في الحلال

Part 55

أقترب منه فوزي وقال بحزن :
- يعني خلاص كده مفيش أمل ؟
ربت إسلام على كتفه وقال مبتسماً :
- أولا كده جدد نيتك هاه وحط في بالك إنك كده بترجع الأمانة وبتدخل السرور علي قلب صاحبها وبتتبع كلام النبي عليه الصلاة والسلام وبتدوس على هواك علشان رضا ربنا ، يعني ماتزعلش من حاجة زي كده ، أنا متأكد إنك جواك كويس وبرضو عاوز ترجعها بس هي حليانة في عينك شوية وبصراحه عندك حق بس عارف یا فوزي ؟
صمت قليلا ليجذب إنتباهه وقال بثقة :
- المؤمن اللي بجد بيبان في المواقف اللي زي دي ، بيبان درجة حبك لربنا وإيمانك في مواقف الشدة
والحاجات اللي زي كده علشان كده لازم تاخد بالك أووي وحتى لو الحاجة على هواك دوس على نفسك شوية علشان تعمل الصح
ثم ضربه بمرح وقال :
- إفرح بقى يا عم وإضحك كده الله ، ده إنت دلوقتي هتكون شخص آمين وهتشوف بنفسك فرحة صاحبها بيك
إبتسم قائلا :
- ماشي يا إسلام حاضر ، وعندك حق برضو رضا ربنا أهم ، وبعدين أنا مش هفرح يعني لو ربنا عاقبني مثلا وحد من ولادي حصله حاجة أو كده ، ربنا يحفظهوملي ويقدرني على تربيتهم بالحلال
تنهد بسعاده وقال :
- يـــــارب يابو مريم ، يلا بقى هات الشريحة علشان نحطها ونكلم صاحبها
أمسك بالشريحه ووضعها بالهاتف وأخذ يقلب في الأسماء ليختار المتصل بينما أمسكه فوزي فجأة
وقال بحيرة :
- طيب صحيح ما ممكن الشريحة اللي لقيناها دي تكون بتاع حد تاني خالص ولما يعرف الموضوع ياخد هو الموبايل ليه
إبتسم قائلا :
- في الغالب مش هيحصل كده إن شاء الله لانها الشريحة الوحيدة اللي لقيناها في نفس المكان لكن
مع ذلك برضو انا مش هديهاله إلا لما يوصفها كويس وكده علشان أتأكد
بدأ إسلام يبحث في الأسماء مرة أخرى حتى وجد إسم My sister فإبتسم لفوزي وقال :
- لقيت رقم اخته او اختها أهي ، خد كلمها بقى وشوف
أمسك فوزي بالهاتف ولكنه سرعان ما أعاده إلي إسلام وقال مازحاً :
- لأ خد ياعم كلمها إنت ، بصراحة مشاعري ما تستحملش أعمل حاجه زي كده
ضحك قائلا :
- صعبان عليك أوي إنك هترجع الموبايل يعني ، قولنا جدد النية بقي يابو مريم
ثم أمسك بالهاتف وإتصل على الرقم وقال بجدية :
- السلام عليكم يا فندم

أجابت بلهفة :
- وعليكم السلام ، لو سمحت الموبايل ده بتاع أخويا والله وضاع منه من ساعة فـ ياريت حضرتك ترجعهوله علشان حالته دلوقتي صعبة ، لو سمحت بلاش تقفل بجد ورجعه وربنا هيجازيك خير على كده إن شاء الله
إبتسم قائلا :
- أنا متصل بحضرتك يا فندم علشان أرجعه ، ممكن أكلم صاحب الموبايل بعد إذنك ؟
سمعها تنادي على أخيها كريم بأعلي صوتها وعلى الفور حضر کریم وقال بلهفة :
- أيوه بعد إذنك إنت فين دلوقتي وأنا هجيلك حــالا
إبتسم براحة وقال :
- أنا في شارع عبد العزيز شكري بس ممكن تقولي مواصفات موبايلك الأول ؟
قال بسرعة البرق :
- كويس جدااا ده جنبي وموبايلي ...
إنتهي من شرح مواصفات هاتفه وكانت تطابق تماماً الهاتف الذي وجده فوزي فإبتسم إسلام قائلا :
- طيب تعالى بسرعة بقى قدام الشركة اللي في أول الشارع هتلاقينا واقفين ، بس بسرعة هاه علشان ميعاد الشغل هيبدأ يأما تستنى لبعد العصر بقى
- لالالالالالا جاي حــالا
هبط کريم من منزله وأخذ يهرول باتجاه شارع عبد العزيز وهو مابين الخوف والأمل ،
وصل أمام الشركه فوجد إسلام يبتسم له ويقول :

