اطلع مانبيكش اطلع
وخدت نفس كبير وشبحتله ودموعها زي لمطر ينزلو:ولا تعالا اقتلني ورحمني مانبيش نقعد بروحي مانبيش نعيش فوق ارض خوي تحت ترابها عيلتي كلها تحتها واني فوقهم مانبيش باللهي عليك اقتلني زي ماقتلتهم
شد محمد يداها:اشششش اهدي
فكت غالية يداها وضرباته علي صدرة بالقوة وعيطت:ماتمسنيش حول
زاد محمد قرب منها وقال:سامحيني ياغلاي
غالية:الله لا تسامحك الله لاتسامحك يامحمد قتلت خوي قتلت امي يتمتني بهدلتني اني وعيلتي قتلتني وكبرتني قبل وقتي الله لا تسامحك كله منك كله قتلت امي حسره علي خوتي وقتلت خوي ظلم ياظالم
وقفت علي ركابها علي السرير ودفاته:بعد بعد من عليا بعد نكرهك من كل قلبي ياريتك متت ياريتك
وضرباته مكان الرصاصه لين محمد توجع وقالت:ياريته قتلاتك رصاصته قبل ماتقتله انت برصاصتك
وقف محمد في مكانه ونزل راسه وهوا يمسح علي شعره ومتمني لو تنشق الارض وتبلعة وتلفت طول ومش قادر يشبحلها او يحط عيونه في عيونها ، طلع وخلاها تبكي بقهر تبكي بوجع علي روحها وعلي خوها لخلاها في وحدتها بروحها خلاها في الدنيا القاسية وفي بلاد اقسه ، وتبكي علي قلبها لحب لكان سبب في دمار عيلتها💔
طلع محمد وكان وجهه متغير باين عليه متاتر قرب من هداية وقلها:بنعدو لطرابلس بكرا حتي انتي بتجي معانا تمام
هداية:ومراد
محمد هز راسه:حتي هوا
هزة هداية راسها ونتبهت علي خوها انه متاتر هلبااا بعدت وخشت لغالية لخشولها الممرضات وعطوها مهدي .
__
.
.
#تاني_يوم_في_طرابلس
جبد محمد لغطاء الابيض من علي وجه احمد بشوية وأول ماشافه غمظ عيونه بالقوة ، ودكر كل لحظه عدبه فيها ظلم ادكر دعاه عليه وعياطه ودموعه المظلومه ، خدي نفس ورجع غطي وجهه وتلفت للباب وشبح لغالية لتبكي بصمت وهيا خايفه تخش وشاده في يد هداية بالقوة .
رفع محمد يده ليها وقال:تعالي
وخرت غالية بخوف ، وزادت شدت في يد هداية لقربت منها وقالت:مش تبي تحقيه قوي قلبك وعدي
شبحتلها غالية ودموعها هما لحكو بدال لسانها كمية الخوف لحاسه بيه ، فهمتها هداية لقالت:عدي وحقيه وماتخليش الندم ياكلك بعدين
زمطت غالية ريقها وسيبت يد هداية لماقدرتش تخش معاها ، قربت غالية من محمد ووقفت جنبه بخوف ، حط محمد يده علي ضهرها وزاد قربها من السرير لراقد عليه احمد وخلاها قدامه وهوا واقف وراها بضبظ ، حس برعشت جسمها الخايف ، بعد عليها شوي وجبد الشرشاف من علي وجه احمد اللي اول ماشافاته غاليه عيطت وهيا تحط في يداها علي فمها وصوت بكها بدي يعلا ، قربت منه وهيا تشبح لملامح وجهه التاعبة وتحت عيونه المرهقه اسود ولون بشرته متحلاله ولونها مايل للابيض ، قربت يدها وكانت تبي تمسه بس ماقدرتش وهيا تبعد خطوه وتلفتت دفنت راسها في صدر محمد وقالت:طلعني من هني طلعني
لف محمد يده علي خصرها وبيده التانية رجع لغطي علي وجه احمد .
__
.
.
