مش متخيلة البيت من غير إسلام يا ماما
قالتها هند عندما عادت من فرح أخيها ونظرت لغرفته الفارغة لأول مرة .. تنهدت الأم بحزن وقالت :
- هي دي سنة الحياة يا بنتي .. دلوقتي ولا أبوكي موجود ولا إسلام .. وشوية كدة هتتجوزي إنتي كمان وأنا هفضل لوحدي .. الحمدلله
إحتضنتها هند بحب وقالت :
- أنا مش هسيبك أبـــداً يا ماما
ضحكت بحنان وقالت :
بس يا كدابة .. دلوقتي ياختي يجيلك واحد إبن حلال كده يخطفك إنتي كمان وأفضل أنا لوحدي بقى .. بس أنا عارفة إنكم هتكونوا معايا علطول ومش هتسيبوني لوحدي كتير لأني عارفة كويس أنا ربيت ولادي إزاي.
ضمتها هند أكثر وقالت :
- ربنا يخليكي لينـــا يا ماما
_________________
- صباح الخير يا عريس
قالتها هند عندما إتصلت بإسلام في الساعة العاشرة صباحاً لتبارك له على زواجه وتخبره بامر ما ..
فأجابها على الفور :
- صباح الخيـــر يا هنوود .. وحشتيني والله تصدقي !
ضحكت وهي تقول :
- أيـــوه ياعم ماهو الواحد يتجوز وينسى أخته كده مـــــاشي
إبتسم لسلمى الجالسة بجواره وقال :
- وهو في حد يبقى عنده أخت مجنونة زيك كده وينساها برضو
- يعني تبقى بقالك 3 أيام متجوز ومفكرتش تكلمني مرة وتقول مش ناسي .. روح يا كدااااب
أخذ يضحك بشدة وغمز لسلمى وهو يقول بمكر :
- وأنا مالي يا هنوود .. ده الموبايل هو اللي كان مقفول
تنهدت بسعادة وقالت :
- ماشي يا عم وانا مسمحاك .. في حاجة بقى كنت عاوزة أقولك عليها
أجابها بجدية :
- خيـــر
قالت على الفور :
- إحنا هنيجي نزوركم النهاردة .. خالتو وخالو وأولادهم مــاشي ؟
- ماشي تنوروا .. كمان إحنا متفقين إنكم هتيجوا تالت يوم يعني فأنا كده كده كنت عارف
- أنا قولت أقولك لحسن تكون ناسي .. وخالتو شكرية جاية معانا هاه .. فهم سلمى بقى
نظر لسلمى بإشفاق وقال :
- ماشي هقولها .. يلا طيري إنتي بقى
ضحكت قائلة :
- مــاشي ياعم العريس .. يلا سلام عليكم
-وعليكم السلام ورحمة الله وبركاته
أنت تقرأ
في الحلال
Non-Fictionالروايه بتتكلم عن حياتنا كلنا ، متهيألي مفيش شخص هيقرأها إلا لما يلاقي نفسه جواها ، كل واحد فيكم هيلاقي حد شبهه في الروايه ، هيلاقي مواقف هو فعلا بيعيشها ، هيلاقي الزقه اللي كان محتاجها من زمان علشان يبدأ حملة التغيير علي نفسه بإذن الله بإذن الله كل...
