Unicode
မနက်ခင်းရဲ့နေရောင်က မျက်နှာပေါ်သို့ ဖြာကျနေလေပြီ။ညက မအိပ်ခင် သေချာပိတ်ထားပါတယ် လိုက်ကာကို....ရတု ဖွင့်ထားတာလား။မထချင်သေးပင်မဲ့ နေထိုးတာကြီးကြောင့် မျက်စိကျိန်းလွန်းလို့ ထကာ အိပ်ယာသိမ်းရပြီ။အပေါ်ထပ်ကို ကြည့်တော့ ရတုက အိပ်နေဆဲ။သူက အပေါ်မှာဆိုတော့ နေသိပ်ကျမနေပင်မဲ့ ကျောပေးအိပ်နေတဲ့ ရတု ကျောပူမည် စိုးသောကြောင့် လိုက်ကာကို ပြန်ပိတ်ပြီး ကိုယ်တိုင်က မျက်နှာသစ်ခြင်းလုပ်ငန်းစဉ် လုပ်ရန် ရေချိုးခန်းသို့...
မျက်နှာသစ်ပြီးတော့ မနက်စာပြင်လိုက်သည်။ဘာမှထူးထူးဆန်းဆန်းတော့မဟုတ် ကြက်ဥကြော် ပေါင်မုန့်မီးကင် baconကိုအပူပေး ကော်ဖီဖျော်...ဒီလောက်ဆိုရပြီ။ရတုကို နှိုးရမယ်.. မဟုတ်ရင် တော်တော်နဲ့ ထမယ့်ကောင်မဟုတ်ဘူး...
"ရတု ရတု ထတော့ ၉နာရီထိုးနေပြီ"
"ငါ ညက နောက်ကျမှ အိပ်ပျော်တာမို့လို့ ခဏလောက် ထပ်အိပ်ချင်သေးတယ် ဥာဏ်"
"ငါ မနက်စာပြင်ပြီးပြီ ထတော့နော် လိမ္မာပါတယ်ကွာ"
"၅မိနစ် ၅မိနစ်လောက်ဘဲ"ဟု ဆိုကာ ပြန်အိပ်သွားသည်။
"ညက တော်တော်နဲ့ မအိပ်ဘူးလား။ဘာဖြစ်လို့လဲ။နေမကောင်းလို့လား"
"အိပ်ယာပြောင်းလို့ ဖြစ်မယ်"
"အိပ် အိပ် ခဏနေမှ ငါလာထပ်နှိုးမယ်"
"Ommm"
မင်းအကြောင်းတွေးနေလို့ အိပ်မပျော်တာလို့ ငါဖြေရင် မင်းဘယ်လိုတုန့်ပြန်မလဲ ဥာဏ်.......။ခုလဲ ငါဘယ်လိုပြန်အိပ်နိုင်မှာလဲ မနက်မိုးလင်းတာနဲ့ မင်းမျက်နှာ မြင်ရတဲ့ အခြေအနေကို ပိုင်ဆိုင်ထားတဲ့အတွက် အချိန်တိုင်းက တန်ဖိုးရှိတယ် အိပ်နေရင် မင်းမျက်နှာမြင်ရမယ့်အချိန်တွေ ပဲ့ပါကုန်လိမ့်မယ်....ပိုတယ်ပြောလည်း ပြောပါစေတော့....
ရတုစိတ်ထဲ ကြည်နူးမှုက အတိုင်းအဆမဲ့... သေချာစဉ်းစားကြည့်ရင် အခုကစပြီး မိုးလင်းလို့ အိပ်ယာထတာနဲ့ ဥာဏ်ကို မြင်နိုင်မယ် မိုးချုပ်ရင် ဥာဏ်နဲ့ အနီးဆုံးမှာ အိပ်ရမယ်။အခုလည်း မနက်စာကို မျက်နှာချင်းဆိုင် ထိုင်စားနေရသည်လေ ရတု အတွက်တော့ ဘာနဲ့မှ မလဲချင်စရာ အချိန်တွေပင်။