عدو ايامات علي غالية كانو اصعب من المر نفسه ، ضيق نفس ودنيا ، وجع خاطر وقلب ، ووحده ، مصعبها انك تفقد عيلتك كلها بسبب كدبة ، بسبب فتنه ، من عيلة كبيرة حنونه وضحكات وخوف اب وحنان ام وتحكم خوت ، لي وحده من غير حد يخاف ويحن عليك ، صعب فقد عيلة في حرب اهليه حرب قامها شعبها لتقدم ، لقو روحهم راجعين الف خطوه التالي بدل التقدم ، حرب داروها المستفيدين وحصلو فيها الخاسرين ، حرب بدل ماتغير لبلاد للاحسن غيرتها لحفرة دم غااااارقة ومعبيه بجثتهم💔
.
.
طول ليامات لفاتو قعدت غالية فيهم في حوش صفاء لفتحه بوها مفتاح ليها ودار عزي لاحمد فيه وهداية في الايام الاولي قعدت معاها وبعدها مشت لحوش محمد ، اما محمد ف كان كل يوم ماشي جاي عليها وماسييبهاش ولا يوم بروحها عند عيلة مفتاح ، برغم ماشافهاش بكل من يوم لجابها عندهم ولا اتصل بيها ولا تصلت بيه .
.
.
مسحت صفاء دموعها ولفت براسها لغالية لراقده جنبها في السرير وقالت:ربي يرحمه ويجعل متواه الجنه ياارب
نزلو دموع غالية:ان شاءالله
سكتت غالية شوي وبعدها تلفتت لصفاء لقعده تشبحلها وقالت:قعده تحبيه
صفاء:احمد حبي الاول حب طفولتي مانقدرش ننساه
غالية:بس خلاص مات توا ماعندك ماديري غير تدعيله نعرف انه كلامي واعر عليك بس اني مانبيكش تقعدي علي أثراه
صفاء هزت راسها: نعرف احمد ربي خداه و اني ح نكمل حياتي اكيد بس صعب نمحيه من قلبي
غالية مسحت دموعها:شن جوك مع رؤوف
صفاء بتسمت:كويس والراجل كويس هلبا
غالية:شكله يحبك
صفاء:هلبااا تعرفي حنيته وكلامه وهتمامه خلوني نميلة هلبااا بديت نفقد فيه لو ماتصلش بيا تعودة عليه
غالية قربت وحضنتها:ربي يتمملكم علي خير
حضنتها صفاء وبعدها بعدت وشبحتلها:حقا شن بديري توا
غالية:شني بندير
صفاء:قصدي ح توافقي علي كلام بابا وبتقعدي تعيشي معانا ماعاش بتولي مع محمد
غالية:علاش ماتبونيش انتم
صفاء صيحت:عينك نبوك مدبيا اني وخيتي وانتيمتي تقعد معاي
بتسمت غالية:خلاص قعده معاكم
رفعت صفاء حاجبها:ومحمد قصدي
قطعت غالية عليها وشبحت لسقف:خلاص هوا دار واجبه معاي وصلني لعيلتي اللي هيا انتم وتوا يمشي في حال سبيله ياسر لداره فيا
صفاء:غالية ماتظلميش روحك وماتظلميشي
شبحتلها غالية وقالت بضحكه مليانه دموع:نظلمه علاش لا ظلمي مش ح يرد نص ظلمه ليا ولي عيلتي دمرونا قتلو بوي ظلم قتلي هوا امي بحسرتها وقتل خوي
صفاء سكتت وقربت حضنتها.
__
.
