6ix Days (Lesbian Story)

Chapter 19: Test Day

"Throw your dreams into space like a kite, and you do not know what it will bring back, a new life, a new friend, a new love, a new country."-Anais Nin

***

Sa araw ng citizenship exam, sumama sa akin si Maricar.

Nagkataon kasi na day off din niya at nagprisinta siya dahil baka daw kailangan ko ng moral support.

Bago mag-alas siete ay nasa basement na siya at parang nanay na nagcheck kung dala ko na lahat ng kailangan ko.

Tiningnan pa ang backpack ko kung meron akong dalang ballpen at kung nailagay ko ang sulat na galing sa Canadian Embassy.

Dahil nakalagay sa guideline na bawal ang cellphone sa loob ng exam room, sinabi ko sa kanya na siya na ang bahala sa gamit ko once pumasok na ako.

Bago ko sinara ang pinto ay nagsign of the cross muna ako.

"Kayang-kaya mo iyan." Inakbayan niya ako sabay pisil sa balikat.

"Paano kung bumagsak ako?"

"Ano ka ba? Think positive. Nagreview ka naman di ba?"

Umakyat na kami sa hagdan at pinauna ko siyang lumabas sa pinto.

"Oo pero nininerbiyos pa din ako. Sabi ni Arlene, three mistakes lang ang allowed."

Binuksan niya ang bakod na gate at ako naman ang unang pinalabas.

"Nel," Nilock niya ang tarangkahan at sinabayan na akong maglakad papunta sa train station.

"Magtiwala ka sa sarili mo. Di ba pasado ka naman sa online test?"

Tumango ako.

"Yun naman pala eh. Basta magfocus ka lang sa gagawin mo. Huwag mong hayaan na matalo ka ng takot. Kayang-kaya mo iyan. Bilib kaya ako sa'yo."

Nakakapagpalakas ng loob ang mga sinabi niya pero hanggang makarating kami sa Harry Hays Building sa downtown, pilit pa ding pumapasok sa isip ko ang posibilidad na baka bumagsak ako.

Matagal ko na kasing pangarap na dumating ang araw na ito.

Ang dami kong sinakripisyo kaya naman grabe ang pangamba ko.

Umakyat kami ni Maricar sa escalator at ng sinamahan niya ko sa pila.

Nang pinapasok na ng security ang mga mage-exam, inabot ko kay Maricar ang backpack.

"Hihintayin na lang kita sa baba." Sabi niya habang sinusuot sa balikat niya ang gamit ko.

"Good luck ha?" Nginitian niya ako at nagpasalamat ako sa kanya.

Pagpasok sa exam room, may maikling speech ang isang babae.

Binigyan niya kami ng instructions at sinabi na pagkatapos ng exam, maghintay kami saglit dahil sasabihin din sa amin ang test results.

Twenty questions lang naman pero ng bigyan na kami ng signal na pwede na kaming magsimulang sumagot, saglit na tinitigan ko ang questionnaire.

Pumikit ako at saglit na nagdasal.

Pagkatapos ay sinimulan ko ng sagutan ang test paper.

Wala pang thirty minutes ay natapos ko ang exam pero binasa ko ulit ang mga sagot ko para makasigurado na tama ang mga sagot ko.

Nang satisfied na ako, tumayo ako para iabot sa isang lalake na nakaupo sa harap ang exam sheet.

Saglit lang akong naghintay at sinabihan ako na pumunta sa isang gilid kung saan may isang babae na naghihintay sa akin.