ناضت صباح لبست قشها و فطرت بزربة باسكو رايحة تتلاقا معاه ليوم يخرجوا يحوسوا شوية.....
هبطت تجري في السكالي خرجت من الباطيمة لڨاتو ڨدامها متكي على طومابيلو و يستنى فيها. تبسم معاها راحت تجري ليه سلمت عليه و راحوا....
يسوڨ و يدنڨ ليها و هي ڨاعدة غير تتبسم ،حمد ربي على النعمة هاذي عرسهم مبقالوش بزاف وحد السمانتين برك وصلوا لوحد لبلاصة فيها الشجر و خضرا تهبل ❤❤❤
اوووه! هذه الصورة لا تتبع إرشادات المحتوى الخاصة بنا. لمتابعة النشر، يرجى إزالتها أو تحميل صورة أخرى.
حكملها يدها و ڨالها :"مكنتش نتصور في نهار تكوني ليا . دايمن كنت نشوف فيك و ساكت، تالمو نحبك بزاااف محبيتش نڨدم ليك في الحرام، محبيتش ندي نيميروا تاعك مالڨري كنت قادر نجيبوا ، كنت ديما نڨول إلا كانت من مكتوبي راح نديها نديها و إلا مكانتش من مكتوبي ربي يفرحها دنيا و آخرة ."
زيرت على يدو و دمعوا عينيها من هدرتوا ، ڨاتلوا كلمة وحدة خلاتو ڨريب يطير من الفرحة "نحبك".
باسلها يدها و حطوا يتغداو و هوما يشايخوا و يتهاوشوا و يضحكوا هو يعشقها و هي متقدرش تعيش بلا بيه .
ناضت سارة بعد ما كملت غداها و جبدت محمد من يدوا و راحت تجري و تجبد فيه و هو شابع ضحك عليها جراو حتان فشلوا حكم ركايبوا و ڨاعد يلهث و ڨالها:" مهبولة من صباح و نتي تجري فيا فشلتيني ."
ضحكت سارة و ڨاتلو :" لكان معجبتكش طلڨني." و تهبط على رڨبتها كف ثلاثية الأبعاد ڨالها:" تزيدي تعاودي هاذي الهدرة تشوفي، أنا سوفريت باش وصلت ليك و نتي تڨولي طلڨني بكل بساطة ."
طرطڨت سارة بضحك عليه و هو ڨاعد غير يشنف حتان راحت باستو من خدو باش رضى عليها . لاح يدو على كتافها و جبدها ليه و زير عليها طلع راسوا للسماء و ڨال:" الحمد لله " كون تخطيه يهبل يموت مستحيل يعيش بلا سارونة كيما يسميها هو .
نعرفكم بسارة و محمد مخطوبين و قاريين المعروف و عاقدين بقى لعرسهم سمانتين برك يموتوا على بعضاهم .....
سارة: طفلة عاقلة و متربية ماهيش ملتزمة مي تعرف حدودها مليح. و جامي حشمت باباها ولا ماماها. طبيبة عامة عندها 27 سنة، زينة شعرها أكحل و طوييل، عينيها خوضر، و مدايرة حجاب .
اوووه! هذه الصورة لا تتبع إرشادات المحتوى الخاصة بنا. لمتابعة النشر، يرجى إزالتها أو تحميل صورة أخرى.
محمد : جدارمي عندو 30 سنة طويل و شعرو بني ،و عينيه خوضر، عندو لحية خفيفة. عاقل بزااف و خاطيه المشاكل . يعاون الصغير و الكبير الناس كامل يحبوه، و والديه يفتاخرو بيه باسكو راجل تاع صح . يحب سارة ملي كان عندو 22 سنة كي رحلو لسطيف وين تسكن سارة، و العام لي فات كي كتب ربي و وجد روحو راح تقدم ليها و والديها قبلو . مام هي قبلت مع شافتو رتاحتلو و كان عندها الحق .
اوووه! هذه الصورة لا تتبع إرشادات المحتوى الخاصة بنا. لمتابعة النشر، يرجى إزالتها أو تحميل صورة أخرى.
