عشق في بلاد حروبها لا تنتهي ( الفتنه و الثأر)

البارت 21

_
_
#عشق_في_بلاد_حروبها_لا_تنتهي
   الحلقة 21
(الياقوت)
في الحلقة السابقة
روان:تي شن ماشيين حني التلاته العفو وفوقها خالتي بتجي بتمشي حشمه لالا اني وايلاف مش لازم نمشو
نطت ايلاف:والله ماكم ماشينها بلاي صاحبتي هدي ره
روان شهقت:والله اول مره نعرف انها صاحبتك ، تي وكان صاحبتك كان صار نصيب نمشي اني وياك معاه للمقابلة الشرعية توا هني روحك
شبحت ايلاف لأمها:اهو قتلك يمه بنمشي اني البنت توصي فيا لحد امبكري تبيني في حاجه
روان:تسبلي تسبلي
نجيه نفخت:اووف من نشافكم تي اسكتو
ايلاف:تبو ولا ماتبوش بنمشي راهو
.
قراءة ممتعة 💛
#البارت_الحادي_والعشرون
.
نجيه:باهي باهي لا غدوة يموتو ناس ويعيشو ناس وانتي كرشتي
روان عوجت فمها:بارده
ضيقتلها ايلاف عيونها:ماخصكش
__
طلع محمد من الدوش وهوا يوقف علي الزيانه ويجفف في شعره واول ماحول الفوطه قعد يشبح لروحه ولشعره لطول ولحيته ، حط الفوطه علي الزيانه ورجع شعره المبلول الهايج كله التالي وتلفت لسرير وخدي وشاح غالية ولف بيه جرحه اللي قعد يصب في الدم مره مره ولبس تشرته بسيف وهوا يبخ في موزيله ، هيا مش بخه وانما دوش تاني .
وطلع وهوا يشم في صنة الطفيه مشي لدار المعيشه ووقف علي البار من برا المظبخ ويدور في غالية اللي مهناش بس الطنجره علي النار قعده
ضيق عيونه ولاد واول ماخش للمظبخ شبحها وهيا كلها في الدولاب ومنحيه عبايتها وقعده في توته صيفيه كم ماليه وسروال بودريات مخطاطات بالأبيض وتيشرت ابيض ووشاحها ملفوف علي رقبتها وشعرها اللي يجنن زي خيوط الشمس واصل لمرافقها وهوا تحت الوشاح المقنوط علي رقبتها
زمط محمد ريقه من جمالها وقرب وهوا يضيق في عيونه:شني الديري ياطشه
نخلعت غاليه و وقفت من غير ماتفكر في الرخامه لفوقها لأول ماحاولت توقف خبطتها وفقدت توازنها وطاحت علي الماعين لي في الدولاب وهيا تعيط هههه
قرب محمد طول وطبس وهوا يشد فيها من خصرها وقامها طلعها من الدولاب ولفتها في حضنه زي البيبي كيف يقيمو فيه ، واول مالفتها شبحها كيف مخنوقه بالوشاح اللي تكح وتجبد فيه ومطلعه لسانها من كتر مامقنوط ، نزلها محمد علي رجلاها ولف يد علي خصرها وتانيه حولها بيها الوشاح وهوا يشبح فيها كيف متخبله بشعرها وتكح مقدرش مايضحكش وقال:هههه من لام عليك ياسمح تلبسهن هدو
بعدت غاليه عليه وهيا تبعد فيه بيدها وبيدها التانيه تنش بيها علي روحها وهيا قعده تكح وتشم في ريحته الرجوليه لغبقت الحوش كله والمظبخ
تلفت محمد لتلاجة لمية وعبالها طاسه ومدهولها ، خدتها منه وشربت وهيا ترد عليه:ربي لايم عليا
وتحمحمت وهيا قعده تكح ، رفع محمد حواجبه ليها بمعني والله ، ضيقت غالية عيونها وهيا تبتسمله بتسهويك وتهز في راسها
ضحك محمد وتلفت للغاز وهوا يعري في مغطت الطنجره ويشبح
قربت غالية وفكت وشاحها من يده وهيا ادخل في شعرها في ماليتها وتلبس فيه زين ولبست عبايتها:زود طلعلي زوز صواني ماعرفتش وين
محمد:شني نظام اجانب بتوكلينا كل واحد وتبسيه ولا كيف
كانت غالية تتكلم ومن غير ماتشبحله تلفتت وهيا تشبح لتومه وردت عليه:لا بس مش مطره ناكل مع واحد دماغو........
