في الحلال

Part 48

ضحك رغماً عنه وقال :
- نتوب من إيه ياحجة ماتصلي على النبي كده وبعدين مفيش مساء الخير حتى ؟!!
قالت على الفور :
- خالد انا دلوقتي شوفت آية وخوفت جداً وحسيت ان ربنا اراد اني اشوفها دلوقتي بالذات علشان نبطل اللي بنعمله ده
مط شفتيه للامام ورفع حاجبه قائلاً بتعجب :
- هو ايه ده اللي احنا بنعمله بقى ان شاء الله ولازم نتوب منه بسرعة كده !!
زفرت بملل وقالت :
- يا خالد بطل بقى ، انت مش عارف يعني احنا بنعمل ايه ؟!!
قال بعصبية :
- ام مش عارف بنعمل ايه ؟!! قوليلي انت يا ست هند بنعمل ايه ؟!! يعني مش كفاية مش بنخرج ولا حتى عارف اشوفك براحتي ومستحمل ده كله وبقول جايز تتغيري وجايز مكسوفة وجايز معرفش ايه !! عايزة ايه تاني هــــاه ؟!!
تنهدت بخوف وقالت :
- يا خالد لازم نبطل الكلام اللي بنقوله ده ، انا حاسة ان كل ده حرام ومش مرتاحة خالص بجد وتعبانة وبقيت أتكسف اروح عند اسلام او ابص في وشه حتى
تطاير الشرر من عينيه وقال بجنون :
- إســــلام إســــلام إســــلام ، قرفتيني بإسلام ياهند ، مش عارف ايه حكايتك انت واخوكي ؟!! ومش عارف انتو عايشين في أنهي زمن بالضبط ؟!! ما الناس كلهم مخطوبين وزي الفل اهو اشمعنى احنا يعني ؟! ده انا عندي كل واحد من صحابي بيدخل ويخرج مع خطيبته وكما بيسافروا سوا ويروحوا شقتهم وبيعملوا كل اللي هم عاوزينه ومحدش بيقدر يكلمهم وانت كل ما اجي اقولك على حاجة تقولي لأ علشان علشان إسلام ؟!! انا مش فاهم انا هتجوزك انت والا هتجوز إسلام ؟!! ومع ذلك برضو مستحملك خـــــالص لحد ما تتعودي عليا ومتمسك بيكي لانك داخلة دماغي لكن كمان تقعدي تقوليلي منتكلمش ؟!! أهو ده اللي ناقص والله !!!
نظرت للجانب الآخر وقالت بعدم فهم :
- يعني إسه داخلة دماغك ؟ ويعني إيه بيسافروا سوا ويروحوا شقتهم ؟!
زفر بضيق وقال :
- مش يعني حاجة ياهند مش يعني حاجة ، عاوزه حاجة تاني والا اقفل ؟!!
تنهدت بحزن وقالت :
- يا خالد طب استنى الله يخليك ، انا والله مش عاوزة أزعلك بس كمان خايفة يكون اللي احنا بنعمله ده حرام ، ماهو طالما بخاف اعمله قدام حد وكمان دايماً بعد ما بكلمك بحس إني موجوعة فأكيد كلامنا ده ميصحش
أغمض عينيه وقال بملل :
- هو إيه اللي ميصحش ياهند ؟ أنا خطيبك فاهمة يعني إيه خطيبك ؟ يعني كام شهر وهتكوني مراتي ، يعني الناس كلها عارفة إنك خلاص بقيتي بتاعتي ، عاوزة ايه تاني بقى ؟
إرتمت على الكرسي وقالت بتعب :
- يا خالد انا خايفة ، بجد تعبانة وخايفة وكمان النهاردة لما مسكت المصحف خوفت أكتر وحسيت اني مستحقرك نفسي اووي ، بالله عليك ساعدني نتوب ونبقى مويسين زي إسلام وسلمى كده ، هما كمان بيحبوا بعض بس مكانوش بيعملوا الحاجات دي في خطوبتهم
ضحك بسخرية وقال :
- وانتِ عرفتي منين بقى إنهم مكانوش بيعملوا كده في خطوبتهم ؟ كنتي قاعدالهم ٢٤ ساعة يعني ؟!
نظرت للمرآة بذهول وقالت :
- عرفت منين يعني ايه ياخالد؟ ما هو اسلام قالي كده وانا كنت بشوف كده !!
إبتسم بعدم إقتناع وقال :
- ياهند انتِ غلبانة ومش فاهمة حاجة ، ‏الناس اللي بيقعدوا يقولوا قال الله وقال الرسول ‏دول وعاملين نفسهم فاهمين في الدين اوووي ‏وبينصحوا  الناس هم اكثر ناس بيعملوا الغلط أصلا ، ‏اوعى تخلى المظاهر تخدعك ، ‏أخوكي اللي بيقولك  ما تتكلميش خالص ده تلقاه كان مقضيها اصلاً وعايش حياته ، ‏أنا مش بقوللك كدا علشان تكرهيه ، أنا بس بعرفك الحقيقة
‏صرخت به قائلة :
- ‏خــــالد أنت بتقول ايــــــه  ؟!!
