إنتهى الأسبوع المتفق عليه على خير وحضر إسلام ليعرف رأي هند في الأمر ، بدأ حديثه بطيبة وقال :
- هاه يا هند قولتي إيه في موضوع العريس ده ؟
نظرت له بتساؤل وقالت :
- إنت إيه رأيك فيه يا إسلام ؟
إعتدل في جلسته ونظر لها بجدية وقال :
- بصي بصراحة أنا شايف إنه محترم وكويس وكمان لما سألت عليه في شغله لقيت صحابه بيشكروا فيه ومفيش بس إلا واحد اللي قالي إبعد عنه أفضل ليك ولأختك .
رغم إن كلام الراجل ده قلقني لكن برضو لقيت إجماع على إن هو كويس والكل بيحبه فقلت يمكن ده بيكرهه أو عامل معاه مشكلة ولا حاجة ، كمان حتة إنه ملتزم فعلا دي لسة متأكدتش منها لكن اللي قدامي إنه لحد دلوقتي كويس .
ثم نظر لها وقال مؤكداً :
- علشان كده بقى قولت الإستخارة هي اللي هتحل الموضوع ، وبإذن الله برضو لو في نصيب هفضل وراه في الخطوبة وأحاول أكتشفه أكتر وأعرف طباعه ومستوى قربه من ربنا وكده
صمت قليلا ثم قال :
- بصي بصراحة أنا كنت حابب أجوزك لواحد أكون متأكد إنه ملتزم مليون في المية مظهر وجوهر ، لكن برضو إفتكرت إني مشيت خطواتي واحدة واحدة فقولت بلاش أظلمه جايز هو كمان زيي زمان
إبتسمت قليلا ثم قالت بحماس :
- خلاص أنا موافقة
نظر لها بحنان وقال :
- خلاص يعني أكيد ؟ صليتي إستخارة وفكرتي كويس ؟
أومأت برأسها إيجاباً وقالت :
- أيـــوه
ثم إنتبهت فجأة وقالت :
- لأ مصليتش إستخارة بس انا فكرت كويس وموافقة عليه يعني
نظر لها بلؤم وقال :
- إسبـــوع كامل ولسه مصليتيش إستخارة يا هند !! ليه كده يا بنتي
- منا فكرت كويس خلاص وموافقة اهو ، ولو صليت إستخارة كنت هوافق برضو
تنهد بحزن وقال :
- لأ طبعا ياهند ، عارفة لما تبقي بتصلي وإنتي بتقولي لربنا أنا معرفش مصلحتي فين وتوكلت عليك يـــارب لأنك الوحيد اللي عالم بالخير فين ، تبقي على يقين إن ربنا هيختارلك الصالح ، وتبقي مسلّمة أمرك لله ، ساعتها بس تكوني متطمنة لأن ربنا مش هيخذلك أبداً .
ثم نظر لها محذراً وقال :
- وطبعا ما تدخليش هواكي في الموضوع ، يعني مش تلاقي حاجات وحشة عماله تظهرلك في الطرف التاني أو الموضوع مش متيسر وتقومي إنتي برضو تبقي مُصرة تكملي علشان على مزاجك ، ساعتها بس يبقى إنتي اللي غلطانة .
أنت تقرأ
في الحلال
Non-Fictionالروايه بتتكلم عن حياتنا كلنا ، متهيألي مفيش شخص هيقرأها إلا لما يلاقي نفسه جواها ، كل واحد فيكم هيلاقي حد شبهه في الروايه ، هيلاقي مواقف هو فعلا بيعيشها ، هيلاقي الزقه اللي كان محتاجها من زمان علشان يبدأ حملة التغيير علي نفسه بإذن الله بإذن الله كل...
