سنيوريتا😍❤️

24

صحيت الصباح دخلت الحمام استحميت وجيت صليت وقريت شوية قرآن وبديت البس لبست ونزلت تحت شربت الشاي مع بابا
ابوي قال لي : اها خلاص ماشه بعد دا
قلت ليه : اي ماشه والليله جايي اخو وجدان من السفر
قال لي : دا ألفي الإمارات داك؟؟
قلت ليه : اي بس ياهو يلا انا الليله بعد ما اجي من الجامعة احتمال امشي مع وجدان لي بيتهم طوالي أو بجي هنا بغير وبمشي
قال لي : خلاص تمام👍
... على كدا طلعت مشيت لي وجدان ركبنا الركشه
وجدان قالت لي : يعني هسه معقوله انا اخوي يكون جايي من السفر وما اقعد استناه😔
قلت ليها : والله حظك كعب كمان الليله في محاضره مهمه شديد ولو كنتي بتفهمي بي سهوله كان انا حضرتها وشرحتها ليك لكن انتِ مخك تخين😂
قالت لي : انا مخي تخييين😒
قلت ليها : ايوااان😂 يلا المهم اخوك ما طاير بعدين بتلاقيه
مشينا الجامعة لاقينا لميس ولجين وقعدنا اتونسنا شويه كدا ودخلنا المحاضره وكان عندنا محاضرتين خلصناهم حتى مشينا الكافتريا أكلنا واتونسنا شويه كدا وبقينا راجعين على البيت بس طلعنا من الجامعة كدا انتظرنا الركشه لحدي ما جات ركبنا ومشينا وصلنا البيت
وجدان قالت لي : تعالى خشي معاي البيت سلمي على قيصر
قلت ليها : بغير هدومي وبصلي وبجيكم
قالت لي : خلاص تمام لكن ما تتاخري
قلت ليها : خلاص سمح
... وجدان دخلت بيتهم وانا دخلت البيت سلمت على بابا وامي وآسر... ورائد كان في الشغل لسه ما جاء طلعت غرفتي استحميت وصليت ونزلت تحت جهزت مع امي  الغدا ورصيناه وبدينا ناكل
قلت لي امي : الليله اخو وجدان الإسمه قيصر دا جاء من السفر
قالت لي : بالله هسه بمشي بسلم عليه
قلت ليها : اي انا زاتي ماشه
ابوي قال لي : يا وتين بكون عندهم ضيوف كتار مش
قلت ليه : اي شايفه في عربات كتيره.
قالت لي : خلاص ما بتلقي لي مزززه اربط معاها 😉
قلت ليه : والله من عيوني.. انت بس اصبر لي بجيب ليك امزز مزه في المزاااميز 😉
من هناك امي بتحمر لينا 😂💔
قلت لي بابا : جازف لي 50 جنيه لي الرصيد وخليني اتخارج سريع سريع😂
يلا امي دنقرت دايره ترفع الشبشب وتفلعني انا شلت قروشي وجريت وخليت بابا وآسر بضحكوا وامي ولعت فيهم ( اصلا انا بعد ما افور البيت واوقفه على رجل وحده طوالي بعمل انسحاب تكتيكي 😂💔)
... قلت امشي اشتري لي رصيد حتى اخش لي ناس وجدان مشيت الدكان بتاع الدكان اسمه عمو علي ( عمو علي بياااع الزيت ساق مرتو وداااها البيت..... 😂) هييي خلاص نرجع لي موضوعنا...
قلت ليه : عمر علي خبراتك شنو؟
قال لي : اووو وتين المختفيه كيف حالك
قلت ليه : تمام الحمد لله عندك رصيد
قال لي : اي
قلت ليه : حول لي بي 50
قال لي : وحاتك دي اخر 50 يلا حلال عليك 😂
بس عمو علي داير يحول لي الرصيد كدا جاء ولد وقال ليه : يا عمك بالله داير لي رصيد
قال ليه : والله في آخر 50 وححولها لي البت دي
قال ليه : ياخ عليك الله بت شنو حولها لي انا
قال ليه : لكن هي جات قبليك
قال ليه : خليها تمشي اي دكان تاني
انا قلت ليه : ما تمشي انت امشي انا 😒
قال لي : ياخ بس شفتي الليله الا اشيل الرصيد دا
قلت ليه : في احلااامك انا الحأشيله
بس بقينا بنقول لي عمو علي: انا الحأشيله لالا انا الحأشيله
في النهايه حنكت عمو على : قلت ليه داااايراه ضروووري ضروووري شديد ( وحاتكم انا بس كنت دايره  لي الضمان لكن مدام جابت ليها لماضه الليله حرررم الا أشيل الرصيد دا 😌😂)
الولد قال : ياخ انا ما عندي ولا جنيه واحد بتاع رصيد
قلت ليه : مشكلتك انا مالي 😏
في النهايه عمو علي قال : والله يا ولدي البت دي زي بتي وما بخليها تحوم في الدكاكين واصلا ماف دكان قريب تاني عشان كدا حأحول ليها الرصيد وانت تعال بكره
بس عمو حول لي الرصيد وانا حمرت لي الولد وطلعت ليه لساني 😝ومشيت
الولد قال : دي شنو الشافعه العويره دي😒
... مشيت لي ناس وجدان سلمت على مريووومه وووجدان وعمو حسام ودلال ولقيت معاهم حبة ضيوف سلمت عليهم وساعدت وجدان شويه
قالت لي : تعالي اعرفك على اخوي 😊
قلت ليها: وينو؟
قالت لي: دقيقه
بس مشت وجات وجابت معاها اخوها
(اتخيلوا بس دا نفس الولد اللاقيتو في الدكان هسه 😂) طبعا بقيت عامله كد😳
الولد قال لي :انتِ؟!
قلت ليها : انت؟!
وجدان قالت لينا : انتوا بتعرفوا بعض؟؟
قال ليها : ياخ دي البت العويره الشالت الرصيد
قلت ليه: عوير براااك 😒
وجدان قعدت تضحك 😂
قالت ليه : يا قيصر دي وجدان بست اختك المبستته 😌❤️
سلمنا على بعض وقعدنا شويه اتونسنا مع بعض وانا لقيت امي جات وجاء معاها آسر بس بعد الضيوف مشوا قعدنا شربنا الشاي وانا وقيصر بقينا بنتونس عادي وطلع ولد لا بأس به 😂💔لكن بس قبيل في الدكان كان لميض شديد لو ما كدا كان اديتو الرصيد لكن بس عشان لماضتو دي ابييييت ماف ليه 😂
...انا ووجدان وقيصر وآسر لعبنا ليدو
وبعد انتهينا وجدان جات الأولى وانا التانيه وآسر التالت وقيصر الأخير ( لووووزر😂💔)... بعديها قعدنا اتونسنا
قيصر قال : والله داير لي رصيد ركبت الشريحه ولقيتها  فاااضيه
قلت ليه : خلاص تعال بقسم معاك الخمسين بديك25
قال لي: والله تكوني ما قصرتي 😊
قلت ليه : من الاول لو كان لميت لسانك عليك كان خليت ليك الخمسين كلها  😏
قال لي : يعني انتِ خلاص اللميتي لسانك عليك؟؟!  قعدنا نضحك😂 وانا حولت ليه 25
امي قالت لينا : ارح بعد دا
قلنا ليها: اي ارح
يلا ودعتناهم وقلنا ليهم يلا نمشي بعد دا وبنجيكم مره تانيه ...
مشينا البيت وانا صليت ونمت😴.........
........

