البارت (٢٤) حدوتة حنين
...................................
سما : عاملة أية دلوقتى
حنين : زى ما انا
سما : كلمتى اصحابك
حنين : اة كلمت داليا
سما : بقولك ايه مش ملاحظة حاجة
حنين : فى أية
سما : يعنى انا فكرت فى اللى قولتية واللى حصل معاكى فى الشغل وربط كلام اياد لما قالك دة عز الطلب للسيد الوالد ..
حنين : قصدك أية
سما : هقولك بس من غير نرفزة ممكن ؟
حنين : ممم
سما : بصراحة موقف الشغل دة كلة غريب ازاى عدا عليكى بسهولة كدة من غير ما تاخدى بالك
حنين : اخد بالى من أية ..انجزى
سما : يعنى عربية مخصوص ليكى توديكى وتجيبك ولو عالناس اللى تشتغل فهو مافيش اكتر من حديثى التخرج واى حد ما هيصدق فاشمعنى بقي انتى بالذات اللى مطلوبة وانكل ابراهيم طلبك وكمان سلط ناس عشان بابا يوافق انك تنزلى الشغل ..
حنين : معرفش
سما : طب مخدتيش بالك باسم دة لابس دبلة فى ايدة ولا لاة
حنين : لااا طبعا مخدتش بالى وانا مالى هو انا هتجوزة
سما : ممم افهمى بس ،،هو انتى لما تاخدى داليا وبوسى هل باسم هيكلمهم زى ما كلمك كدة ويعرفهم بنفسة ويجيب تاريخ حياتة وانة وحيد أبوة وأمة
حنين : معرفش بس الكلام جاب بعضة
سما : طيب مش انتى هتاخدى داليا وبوسى معاكى
حنين : اة
سما : خلاص ابقي شوفى طريقة الكلام معاهم زى ما كانت معاكى ولا لاة
حنين : اكيد لاة عشان باسم وابوة عاملين حساب بابا
سما : وهو يعنى خلصوا الناس اللى عايزة تشتغل عشان تبقى وقفت عليكى
حنين : بصى انا هقولك بصراحة
سما : قولى
حنين : انا عمالة اعاند فى نفسى وف كلامك بس كل اللى بتقولية دة انا قولتة لنفسى
سما : يعنى فاهمة انا قصدى أية
حنين : كنت فاكرة انى مزوداها بس لما انتى قولتى كدة دلوقتى يبقى اكيد انا فكرت صح
سما : تفتكرى احنا كبنات وفكرنا كدة يبقى اياد بقى فكر ازاااى وخصوصا أن احنا رعبينة من بابا ومانعينة يتقدم دلوقتى خالص لكن لو علية هو على استعداد
حنين : ماهى دى كمان هتبقي كارثة لو كان بابا عندة علم أن باسم دة عايز عروسة وأنهم اتكلموا عليا
سما : وانا اعتقد كدة وبعتوكى الشغل بحجة انك تشتغلى وف نفس الوقت تتعرفوا على بعض من غير احراج لحد وواضح جدا من كلامة معاكى أنة اعجب بيكى
حنين : هو انتوا عرفتوا منين انى اغمى عليا
سما : هو اللواء إبراهيم دة اتصل ببابا لما السواق كلمة ونقلوكى عالمستشفى وراحوا معاكى على ما جينالك
حنين : ممم فهمت
سما : دى ماما كان هيحصلها حاجة لما عرفت
حنين : حبيبتى يا ماما 😊
سما : الحمدلله عدت على خير بس واضح انك ضغطى على نفسك جامد
حنين : الله يسامحه بقى
سما : انا مستغربة أنة متصلش لحد دلوقتى دة مكنش فى يوم ولا صبح ولا ليل غير لما يطمن عليكى
حنين : بقولك هو ما صدق خلاص
سما : تفتكرى حصلة حاجة
حنين : هيحصلة أية يعنى ،،دة هو اللى قرر أنة يبعد مش انا اللى فرضت علية وحطيتة قدام الأمر الواقع ..