- إنت كريم ؟
أومأ برأسه إيجابا وقال :
- أيوه
صافحه إسلام وقال مازحا :
- ده إنت طلعت صغير اوووي ، شوف أهو أنا بطولي ده كله ومش معايا نص العده دي ، يلا ياعم على العموم ألف مبروك رجوعها وإبقى خد بالك منها بعد كده ، وماشاء الله يعني لا تقول بحسد ولا حاجة
إمسك كريم هاتفه وكأنه يحتضنه وقال بسعادة :
- شكرا أوووي يا شيخ ، أنا كنت ممكن أموت لو الموبايل ده ضاع مني
إبتسم إسلام بتلقائية بينما قال فوزي متعجباً :
- للدرجادي يعني ؟!!
أومأ برأسه إيجاباً وقال :
- أنا بقالي سنين نفسي في موبايل جديد ومكانش في إمكانية إني أجيب يعني علشان الظروف وكده وكمان لما عييت وعملت العملية بابا صرف كل اللي معاه عليا بس الحمد لله بقي ربنا رزقني بواحد من قرايبي اللي في السعودية ولما عرف إني عملت العملية بعتهولي وكنت هطير من الفرحه ساعتها لدرجة إني قولت وقتها يا ريتني كنت عملت العملية من زمان ، عموماً شكراً اوووي بجد ربنا يجازيكم خير وادعو لأخوكم بقى ثانوية عامة ومزنوق
إبتسم إسلام وقال بلهفة :
- عملية إيه خير ؟ وكمان شكلك صغير اووي على الثانوية العامة
تنهد برضا وقال :
- مش مهم بقى ، يلا الحمد لله على كل شيء ، ربنا يجازيكم خير يارب ويجعل فرحتي في ميزان حسناتكم ، بعد إذنكم هروح بقى علشان عندي درس ۱۰ الصبح
صافحه كل من إسلام وفوزي وغادر كريم بينما ظل كل منهما ينظر للآخر وقال إسلام براحة :
- إنت حاسس باللي أنا حاسس بيه ؟ شوفت فرحته كانت عاملة إزاي ؟ ولا تخيلت لو كان ضاع منه فعلا بعد صبر السنين دي كلها كان ممكن يحصله إيه ؟ بجد الحمد لله إننا رجعناه في وقته
نظر فوزي الإسلام بحب وقال :
- شكرا يا إسلام على كل حاجة ، حقيقي فرحت من اللي حصل ده ، الحمد لله على كل شيء
ثم أخذ بيده وصعدا للشركة مرة أخرى ..
————————————————-
إنتهي إسلام من عمله وأثناء عودته إلى منزله إتصلت به سلمى فأجاب علي الفور :
- السلام عليكم
قالت بتعب :
- وعليكم السلام ، إلحقنـــــي بسرعة يا إســــلام همــــوت ومش قادرة يــا إســــلام إلحقنــــــــي اااااااه
قال بلهفة :
- إيـــه يا سلمى بتولدي ولا إيه ؟
صرخت قائلة :
- هموت يا إسلام مش قادرة إلحقني بســــرعة ، لا عارفة أقف ولا أقعد ولا انام ولا أعمل أي حاجة ، بسرعة يا إسلام الله يخليك إعمل أي حاجــــة شکلي هولد دلوقتي فعــــلاً
شعر بالخوف وقال أثناء عبوره للطريق :
- خـــلاص أنا على اول الشارع أهو وجاي حالاً معلش إستحمـ...
يــــــا أستاذ حاســـب
يــــــا أستاذ خد بالك العربيــــــات
يـــــا أستاذ
حاســــب
حاســــــب
طــــــراخ ، بــــــوف !!
_______________________________