‏اجابها مؤكداً :
- ‏روحي يا هند شوفي لي كام واحد مربي دقنع بيضرب مراته ‏ومبهدل أهل بيتو ‏مكفر ده و بيتكلم على ده وفي الآخر ‏عامل نفسه متدين ، ‏ولا شوفي كام وحده لابسالي نقاب وعمالة تضحك في الشارع ‏ومصحبالي ده وده وبتجيب في سيرة وتشتم على دي ‏وفي الآخر تقوللك أنها متدينة ، ‏يا بنتي الناس دى معقدين أصلا ، ‏وبيقعدوا ينصحوا في الناس كأنهم ملايكة ‏وهم أصلا بيعملوا بلاوي بس من تحت لتحت
‏اخذت تحرك رأسها يمين ويسارا يعدم تصديق وقالت :
- ‏مستحيــــل ‏اللي أنت بتقولوا ده يا خالد ، اوعى ‏تقول عليهم كده تاني ، إسلام وسلمى عمرهم ما يعملوا كده ‏وكمان مش علشان شوفنا نموذج مش كويس يبقى نعمم على الكل ، ‏ياما في ناس ملتحين ومنتقبات وزي الفل ‏ومش بيعملوا حاجة من اللي أنت بتقول عليهم دول ، ‏وطبعا أكيد هتلاقي نموذج سيء ولكن الأغلب بيكونوا كويسين الحمد لله ، ‏كمان اللى اعرفهم شخصيا زي إسلام ‏وسلمى ونهى  واحد صاحب إسلام تقريباً اسمه طارق ‏كلهم دول كويسين جداااا ومش زي ما أنت بتقول ‏خالص ، حرام تظلم الفئة كلها وانت متعرفش منهم حد أصلا !!
‏نظرة للمرآة بالملل وقال :
- ‏خلاص يا هند مش موضوعنا ، ‏أنتِ حره برأيك وأنا برضو مقتنع برأيي ، ‏المهم يعني ان الناس ‏دول معقدين جدا وبيقعدوا يحرموا كل حاجة وانا مش عاوزهم في حياتي ، وبما انك هتبقي مراتي يبقى تسمعي كلامي انا مش كلامهم همّا مـــــاشي ؟!!
- ‏ماشي يا خالد أنا هسمع كلامك والله بس ‏بلاش نتكلم في الحاجات دي ‏علشان تعبت خلينا نتكلم عادي وخلاص
- يبقى أنت كده مش بتحبيني يا هند
‏زفرت بضيق وقالت :
- ‏يوه يا خالد هو أنا كل ماقوللك حاجة تقول مش بتحبيني ؟!! ‏آومال أنا بعمل كل ده علشانك ليه بس ؟
‏قال بإصرار :
- ‏خلاص يبقى ‏ما تتكلميش في الموضوع ده تاني ماشي ؟ ‏أنت خطيبتي ودي أبسط حقوقي ، وبعدين أنا مش خاطبك علشان نقعد زي الإخوات كده ؟!!
- ‏حقوقك ؟ حـــاضر يا خـــالد حـــاضر
__________________________
- يــــا خلاثي يا سلمى على شكلك ، بطوطة خــــالص
‏قالها إسلام بعد ما عاد من عمله في اليوم التالي ‏ونظر لسلمى وهي تجلس بمنتصف الصالة ‏ومحاطة بالبالونات من كل جانب ، ضحكت سلمى وقالت :
- ‏أنا انتفخت يا اسلام ، قصدي فسيت ، ‏أنا مبقاش فيا حيل أصلا ونفسي إتقطع ، ‏تعالى كمل بقى ‏علشان تعبت
‏نزع حذائه من قدمه وألقى الكيس الذي ‏احضرها معه على الأريكة ‏واقترب منها وظل يعد في البالونات ‏وهو يقول بمرح :
- براوه عليك يا واد يا بليه ، طلعت اشطر مما توقعت
ضحكت بفخر وقالت :
- إحنـا بنحح نخـــدم يا كبيـــر ، هات عشه جنيه بقى
ألقى عليها البالونات التي كانت في يده وقال مازحاً :
- عشه جنيه ؟ عاملة نفسك روشة يا سلمى ؟ بــــــارضو مش لايقه ، وهتفضلي اوزعة وكيوت كده مهما عملتي
تنهدت بحزن وقالت :
- هفضل كيوت ؟ مفيش أمل يعني؟ قشطة الكيوته حلوة برضو
رفع حاجبه قائلاً بمرح :
- كيوته ؟ دي الي هي على وزن روشنه يعني ؟ ماشي يا كبيرة يلا  ناكل بقى علشان في مفاجئة قبل المغرب
إتسعت عيناها وقالت بحماس :
- مفاجئة إيه دي ؟ والكيس اللي على الكنبة ده جواه ايه ؟ هــــاه هـــــاه هـــــاه ؟
- بطلي زن بقى بطلي زن ، هقولك على كل حاجة بس بعد الاكل ان شاء الله