سما : طب لو طلع حوار باسم دة صح هتعملى أية
حنين : مش عارفة لسة
سما : طب هتنزلى امتى
حنين : بفكر في بكرة عشان هيحصلى حاجة لو قعدت اكتر من كده
سما : طب الكورس هتعرفى تكملية
حنين : مش عاوزة اكملة
سما : ايييية دة ناقص حاجة بسيطة
حنين : مش دة المكان اللى اياد كان مختارة وهو اللى محدد المواعيد على حسب ظروفة
سما : هو اختارة عشانك والمواعيد عشان يعرف يشوفك والله اياد دة بيحبك بجد
حنين : سما سمااا بلاش الكلام ده مش هيفرق فى حاجة خلاص
سما : طب مين شكلة احلى باسم المهندس ابن اللوا ولا دكتور اياد اللى هياخد الماجستير ابن المهندس اسماعيل ؟
حنين : هه حلوة المقارنة دى
سما : صحيح هو قرب يخلص الماجستير
حنين : دة كان لسة بادئ فيها
سما : طب مين احلى
حنين : متوقعة مين يعنى
سما : انتى اللى تقولى عشان انا مشوفتش باسم وعايزة اعرف عين شمس اللى تكسب ولا مصر الجديدة ؟
حنين بعد سكوت فترة : اياد كل حاجة فية كانت حلوة وعمرى ما حسيت ان عين شمس تعيبة فى حاجة بالعكس هو شاب وسيم
سما قاطعت حنين : وسيم بس دة قمر يخربيت كدة
حنين : يعنى حلو وشيك وذوق وطموح ومستقبلة كويس واللى كان عجبنى اكتر واكتر حبة واهتمامة بيا وحصارة عليا
سما : كنتى بتحبى الحصار دة مش بتتخنقى
حنين : بالعكس كنت بحب كدة اوى لانة كان عامل حصار حواليا من اى حد يفكر يقربلى وان انا ملكة هو وبس لكن جوة الحصار دة كان هو بيدخلى ويحسسنى انى كل حاجة فى حياتة وكل الدلع شوفتة معاة فى الصغيرة قبل الكبيرة 😢
سما : تفتكرى حد بيحب كدة وعمل كدة يتنازل عن حبة بالسهولة دى
حنين : اهو أتنازل ومفكرش يطمن عليا
سما : اكيد في حاجة
حنين : المشكلة أن انا مشيت معاة فى شوارع كتير وفى مواقف فى حياتى كان هو عامل مؤثر فيها حتى الاكل والشرب 😢😢 يعنى اى حاجة بتحصل دلوقتى قدامى بفتكر كلامة ليا عنها ولما حتى بسمع اغنية بفتكر احنا قولنا عليها أية يعنى من الاخر اياد هيفضل مأثر عليا فى كل حاجة ودى اكتر حاجة مديقانى وبتعذب منها
سما : اكيد هو كمان بيفكر فيكى دلوقتى انا واثقة
حنين : اذا مكنش شايفنى بلعب بية وعينى راحت عالشغل وعلى باسم زى ما حاول يلمح
سما : دة من غيرتة يا حنين
حنين : انا كنت حاسة انة هيغلط فى بابا
سما : هو مغلطش يا حنين هو قال الصورة اللى احنا وصلنهالة عن بابا ولا نسيتى
حنين : يعنى انا غلطانة انى فهمتة شخصية ودماغ بابا
سما : لاة بس هو حس أن اللى بيحصل كلة هيناسب بابا وغصب عنة مستحملش كأنة حس أنة صغير قدام باسم وان كفة باسم هى اللى هتكسب قدامة وواضح كدة أن جنب الغيرة فى كرامة كمان بزيادة
حنين : كان بيوعدنى أنة مهما حصل مش هيبعد عنى اهو طلع كدااااب
سما : طب أهدى والأيام الجاية هيبان كل حاجة
حنين : زى ما تيجى بقي ،، انا اللى عملت كدة ف نفسى
سما : دة غصب عنك معلش
حنين : يالا ننزل انا حاسة انى جعانة
سما : يالا وانا كمان
😟😟😟😟😟😟😟
داليا وبوسى كلموا حنين واتفقوا يتقابلوا تانى يوم قدام الشركة الساعة ٩ وفهمتهم الشغل أية ووضع باسم فى الشركة وكانوا فرحانين أنهم هيكونوا مع بعض بس ف نفس الوقت كانوا مدايقين من انفصال حنين واياد .....