سكتت وهيا تتحمحم وتستاقط بروحها
ضيق محمد عيونه:كملي كملي دماااغو وشني عقابها
حطت غالية صبعها في فمها وتلفتتله:انت تحب التومه ولا مانحطش
محمد شبحلها شوي وهوا قعد مضيق عيونه وطلع من المظبخ وخلاها تحط في يداها الزوز علي فمها:واااه قريب تكسرت بين اربعه ونحطيت في الطبيخه بدال المكرونه السباقيتي
__
درس الحاج فتحي قدام باب حوش فارس وهوا يتلفت يبي يفتح الباب باش ينزل يفتح الكنشيلو ويدرس في الجنان بس وقفاته نادين وهيا تشد في كتفه:بابا نبي نمشي عندكم اليومين هدوم
رجع الحاج فتحي وتلفت لبنته وقال:علاش يابنتي اهو حوشك وبعدين راجلك ماعنداش علم عيب
حنان:اي انزلي توا هني ولما يجي شاوريه ونرفعوك
هزت نادين راسها وقالت ودموعها بدو ينزلو:لالا باللهي عليكم ارفعوني عندكم حاسه قلبي نغم اول ماشفت الحوش نبي نرتاح عندكم مش ضايقاته اني الحوش
تنهد الحاج فتحي وهوا يشبح لحنان لقالت:خلاص يافتحي كلم فارس وقوله
الحاج فتحي تلفت:ربي يهديك وخلاص بتحشميني مع الراجل
رشفت نادين دموعها وهيا تشبح للحوش اللي بوها وخر بالسياره بعد عليه ومشي لحوشهم وهيا تقول في خاطرها مستحيل نخشله تاني خلاص ماعاش فيه شي بينا كله انكسر اصلا هوا مافيش شي باش ينكسر غير قلبي بس ، ويتهني هوا وياها .
__
وتت غالية الصفور وحطتله بروحه وهيا حطت بروحها بتاكل في المظبخ ، تلفتت لروشن المظبخ لطلع علي الجنان الوراني وقربت فتحاته وهيا تشبح في الزرع كيف يهبل وشجر و ورد وعطر وياسمين بتسمت وهيا تشبح فيه شاد الطوبو وييسقي في الغرسات وهوا قايم سرواله فوق شوي ويده المصابه مايحركش فيها رفعت حاجبها ، يهبل جسمه هكي عنده هيبه لما يوقف ياحنه سلم التمارين والنفخ تراهو ياكل في البروتينات وتروتينات والبروشينات ههههه المهم مانعرفش شن اساميهم ، تنهدت وقالت:هدا كيف بناديه توا ولا نطلعله برا
وشهقت علي روحها:وعلاش ان شاءالله نطلعله شن خدامه عنده ولا خدامه بارك الله فيا طيبتله اني
نفخت ورجعت شبحتله وسكرت الروشن بالقوة مستقصده باش ينتبه عليها.
حط محمد الطوبو تحت الشجره وسكر لمية وهوا يخش ينفض في سرواله وينزل فيه.
واول ماخش لدار المعيشه شبحها حاطتله لوطه وهيا تاكل علي الطاوله في المظبخ
قرب لصفرة لحاطتهاله وقامها وخش للمظبخ وجبد الكرسي لقدامها وقعمز وشد الكشيك بيكل
ضيقت غاليه عيونها:ضاقت عليك الا هني
.
.
حباها الله حسنا وأكرمها بقلبا تهافتا بدكره 💛🌙
(الياقوت)
.
.