عند ناس وجدان :  .....
قيصر : يا وجدان دي وتين القاداني بيها😂
وجدان : اي ياخ دي صحبتي شدييييييد ❤️
قلت ليها : لكن ياخ لسانها طويل خلاص 😂💔
قالت لي : لكن في نفس الوقت ظريفه وقلبها ابيض
قلت ليها: بالجد هي ظريفه شديد وبتخش في الناس طوالي 😊
دلال : بالجد والله وتين دي انا بحبها شديييد
قلت ليها : بالجد هي بت ظريفه وبتتحب
وجدان : اي عشان تعرفوا بس انو انا ما بصاحب اي زول😌
قلت ليها : لالا شاااطره 😂
دلال : بالجد يا وجدان مصاحبتك لي وتين دي الحسنه الوحيده العملتيها في حياتك😂..
وجدان : قومي يا دلال من جمبي انا اصلا حياتي كلها حسنات 😌
دلال : يااا شيخه
قلت ليهم : هيي خلاص يلا قوموا تموا عوارتكم دي بعيد انا جايي من السفر تعبان وداير ارتاح....
.......

كسره......
...  يا جماعة ما اي زول لسانه طويل معناتها كعب وقليل أدب.... ابداااا في ناس بكونوا طيباانيين شديد من جوه لكن ما بعرفوا يعبروا عن الدايرنه وعن مشاعرهم.... وفي نفس الوقت في ناس بكونوا كعبييين شديد من جوه☹️ لكن من بره عاملين فيها ظريفين ومركبين وش البراءه😟 انا في رأيي احسن الزول اللسانه طويل لكن قلبه ابيض وبتكلم بي عفويه😊 وما بكون قاصد شي دا احسن من البمثل وبتمسكن وبعمل فيها شيخ وبتاع 😒يلا عشان نكون عارفين ماف أطيب من الناس البكونوا قلبهم ابيض وبقولوا ألفي قلبهم طوالي وما بشيلوا في قلبهم على زول وأحيانا بكون لسانهم طويل واي شي لكن مهما كان برضو من جوه حلويييين شديد 😊❤️وبكونوا كدا على طبيعتهم ما بتصنعوا وما بمثلوا.... ولا رايكم شنو انتوا؟؟؟....
...

# يتبع