وبعد ثلاثة أيام حضر إسلام من عمله وهو يحمل حقيبة كبيرة بداخلها شيء ما ، وضعها أمام سلمى وقال بحماس :
- إتفضلي يا ستي دول شوية كتب حلوين كده عن تربية الأطفال ، بإذن الله لو خلصناهم هنجيب غيرهم بس في القبض الجاي بقى إن شاء اللـــه
فتحت الحقيبة بحماس وأخذت تقلب فيها وهي تقول بسعادة :
- مـــاشي يا إسلام شكراً أوووووي ، هتقرأهم معايا بقى هاه
ضحك بإستفزاز وقال :
- إبقي إقرأيهم وبعدين إحكيلي بقى ماشي
ضربته على كتفه بخفة وقالت :
- إســـــلام هتقرأهم يعني هتقراهــــم ، أنا مش هربي لوحدي ياخويا
- خلاص يا ست متزوقيش كده ، نبقى نخصص كل يوم ساعة ولا إتنين كده ونتسلى فيهم بإذن الله
ثم نظر لها بحماس وقال :
- أنا قررت إني أربي ولادي أحسن تربية و بإذن الله عمري ما هسمح أبـــدا إنهم يكونوا زيي زمان ، إن شاء الله دول اللي هيكونوا السبب في دخولنا للجنة يا سلمى
تنهدت بسعادة وقال :
- يـــــارب يا إسلام ، وبكده هيكونوا دول أول مجموعة في مكتبتنا الصغنونة
___________________
- يعني أنا لو جيت أتقدمتلك هتصدقي فعلا إني مش بضحك عليكي ؟ هو ده اللي هيريحك يعني يا هند
كتبها خالد كمحاولة أخيرة منه للتعرف على هند قبل ذهابه لمنزلها كما يزعم ، زفرت بضيق وفكرت قليلاً ثم قررت أن ترد عليه لآخر مرة فكتبت :
- أيـــوه
إبتسم قائلاً :
- طيب هو أنا مش من حقي إني أعرف أنا رايح أتقدم لمين ؟ يعني أنا كل اللي أعرفه عنك إنك خريجة تربية إنجلش وإسمك هند وبس ، وإنتي عارفة عني كل حاجة ينفع كده بقى ؟
- الموضوع منتهي بالنسبالي يا أستاذ خالد ، دخلت من الباب هعرف إنك صادق وساعتها هتعرف عني كل حاجة ، قضيتها شات يبقى البلوك هو الحل
- بــلوك مين حرام عليكي ده أنا غلبان ، طيب بصي هتفق معاكي إتفاق حلو
- إتفضل
- انا هرجع من السفر يوم السبت الصبح إن شاء الله ، يوم السبت بالليل هتلاقي أخوكي بيقولك إني كلمته ماشي ؟
- ماشي
- علشان تعرفي غلاوتك عندي يا هند ، وإن خالد لما بيقول كلمة مش بيرجع فيها ، وهتشوفي بنفسك
أخذت تقرأ كلماته الاخيرة بسعادة وتحدث نفسها بكل ثقة :
- إنتي كده صح يا هند ، إتأكدتي إنه مش كداب وبرضو خليتي نفسك غالية قدامه ، والنهاردة من يوم السبت مش بعيد
أنت تقرأ
في الحلال
Non-Fictionالروايه بتتكلم عن حياتنا كلنا ، متهيألي مفيش شخص هيقرأها إلا لما يلاقي نفسه جواها ، كل واحد فيكم هيلاقي حد شبهه في الروايه ، هيلاقي مواقف هو فعلا بيعيشها ، هيلاقي الزقه اللي كان محتاجها من زمان علشان يبدأ حملة التغيير علي نفسه بإذن الله بإذن الله كل...