ضحك سفيان وهوا يتنهد براحة:خلاص يافندي هكي تحررة وله
محمد طبطب علي كتفه:خلي رؤوف يروح من الصحراء ويجو هوا وخوته بيش يبان الحق للجميع
زادت ضحكت سفيان لقرب من محمد وحضنه بفرحة:والله وقفتك ما ننساها يافندي والله ماننساها
محمد:نحنا خوت مافيش بينا
بعد سفيان اول ماسمع صوت تليفون محمد يشرين وقال ببتسامه:وربي ارجل منك ماريت يافندي
محمد:ربي يفرحني كيف فرحتك
سفيان:ربي يعطيك كل ماتتمني ان شاءالله ويجازيك بالخير
محمد ضحك وهوا يشبح في رقم مفتاح وقال:حنتي عدي هههه
ضحك سفيان:تمام هههه
بعد محمد ورد علي مفتاح:السلام عليكم
مفتاح:وعليكم السلام شني حالك
محمد:الحمدالله من ربي ان شاءالله خير فيه حاجه
مفتاح:لالالا مافيه شي غير اتصلت علي موضوع امس اني حكيت مع غالية وهيا تبي تقعد معانا بارك الله فيكم انتم قمتو بواجبكم واكتر مع ليتيمه توا وصلت لحوشها
تكلم محمد طول:لالا مكانها عندي نا ياحاج خوها حطها امنه عندي نا مانقدر نسيبها لا عندك لا عند غيرك
مفتاح:وهيا امانتنا حتي حني وهيا بإرادتها تبي هكي
محمد:نا تو نتفاهم معاها اليوم لو تسمحولي جاي نا واختي
مفتاح:تفضل الحوش حوشك في اي وقت
محمد:الله يبارك فيك ماقصرت لعشيه نكونو عندكم
سكر محمد وهوا شاد اعصابه بالسيف وطول اتصل بغالية اللي كانت تهدرز مع لبنات وعلي ايلاف لجت تشوف فيها ، واول ماشرين تليفونها قاماته من جنبها ولما شافت رقم محمد تلخبطت ووقفت طول وهيا تستأذن ومشت لدار لبنات وتشبح لتليفون لقعد يشرين برقمه ، قعدت تشبحله لين تسكر واول ماسكر سكرات التليفون بسرعة وقعمزت قعدت تبكي.
__
.
.
قعمز سفيان علي الكرسي وشد تليفونه وحط علي رقمها مع بتسامه وتصل بكل ثقه وبفرحة مالية وجهه.
خشت ايلاف للدار وهيا تتسهوك علي روان:طيح سعدك انتي وخطيبك البالو اللي لا خطبك لا حبك ههههه
روان:انتي علي العموم حيوااانه
ضحكت ايلاف وهيا تقعمز علي السرير وتفك في وشاحها وطلع في تليفونها لشرين من الشنطه ، واول ماشافت رقمه زمطت ريقها و وقفت سكرت باب الدار طول .
تلفتتلها روان:خيرك
ايلاف فتحت الخط وردت:شن تبي متصل
سفيان:اتصلت بنقولك وفيت بوعدي
ايلاف خدت نفس ودكرة اخر مكالمه ليهم وكيف وعدها انه مش ح يتصل بيها غير لما يتبت برائته ، رفعت راسها لروان لجت وقفت قدامها .
سفيان:اني قتلك مش ح نتصل الا لما نتبت برائتي واليوم بس تبتها اليوم وليت برئ قدامكم كلكم برئ قدامك وقدام عيلتك
ايلاف:قدام عيلتي
سفيان:اي قريب ح يعرفو
وسكت سوي وكمل:اني حبيتك ياايلاف حبيتك ومالمتكش لما كرهتيني وجيتي ضدي ، ربي يسعدك في حياتك ياحبي الاول ربي يسرلك طريقك كنت نبي نتبتلك انه اني ماخيبتش ضنك ولا طعنتك واهو تبته ونستأذنك
وسكر الخط وخلاها مش مستوعبه لقاله ومش فاهمه لو كلامه هدا حق ولا كدب .
__
.
.
.
#يتبع_للبارت_لبعده
شن تقولو محمد وغالية ح تكون هدي نهاية قصتهم وكل واحد ح يمشي في حال سبيلة وبيبدا قصة بعيده علي التاني ، وقصتهم كانت قصة عابرة في الرواية ام ربي رايد يصير كل هدا باش يتلاقو ويجمعهم ويكونو قسمت ونصيب بعض.
شن تقولو ح يصير في نهاية الموسم الاول من الرواية ح تكون النهاية سعيده ام مألمه زي واقعنا 💔
انتظروني لقَفلة أحداث الجزاء الأول من رواية
#عشق_في_بلاد_حروبها_لا_تنتهي (الفثنه و الثأر)

ادعولي بنجاااااح محتاجة دعوة 💛🥺
____________________________________
بداء كتابة الرواية في 2019 / أبـــ4ٰـــريل / 7
تم وضع قَفلة لـ الرواية في 2019 / سبتــ9ٰـــمبر / 25