နည်းပညာကျောင်းများ၏ ကျောင်းသားများ၏ ဘဝသည် ရေးဖြေစာမေးပွဲများပြီးသွားသော်လည်း မကျွတ်လွတ်နိုင်ကြ။
စာမေးပွဲများပြီးသည်နှင့် လက်တွေ့ဆင်းခြင်း ၊ တစ်နှစ်စာ ပရော့ဂျက်နှင့် နှုတ်မေးနှုတ်ဖြေ စာမေးပွဲများကက အသင့်စောင့်ကြိုနေတတ်သည်။
ဒီနှစ်အတွက်တော့ နေသစ်က အခွင့်ထူး
ခံဖြစ်သွားရသည်။ ခုံနံပါတ်ကပ်လျက်ရှိသော သူများနှင့် ဖွဲ့စည်းထားသော ပရော့ဂျက်အဖွဲ့သည် နေသစ်ကို
အနားပေးထားကြသည်။ သူ့ခြေထောက်အခြေအနေက ကောင်းကောင်းမသွားနိုင်
မလာနိုင်သေး၍ အိမ်မှာပင်နေ၍ ဗီဒီယိုကော်လ် ခေါ်ခြင်းဖြင့် ဆွေးနွေးကြ။ စာရိုက်ခြင်းကဲ့သို့ သေးသေးမွှားမွှားကိစ္စလေးတွေကိုသာ လုပ်ခိုင်းကြ၏။
အိမ်ထဲမှအိမ်ပြင်လုံးဝမထွက်ရသည်တော့မဟုတ်။ ကျောင်းသွားတက်မည့်ကိစ္စအတွက် မမလတ် နှင့် ဖေကြီးက အကုန်လုပ်ပေးနေကြသော်လည်း လူကိုယ်တိုင်လိုက်ရမည့် ကိစ္စများတွင်တော့ နေသစ်အပြင်ထွက်ရသည်။ ကိစ္စပြီးသည်နှင့် အိမ်ကိုသာပြန်လာရသည်။ အရင်လို စကွက်နှင့်ဟိုဟိုဒီဒီလျှောက်မလှိမ့်နိုင်ပေမဲ့ သူငယ်ချင်းများက နောက်ချန်မထားခဲ့ပါ။ နေသစ်သွားတော့မည်ဆိုတာ သေချာနေပြီဖြစ်၍
မကြာခဏဆိုသည့် အကြိမ်ရေထက်ပိုကာအိမ်သို့လာတွေ့ကြ၏။ ကိုဒွန်းနှင့်တော့စာမေးပွဲနောက်ဆုံးနေ့နောက်ပိုင်းလူချင်းမတွေ့ဖြစ်ကြ...သူလည်းသင်္ဘောပြန်တက်ဖို့ ရာထူးတိုးစာမေးပွဲဖြေရန် အာရုံစိုက်နေခဲ့ပြီဖြစ်၍ အရင်လို မအားလပ်တော့သည်လည်းပါမည်။
ခန့် နှင့်တော့ စာချင်းအဆက်အသွယ်ရှိ
သည်။ ခန့် နှင့် မိုးရိပ်တို့ နှစ်ယောက်တွဲ
ပုံတင်တိုင်း အရင်လိုကျော်မသွားဖြစ်တော့။ တုံ့ပြန်မှုတစ်ခုတော့ အနည်းဆုံး
ပေးဖြစ်ခဲ့သည်။ ခန့်အဆင်ပြေ ၊ မပြေကိုသေချာမသိနိုင်သော်လည်း ခန့်ကိုတော့ဖြင့် သူယုံကြည်သည်။ ခန့် သည် ခန့်ညီလိုမဟုတ်။ အခြေအနေနှင့် ကိုက်ညီအောင်လိုက်လျောညီထွေနေထိုင်တတ်သည်။
အကူအညီလိုကလည်း အကောင်းဆုံး
အကြံဥာဏ်ပေးနိုင်သူတွေထံမှ အကြံ
ဥာဏ်ကောင်းများရယူတတ်သည်။ နောက်ပြီး ခန့်မှာက Aura မှာ ကိုထွေး
နှင့်ဝေဠုတို့ရှိသည်သာမက သူ၏ အနီးကပ်သူငယ်ချင်းများလည်းရှိသည်။ ခန့်ညီမှာက သူ့ကိုတစ်ဖက်သတ်ကြိတ်ပုန်းကြွေနေသော ထွန်းကိုကိုသာရှိသည်။