كلي محمد ورفع عيونه فيها من غير مايرد عليها لين غالية نفخت بالقوه وخدت صونيتها ووقفت وهيا بتطلع ، تلفتلها محمد وقال:علي خير
غالية:بنهج هجان يطلع روحي
ضحك محمد علي كلامها وهيا مشت طلعت براا قعدت تاكل من الجوع قبل ماتقعمز
قعدت تلود في الجنان وتشبح في الورد ، زمطت الماكله لي في فمها وقالت:غريب الراجل من جيها شاد سلاح ويقتل ومن جيها يغرس في ورد
وأول ماتلفتت شبحت كلب جاي يجري من الجيها التانيه تعيطها عيطه لين محمد ياناري انكمد بفم المكرونه وشرق.
وقف وهوا يجري ياخد في سلاحه ويطلع ، واول ماطلع من الباب فاتت تجري من قدامه تفن فنان ههههههه والسبيدرو لنطراته كل واحد في جيها والوشاح خداه الريح وهديكا العباية مرقيتها لا فوق وشوي شبح الكلب يجري وراها ينبح.
ومحمد من نوبة الضحك لجاته معاش قادر يلحقها وهوا مطبس لوطه ويضحك ، سمع صوتها تعيط جاية بتلف مره تانيه تحمحم في نص ضحكه ووقف وهوا ينزل من الدرجات ويشبح فيها مكمله جري والكلب وراها بس غالية بعد ماخطمت من قدام محمد ولتله تجري وهيا تتكبش في رقبته وترفع في جلاها ورا ضهره وهيا تتشبت فيه بكل قوتها وتعيط وشاده كلمة:لزه لزه لزه ياااامامااااااا زوديلي لزه
لف محمد يده علي خصرها وهوا يزيد يرفع فيها باش مطيحش وقال بضحكه:هههههههه طشه وخوافه
وشبح للكلب اللي اول ماشبحه وقف وقعمز:بووب
قعد الكلب يلهت ومحمد تلفت خش للحوش وهوا يسكر في الباب برجله وخش لدار المعيشة وهوا يحاول يبعد راسه وهوا يبيها تشبحله:خنقتيني يابنت
فتحت غالية عيونها وبعدت وهيا تحول في يداها من علي رقبته ونزلت رجليها تبي تبعد عليه بس سريتت عبايتها علقت في رقبت تيشرته وشعرها علق معاها ، ولما نزلت قعدت العباية لمعلقه فيه ونخنقت رجعت طول رفعت روحها علي روس صوابع رجليها وهيا تحاول تفك ومحمد كان يشبحلها كيف توثرة رجع لف يده علي خصرها ورفعها بيد وحده بالقوة علي الرخامه لين غالية نصدمت وهيا تشبحله ، حول يده من خصرها وشبح لسريتا العالقه في تيشرته:بشويه وانتي تجبدي
غالية:يبيش يتنحه شعري نسل
ضحك محمد وفوتها لين غالية ستغربت وهيا تشبح فيه يحول في يدها وقعد يحول في السريتا بشويه من تيشرته
ردت غالية قالت بتنقنيق:يبيش يتنحه مايبيش
زاد محمد ضحك وهوا يبعد شوي بعد مافك تيشرته من العباية وقال من بين ضحكاته:مايبيش شني
غالية طبست تشبح لسريتا لفك تشرته منها:خلاص تنحه
مسح محمد علي وجهه بديه وقال: هههههه احيه منك ياطشه ومن الثقه لعندك
غالية رفعت راسها وشبحتله:ثقة شن
طلع محمد لسانه ونتشه وقرب منها بجرائه وضرب جبهتها بجبهته لين غالية غم عليها نفسها وهيا تشبح فيه تلفت وهوا يمشي ويضحك.
__
كان فارس مقعمز علي لبحر وهوا يحاول ياخد في نفسه اللي اول مايدكر كيف مد يده علي نادين يهرب.