داليا : تعالى نستنى حنين جوة عشان الشمس
بوسى : كنا جينا معاها وخلاص
داليا : هى قالتلى بس انا قولتلها مينفعش عشان منحطهاش فى موقف محرج مع المهندس باسم وابوة
بوسى : اهى جت
حنين : اتأخرت عليكوا
داليا : لا يا قلبى احنا لسة واصلين
حنين : طب يالا نطلع وان شاء الله تكمل على خير
البنات : يارب والاحلى أننا مع بعض
حنين : اة والله
داليا : حلوة الشركة
حنين : صباح الخير يا بشمهندس
باسم : اهلا صباح النور اتفضلوا
حنين : داليا وبوسى أقرب اتنين ليا
باسم : اهلا وسهلا نورتوا
البنات : ميرسى لحضرتك
باسم : تشربوا أية
البنات : لالا ولا حاجة
باسم : لالا مينفعش هى أول مرة بس عشان ضيوفنا لسة وبعد.كدة هتبقوا أصحاب مكان ومش هعزمكوا
البنات : كلك ذوق ميرسى جدا
باسم : تعالى يا عم محمد شوف الاساتذة يشربوا أية
البنات : اى حاجة خلاص
باسم : كلة موجود عصاير فريش أو اى حاجة سخنة حتى الزبادو موجود
حنين 🙄: زبادو !!
باسم : ههههه اة خلاص هات لحنين زبادو وانتوا بقي
البنات : احمم اى عصير فريش
باسم : تمام يالا يا عم محمد
حنين سرحت وافتكرت اياد اول لما باسم قال زبادو واول مرة عزمها علية ولما سما راحت الجامعة معاها وجابلهم زبادو فراولة وطبعا أصحابها فهموا لية حنين وشها اتغير لما باسم قال زبادو ؟؟؟
باسم : تعالوا نقعد هنا عشان نعرف نتكلم
داليا : اتفضل
باسم : عاملة أية يا حنين دلوقتى احسن ؟
حنين : اة الحمدلله
باسم فضل يشرح الشغل المطلوب منهم وقسم الشغل على كل واحدة فيهم وكان كلامة جد جدا اول لما بدأ يتكلم عن الشغل وحدد مرتب كويس لكل واحدة وخلاهم كلهم زى بعض حتى حنين وطبعا حنين كانت بتسمع الشغل بس من غير ما تعلق على اى حاجه وقعدت تتخيل لو باسم دة زوجها فعلا هل هتقدر تنسى اياد وحبها لية؟ وهل فعلا هى ممكن تقبل باسم أو غيرة يبقى زوجها ؟؟
حنين اول فترة من انفصالها عن اياد كانت فترة صعبة جدا ...
وبقيت حنين بتعدى ايامها من غير احساس باى حاجه بس مقدرتش تقلع الحجاب زى ما قالت ورجعت تعمل الحجاب بنفس الطريقة اللى كانت عليها فى الجامعة وكان طبعا اول شعرها باين من الحجاب كأنها بتعاند مع نفسها وتقول إن اياد.لما اتعرف عليها كانت محجبة بالشكل دة وهى دلوقتى هتبقي زى ماكانت مش زى اياد ما طلب منها تعمل ...
