May nakilala akong anghel.
Kumikinang ang bawat patak ng luha niya
Mahal, siguro'y ginto ang halaga
Madalang pa sa madalang kung magpakita
Hindi ito tutulo para kung kanino lamang,
Sa katunayan, hindi iyon para sa akin at nakapanghihinayang
Pero ayos lang.
Ang anghel na nasa harapan ko... wala siyang pakpak
Ngunit ang bawat galaw ng labi niya't mabulaklak
At maaabot niya ang mga lugar kung saan niya gugustuhing tumapak
Naisip ko, baka siya ang ibinabang anghel ni Bathala upang umantabay sa akin
Magandang isipin, makulay na panaginip, ngunit sarili rin ang lolokohin
Ang anghel na nasa harapan ko...
Hindi siya sa akin.
Hindi siya naririto para sa akin.
Iyon ay aking tatanggapin,
Ngunit walang pangakong sa pagpatak ng gabi'y hindi ako nito paluluhain
Mula rito sa lupa,
Sa paglisan niya,
Pabalik sa pinakamamahal niyang musika,
Titingala, kakaway ako, at sasabihing,
"Babalik ka, ha?"
At kapag naglaho na siya sa aking paningin,
Mangunguliha ang puso ko para sa pagmamahal na kasama niyang naglaho sa hangin
May nakilala akong anghel.
At tulad ng mga bituin,
Hindi ko siya kayang abutin.
BINABASA MO ANG
Promises Etched in Poetry (Arte del Amor #2)
RomanceBeing madly in love with someone who has his eyes fixated on someone else. Astraea Lekha has to wake up everyday with this painful reality, but what else can she do? She writes her agony in prose and poetry, swearing that she will not stop until the...