تنهد بالقوة وهوا يتكي بمرافقه علي رجليه ويحط في كفوف يديه علي وجهه ""...:اني ماقلت شي لا قلتلها لا رخيصه لا من لكلام لقالاته ولو هيا قالاته في روحها عادي فهيا رخيصه اي واهو اني نقولهالها
ومن غير مايحس فارس علي روحه ضربها كف وهوا يدف فيها علي الطاوله لجت علي بطه بالقوة""
غمط عيونه وهوا حاس روحه بتطلع""قرب ولفها ليه وهوا يشد فيها من دقنها لين نادين قعدة تحوله في يده وتبعد فيه
فارس:الرخاص الي زيك بس مايصدقو حصلو علي راجل مش نهي اللي احسن منك ماتسوي ظفرها انتي ، ..... :اصلا لصير فيك كله شويه وتستاهليه""
قام فارس راسه فوق وتنهد بالصوت:اااااااااه ياربي علاش علاش
ورجع مسح وجهه بديه الزوز وقعد يدكر لما قعدت تشبحله في المستشفي لما جي سمع نهي شن تدوي حس بكسرة قلبها حس بخيبث املها وجهدها لطاح وأملها اللي ضاع:علاش قلبي حجر علاش خسرت ولدي بسبت غبائي وحقارتي
طلع تليفونه من جيبه وتصل بالحاج فتحي لرد عليه طول:ايوه فارس
فارس:شن روحتو بيها
الحاج فتحي:اي اي روحنا بيها مادور شي ياولدي كمل خدمتك وتعالي لوحشنا
فارس ستغرب:حوشكم علاش
الحاج فتحي:والله البنت نادين قالت مضايقه من الحوش وقعدت تبكي ياولدي قولتلها تشاورك قبل لكن سكرت راسها ماعليشي خليها يومين توسع صدرها وخلاص
تنهد فارس:بالله ياعمي سامحني تعبتك معاي
الحاج فتحي:تي اما تعب هدي بنتي وانت ولدي
فارس:بارك الله فيك انرده في الفرح ان شاءالله
الحاج فتحي تلفت لفرح لقالت:بابا خالي معاد برا
الحاج فتحي:باه اهو طالع ، وانت يافارس معطل مازال
فارس:لالا شوي وجاي هي
وسكر من الحاج فتحي وتصل ب فرح طول اللي خشت لدار علي نادين اللي حاضنه زيد وراقده في سريرها لي في دارها هيا وخواتها
ردت فرح بصوت واطي:الو
فارس:فرح بالله اعطيهالي
فرح:بس ممكن راقده
قامت نادين راسها وقالت بصوت تاعب:فرح
قربت فرح وقالت:اهيا معاك
وحطت التليفون في ودن نادين لضيقت عيونها وشدت التليفون وهيا مستغربه بس اول ماسمعت صوته:نادين
نزلو دموعها وهيا اضم في فمها باش ماتسمعاشي بكاها اللي وصله وزاد من جرحه لي في قلبه ورد قال:اسف
وغمظ عيونه وهوا يتخيل فيها كيف تبكي وكمل:سامحيني
زادت نادين في صوت بكاها لين فرح دموعها نزلو وتلفتت طلعت من الدار وهيا تسكر في الباب وراها
فارس:باللهي عليك ماعاش تبكي باللهي عليك ماتزيديش وجع قلبي يانادين
قعدت نادين تبكي وفارس ماعاش قدر يتكلم وهوا يسمع في صوت بكاها وساكت وحاس بقلبه يوجع فيه من غبائه من قساوته اللي جت علي الانسانه الوحيده اللي وقفت معاه واللي سانداته في اصعب محنه ليه برغم كانت تقدر ادير زي غيرها زي نهي لحبها بصدق وسيباته في اول حفرة طاح فيها وفي الاخير يجازي الانسانه لعارف كويس انه تحبه بجنون تحبه بصدق بأنه يحتقرها ويوصفها بالأنانيه وبالرخيصه علي خاطر نهي اللي ماتستهلش اللي بعاته اللي تخلت عليه لفضلت روحها علي حبه لكبير ليها ، بعاته بالرخيص زي ماباع هوا نادين اللي ماتستاهلش ربع لداره فيها اصلا هيا ماتستاهلاش من الأول لانه كان يعرف كويس انه تحبه حتي من قبل مايتجوزها كان ملاحظ حركاتها جيتها لأمه باش تشوفه حتي من نهي كانت تغير منها وتنق عليه بسبب هدا الشي ، برغم احساسه وياقينه بحبها سودلها عيشتها اول ماخداها بعد عليها بينلها في اكتر من مره انه مايبيهاش ومايحبهاش ومستحيل يحبها بس هيا تحملاته كانت كل مايضايق يلقاها جنبه يلقاها تواسي فيه وتعطي فيه من حنانها عكسه هوا كان كل مايشوفها متنكده او مستاحشه عيلتها كان يزيد في الطين بله عليها حتي من قرايتها منعها انها تكملها ادكر لما قعدت تبكيله وتترجا فيه يخلاها تكمل قرايتها وتنتسب في وحده من جامعات تركيا بس بكل قساوه ماوفقش وخلاها تنقهر بس برغم هدا كله بعد ايامات رجعت زي ماهيا صح يتعاركو بس ماعاملاتاش ابدا بالمثل كانت كل مايقسه عليها اكتر كل مايحس بحبها وحنيتها زادو اكتر.