😟😟😟😟😟😟😟
داليا : الصبح المهندس باسم كان بيتخانق مع حد وصوتة جايب اخر الشركة
بوسى : أية دة واحنا كنا فين
داليا : كنتى مع حنين فى الدور الاول
حنين : عشان الشغل اكيد
داليا : معرفش بس اللى فهمتة أنة مش هيكمل شغل مع الشركة اللى بيكلمها لحد ما ينفذوا اتفاقهم معاة
بوسى : هو جد اوى
حنين : لازم يبقى جد ف شغلة
داليا : أية الاخبار يا بوسى عن حسام عريسك
بوسى : الحمدلله خلاص كمان شهر كدة هنكتب الكتاب وبعد سنتين الفرح ان شاء الله
داليا : الف مبروك يا قمر
حنين : الف مبروك يا بوسى هو عسولة زيك
بوسى : الله يبارك فيكوا عقبالكم
داليا : من التجارب اللى قدامى الواحد ميفكرش اصلا
حنين : الحمدلله انا عرفت حظى قبل ما ادبس
داليا : ثوانى هرد عالموبايل
الو ...... طب ثوانى عشان مش سامعة ...
بوسى : لسة يا حنين اياد مكلمكيش
حنين : انسى يا بوسى انسى
بوسى : والله حرام الحب دة
حنين : كان حب اة بس من طرف واحد وانا الطرف دة
بوسى : قادرة تنسى
حنين : اهو بحاول وكويس أن فى شغل عشان اشغل نفسى بية
بوسى : بقالكوا اسبوعين
حنين : أية دة انتى بتعدى معايا
بوسى : طول ما انتى بتعدى الايام يبقى لسة فى دماغك
حنين : معلش ماهو كام شهر صعب يتنسوا فى يومين بالسهولة دى وخصوصا أنة كان مأثر عليا جدا
بوسى : ربنا يهدى الحال
باسم : حنين تعالى
حنين : حاضر
باسم : اتفضلى
حنين : ميرسى
باسم : حضرتى فايل شركة (...) عشان جايين كمان ساعتين ؟؟
حنين : اة جاهز وداليا بتكمل اخر حاجة فية
باسم : طب تمام جدا وبرافوا عليكوا ،،بصراحة شغل المكتب هنا ماشى زى الساعة برافوا عليكوا
حنين : اصلا مافيش حاجه فى حياتنا غير الشغل
باسم : دة من حظى بقى
حنين : لية يعنى
باسم : عشان انا كنت محتاج ناس كدة فى الشغل
حنين : بالعكس احنا كمان لما بنرجع البيت بنقعد نفكر ازاى نجدد فى شغلنا
باسم : معقولة فى البيت كمان
حنين : اة والله
باسم : مافيش نادى ولا خروجات مع الفريندز مثلا
حنين : أقرب اتنين ليا جبتهم معايا الشغل ومش محتاجين ننزل النادى عشان نتقابل ماهما كل يوم فى وشى ههههه
باسم : ههههه ياااة اخيراا ضحكتى
حنين : معلش انا عارفة انى تنشن اوى من ساعة ماجيت بس انا مش كدة والله بس شوية وقت واكيد هعدل طريقتى
باسم : خليكى براحتك مافيش مشكلة بس اتمنى نكون اصدقاء واعرف انتى لية دايما حزينة ؟؟
حنين : لاا انا مش حزينة لية بتقول كدة
باسم : عينيكى كلها حزن وحتى ابتسامتك
حنين : معلش انا ممكن استأذن
باسم : لالا ثوانى وانا متأسف لو زعلتك،، المرة اللى فاتت ادايقتى لما قولتلك سكرتيرة وخرجتى اغمى عليكى وحسستينى بالذنب والمرة دى هتخرجى وانتى زعلانة تانى استحالة هوافق خليكى قاعدة لحد لما تضحكى لحسن المرة دى لا باباكى ولا ابويا هيعدوها وهيقولولى اشمعنا كل ما تكون عندك تخرج يغمى عليها..