فيقه صوتها اللي طلعاته من بين عبرتها:طلقني يافارس
رفع فارس حواجبه بصدمه وحس بالهواء ضاق بيه وقال:شني
نادين:طلقني ، طلقني ماعاش نبيك ومستحيل اردلك
وقعدت تبكي اكتر وهيا تكمل:بعد عليا نبي نرتاح نبي قلبي يرتاح انت مش ليا ومستحيل تولي ليا حررني وخليني نتنفس لانه ليا تلاته سنين مخنوقه
حط فارس يده علي عيونه لدمعو:نادين انتي متغايضه توا وتعبانه رتاحي وخلينا نتكلمو ونتفاهمو بشويه
بعدت نادين من علي زيد اللي فتح عيونه وهوا يشبح في امه لقعمزت وهيا تبكي:مافيش حاجه نتفاهمو عليها خلاص لبينا كله تم واصلا ماكانش فيه شي بينا اني بس اني يافارس لكنت نوهم في روحي بيك اني الغبيه اني الغالطه
فارس صيح بخوف من كلامها:فيه فيه ، فيه هلبا دوه نبي نقولهالك
وهدا من صوته وكمل بترجي: اني جاي توا واطلعيلي باللهي عليك نادين
مسحت نادين دموعها وقالت:مش ح نطلعلك ولا ح تشوف وجهي مره تانيه يافارس خلاص ماعاش نبي نشبحك اختفي من حياتي نبي نرتاح
وسكرت التليفون في وجهه وخلاته يضرب في يديه علي رملة لبحر بتعصيب وبقهر وهوا يوقف.
__
خشت غالية للحمام دوشت ومحمد قعد في الجنان يسقي في الزرع وهوا يفكر شن بدير وكيف بيطلع من هني وهوا مش عارف لو كانو جمعة الصقر حايسين هني ولا ملو ويأسو انه يلقوه وولو لطرابلس ، ماعنداش لا تليفون لا اي شي يقدر يتواصل بيه وشفراته كلهم خلاهم في الشقه مستقصد لانه عرف انه ح يراقبو رقمه ، قرب طوبو لميه وحطه بين رجليه وغسل وجهه ومسح علي شعره وحطه في جدولة الغرس ومشي سكر الشيشمة وخش الداخل وهوا يدور فيها بعيونه ويبتسم لانه كل ماتجي في باله او يشبحها بدي ينصب عليه الضحك.
خش لدار المعيشه وفتح التلفزيون وقعمز وهوا يشبح في الاخبار.
طلعت غالية وهيا تقطر اميه لانه مابتش تاخد فوطه لي في الحمام.