حنين : هههههههه
باسم : الحمدلله هههههههه انتى كدة تمام صح
حنين : هههههههه اة والله
باسم : بصي براحتك خالص وقت ما تحبى تتكلمى انا موجود
حنين : متشكرة انت فعلا ذوق
باسم : يالا يالا خلى البنات تجهز عايزين نبقى جاهزين قبل الناس ما توصل
حنين : حاضر متقلقش
خرجت حنين من مكتب باسم وراحت التويليت وقفلت عليها وفضلت تعيط بحرقة وتكلم نفسها😭😭😭 ( اعمل اييية بس مش قادرة انساة وكل حاجة بتفكرنى بية وقلبى موجوع،،ااااااااااة حاسة انى هموت من كتر ما واحشنى وقلبى مكسور من زعلى منة 😭 معقولة هونت عليك تبعد عنى يعنى احساسى بانك بتحبنى دة كان كدب يعنى ضحكت عليا فعلا وعلقتنى بيك لدرجة أن مش عارفة افكر في حاجة غيرك طب ليييية انا سيبتك تتحكم فيا براحتك وانا كنت مبسوطة وسعيدة بدة !!!! يا خسارة كل حاجة حلوة عملتها معاك ومشاعرى اللى كبرت جوايا بسببك وعشانك 😭😭😭😭😭😭
داليا : حنين فين
بوسى : كانت عند البشمهندس وخرجت عالتويليت تقريبا
داليا : كل دة جوة
بوسى : هروح اشوفها
داليا : ماشى
بوسى : حنين حنين
حنين 😢 : احمم ايوة يا بوسى
بوسى : انتى كويسة
حنين : اة انا خارجة اهو
بوسى : 😳 كنتى بتعيطى
حنين : عادى بقي
بوسى : باسم قالك حاجة زعلتك
حنين : باسم دة مظلوم معايا والله
بوسى : مش فاهمة
حنين : هفهمك اول مرة جيت هنا قعدت معاة واتكلمت وفهمت غلط فى حاجة معينة بس بعدها خلاص فهمت صح وخرجت من عندة كلمت اياد وحصل اللى حصل واغمى عليا ومن شوية بيقوللى حاجة فافتكر انى زعلت زى المرة اللى فاتت ولقيتة بيقوللى لا والله ما انتى قايمة غير لما تضحكى لحسن كدة ابوكى وابويا مش هيعدوهالى لو حصل حاجة هههههههه
بوسى : هههههههه خاف
حنين : هههههههه ضحكنى والله وانا على أخرى
بوسى : طب كويس انك ضحكتى عشان شكلك باين انك بتعيطى ،،،خدى نفس كدة جامد عشان وشك يتعدل
حنين : ماشى روحى وانا جاية وراكى
بوسى : اوك
داليا : فينها
بوسى : جاية ورايا
داليا : فى حاجة ولا أية
بوسى : كانت بتعيط
داليا : طب بس عشان جاية
حنين : ههههه عارفة بتتكلموا فى أية
داليا : أية دة بتراقبينا بقي
حنين : مش محتاجة اراقبكوا دانا حفظاكوا
داليا : احنا بنطمن بس
حنين : اطمنى اصل المرض لسة فى اولة ولسة شوية على العلاج ما يعمل مفعول..
🧐🧐🧐🧐🧐🧐🧐🧐🧐🧐
لااااايك وكومنت لمتابعة حدوتة حنين
عشان نعرف مين اللى كلم داليا فى الموبايل وخرجت تتكلم برة عشان محدش يسمع وآية اللى حصل؟؟
تحياتى حنين الماضى 🤗