رجعت لبست توتتها لقطنة عليها علي قولتها ههه ولبست عبايتها ووشاحها اللي ولا يقطر اميه من شعرها المبلول ، وقعدت واقفه في نص الدار وهيا حاطه صبعها في فمها:زعما هكي ولا هكي القبله
نفخت وهيا تشبح للباب:وااااك تو بيشبحني بيقعد يضحك وهوا دسكته علقت
وبتسمت وهيا تميل في راسها:بس حلو لما يضحك ياربي قداااش ماهوا رجاااال رجااااااال رااااااجل حمششش واااه
هزت راسها وستاقطت بروحها وعلي كلامها:ستغفرالله ياربي لا حولي ولا قوة الا بالله
وضربت راسها وهيا تحاول ماعاش تفكر نهائي وطلعت من الدار وهيا تواسي في وشاحها لتعبه اميه وتتنهد وتعاود ، قربت من دار المعيشه وهيا تشبح فيه متكي بضهره وتاني رجليه قدامه ويتفرج علي التلفزيون لفالته علي طول حسه ، وقفت قدام الدرجتين ليرقو للمعيشه وقالت:وين القبله
تلفتلها محمد علي طول وهوا يركز فيها وفي وشاحها المبلول وقال:كنك مبلوله
حطت غالية يدها علي راسها وكيف جايه بتتكلم بس ضيقت عيونها وقالت:وشن دخلك انت
ضحك محمد وهوا يمسح علي جبهته وقال:ههههه ها باهي شني تبي
غالية تكنطت من طريقت دوته وضحكه اللي مابي يتم:انت شن لضحك فيك اه شن هوا ليضحك قولي غر نضحك معاك
تحمحم محمد وهوا يحاول يبطل ضحك:بنتي السمحه اضحك فيا هههه يانعن فيتك انتي وحركاتك وبالله كبيها العباية هدي هههه وخليك في سروالك السمح هههههه
شبحت غالية يمين يسار واول ماجت عينها علي الشبشب اللي محطوط علي الدرجات خدت الفرده وقالت:تفوه عليك يادمغول يامجرم
وحدفتها عليه لين محمد تلفت لجيها التانيه وهوا يحط في يده علي يده المصابه ، واول ماشبحه فن قدامه ضرب الحيط طلع لسانه لنتشه وتلفتلها وناض يجري بشدها بس صكتها عيطه وهيا تقيم في العباية ومشت تجري لدار وهيا تتفاده في يده لبتشدها وخشت لدار وسكرت باب الدار في وجهه في اخر لحظه وهيا تسمع فيه انخبط في الباب وصيح:يانعنفيتك ياقرده مايكونش اسمي الطقه كان ماتقطقتك بين اربعه ياطشه
غالية خبطت علي الباب:تفوه يا مجرم يادماغول يا سفااااح
ردلها محمد التخبيطه بالقوة لين غالية رجعت التالي:باه ياقرده سيورك بتطلعي كيف الكلبه ياكلبه
عيطت غالية بس بتنقنيق لانه عارفه كلامه صح اصلا هيا من توا حست روحها جعانه وتبي الحمام وتبي تعرف القبله وين وقالت:اني مادرتلك شي باهي
زاد محمد خبط:لكن نا بندير لكي وتو تحقي ياقرده ياتخمري جوا يانقطعك بديااااا
قعدت غالية تخبط في الارض برجلاها زي البيبي وهيا تنقنق بس وقفت وهيا تقعمز بعيطه وتشبح لجروح رجلاها لنستهم وتسمع فيه قعد واقف قدام الباب:واااااه وااااااه
__
نزل فارس من التاكسي لخلصه وهوا يتلفت يطلع في تليفونه ويتصل بنادين علي رقم فرح بس قعدت تسكر عليه.
قعد يتمشه وهوا يحاول يتصل ويبعتلها في رسائل""وراسي ردي كان نعزك"" ""اني اسف والله عارف الغلط راكبني من راسي لا ساسي"" ""دودة عارفك تقري في رسائلي وتبكي وعارفك مجروحه مني"" ""اساسا اني مجروح من روحي وكاااره روحي بعد لصارلك بسببي""
ورفع فارس راسه من التليفون وهوا حاس بخطوات وراه تلفت بس مالقي حد رجع شبح قدامه وكتب""روحي انتي يادوده كان بجد بتسيبيني اعرفي انه روحي ح تطلع وح نموت والله نمووووووت""
اول ماقرتها نادين قعدت تبكي بالصوت وهيا ادخل في راسها في المخده وتزيد من صوت بكاها وشاده التليفون وحاطاته علي قلبها ، سمعت الباب انفتح رشفت دموعها وقالت بالعبره:باللهي عليكم خلوني بروحي
بس حست بخطوات قربت تلفتت وهيا تبي تصيح بس اول ماشافت زيد يقرب منها ودموعه علي خده تنهدت وزاد قلبها وجعها اكتر ما هوا واجعها وقعمزت وهيا تمسح في دموعها وفتحت يداها:تعالا حبيبي
جاها زيد يجري اللي قماته في حضنها وهيا تقعمز فيه في حجرها وتحاول ماتبكيش قدامه:خيرك ياماما تبكي
قعد زيد يحك في عينه ويبكي:مه انتي تبتي ونا ابي بابا دالولي هناش
خدت نادين نفس وحضناته:لا خلاص ها ماعاش بنبكي
لف زيد يديه علي رقبتها وقال:نا نبي ممي ماما
نادين:باه ياماما برا قول لفرح ولا لفاطمه يديرولك حاجه
هز زيد راسه:لالا بيك انتي ماما
تنهدت نادين وهيا تفكله في يديه من علي رقبتها وحطاته
لوطه لانه ماقدرتش تنهضه لانه قعده تتوجع بسبب الاجهاض ووقفت مشت معاه للمظبخ لكانو فرح وفاطمه فيه واقفات علي الروشن يسمعو في صوت عراك.
خشت نادين عليهم وهيا تشبح لزيد لخش قدامها يجري ومشالهم خلعهم
فرح:واااه ياعفريت خلعتني
تلفتت فاطمه لنادين:نادين
شبحتلها فرح:خيرك جيتي ناديتينا كان تبي حاجه
قربت نادين من التلاجه لفتحتها:زيد جعان يبيني نديرله حاجه
فاطمه:هاتي تو نديرله اني
نادين:لالا تو نديرله فكيني تو يبدا يعيط
وشبحتله كيف يكبش في الكرسي لين رقي وقعمز عليه ، وشبحت لفرح لواقفه جنب الروشن وتسمع وهيا تقول:حي حي صوت بدي قوي شكلها عركه قويه
نادين:عراااك؟؟؟
فاطمه:اي شكلهم ولاد الشااار....
وقعده فاطمه ماكملتش كلمتها وسمعو صوت رصاااص.
شهقت فرح:واااااه عليااا ابصر من القاتل ومن المقتول ناقصه شارعنا مه
حطت نادين يدها علي قلبها وخافت وهيا تطلع ورا فرح وفاطمه لمشو يجرو طلعو لجنان لأول ماطلعوله شافو امهم حنان واقفه تكبه من الباب وتخبط علي خدودها وتبكي قربو منها لبنات وهما مستغربين
نادين:خيرك يمه
قربت حنان من نادين وهيا تتغمر فيها:واااااه عليك يابنيتي وااااه عليك قتلوه قتلوه الله لا تربحهم
حست نادين وكأنها في حلم وهيا تبعد في امها:تي من هوا
فرح وفاطمه فهمو علي طول وهما يقربو علي نادين ويشدو فيها وهيا قعده هاديه وتكرر:من هوا لمات
قعدت حنان تبكي وتخبط مره علي رجلاها مره علي خدودها:رملوك يابنتي رملوك
جي في بال نادين رسالة فارس""روحي انتي يادوده كان بجد بتسيبيني اعرفي انه روحي ح تطلع وح نموت والله نمووووووت""
وطاحت من طولها مغمي عليها لين فرح وفاطمه عيطووو....
__
سلمت غالية من صلاة المغرب وهيا تسبح وتتنهد:ستغفرالله ياربي حتي من القبلة درت حادي بادي من المجرم هدا
ونفخت وهيا توقف تفك في وشحها المبلول ونشراته علي المندار ومشت لروشن لنحت الستار وقعت تشبح برا وسرحت وهيا تفكر ، لا امتي بيقعدو هني هاربين وكيف بيدير وشن بيدير والأهم لما بيسمع احمد شن بيدير ، تنهدت من وسط قلبها ودموعها نزلو:علاش ياربي خليتني بروحي لا ام لا اب اخرتي مع واحد مجرم مش عارفه كان خاطفني او يحمي فيا حق
قعدت تبكي لين فرغت الدموع اللي في داخلها كلها واول مارجعت رفعت عيونها علي الروشن شبحت حد ينقز من السور شهقت وحطت يداها علي فمها.
تلفتت فتحت الباب وطلعت تجري ادور في محمد.......
.
.
.
#يتبع_للبارت_لبعده
____________________________________
بداء كتاب الرواية في 2019 / أبـــ4ٰـــريل / 7
تم وضع قَفلة لـ الرواية في 2019 / سبتــ9ٰـــمبر / 25